Kajitõk ko Jen Ro Rej Read

Enana ke gamble meñe kin jidik wõt money?

Nan in Anij ejjab kamelele kin gamble ilo tibdikin, ak ebwe an kamelele im kwalok bwe gamble ilo wãwen otemjej ej jõkkar ñan kien ko an Bible.a Ñan wanjoñok, ej alikar bwe gamble ej lujur jitõbõn kibbon. Mol in ebwe ñan kalikar bwe ej juõn men eaorõk ñan an Ri Christian ro lemnak kake, kinke Bible eo ej ba bwe ro “re kibbon” rejamin jolet Ailiñ in Anij im ej joñan wõt kabuñ ñan ekjap.​—1 Dri Korint 6:​9, 10; Dri Kolosse 3:5.

Gamble ak ikkure kin money ej lujur jitõbõn kemjãje im jiaik don, juõn kõnan ñan win jekdon ta. Ri jilek Paul ear kakkõl kij nae wãwen kein ke ear je: “Jen jab dri kimjãje wan, dri kaillu dron, dri junmare dron.” (Dri Galetia 5:​26) Bareinwõt, gamble ej kamakit jet bwe ren atartar ion good luck ak jire im bõk jerammõn. Ri ikkure ro kin money rej atartar ion elõñ wãwen tõmak ko ejelok bedbediir ñan jire im bõk jerammõn. Rej kakememej kij kin Ri Israel ro rar jab tiljek rar “kapojõk juõn tebel ñõn Jerammõn [ak jire im bõk jerammõn] im eteñ wain ekãre ñõn Jenekij.”​—Aiseia 65:11.

Jet armij remaroñ lemnak bwe ikkure wõt card kin jidik wõt money im jab jiaik don ak ikkure board game ibben ro nukid ak ro jerad rej ebake kij ejelok jorrãn. Emol, eo ej ikkure kin jidik wõt money emaroñ lemnak bwe ejjab kibbon, kemjãje, jiai, kajitõbtõb. Mekarta, ewi wãwen an ikkure kin money maroñ jelet eo ej ikkure kake? Elõñ ro rej iminene in gamble rar jino im korlok money ilo air ‘ikkure wõt’. (Luk 16:10) Juõn men rar lemnak bwe ejjab nana ear erom juõn men ekamijak im kauwatata ñan ir.

Emol men in elaptata ibben ajiri ro. Elõñ ajiri rar lo mõnõnõ ke rar win jidik wõt money im men in ear kamakit ir bwe ren kalaplok joñan money ko rej ikkure kake. (1 Timote 6:​10) Kumi in Arizona Council ñan Compulsive Gambling ear kõmmane juõn etale eaetok ilo United States im rar kalikar bwe elõñ ro rej mour wõt ñan gamble rar jino jen ien ajiri “ilo air ikkure kin jidik wõt money ilo jinoin kin ikkure ak sport ko ak ikkure kin card ibben ro jerair rej bed ebake don ak ro nukiir.” Bar juõn report ej ba bwe “ajiri ro rej jino gamble ilo moko imwiir, ekkã air ikkure card ko ibben ro uan family eo im ro jerair.” Report eo ear kobaiktok im ba bwe “jilñul percent in ajiri ro rar jino gamble mokta jen air tõbar joñoul juõn yiõ dettair. Elõñ jodikdik ro rej bõk money ñan gamble ilo air kwot ak bed ilo mour in ejej, ekkar ñan juõn ekkatak kar naetan Why Do People Gamble Too Much​—Pathological and Problem Gambling (Etke Armij Ro Elap Air Kõnan Gamble​—Juõn Nañinmij im Abañ kin Gamble). Ej juõn jerata elap jen juõn men jej baj lemnak ilo jinoin ejelok jorrãn jen e!

Kinke jej mour ilo juõn lal eo eobrak kin elõñ aujid im men in kabo ko, etke jekõnan kajerwawaik kij ñan bar juõn aujid? (Jabõn Kennan Ko 27:12) Gamble​—ñe ajiri ro rej bed ak rejjab, kin jidik wõt money ak elap​—ej kauwatata ñan mour in jitõb eo ad im jej aikwij kejbãrok kij jen e. Emõnlok bwe Ri Christian ro rej mõnõnõ in ikkure kin board ak card ko ren baj jeje wõt joñan tõbrakiir ilo juõn paper ak baj ikkure wõt ilo mõnõnõ im jab kwalok tõbrakin. Ri Christian ro remeletlet rej lale mour in jitõb eo air im ro jerair im ro uan family eo air rejjab gamble​—meñe rej kajerbal jidik wõt money.

[Kamelele ko itulal]