Tõmak ilo Manit ko Rejjab Bedbed ion Mol Eo Ej Tel ke Mour eo Am?
SUPERSTITION ak tõmak ilo manit ko rejjab bedbed ion katak ko remol jemaroñ loi ibelakin lal. Jet ien remaroñ kautieje einwõt mõttan men in jolet eo an ailiñ eo. Ak remaroñ watõki einwõt juõn men bajjek rej itoklimo kake—juõn men in kaitoktoklimo ñan mour. Ilo ailiñ in America im ailiñ ko rejjab mõttan communist ilo Europe, emakijkij air jab kaorõk superstition ko. Ilo jikin ko jet—ñan wanjoñok, ilo Africa—superstition ko emaroñ lap an jelet armij ro ie.
Enañin aolep manit ko mantin Africa rej bedbed ion superstition ak manit ko rejjab mol. Movie ko, program in radio ko, im jeje ko ilo Africa ekkã air kwalok bwebwenato ko kin superstition im men ko rekabwilõñlõñ, einwõt magic, kabuñ ñan ro nukid emwij air mij, im kajerbal kein anijnij ko. Etke manit ko rejjab mol rej kareel elõñ armij, im ia eo manit kein rejjab mol rej itok jen e?
Ta Unjen Superstition ko?
Elõñ superstition ak manit ko rejjab mol rej itok jen juõn mijak kin jitõbõn ro remij ak jabdewõt kain jitõb. Rej watõk men ko rej walok einwõt wãwen an jitõb rein kajeoñ in konono ibben armij ro remour ñan lelok juõn men in kabañbañ, juõn nan in kakkõl, ak juõn jerammõn.
Superstition ko rej ekkeijaklok ibben madmõd im uno in kamadmõde nañinmij. Ñan enañin aolep armij ro ilo ailiñ ko remweie, uno in kamadmõde nañinmij ebwe an lap wõnãn im ejeja air maroñ bõki wõt. Kin men in, elõñ rej bukõt wãwen kamadmõde nañinmij ak kajeoñ in bõpraek men kein ilo air lori manit ko an jimmair im jibwiir, anijnij, im superstition ko. Elaplok air mõnõnõ in bõk jibañ jen juõn ri anijnij eo ejelã kin manit ko air im konono ilo kajin eo air jen juõn doctor in hospital eo. Ilo wãwen kein tõmak ilo superstition ko ej wõnmanlok wõt.
Superstition ko rej lukkun oktak jen don iaolepen lal, im wõnmanlok eo air ej bedbed ion joñan inoñ ko an ailiñ ko, im men ko eirlok wõt. Ak men eo elap ibbeir aolep ej tõmak eo bwe rej aikwij kabuñburuen juõn jitõb, ak juõn men jejjab maroñ loe.
Anij ej jõjõik ad bõk jibañ jen mantin anijnij ko. (Duteronomi 18:10-12; 2 Dri Kiñ 21:6) Ej einwõt ad kamao ibben ri kijirãte eo, kobalok ibben ri jumae ro an Anij! Manit ko einwõt jedjed iju, kajitõk kin jibañ jen ri kabel eo, ak ikkure kin anijnij renaj kõtlok bwe jitõb ro renana ren tel kij ñe jej kõmman bebe ko rej jelet wãwen mour eo ad. Ejja einwõt ad kobalok ibbeir im jumae Anij.
Christian ro remol rej aikwij kõmman bwe manit ko remarok ikijen superstition ko ren bed etolok jen mour eo air im bõk meram ilo jitõb jen Ri Kõmanman eo, Jehovah, im Nejin, Jesus Christ. Ilo wãwen in renaj kalañliñ ir ilo air bõk ainemõn eo emol ilo lolãtãt jen jelãlokjen eo bwe men eo rej kõmmane rej remõn iman mejen Anij.—Jon 8:32.