En Melak Am Katakin
1. Ta juõn wãwen katakin eaurõk bwe en alikar im keie?
1 Katakin ilo melak eaurõk ñõn jibõñ armij melele. Ar etale wãwen an Jisõs Dri Kaki eo Elap, katakin, enaj kalaplok maroñ ko ar ñõn “katakin.”—2 Tim. 4:2; Jon 13:13.
2. Bwe en melak ar katakin jenaj aikwij ta, im ewi wãwen katak rot in enaj jelet ro jet?
2 En Melak Am Kennan: Katak eo ion Tol eo ej kwalok jet ian katak ko relaptata im juõn armij ear kwalok kake, im elukkun melak. (Matu, japter 5-7) Jarlepju in armij ro rar roñjake Jisõs rar “bwilõñ kin An katak.” Dri Tõrinae ro rar ba ke kar jilkinlok ir bwe ren jibwe: “Ejelok armij e ar konono einwõt armij in.” (Mat. 7:28, 29; Jon 7:46) Jejjab aikwij kajerbal nan ko rebin, kemelele ko relõñ ak wanjoñok ko raitok ñõn karel ro jet kin mol eo. Jemaroñ kwalok mol eo ilo alikar ikijen ar kajerbal nan ko armij ro remelele kaki.
3. Etke jet remaroñ le jen joñõn air kemeleleik ro rej roñjake, im ta eo jen kõmõne bwe jen jab eindrein?
3 Lelok Ekkar ñõn Maroñ: Jisõs ear lelok katak ko ñõn armij ro ekkar ñõn joñõn maroñ ko ibeir. (Jon 16:12) Jenaj aikwij kile wãweir im pojõk in ukot wãwen ar kennan, elaptata ilo ien eo jej konono iben ro nukid, iben ro rekãl ak iben ajiri ro. Jej aikwij lale bwe en jab le jen joñõn ar kemelele meñe eor air itoklimo im emõn air roñjake. Ro im emol burueir renaj mõnõnõ in katak wõt im bõk jelalokjen eo kin Anij eo emol, Jeova.—Jon 17:3; 1 Kor. 3:6.
4. Etke emõnlok ñõn kalikar melele ko relap ijellokin ar kwalok tibrikin melele ko?
4 Kalikar Melele ko Relap: Jisõs ear jab kobrõk katak ko an ilo an kwalok tibrikin elõñ melele ko. Ke ear ba, “Ro otemjej rej ber ilo lũp ko, naj . . . drioijtok,” ear jab ien eo bwe en kemeleleiklok kin kejatrikrik ko ruo kin ro im renaj jerkakbiji. (Jon 5:28, 29) Ñe jej katak Baibel iben ro jet, jen kalikar melele ko relap im jab kadreloñtok melele ko im rejjab ber ilo katak eo.
5. Ta jerammõn ko jenaj bõki elañe jej katakin armij ilo melak?
5 Elap ar kamolol Jeova kin an kar katakin kij ilo melak kin men otemjej jar aikwij jela kaki! (Matu 11:25) Jen jerbale nan in kakabilek kein ñõn katakin armij ilo melak im bõk lõñliñ kin ar lo tõbrõk ilo ar kwalok nan ilo emõn.