Jesus Christ—Missionary Eo Elaptata
“A Ña I jela E; bwe Ña jen E, im E ar jilkintok Iõ.”—JON 7:29.
1, 2. Wõn eo jemaroñ naetan Missionary eo elaptata?
TA EO ej jiktok ilo lemnak eo am ñe kwoj roñ nan in “missionary”? Jet rej lemnak kin missionary ro an kabuñ ko rej ba rej Christian, me elõñ iair rej bõk kunair ilo makitkit ko an kien im business ko an ailiñ ko rej jerbal ie. Bõtab, einwõt juõn ian Ri Kennan ro an Jehovah, bõlen ekkã am lemnak kin missionary ro me Governing Body eo ej jilkinlok ir ñan kwalok kin news eo emõn ilo elõñ ailiñ ko ibelakin lal in. (Mat. 24:14) Ilo jab kibbon missionary rein rej kajerbal ien im kajur ko air ñan jibañ armij ro ñan air ruaklok ñan Jehovah Anij im ñan air lañliñ kin juõn kõtan emõn ibben.—Jem. 4:8.
2 Jehovah ej Ri Evanjel eo elaptata, ak jejjab maroñ naetan Missionary eo elaptata, kinke kar ejelok ear jilkinlok e. Ak, ikijen Jemen ilañ, Jesus Christ ear ba: “Bwe Ña jen E, im E ar jilkintok Iõ.” (Jon 7:29) Ñan kwalok yokwe eo an elap ñan armij ro ilo lal in, Jehovah ear jilkintok Nejin ej make wõt ear keotak ñan lal. (Jon 3:16) Jemaroñ naetan Jesus Missionary eo elaptata, kinke juõn ian un ko unin kar jilkintok e ñan lal in kar ñan an “kennan kin mol” eo. (Jon 18:37) Ear lo tõbrak in keañ kin news eo emõn kin Ailiñ eo, im tokjen ko kin jerbal eo an rej wõnmanlok im bellok wõt ñan kij. Ñan wanjoñok, ilo jerbal in kwalok nan eo ad jemaroñ jerbale wãwen kilen an kar katakin armij ro, meñe jej jerbal einwõt missionary ro ak jab.
3. Ta kajitõk ko jenaj etali?
3 Jerbal eo an Jesus einwõt juõn ri keañ kin Ailiñ eo ej bõkmantak kajitõk kein: Ta eo Jesus ear iione ion lal? Etke ear keie wãwen an kar katakin? Im ta eo ear kõmman bwe jerbal in kwalok nan eo an en wõr tõbrak ie?
Juõn Jitõbõn Mõnõnõ Ibwiljin Wãwen ko Rekãl
4-6. Ke ear jilkintok Jesus ñan lal, ta kar jet ian oktak ko ear jelmaiki?
4 Missionary ro ilo ran kein im jet Ri Christian ro me rej emmakit ñan jikin ko elap aikwij ie kin ri kwalok ro kin Ailiñ eo, remaroñ aikwij katak ñan bed ilo juõn wãwen mour enanalok jen wãwen eo rej iminene kake. Ak jejjab maroñ keidi joñan oktak ko ikõtan wãwen bed eo an Jesus ke ear bed ion lal im bed eo an ilañ, ijo ear jokwe ibben Jemen ibwiljin enjel ro me rar karejar ñan Jehovah kin un ko remõn. (Job 38:7) Elap an kar oktak ñan an bed ibwiljin armij ro rejerawiwi ilo juõn lal elukkun nana! (Mark 7:20-23) Jesus ear aikwij bar kijenmij kin junmad eo ekar bed ibwiljin ri kalor ro an rebaktata. (Luk 20:46; 22:24) Emol, ear emmakit ilo juõn wãwen elukkun emõn ñan jabdewõt men ear iione ion lal.
5 Jesus ear jab jino an konono bar juõn kajin ilo juõn wãwen ekabwilõñlõñ; ear katak kake ke ear juõn niñniñ. Elap an kar oktak jen ke ear tel enjel ro ilañ! Ke ear bed ion lal, bõlen Jesus ear kajerbal juõn wõt kajin ak “lo ko an armij.” Ear lukkun oktak jen ‘lo ko an enjel’ ro. (1 Kor. 13:1) Bõtab, ikijen kajerbal nan ko remõn im joij, ejelok bar juõn armij ear maroñ konono einwõt Jesus.—Luk 4:22.
6 Lemnak kin wãwen ko jet ear lap an oktak ibben Nejin Anij ke ear itok ñan lal. Meñe Jesus ear jab jolet jerawiwi jen Adam, Ear erom juõn armij, einwõt kar ro tokelik me rar erom “ro jatin” ak ri kabit ri kalor ro an. (Read Dri Hibru 2:17, 18.) Ilo boñin eo eliktata in an mour ion lal, Jesus ear jab kajitõk ibben Jemen ilañ ñan jilkintok “joñoul im ruo lijion enjel” ro. Ak baj lemnak mõk kin aolep enjel ro me ear iroij ioir ke ear Michael Archangel eo. (Mat. 26:53; Jud 9) Aet, Jesus ear kõmman menin bwilõñ ko; ak, men eo ear kõmmane ion lal ear dik ñe keidi ibben joñan eo ear maroñ kõmmane ilañ.
7. Ewi wãwen an kar Ri Jew ro emmakit ikijen air bokake Kien eo?
7 Ke Jesus ear jerbal einwõt “Nan eo” ilo ien mour eo an mokta jen an kar itok ñan lal, bõlen ekar Ri Konono eo an Anij me ear tel Ri Israel ro ilujen ene jemaden eo. (Jon 1:1; Ex. 23:20-23) Bõtab, rar “bõk kien eo einwõt enjel r’ar likit e, im [rar] jab kejbãrok e.” (Jerb. 7:53; Hib. 2:2, 3) Ilo mol, ri tel ro an kabuñ eo an Ri Jew ro ilo ebeben eo kein kajuõn rar likjap in kile melele eo elap kin Kien eo. Ñan wanjoñok, lemnak kin kien eo kin Sabbath. (Read Mark 3:4-6.) Scribe im Pharisee ro rar “jolok men ko relap an kien, ekajet im tiriamo, im tõmak.” (Mat. 23:23) Mekarta, Jesus ear jab lemnak bwe ejelok tokjen ñan jibañ ir inem bõjrak jen an kwalok nan kin mol eo.
8. Etke Jesus emaroñ jibañ kij?
8 Ear wõr juõn jitõb in mõnõnõ ibben Jesus. Yokwe eo an kin armij ear kamakit e ñan an kõnan jibañ ir. Ear jab jako jitõb in evanjel ibben. Kin an kar tiljek ñan Jehovah ke ear bed ion lal, Jesus ear erom “Dri Lomor in drio ñõn ro otemjej rej bokake E.” Bareinwõt, “kin An iñtan ke ar kabo E, ej maroñ in jibõñ ro kabo ir [einwõt kij].”—Hib. 2:18; 5:8, 9.
Juõn Ri Kaki Ekar Emõn Katakin E
9, 10. Mokta jen an kar jilkintok Jesus ñan lal, kain katak im kaminene rot ko ear bõki?
9 Mokta jen air jilkinlok Ri Christian ro ñan air jerbal einwõt missionary ro, Governing Body eo ej karõk bwe rein ren bõk katak im kaminene. Jesus Christ ear ke bõk katak im kaminene? Aet, ak ear jab bed ilo school ko an ri kaki (rabbi) mokta jen an kar ekabit einwõt Messiah eo; im ear jab katak ibben jabdewõt ri tel ro rebuñbuñ an kabuñ. (Jon 7:15; keidi Jerb. 22:3) Inem, etke Jesus ear wõr an maroñ ñan katakin armij?
10 Jekdon ta eo Jesus ear katak jen jinen im jemen, Mary im Joseph, ear bõk katak im kaminene eo elaptata kin jerbal in kwalok nan eo an jen Jehovah, eo elaptata an maroñ katakin e. Ikijen men in, Jesus ear ba: “Bwe I ar jab mõke konono jen Iõ; a Jema eo e ar jilkintok Iõ, E ar letok ñõn Iõ kien, men eo In ba im men eo In konono kake.” (Jon 12:49) Lale bwe kar lelok nan in jiroñ ko rejejjet ñan Nejin kin ta eo en katakin kake. Mokta jen an kar itok ñan lal, ejelok bere bwe emaroñ kar to an Jesus bõk katak jen Jemen. Ejelok katak im kaminene emõnlok ear maroñ bõki.
11. Ñan joñan et eo Jesus ear kwalok lemnak eo an Jemen kin armij ro?
11 Jen ien eo kar kõmanman e, kõtan eo an ibben Jemen ear lukkun ebak. Mokta jen an kar itok ñan lal, Jesus ear maroñ lo lemnak eo an Anij kin armij ikijen an lale wãwen an kar Jehovah jerbal ibbeir. Nejin ear kwalok ejja yokwe eo wõt an Anij kin armij ro ilo joñan eo ear maroñ ba: “Aõ lõñliñ e ar iben ro nejin armij.”—Ken. 8:22, 31.
12, 13. (a) Ilo wãwen et Jesus ear katak ilo an lale wãwen eo Jemen ear jerbal ibben Ri Israel ro? (b) Ewi wãwen Jesus ear kajerbal katak im kaminene ko ear bõki?
12 Katak im kaminene ko Jesus ear bõki rar bareinwõt kitibuj an lo an Jemen jerbale wãwen ko rebin. Ñan wanjoñok, lemnak kin wãwen eo Jehovah ear jerbal ibben Ri Israel ro ke rar jab bokake. Nihimaia 9:28 ej ba: “A elikin air lo kakije, rar bar kõmõn nana imam [Jehovah] kin men in Kwar likit ir na ilo pein ro air dri kijirãt, inem rar iroij ioir: a ke rar jeblaktok im kir ñõn Kwe, Kwar eoroñ jen lõñ: im elõñ alen Am lomor ir ekar ñõn tiriamokake ko Am.” Kin an kar jerbal ibben Jehovah im lale makitkit ko an, Jesus ear maroñ kwalok tiriamokake ñan armij ro ear kwalok nan ibbeir.—Jon 5:19.
13 Jesus ear jerbale men ko ear katak kaki ke ear jerbal ilo tiriamokake ibben ri kalor ro an. Ilo boñin eo mokta jen an kar mij, aolep ri jilek ro me ear yokwe ir rar “ilok jen E im ko.” (Mat. 26:56; Jon 13:1) Jilu alen an kar ri jilek Peter karmijeteik Christ! Meñe eindein, Jesus ear kõmman bwe en bellok wõt juõn ial ñan an ri jilek ro jeblak ñan e. Ear jiroñ Peter: “A I ar jar kin yuk bwe am tõmak e jamin joko; im ñe emwij am bar oktõk, kwon kakajur ro jeõm im jãtõm.” (Luk 22:32) Israel eo ilo jitõb kar kajutake ion “dri jilik kab dri kanan” ro, im dekã ko in bedbed eo kin worwor in Jerusalem eo ekãl ewõr ãt ko 12 etan ri jilek ro retiljek an Lamb eo, Jesus Christ. Ñan rainin, Christian ri kabit ro ibben ‘sheep ro jet’ mõttair emwij wujleplok air mour, rej lõñlok wõt ilo jerbal in kwalok nan eo air kin Ailiñ eo iumin pein Anij im tel eo an Nejin ejitenburu ibben.—Ep. 2:20; Jon 10:16; Rev. 21:14.
Wãwen eo Jesus Ear Katakin
14, 15. Ilo wãwen et ko ear oktak wãwen katakin eo an Jesus jen eo an scribe im Pharisee ro?
14 Ewi wãwen Jesus ear jerbale men ko ear katak kaki ke ear katakin ri kalor ro an? Ñe jej keidi wãwen katakin eo an Jesus ibben wãwen eo ri tel ro an kabuñ eo an Ri Jew ro rar katakin, ealikar jenaj lo utiejen wãwen katakin eo an Jesus. Scribe im Pharisee ro rar ‘kejekron kien Anij kin manit ak bwebwenato ko air.’ Ilo oktan, men ko Jesus ear konono kaki rar jab jen e make; ien otemjej ear katakin kin Nan eo an Anij. (Mat. 15:6; Jon 14:10) Eñin men eo jej aikwij kõmmane bareinwõt.
15 Ewõr bar juõn men me ear kõmman bwe Jesus en oktak jen ri tel ro an kabuñ. Ikijen scribe im Pharisee ro, ear ba: “Men otemjej jabrewõt r’ar jiroñ kom, komin kejbãroki im kõmõnmõni; a komin jab kõmõn einwõt air jerbal; bwe rej ba im jab kõmõnmõn.” (Mat. 23:3) Jesus ear jerbale men eo ear katakin kake. Jen etale juõn wanjoñok me ej kamol men in.
16. Etke kwomaroñ ba bwe Jesus ear mour ekkar ñan nan ko an ilo Matu 6:19-21?
16 Jesus ear rejañ ri kalor ro an ñan air “koorlok mweiuk . . . i lõñ.” (Read Matu 6:19-21.) Jesus ear ke mour ekkar ñan nan in rejañ in? Aet, bwe ear maroñ ba kin e make: “Kiru jakol ko eor roñ air, im bao in mejatoto eor ileir: a Nejin armij ejelok jikin An kababu bõran.” (Luk 9:58) Ear lamwan wãwen an kar Jesus mour. Ear boub in keañ kin news eo emõn kin Ailiñ eo, im ear kalikar ta melelen ad anemkwoj jen inebata ko me rej itok jen ad korlok mweiuk ko ilal. Jesus ear kwalok bwe ear emõnlok ñan korlok mweiuk ko ilañ, “ijo drile im jo re jab kõñi, im ijo ro dri kwot re jab rupe im kwote.” Kwoj lor ke nan in kakkõl in an Jesus ñan korlok mweiuk ko ilañ?
Kadkad ko Me Rar Kõmman Bwe Armij Ro Ren Yokwe Jesus
17. Kadkad et ko rar kõmman bwe Jesus en juõn ri evanjel ejejuan?
17 Kadkad et ko rar kõmman bwe Jesus en juõn ri evanjel ejejuan? Juõn, kar lemnak eo an kin armij ro ear jibañ ir. Jet ian kadkad ko remõn kadkadin Jehovah me Jesus ear kwaloki kar ettã buru, yokwe, im tiriamokake. Lale wãwen eo kadkad kein rar karuaklok elõñ armij ñan Jesus.
18. Etke jemaroñ ba bwe Jesus ear ettã buruen?
18 Elikin an bõk jerbal eo ñan itok ñan lal, Jesus “E ar mõke kejeramel E, im bõk wãwen korijer, im erom nememen armij.” (Pil. 2:7) Men in ear kwalok an ettã buruen. Bareinwõt, Jesus ear jab kajettokjen armij. Ear jab bõk lemnak eo, ‘Iar itok jen lañ, inem komij aikwij eoroñ iõ.’ Ilo an oktak jen ro rar make ba bwe rej messiah eo, Jesus ear jab kemjãje kin jerbal eo an einwõt Messiah eo emol. Jet ien ear jiroñ armij bwe ren jab jiroñ ro jet kin wõn e im ta eo ear kõmmane. (Mat. 12:15-21) Jesus ear kõnan bwe, armij ren kõmman bebe eo air ñan lor e ion bedbedin ta eo rar make loe. Elap an ri kalor ro an bõk jerammõn bwe Iroij eo air ear jab kõtmene bwe ren wãppen einwõt enjel ro ear bed ibbeir ilañ!
19, 20. Ewi wãwen yokwe im tiriamo ear kamakit Jesus ñan an jibañ armij?
19 Jesus Christ ear bareinwõt kwalok yokwe—kadkad eo elap kadkadin Jemen ilañ. (1 Jon 4:8) Jesus ear katakin ri roñjake ro an kin an yokwe ir. Ñan wanjoñok, lemnak kin eñjake eo an kin juõn iroij edik. (Read Mark 10:17-22.) Jesus “ej lale e im yokwe e” im ear kõnan jibañ e, ak iroij eo ear jab kõnan jolok men ko mweien ñan an maroñ lor Christ.
20 Bar juõn kadkadin Jesus me ear kõmman bwe armij ren yokwe, kar an kwalok tiriamokake. Einwõt aolep armij ro rejjab wãppen, ro rar uak ilo emõn ñan katak ko an rar jelmae elõñ abañ ko. Ilo an jelã men in, Jesus ear katakin ir ilo an kwalok tiriamokake. Ñan wanjoñok: Juõn ien, joñan an kar boub Jesus im ri jilek ro an ekar ejelok ien air mõñã. Bõtab, Jesus ear emmakit ilo wãwen et ke ear lo bwe juõn jar in armij rar itok? “Ej tiriamokake ir, bwe ir einwõt s̃ip ko ñe ejelok air s̃eperd: im Ej jino An katakin ir men ko relõñ.” (Mark 6:34) Jesus ear kile wãwen in ekaburomõjmõj an armij ro im ear kate e ñan katakin ir im kõmman menin bwilõñ ko ñan jibañ ir. Jet rar reel kin kadkad ko remõn kadkadin, nan ko an rar jelet burueir, im rar erom ri kalor ro an.
21. Ta eo jenaj etale ilo katak in tok juõn?
21 Elõñlok men ko jet jemaroñ katak kin jerbal in kwalok nan eo an Jesus ion lal, einwõt katak in tok juõn enaj kwalok kaki. Ilo wãwen et ko jet jemaroñ kajeoñe Jesus Christ, Missionary eo elaptata?
Ewi Wãwen Am Naj Uak?
• Ta katak im kaminene ko Jesus ear bõki mokta jen an kar itok ñan lal?
• Ikijen wãwen eo Jesus ear katakin armij, ewi wãwen ear utiejlok jen wãwen katakin eo an scribe im Pharisee ro?
• Ta kadkad ko kadkadin Jesus rar kamakit armij bwe ren yokwe e?
[Pija eo ilo peij 15]
Ewi wãwen an kar Jesus katakin jar ko?