“I Ar Likit Joñok Ñan Kom”

“Bwe ke, kin ien eo, emõn komin dri kaki.”​—DRI HIBRU 5:​12.

1. Etke nan ko ilo Dri Hibru 5:​12 remaroñ kõmman bwe juõn Christian en eñjake joñan men eo ej lemnak kake?

KE KWOJ konono nan in kakõrmol ko ilo eon in ilo unintel in ad, kwoj eñjake ke am inebata kin kwe make? Elañe eindein, kwoj jab make iam. Einwõt ri kalor ro an Christ, jejelã bwe jej aikwij in ri kaki. (Matu 28:19, 20) Jejelã bwe ilo ien kein jej mour ie ej kõmman an menin ekaiuriur bwe jen katakin ilo wejepedik joñan wõt ad maroñ. Im jejelã bwe katakin eo ad emaroñ kõmman juõn oktak in mour-ak-mij ñan ro jej katakin ir! (1 Timote 4:​16) Inem, eindein, bwe jemaroñ kajitõkin kij make: ‘Ña ij lukkun ri kaki eo Ij aikwij bwe in einwõt ke? Ewi wãwen aõ maroñ kõmanmanlok?’

2, 3. (a) Ewi wãwen juõn ri kaki ear kamelele kin bedbedin katakin eo emõn? (b) Ta joñok eo kin katakin Jesus ear likit ñan kij?

² Kain lemnak rot in ejjab aikwij kabwer kij. Elañe jej lemnak wõt kin katakin einwõt juõn men eo ej menin aikwij nan kilen katakin ko ewõr kabel ie, jemaroñ eñjake bwe enaj lap an bin ñan ad kõmman wõnmanlok ie. A bedbedin katakin eo emõn, ejjab kin kilen ak ej juõn men eo elaplok an lap tokjen. Lale ta eo juõn ri kaki eo ewõr an kabel ear jeje kake ilo juõn book kin unintel in: “Katakin eo emõn ejjab wawa ion kilen ko reinjuõn, ak style ko, karõk ko ak kõmman ko. . . . Katakin ej juõn wãwen kalikar yokwe.” Bwebõta, jelã eo an ear jab einwõt juõn juõn ri kaki in kabuñ. Bõtab, melele eo an emaroñ laplok an jerbal ñan katakin eo jej kõmmane einwõt Christian ro. Ewi wãwen?

³ Ri Joñok eo ad emõn kin juõn ri kaki ejelok bar juõn ijellokin Jesus Christ, eo ear jiroñ ri kalor ro an: “I ar likit joñok ñan kom.” (John 13:​15, NW) Ear jitõñlok ñan wanjoñok eo an ilo kwalok ettã buru, ak joñok eo Jesus ear likit ñan kij ekoba jerbal eo an elap an lap tokjen einwõt juõn armij ion lal​—eñeo kin katakin armij kin news eo emõn kin Ailiñ in Anij. (Luk 4:​43) Kiõ kin menin, elañe kwar aikwij kãlet juõn nan ñan kalikar jerbal in kwalok nan eo an Jesus, bõlen kwo naj kar kãlet nan in “yokwe,” kwo jamin kar ke? (Dri Kolosse 1:​15; 1 Jon 4:⁠8) Yokwe eo an Jesus ñan Jemen, Jehovah ilañ ear kanuij lap. (Jon 14:31) Ak, einwõt juõn ri kaki, Jesus ear kalikar yokwe ilo bar ruo wãwen ko. Ear yokwe mol ko ear katakin kaki, im ear yokwe armij ro ear katakin ir. Jen kalimjek wãwen joñok kein ruo ear likit ñan kij.

Juõn Yokwe eo Etto an Jutak Kin Mol ko An Anij

4. Ewi wãwen an kar Jesus ejaake juõn yokwe kin katakin ko an Jehovah?

⁴ Wãwen eo juõn ri kaki ej kõmmane ñan unintel in konono eo an ej juõn wãwen ej jelet kadkadin katakin eo an. Jabdewõt wãwen eo ejelok an itoklimo ie enaj walok im jededlok ñan ri katak ro an. Jesus ear jab ejelok an itoklimo ilo mol ko raorõk ear katakin kaki kin Jehovah im Ailiñ eo An. Yokwe eo an Jesus ñan unintel in ear kanuij mũlal. Ear ejaake yokwe in einwõt juõn ri school. Ilo aolepen ebeben ko raetok in bed eo an mokta jen mour in armij eo an, Nejin eo ej make wõt kar keotak kar juõn ri katak eo ewõr an itoklimo. Aiseia 50:​4, 5 ej kwalok nan kein rejejjet: “Jeova e ar letok ñõn iõ loin ro emwij katakin ir, bwe in jela ekijkan in jibõñ eo e mõk kin nan ko: Ej kworuj jibõñ otemjej, Ej kworuj lojilñiõ bwe en roñ einwõt ro emwij katakin ir. Iroij Jeova e ar kabellok lojilñiõ im I ar jab bõt, im jab oktõkliklok.”

5, 6. (a) Ta men eo ealikar Jesus ear ione ilo baptais eo an, im kin ta eo ear jelet e? (b) Ta oktak eo jej loe ikõtan Jesus im Satan ikijen kajerbal Nan in Anij?

⁵ Ke ear rittolok einwõt juõn armij ion lal, Jesus ear etal wõt im yokwe meletlet eo ekwojarjar. (Luk 2:​52) Inem, ilo ien baptais eo an, ear walok juõn men eo ejejuan. “Lõñ emjallok,” Luk 3:​21 ej ba. Alikar, Jesus ilo ien eo ear maroñ kememej bed eo an mokta jen mour in armij eo an. Elikinlok ear jolok 40 ran im jitlok ilo ene jemaden eo. Emaroñ kar lo an lap an itoklimoen ilo an kalmenlokjen kin elõñ ien ko ilañ ear bõk katak jen Jehovah. A ejjabto, yokwe eo an kin mol ko ear bed ilo melejoñ.

⁶ Ke Jesus ear mõk im kwõle, Satan ear bukõt kilen an kabo e. Juõn oktak eo jej lo ikõtan lõmarein ruo nejin Anij! Erro jimor rej eliji ir jen Jeje ko ilo Hebrew​—ak kin juõn kõmman eo einjuõn ilo jitõb. Satan ear iñite Nan eo an Anij, im ilo jab kautiej kajerbale ñan jemlok ko an make rekibbon. Emol, ri jumae in ear dike mol ko an Anij. Ilo wãwen eo juõn, Jesus ear eliji Jeje ko kin yokwe eo ealikar, kejbãrok an kajerbal Nan in Anij ilo kajjojo uak. Jesus ear bed im mour mokta lok wõt jen air kar jino je nan in kakõrmol kein, ak ear debij wõt an kautiej nan kein. Rar mol ko raorõk jen Jemen ilañ! Ear jiroñlok Satan bwe nan rot kein jen Jehovah ear laplok aorõkiir jen mõñã. (Matu 4:​1-​11) Aet, Jesus ear yokwe mol ko otemjej Jehovah ear katakin e. A ewi wãwen an kar kwalok yokwe in einwõt juõn ri kaki?

Ear Katakin ñan Yokwe Mol ko

7. Etke Jesus ear jenlik jen an kine kilen katak ko an make?

⁷ Yokwe eo an Jesus kin mol ko ear katakin kaki ear alikar ien otemjej. Eokwe, ke emaroñ kar bidodo an ejaake lemnak ko an make. Ear wõr ibben juõn jelãlokjen im meletlet eo elap. (Dri Kolosse 2:3) Mekarta, ear kakememej im bar kakememej ri roñjake ro an bwe jabdewõt men eo ear katakin kake, ear jab ijjino ibben make, ak ibben Jemen ilañ. (Jon 7:​16; 8:​28; 12:49; 14:10) Kin an kar lap an yokwe mol ko unjeir rar jebar jen ibben Anij ejamin kar bõk jikiir kin lemnak eo an make.

8. Ilo jinoin jerbal in kwalok nan eo an, ewi wãwen an Jesus kar likit juõn joñok eo ej wawa ion Nan in Anij?

⁸ Ke Jesus ear jino jerbal in kwalok nan eo an ilobwilij, ear mõkaj im likit juõn joñok. Lemnak kin wãwen eo ear jino keañ kake ñan armij ro an Anij bwe e eo ej Messiah eo kar kallimur kake. Ear baj jede wõt iman jarlepju in armij ro, keañ kin e make Christ, inem kõmman menin bwilõñ ko ñan kamol melele eo an ke? Jab. Ear ilok ñan juõn imõn kwelok eo, ijo armij ro an Anij einwõt manit rej konono jen Jeje ko. Ijo ej konono ilo elaj kanan eo ilo Aiseia 61:​1, 2 im ear kamelele bwe mol in kanan kein rar jitõñlok ñan e. (Luk 4:​16-​22) Menin bwilõñ ko relõñ ear kõmmani rar jibañ ñan kalikar an Jehovah rejetake. Meñe eindein, ien otemjej ear atartar ion Nan in Anij ilo an katakin.

9. Ilo kamadmõd ko an ibben Pharisee ro, ewi wãwen an kar Jesus kwalok yokwe eo an etiljek kin Nan in Anij?

⁹ Ke ri jumae ro an kabuñ rar aitwerõke Jesus, ear jab aitwerõke ir, meñe emaroñ kar bidodo an win jen ir ilo juõn aitwerõk eo einwõt in. Jen an eindein, ear kõtlok bwe Nan in Anij en kalikar air riap. Ñan wanjoñok, kememej, ke Pharisee ro rar naruõn ri kalor ro an Jesus kin rupe kien Sabbath kin air kar lotlot jejjo corn ilo juõn melaj in jikin kallip corn im mõñã ke rej kijone. Jesus ear uak: “Kom ar jab konono ilo buk ke, men eo Devid e ar kõmõn ke e ar kwuli, im ro iben?” (Matu 12:​1-5) Bwebõta, maan rein rar make kowãnik ir remaroñ kar konono bwebwenato in kakõrmol in emwij je ilo 1 Samuel 21:​1-6. Elañe eindein, rar likjap in melele juõn katak eo elap tokjen ej bed ie. Bõtab, Jesus ear kõmman elaplok jen an baj konono wõt bwebwenato eo. Ear kalmenlokjen kake melelen im bõk kien ko ear maroñ katak jeni. Ear yokwe kien ko Jehovah ear katakin ikijen mõttan ennan eo jen Jeje ko. Ilo ien eo ear kajerbal bwebwenato eo, im bareinwõt juõn wanjoñok jen Kien eo ikijen Moses, ñan kalikar kõmmanwa eo ilo Kien eo. Ilo wãwen in lok wõt, ekkeijaklok eo etiljek an Jesus ñan Nan in Anij ear kamakit e ñan an jojomare Nan in Anij nae jibadbad ko an ri tel ro an kabuñ ñan ikir kiren melelen Nan in Anij ñan tokjen eo ñan ir make ak noje iumin juõn lakabwokbwok in manit ko an armij.

10. Ewi wãwen an kar Jesus kajejjet kitien kanan ko kin aorõkin wãwen an katakin?

¹⁰ Yokwe eo an Jesus kin mol eo ear katakin kake ear jab kõtlok bwe en baj katakin wõt kin an kememej ak ejelok lemnak kin melelen, ilo juõn wãwen eo ejelimo ak jabwe ilo kadkad ko kadkadin armij. Kanan in kakõrmol ko rar kwalok bwe Messiah eo enaj kar konono ‘joij ilo tien,’ im kajerbal “nan ko remõn.” (Sam 45:2; Jenesis 49:21) Jesus ear kajejjet kitien kanan ko ilo an kejbãrok ennan eo an bwe en kaitoklimo im kemourur, kajerbal “nan in joij” ke ear katakin kin mol ko elap an kar yokwi. (Luk 4:​22) Ejelok bere itoklimo eo an ear lujur kamelele ko an, im mejen rar romak kin itoklimo eo emour ilo unintel in konono eo an. Ej aikwij kar menin kamõnõnõ ñan ri roñjake ro an, im juõn joñok emõn ñan kij ñan ad anõke ñe jej konono ñan ro jet kin men eo jaad katak!

11. Etke maroñ ko an Jesus einwõt juõn ri kaki rar jab kõmman menin an oktak im kemjãje kin utiej buru?

¹¹ Jelã eo elap an Jesus kin mol ko rekwojarjar im wãwen eo ej lo tõbrak ie kin nan ko an rekareelel menin ear kõmman ke bwe en oktak im utiej buruen? Menin ekkã an walok ilo wãwen eo ibben armij ro rej ri kaki. Bõtab, kememej, bwe Jesus ear meletlet ilo juõn wãwen eo ear kalikar an mijak Anij. Meletlet rot in ejjab kõtlok ñan an wõr lomaan, kinke “meletlet ej ber iben ro retã.” (Jabõn Kennan Ko 11:2) Ear bar wõr juõn men eo ear kejbãrok Jesus jen an oktak im utiej buru ak lomaan.

Jesus Ear Yokwe Armij ro Ear Katakin Ir

12. Ewi wãwen an kar Jesus kwalok bwe ear jab kõnan bwe ri kalor ro an ren mijak e?

¹² Yokwe eo emũlal an Jesus ñan armij ro ear alikar ien otemjej ilo an katakin. Katak eo an ear jab kõmman menin an armij ro eñjake air ettã ak lelñoñ, ejjab einwõt wãwen katakin eo an armij ro eutiej burueir. (Ekklisiastis 8:⁠9) Elikin an lo juõn ian menin bwilõñ ko an Jesus, Peter ear lokjenan kin an bwilõñ, im ear buñbadikdik ilo bukwien Jesus. Ak Jesus ear jab kõnan bwe ri kalor ro an en bwok air lemnak kin air mijak e. Ear ba ñan ir ilo joij, “Kwon jab mijõk” inem ear jiroñlok Peter kin jerbal eo ekairujruj kin kõmman ri kalor eo me Peter enaj kar bõk kunan ie. (Luk 5:​8-​10) Jesus ear kõnan bwe ri kalor ro an ren emmakit kin yokwe eo air make ñan mol ko reaorõk kin Anij, im jab kin air mijak ri kaki eo air.

13, 14. Ilo wãwen et ko Jesus ear kalikar lemnak in eñjake eo an kin armij?

¹³ Yokwe eo an Jesus ñan armij ro ear katakin ir ear bareinwõt menin kamol ilo eñjake in lemnak eo an kin ir. “A ke Ej lo jar ko, Ej tiriamokake ir, bwe rej barõk, im jibliklik einwõt s̃ip ko ejelok air s̃eperd.” (Matu 9:​36) Ear buromõj kake ir ilo wãwen eo enana rar bed ie im ear emmakit ñan jibañ ir.

¹⁴ Lale eñjake in lemnak eo an Jesus ilo bar juõn ien. Ke juõn kõrã ej toor bõtõktõk ibben ear kebake e ilo juõn jar in armij ro im uñur tõrerein nuknuk eo an, kõrã eo ear kemour ilo kabwilõñlõñ. Jesus ear eñjake kajur eo ear ilok jen e, ak ear jab lo wõn eo ear mour jen nañinmij eo an. Ear akwelap bwe en lo kõrã eo. Etke? Ejjab ñan notaiki kõrã eo kin an rupe Kien eo ak rule ko an scribe im Pharisee ro, einwõt ke kõrã eo emaroñ kar lelñoñ. Jen an eindein, ear ba ñan kõrã eo: “Nejiõ, am tõmak e ar kemour yuk; Kwon ilok im ainemõn, im mour jen am nañinmij.” (Mark 5:​25-​34) Lale eñjake in lemnak eo ilo nan kein. Ear jab baj ba wõt im ba, “Kwon mour.” Ak, ear ba: “Kwon ilok im ainemõn im mour jen am nañinmij.” Ijin Mark ej kajerbal juõn nan eo emaroñ melelen “eñtan,” juõn deñdeñ ekkã kajerbale ñan kaeñtan. Kin menin, Jesus ear kamol bwe nañinmij eo an kõrã eo ear kõmman an eñtan, bõlen metak eo elap ilo enbwin im eñjake. Ear eñjake an buromõj kin kõrã eo.

15, 16. Ta men ko rar walok ilo jerbal in kwalok nan eo an Jesus rej kalikar bwe ear bukõt emõn eo ilo armij?

¹⁵ Jesus ear bareinwõt kwalok an yokwe armij ilo an lale kadkad ko remõn ilo ir. Lemnak kin men eo ear walok ke ear ion Nathanael, eo tokelik ear oktak im juõn ri jilek. “Jesus ej lo Natanael itok ñõn iben, im E ba ñõn E: ‘Lo, dri Israel emol, ejelok mon iben.’” Ilo kabwilõñlõñ, Jesus ear lo kadkad ko ituloa kadkadin Nathanael, im ear lap an katak kake e. Bwebõta, Nathanael ear jab wãppen. Ear wõr likjap ko an, einwõt kij aolep. Ilo mol, ke ear roñ kin Jesus, ear kwalok juõn an ennan: “Jabrewõt men eo emõn ej itok jen Nazeret ke?” (Jon 1:​45-​51) Bõtab, ian men ko otemjej rar maroñ ba kin Nathanael, Jesus ear kãlet juõn men eo ear menin nebar ñan kalimjeke, mol eo an armij in.

¹⁶ Ilo wãwen in lok wõt, ke juõn officer ri tarinae​—bõlen juõn Ri Gentile, juõn Ri Rom​—ear kebak Jesus im kajitõk ñan an kemour juõn nañinmij in kamakoko, Jesus ear jelã bwe ri tarinae eo ear wõr an likjap. Juõn officer ri tarinae ilo ran ko bõlen wãwen mour eo an ear obrak kin elõñ kõmman ko kin kõtõrãik kien, katorlok bõtõktõk, im kabuñ wan. Ak, Jesus ear kalimjek wõt men ko remõn​—tõmak eo emõn an leo. (Matu 8:​5-​13) Tokelik, ke Jesus ear konono ñan ri nana eo rar totoike iturin ilo alal in kaeñtan eo, Jesus ear jab lelok kauwe ñan leo kin an kõtõrãik kien ilo ien ko remotlok ak ear kõketak e kin juõn kejatdikdik ñan ran ko rej itok. (Luk 23:43) Jesus ear emõn an jelã bwe elañe ear notaiki armij ro men in emaroñ kabwer ir. Ejelok bere jibadbad ko an ñan an lo emõn ibben ro jet menin ear kõketak elõñ ñan air kõmanmanlok kõmman ko air.

Mõnõnõ in Karejar ñan Armij

17, 18. Ilo an bõk jerbal eo kar kabbeik e kake ñan an itok ñan lal, ewi wãwen an Jesus kar kwalok juõn mõnõnõ in karejar ñan ro jet?

¹⁷ Bar juõn menin kamol ekajur kin yokwe eo an Jesus ñan armij ro ear katakin ir kar mõnõnõ eo an in karejar ñan ir. Ilo mour eo an mokta jen an kar bõk mour in armij, Nejin Anij ien otemjej ear yokwe armij. (Jabõn Kennan Ko 8:​30, 31) Einwõt “Nan” eo an Jehovah ak ri konono eo an, emaroñ kar lañliñ kin elõñ jerbal ko ekin jerbali ibben armij. (Jon 1:⁠1) Bõtab, mõttan un eo unin an kar itok ñan lal ej bwe en laplok an kajju ilo an katakin armij, im “E ar mõke kejeramel E, im bõk wãwen korijer,” im ilok jen ijo jikin eutiej ilañ. (Dri Pilippai 2:⁠7; 2 Dri Korint 8:9) Ke ear bed ion lal, Jesus ear jab kõtmene ñan air jerbal ñane. Jen an eindein, ear ba: “Nejin armij e ar jab itok bwe armij ren jerbal ñõn E, a bwe En jerbal ñõn ir, im lelok An mour bwe En binmour ñõn ro relõñ.” (Matu 20:28) Jesus ear mour ilo an kajejjet kitien nan kein.

¹⁸ Jesus ilo ettã ear jerbal ñan kabwe aikwij ko an ro ear katakin ir, bojak ilo an jab aibedbed in kalaplok ijo kunan make ilo tokjen eo ñan ir. Ear etal lal ilujen Enen Kallimur eo, etetal buki mile ko ilo an itoitak im kwalok nan ilo juõn jibadbad ñan tõbar elõñ armij joñan wõt an maroñ. Ilo an jab einwõt Pharisee ro im scribe ro reutiej buru, ear bed wõt ilo ettã im bidodo kebake e. Aolep wãwen armij​—ri utiej ro, ri tarinae ro, ri jojomar ro, kõrã ro, ajiri ro, jeramel, nañinmij, bareinwõt armij ro jukjuk im bed eo ej kajekdon ir⁠—rar itoklimo in kebak e, ilo air jab mijak. Meñe ear wãppen, Jesus kar armij, im ear tellokin mõk im kole. Bõtab, meñe ear mõk ak kar aikwij in kakije ak ien ikõñ ñan jar, ear likit aikwij ko an ro jet mokta jen ko an make.​—Mark 1:​35-​39.

19. Ewi wãwen an kar Jesus likit juõn joñok in jerbal ilo ettã, meanwõd, im joij ibben ri kalor ro an?

¹⁹ Kar eindein Jesus ear mõnõnõ in karejar ñan ri kalor ro an make. Ear kõmman eindein ilo an katakin ir ilo joij im meanwõd. Ke ear rumij air melele kin katak ko elap tokjeir, ear jab ebwer, oktak im illu, ak lu ir. Ear etal wõt im lo wãwen ko rekãl ñan jibañ ir melele. Ñan wanjoñok, baj lemnak kin emakijkij in an kin ri kalor ro iakwelel kin wõn eo elaptata ibwiljiir. Rej akwel im bar akwel mae joten eo mokta jen air mõne, Jesus ear lo wãwen ko rekãl ñan katakin ir ñan air jerbal ilo etta ibben don. Ilo wãwen in kin ettã, einwõt ilo aolep men ko jet, ear jimwe an Jesus ba: “I ar likit joñok ñan kom.”​—John 13:​5-​15, NW; Matu 20:25; Mark 9:​34-​37.

20. Ta kilen katakin eo ear kajenolok Jesus jen Pharisee ro, im etke kilen eo ear bolemen?

²⁰ Lale bwe Jesus ear jab baj jiroñ wõt ri kalor ro ta kar joñok eo; ear “likit joñok” eo. Ear katakin ir ikijen wanjoñok. Ear jab konono lallok ñan ir jen juõn jikin eutiej, im einwõt ñe ear watõk e make ilañ im jerbali men ko ear jiroñ ir bwe ren kõmmani. Eñin kar wãwen eo an Pharisee ro. “Bwe rej ba im jab kõmõnmõn,” Jesus ear ba kin ir. (Matu 23:⁠3) Jesus ilo ettã ear kwalok ñan ri katak ro an ta eo ej lukkun melelen katak ko an ilo an mour kaki, im jerbali. Inem ke ear rejañ ri kalor ro an ñan air tel ilo juõn mour elamwan im ejjab abañ kin mweiuk, rar jab aikwij in kajidede kin ta kar melele eo an. Rar maroñ lo mol in nan ko an: “Kiru jãkol eor roñ air, im bao in mejatoto eor ilir; a Nejin armij ejelok jikin An kababu bõran.” (Matu 8:​20) Jesus ear karejar ñan ri kalor ro an ilo ettã im likit joñok eo ñan ir.

21. Ta eo naj etale ilo katakin tok juõn?

²¹ Alikar, bwe Jesus kar Ri Kaki eo elaptata ear mour! Yokwe eo an kin men eo ear katakin kake im yokwe eo an ñan armij ro ear katakin ir kar menin kamol ñan ro otemjej emol burueir ro rar lo im roñjake e. Ejja einwõt menin kamol eo ñan kij rainin ro rej katak joñok eo ear likiti. Ak ewi wãwen, ad maroñ anõk joñok eo ewãppen an Christ? Katak in tok juõn enaj konono kake kajitõk in.

Ewi Wãwen Am Naj Kar Uak?

• Ta eo ej bedbedin katakin eo emõn, einwõt an kar wõn eo kalikare?

• Ilo wãwen et ko Jesus ear kalikar yokwe kin mol ko ear katakin kaki?

• Ewi wãwen an kar Jesus kwalok yokwe ñan armij ro ear katakin ir?

• Ta wanjoñok ko rej kwalok mõnõnõ eo an Jesus in kõttã ñan an karejar ñan ro ear katakin ir?

[Pija eo ilo peij 8]

Ewi wãwen an kar Jesus kwalok bwe ear yokwe kien ko ear loi ilo Nan in Anij?