Jilu Wãween ko ñan Kakõm̦anm̦anl̦o̦k Kilen Am̦ Katakin
1. Etke jej aikuj pukot kilen ñan kakõm̦anm̦anl̦o̦k wãween ad katakin armej ro?
1 Aolep ri kwal̦o̦k naan ro rej ri katakin. Mekarta ñe jej jepl̦aak ippãn armej ro ilo iien eo jinointata, ak bar jepl̦aak im kal̦apl̦o̦k aer mel̦el̦e, ak katak Baibõl̦ ippãer, jej katakin er. Men ko jej katakin er kaki rejjab mel̦el̦e bajjek. Jej kwal̦o̦k mel̦el̦e ko kõn “jeje ko re kwõjarjar,” ko remaroñ lel̦o̦k ñan armej jel̦ãl̦o̦kjen̦ eo ej tõll̦o̦k ñan “lo̦mo̦o̦r.” (2 Ti. 3:15) Ej lukkuun juon jeraam̦m̦an el̦ap! Jenaaj etale jilu wãween ko ñan kakõm̦anm̦anl̦o̦k kilen ad katakin.
2. Ewi wãween jemaroñ katakin armej ro ilo juon wãween epidodo?
2 En Pidodo: El̦aññe el̦ap mel̦el̦e eo ippãd kõn juon men, jemaroñ mel̦o̦kl̦o̦k ke armej eo ej kab roñ kõn men eo enaaj pen an mel̦el̦e. Kõn men in, ñe kwõj katak Baibõl̦ ippãn juon armej, kajjioñ jab kwal̦o̦k elõñ mel̦el̦e ko. Ak kwal̦o̦k kõn mel̦el̦e ko raorõk im rej pedped wõt ioon katak eo. An l̦ap ad kõmel̦el̦e im kõnono, ejjab mel̦el̦ein bwe em̦m̦anl̦o̦k ad katakin. (JK. 10:19) Em̦m̦anl̦o̦k ñan riiti wõt eoon ko rekkar ñan mel̦el̦e ko jej kõnono kaki. Bareinwõt, ñe em̦õj riiti juon eoon, bõk wõt mel̦el̦e eo jãn eoon eo im ej ekkejell̦o̦k ñan katak eo. Ilo Matu jebta 5 ñan 7 ej kwal̦o̦k kõn Katak eo El̦ap an Jijej ioon Tol̦ eo. Meñe mel̦el̦e ko el̦ap aer m̦wilal̦, bõtab Jijej ear katakin armej ro ilo wãween eo epidodo im ear kõjerbal jejjo wõt naan ko me rejejjet ñan aer mel̦el̦e.
3. Etke eaorõk ñan kõjerbal waanjoñak ko, im kain waanjoñak rot ko rem̦m̦an?
3 Waanjoñak Ko: Waanjoñak ko rej kõm̦m̦an bwe armej ren l̦õmn̦ak. Bareinwõt rej kõm̦akũt bũrueer im jipañ er bwe ren jab mel̦o̦kl̦o̦ki. Kwõjjab aikuj in juon eo im ejel̦ã bwebwenato ak ino̦ñ bwe kwõn jel̦ã kõm̦m̦an waanjoñak ko. Ekkã an kar Jijej kõjerbal waanjoñak ko rekadu im pidodo. (Matu 7:3-5; 18:2-4) Pija ko rejjab kapokpok im jej jiñaik ilo juon peba remaroñ bar l̦ap aer jipañ. Am pojakl̦o̦k im̦aan emaroñ jipañ eok l̦õmn̦ak kõn waanjoñak ko im rejejjet ñan aikuj eo an armej eo.
4. Ewi wãween jemaroñ lo tõprak ilo ad kõjerbal kajjitõk ko?
4 Kajjitõk Ko: Kajjitõk ko rej aikuj kõm̦m̦an bwe ri katak eo en kõl̦mãnl̦o̦kjen̦. Kõn men in, kwõn meanwõd wõt ñe ej to an uwaak. El̦aññe em̦õkaj am kwal̦o̦k uwaak eo ñane, kwõban lukkuun jel̦ã joñan mel̦el̦e eo an ri katak eo. El̦aññe ejjab jim̦we an uwaak, em̦m̦anl̦o̦k ñan kwal̦o̦k bar jet kajjitõk me repidodol̦o̦k ñan an lo uwaak eo ejim̦we, ijello̦kun am̦ kwal̦o̦k ñane uwaak eo. (Matu 17:24-27) Em̦ool bwe ejjel̦o̦k juon iaad eweeppãn im enaaj jejjet wãween ad katakin aolep iien. Eñin unin Baibõl̦ eo ej rõjañ kõj ñan lale im kõjparok wãween ad katakin. Ad kõm̦m̦ane men in, jenaaj bõk tokjãn ko rem̦m̦an me jenaaj bõki ñan indeeo, ekoba ro rej roñjake kõj.—1 Ti. 4:16.