Kajeoñe Ri Kaki Eo Elap

“Inem komin ilok, im kõmõn dri ailiñ ko otemjej bwe ren dri kalora . . . , katakin ir bwe ren bokake nan ko otemjej I ar jiroñ kom.”​—MATU 28:19, 20.

1, 2. (a) Ewi wãwen kij aolep, ilo juõn wãwen, jej ri kaki ro? (b) Ikijen katakin, ta eddo eo ejej uan ewõr ibben Ri Christian ro remol?

KWOJ juõn ri kaki ke? Ilo juõn wãwen kij otemjej jej ri kaki. Jabdewõt ien kwoj lelok ialin tel ñan juõn ri itoitak eo ejebwãbwe, kwalok ñan juõn ri jerbal eo rejetam wãwen kõmmane juõn jerbal, ak kamelele ñan juõn ajiri wãwen lukwõji juj ko an, kwoj katakin. Jibañ ro jet ilo kain wãwen kein ej bõktok juõn joñan in juburu, ejjab ke?

² Ikijen katakin, Ri Christian ro remol ewõr juõn air eddo eo einjuõn. Kar kakien kij ñan “kõmõn dri ailiñ ko otemjej bwe ren dri kalora . . . , katakin ir.” (Matu 28:19, 20) Barenwõt, iloan congregation eo ewõr ad ien ñan katakin. Maan ro tellokiir rej jitõñ ir ñan air jerbal einwõt “shepherd ro im ri kaki ro,” kin mejenkajjik eo ñan kalek congregation eo. (Ephesians 4:​11-​13, NW) Ilo jerbal in Christian ko air ran otemjej, kõrã ro reritto ren “dri katakin kin men ko remõn” ñan kõrã ro redik. (Taitõs 2:​3-5) Rej rejañ kij aolep ñan kõketak ri tõmak ro mõttad, im jemaroñ bokake nan in kakabilek in ilo ad kajerbal Bible eo ñan kalek ro jet. (1 Dri Tessalonika 5:​11) Ej juõn jerammõn elap ñan erom juõn ri kaki kin Nan in Anij im tilmake men ko raorõk ilo jitõb me tokjeir etto air bed!

3. Ewi wãwen ad maroñ kõmanmanlok ad keie einwõt ri kaki ro?

³ Ak, ekijkan ad maroñ kõmanmanlok an bolemed einwõt ri kaki ro? Men eo moktata, ej ilo ad kajeoñe Ri Kaki eo Elap, Jesus. ‘Ak ewi wãwen ad maroñ kajeoñe Jesus?’ jet remaroñ lemnak. ‘E ar wãppen.’ Emol, jejjab maroñ ri kaki wãppen. Mekarta, jekdon kin maroñ ko ad, jemaroñ kõmman joñan wõt ad maroñ ñan kajeoñe wãwen an kar Jesus katakin. Jen etale ewi wãwen ad maroñ jerbale emen ian kilen katakin ko an​—elamwan ak bidodo melele, kajitõk ko rekeie, nan in kõmmanwa ko remõn, im wanjoñok ko rejejjet.

Katakin Ilo Juõn Wãwen Ebidodo

4, 5. (a) Etke lamwan ej juõn mõttan eo elap tokjen kin mol eo ilo Bible? (b) Ñan katakin ilo lamwan, etke elap tokjen ñan kanuij lale nan ko ad?

⁴ Bedbedin mol ko ilo Nan in Anij rejjab kabwokbwok. Ilo jar, Jesus ear ba: “Ij kamolol Yuk O Jema, . . . bwe Kw’ar noj men kein jen ro dri meletlet im dri jelalokjen, im Kw’ar kwaloki ñõn niñniñ rõn.” (Matu 11:25) Jehovah ear kõmman bwe karõk ko an ren alikar ñan ro remol im ettã burueir. (1 Dri Korint 1:​26-​28) Kin menin, elamwan ak bidodo melele, ej juõn wãwen elap kin mol eo ilo Bible.

⁵ Ñe kwoj kõmmane juõn katak Bible ilo mweo ak bar jeblak ibben ro ewõr air itoklimo, ewi wãwen an maroñ bidodo am katakin? Eokwe, ta eo jaar katak jen Ri Kaki eo Elap? Ñan kõmman bwe ri roñjake ro an ren melele ilo alikar, ro elõñ wõt iair rar “dri jab katak im dri jab meletlet,” Jesus ear kajerbal kajin eo elamwan me rar maroñ melele. (Jerbal 4:​13) Inem, ñan katakin ilo bidodo, menin aikwij eo moktata ej ñan lale nan ko ad. Jejjab aikwij kajerbal nan ko rekõbbalbal ñan an ro jet tõmak Nanin Anij. Kain “konono im meletlet” rot in emaroñ kalelñoñ, elaptata ñan ro ejabwe air kar school ak ewõr joñan maroñ ko air. (1 Dri Korint 2:​1, 2) Wanjoñok eo an Jesus ej kwalok bwe nan ko rebidodo im ejimwe kãleti remaroñ kalikarlok mol eo ilo juõn wãwen ekajur.

6. Ewi wãwen ad maroñ bõprae an tarjen joñan ad lelok melele ko ñan juõn ri katak Bible?

⁶ Ñan katakin ilo juõn wãwen ebidodo, jej aikwij bareinwõt bõprae an tarjen joñan ad lelok melele ko ñan juõn ri katak Bible. Jesus ear lemnak kin joñan maroñ ko an ri kalor ro an. (Jon 16:12) Kij, bareinwõt, jej aikwij lemnak kin joñan maroñ eo an ri katak eo. Ñan wanjoñok, ñe jej kõmmane juõn katak ilo book eo Jelãlokjen Eo Ej Tellok Ñan Mour Indio, jejjab aikwij kamelele kin aolep kajjojo tibdik ko.a Im ejjab bar menin aikwij ñan kaiur kake melele eo, im einwõt ñe juõn joñan eo emwij karõke kin menin katak eo ej men eo elaptata tokjen. Jen an eindein, ej menin meletlet ñan kõtlok bwe aikwij ko im maroñ ko an ri katak eo en men eo ej beek kilen katak eo. Mejenkajjik eo ad ej ñan jibañ ri katak eo ñan an erom juõn ri kaloran Christ im juõn ri kabuñ an Jehovah. Jej aikwij bõk jabdewõt ien eo ej menin aikwij ñan jibañ ri katak eo ewõr an itoklimo ñan an melele ilo alikar men eo ej katak. Kin menin, mol eo emaroñ lujur buruen im kamakit e ñan an jerbal.​—Dri Rom 12:2.

7. Ta lemnak ko remaroñ jibañ kij ñan katakin ilo lamwan ñe jej kwalok katak ko ilo congregation eo?

⁷ Ñe jej kwalok katak ko ilo congregation eo, elaptata elañe ewõr ri kãltok ro rej bed im roñjake, ewi wãwen ad maroñ konono nan ko “ebiruru in melele” kake? (1 Dri Korint 14:9) Lemnak kin jilu nanin lemnak ko remaroñ jibañ. Moktata, kameleleik jabdewõt kajin ko ejelok jelã kaki im kwoj aikwij kajerbali. Jelã eo ad kin Nanin Anij ear letok ñan kij juõn lajrak in nan ko reinjuõn im ejejuair. Elañe jej kajerbal kain kajin rot in einwõt “dri kõrijer e tiljek im meletlet,” “bar jet s̃ip,” im “Babilõn Elap,” jemaroñ aikwij kamelele ñan ir kin nan ko rebidodo me rej kalikar melele eo. Kein karuo, bõprae lõñin nan. Elañe kwoj kajerbal elap an lõñ nan, im elap am kamelele ilo tibdikin, men in emaroñ kõmman bwe ro rej roñjake ren luji air itoklimo. Alikar in melele ej itok kin jab kajerbali nan ko rejjab menin aikwij. Kein kajilu, jab kajeoñ kalap am kitibuj menin katak eo. Kin ad etale katak ko men in emaroñ kõmman an walok elõñ tibdik in kamelele ko rekaitoktoklimo. Ak emõntata karõk menin katak eo ñan jejjo wõt melele ko relap, kajerbal kamelele ko wõt me rej rejetake melele kein im emaroñ alikar ad kamelele kaki ilo joñan ien eo emwij karõke.

Kajerbal Kajitõk ko Ilo Keie

8, 9. Ewi wãwen ad maroñ kãlet juõn kajitõk eo ej jejjet ñan itoklimo eo an juõn armij imweo? Kwalok wanjoñok ko.

⁸ Kememej bwe Jesus kar juõn eo elap an kabel ilo kajerbal kajitõk ko ñan kõmman bwe ri kalor ro an ren kwalok kin ta eo kar bed ilo lemnak ko air im ñan lujur im katakin air lemnak. Kin kajitõk ko an, Jesus ear tõbar im jelet burueir. (Matu 16:13, 15; Jon 11:26) Ewi wãwen ad maroñ, einwõt Jesus, kajerbale kajitõk ko ilo keie?

⁹ Ñe jej kwalok nan jen em ñan em, jemaroñ kajerbal kajitõk ko ñan kaitoklimo, im ilo wãwen in keboj ial eo ñan ad konono kin Ailiñ in Anij. Ewi wãwen ad maroñ kãlet juõn kajitõk eo en ekkar ñan itoklimo ko an ri mweo? Kanuij lale. Ñe kwoj kebaklok juõn em, lale belak ko ie. Ewõr ke kein ikkure ko ibelakin mweo, ñan kalikar bwe ewõr ajiri ilo mweo? Elañe eindein, kwo maroñ kajitõk, ‘Kwo nañin kar lemnak ke kin ta eo lalin enaj einlok wõt ñe ajiri ro nejim rej rittolok?’ (Sam 37:10, 11) Ej lõñ ke lak ko ilo kejam eo iman, ak ewõr ke juõn kein jerbal jarom ñan kejbãrok mweo jen ri kwot ro? Jemaroñ kajitõk: ‘Kwoj lemnak ke bwe ien eo enaj itok ñe armij ro einwõt kwe im ña jemaroñ eñjake ad jokane ilo mweo imõd im ilo ial eo?’ (Micah 4:​3, 4, NW) Ewõr ke juõn ial ñan an wheelchair etal ie lok? Jemaroñ kajitõk: ‘Enaj wõr ke juõn ien ñe jabdewõt armij ro rej mour renaj lañliñ kin an emõn air ejmour?’ (Aiseia 33:24) Elõñ kajitõk ko jemaroñ loi ilo book eo Reasoning From the Scriptures (Kõmmanwa Jen Jeje Ko).b

10. Ewi wãwen ad maroñ kajerbal kajitõk ko ñan ‘tõbar’ lemnak ko im eñjake ko ilo buruen juõn ri katak Bible, ak ta eo jej aikwij lemnak kake?

¹⁰ Ewi wãwen ad maroñ kajerbal kajitõk ko ilo bolemen ñe jej kõmman katak Bible? Ilo ad jab einwõt Jesus, jejjab maroñ readi buru ko. Bõtab, kajitõk ko ilo jelã kilen ak ej kwalok lolokjen emaroñ jibañ kij ñan ‘tõbar’ lemnak ko im eñjake ko ilo buruen ri katak eo. (Jabõn Kennan Ko 20:5) Ñan wanjoñok, jen baj ba jej katak chapter eo “Etke Mour Ilo Kwojarjar Ej Bõktok Lemõnõnõ,” ilo book eo Jelãlokjen. Ej konono kin lemnak eo an Anij kin jab mol, lũñ, im wãwen men ko jet. Ri katak eo emaroñ uak kajitõk ko emwij jei ilo jimwe, ak ej errã ke ibben men eo ej katak? Jemaroñ kajitõk: ‘Lemnak eo an Jehovah kin men kein rej men in kõmmanwa ke ñan kwe?’ ‘Ewi wãwen am maroñ jerbale nanin kaiñi kein ilo Bible ilo mour eo am?’ Ak, lemnak, kin aikwij eo ñan kautiej utiej eo an ri katak eo. Jenaj jamin kõnan kajitõk kin kajitõk ko rej kajook ri katak Bible eo.​—Jabõn Kennan Ko 12:18.

11. Ilo wãwen et ko ri konono ro ibwiljin armij ro emaroñ keie air kajerbal kajitõk ko?

¹¹ Ro rej konono iman bwijin armij remaroñ bareinwõt kajerbal kajitõk ko ilo keie. Rhetorical kajitõk ko​—kajitõk ko me jejjab kõtmene bwe ri roñjake ro ad renaj uak ilo ainikien ellaj​—emaroñ jibañ armij ro rej bed im roñjake ñan air lemnak im kõmmanwa. (Matu 11:​7-9) Bareinwõt, elikin nanin kabellok ko, ri konono eo emaroñ kajerbal kajitok ko ñan kõllajrak melele ko relap naj konono kaki. Emaroñ ba: “Ilo konono eo ad rainin, jenaj etale uak ko ñan kajitõk kein tok ilokan . . .” Inem, ilo nanin kajemlok eo, emaroñ jitõñlok ñan kajitõk ko ñan eliji melele ko relap.

12. Kwalok juõn wanjoñok kin ewi wãwen Christian elder ro remaroñ kajerbal kajitõk ko ñan jibañ juõn ri tõmak mõttair ñan bõk kainemõn jen Nanin Anij.

¹² Ilo jerbal in shepherd eo air, Christian elder ro remaroñ kajerbal kajitõk ko ñan jibañ juõn ‘eo eburomõj’ ñan bõk kainemõn jen Nan eo an Jehovah. (1 Dri Tessalonika 5:​14) Ñan wanjoñok, ñan jibañ juõn eo ej eñjake an mõjno, juõn elder emaroñ jitõñlok e ñan Psalm 34:18, NW. Ej ba: “Jehovah ej ebak ñan ro erup burueir; im Ej lomoren ro rej mõjno ilo jitõb.” Ñan kõmman bwe eo ej ebwer ej lo wãwen an menin jerbal ñan e, elder eo emaroñ kajitõk: ‘Wõn eo Jehovah ej ebake? Jet ien kwoj eñjake ke an “rup buruõm” im “mõjno ilo jitõb”? Elañe, einwõt an Bible eo ba, Jehovah ej ebake armij rot in, ejjab melelen menin ke bwe ej ebak ñan yuk?’ Kain nan in kamol rot in ejoij emaroñ kakajur im kemour jitõbõn armij eo emõjno.​—Aiseia 57:15.

Nan in Kammanwa ko Remõn

13, 14. (a) Ewi wãwen ad maroñ kõmmanwa ibben juõn eo ej ba ejjab tomak ilo juõn Anij eo ejjab maroñ loe? (b) Etke jej aikwij jab kõtmene bwe aolep armij renaj tõmak?

¹³ Ilo jerbal in kwalok nan eo ad, jej kõnan tõbar buruen armij ro kin kõmmanwa eo emõn. (Jerbal 19:8; 28:23, 24) Melelen menin ke bwe jej aikwij katak ñan kajerbal kilen eo ekabwokbwok ñan kamol ñan ro jet kin mol eo kin Nanin Anij? Ejjab ñan jidik. Kõmmanwa eo emõn ejjab aikwij kabwokbwok. Un ko rejimwe im rej kwaloki ilo juõn wãwen ebidodo ekkã an lap an keie. Lemnak kin juõn wanjoñok.

¹⁴ Ewi wãwen ad maroñ uak ñe juõn armij ej ba bwe ejjab tõmak ilo juõn Anij eo ejjab maroñ loe? Jemaroñ kõmmanwa kin kien eo ej kõmman an walok juõn men im tokjen eo. Ñe jej lale juõn tokjen eo ej walok kitien, jenaj kar jelã bwe ej aikwij wõr juõn men eo ear kõmman an walok. Jemaroñ ba: ‘Elañe kwar bed ilo juõn melan eo ettolok im lo juõn em emõn air kar kaleke im emwij kanne kin mõñã, (tokjen eo), kwo naj kar jelã bwe ewõr juõn eo (kõmman bwe en walok) ear kalek mweo im kanne kin nien mõñã ko iloan. Eindein, bareinwõt, ñe jej lo men in kõmanman ko emõn kar eiki im ralikar ilo lal im an lap mõñã ko ilo “nien mõñã” eo an lal in (tokjen eo), ejjab men in kõmmanwa ke ñan tõmak bwe ewõr Juõn eo (kõmman bwe en walok), ej bõk eddon?’ Un eo elamwan ilo Bible ealikar an kwalok mol in: “Bwe im otemjej armij rej kaleki; a Eo e ar kalek men otemjej, E Anij.” (Dri Hibru 3:4) Bõtab, jekdon ewi joñan an maroñ emõn kamelele eo ad, ejjab aolep armij enaj tõmak. Bible eo ej kakememej kij bwe ro wõt “ear jimwe likit ir” renaj oktak im ri tõmak.​—Acts 13:48, NW; 2 Dri Tessalonika 3:2.

15. Kain nan in kõmmanwa eo jemaroñ kajerbale ñan kalikar kadkad ko kadkadin Jehovah im wãwen ko an, im ta wanjoñok ko ruo rej kwalok wãwen ad maroñ kajerbal kõmmanwa rot in?

¹⁵ Ilo ad katakin, elañe ilo jerbal in kwalok nan ak ilo congregation eo, jemaroñ kajerbal nan in kõmmanwa ko ilo jimwe ñan kalikar kadkad ko kadkadin Jehovah im wãwen an jerbale men ko. Men eo elaptata an keie ej ‘ewi joñan an laplok an eindein’ wãwen kõmmanwa eo Jesus ekin kajerbale jet ien. (Luk 11:13; 12:24) Ilo keidi, kain kõmmanwa rot in emaroñ kõmman juõn bwilõñ eo emũlal. Ñan kajedmatmat an jab ekkar tõmak eo kin kaeñtan ro renana ilo kijeek in bwil eo, jemaron ba: ‘Ejelok jemen eo ej yokwe enaj kaje ajiri eo nejin ilo an debij pein ajiri eo nejin ilo juõn kijeek. Ewi joñan an laplok an eindein lemnak eo kin kaeñtan ro renana ilo kijeek in bwil eo jab emõn ibben Jemed ilañ eo ej yokwe!’ (Jeremiah 7:​31, NW) Ñan katakin bwe Jehovah ej kea kin ro ri karejeran einwõt kajjojo armij, jemaroñ ba: ‘Elañe Jehovah ejelã kajjojo oran billion iju ko ilañ kin etair, ewi joñan an laplok an aikwij kea kin armij ro rej yokwe e im kar wiaik ir kin bõtõktõkin eo eaorõk bõtõktõkin Nejin!’ (Aiseia 40:26; Jerbal 20:28) Kain kõmmanwa rot in ekajur emaroñ jibañ kij tõbar buruen ro jet.

Wanjoñok ko Rejejjet

16. Etke wanjoñok ko raorõk ilo katakin?

¹⁶ Wanjoñok ko rekeie rej juõn un eo emaroñ kõmman bwe katakin eo ad en laplok an ro jet kõnan. Etke elap aorõkin wanjoñok ko ilo katakin? Juõn ri katakin ear loe: “Maroñ eo ñan lemnak ke jidik wõt ak ejelok men kwoj pijaiki ilo lemnak eo am ej juõn ian men ko rebin tata ilo men ko armij rej kõtõbraki.” Wanjoñok ko rej kwalok pija ko ewõr tokjen ilo lemnak eo ad, im rej jibañ kij kalaplok ad tõbar lemnak ko rekãl. Jesus ear kanuij wejepedik ilo an kajerbal wanjoñok ko. (Mark 4:​33, 34) Jen lale wãwen ad maroñ kajerbal kilen katakin rot in.

17. Ta mol ko emen rej kõmman an juõn wanjoñok keie?

¹⁷ Ta eo ej kõmman an juõn wanjoñok keie? Moktata, ej aikwij jejjet ñan ri roñjake ro ad, im ej kajerbal men ko rej iminene kaki. Kememej bwe Jesus ear kwalok elõñ wõt ian wanjoñok ko an jen mour jen ran ñan ran an ri roñjake ro an. Kein karuo, juõn wanjoñok ej aikwij kwon ibben melele eo jej kwalok kake. Elañe men eo jej keidi tok ñan ibben ejjab jejjet ñan melele eo, wanjoñok eo emaroñ kõmman bwe ri roñjake ro ad ren bwok. Kein kajilu, juõn wanjoñok ejjab aikwij kobaik elõñ tibdik ko rejjab menin aikwij. Kememej bwe Jesus ear kwalok tibdik in kamelele ko rej menin aikwij ak ear jab kobaik men ko ejjab lap tokjeir. Kein kemen, ñe jej kajerbal juõn wanjoñok, jej aikwij lukkun lale bwe ealikar men eo ej jerbal ñane. Elañe ejjab eindein, jet remaroñ jab melele wãwen eo ñan jerbale melele eo rej konono kake ilo wanjoñok eo.

18. Ewi wãwen ad maroñ lemnak kin wanjoñok ko rekkar?

¹⁸ Ewi wãwen ad maroñ lemnak kin wanjoñok ko rekkar? Jejjab aikwij lemnak kin bwebwenato ko raetok im lap tibdikiir. Wanjoñok ko rekadu remaroñ kanuij keie. Kajeoñ in lemnak kin wanjoñok ko rejejjt ñan melele eo rej konono kake. Ñan wanjoñok, jen baj ba jej konono kin unintel eo kin an Anij jolok bwid, im je kõnan kõmman juõn wanjoñok kin melele eo ej walok ilo Jerbal 3:​19, ijo ej ba bwe Jehovah ‘jeorlok,’ ak irilok, bwid ko ad. Menin ej juõn nan in kõkkar ealikar, ak ta wanjoñok eo emol jemaroñ kajerbale ñan wanjoñok kin melele eo​—juõn men einwõt kein ejjeor ke? juõn matmat ke? Jemaroñ ba: ‘Ñe Jehovah ej jeorlok bwid ko ad, ej irilok im einwõt ñe ej kajerbal juõn matmat (ak juõn kein ejjeor).’ Ebin ñan ad jab melele kin melele eo an juõn wanjoñok elamwan.

19, 20. (a) Ia eo jemaroñ lo wanjoñok ko remõn ie? (b) Ta jet ian wanjoñok ko rekeie emwij jei ilo book ko ad?

¹⁹ Ia eo kwo maroñ lo wanjoñok ko rekkar, ekoba wanjoñok ko ko remol kin mour an armij? Bukõti ilo mour eo am make ak ilo bedbedin wãwen mour im bwebwenato ko reinjuõn jen don an ri tõmak ro mõttam. Wanjoñok ko jemaroñ kãleti jen elõñ unjen ko jet, ekoba men ko remour im rejjab mour, kõbwebweien em ko, ak juõn men eo ej walok im emõn jelã kake ilo bukwon eo. Juõn wãwen eo ekeie ñan lo wanjoñok ko remõn ej ilo ad bojak, im “kanuij lale” wãwen ko rej walok ibelakid ran otemjej. (Acts 17:22, 23, NW) Juõn jerbal in bõk melele kin konono ibwiljin armij ej kamelele: “Ri konono eo ej lale mour in armij im elõñ kain jerbal ko an, ej konono ibben aolep kain armij ro, ekanuij etali elõñ men ko im kajitõk kin kajitõk ko mae ien ej melele kaki, ej kobaiktok men ko rej menin wanjoñok im elap air naj jibañ e ñe ej aikwiji.”

²⁰ Ebar wõr juõn jikin eo emõn kin wanjoñok ko rekeie​—Imõniaroñroñ eo, Awake!, im book ko jet Ri Kennan ro an Jehovah rej kõmmani. Elap ijo kwo maroñ katak jene jen am lale wãwen an book kein kajerbal wanjoñok ko.c Lemnak, ñan wanjoñok, kin wanjoñok eo kar kajerbale ilo 11 eon in chapter 17 ilo book eo Jelãlokjen. Ej keidi elõñ kain kadkad in armij ro ilo congregation eo ñan elõñ kain wan ettõr ko rej ettõr iturum ion ial eo. Ta eo ej kõmman an keie? Lale bwe ej bedbed ion wãwen ko rej walok ran otemjej, elap an einlok wõt melele eo kar kõmmane, im ealikar wãwen an jerbal. Wanjoñok ko emwij jei jemaroñ kajerbali ilo ad katakin, bõlen kajerbali ñan aikwij ko an juõn ri katak Bible ak karõki ñan kajerbali ilo juõn katak.

21. Ta jinekjej ko rej itok jen an keie juõn ri kaki in Nanin Anij?

²¹ Jinekjej ko an juõn ri kaki eo ekeie relap. Ñe jej katakin, jej bõk kunad ibben ro jet; jej kajerbal men ko ewõr ibbed ñan jibañ ir. Kain lelok rot in ej bõktok mõnõnõ, bwe Bible eo ej ba: “Mõnõnõ in lelok elap jen bõk.” (Jerbal 20:35) Ñan ri kaki ro an Nanin Anij, mõnõnõ in ej lañliñ eo ilo jelã bwe jej lelok juõn men eo emol im aorõkin ej indio​—mol eo kin Jehovah. Emaroñ bareinwõt wõr ibbed juburu eo ej itok jen ad jelã bwe jej kajeoñe Ri Kaki eo Elap, Jesus Christ.

[Kamelele ko itulal]

Kwoj Kememej Ke?

• Ewi wãwen ad maroñ katakin ilo lamwan ñe jej kõmmane juõn katak Bible ilo mweo? ñe jej kwalok juõn katak ilo congregation eo?

• Ewi wãwen emaroñ keie wãwen ad kajerbal kajitõk ko ñe jej kwalok nan jen em ñan em?

• Ewi wãwen ad maroñ kajerbal nan in kõmmanwa ko remõn ñan kalikar kadkad ko kadkadin Jehovah im wãwen ko an?

• Ia eo jemaroñ lo wanjoñok ko rekkar ie?

[Pija ko ilo peij 28]

Ri Christian ro remol rej ri kaki in Nanin Anij

[Pija eo ilo peij 30]

Elder ro remaroñ kajerbal kajitõk ko ñan jibañ ri tõmak ro mõttair ñan bõk kainemõn jen Nanin Anij