Kainemõn Ro Rej Eñtan

IUMIN elõñ ebeben ko, kajitõk in kin unin an Anij kõtlok eñtan elõñ ri meletlet im ri tel in kabuñ ro rar kajitõk kake. Jet iair rar ba bwe kinke Anij ej kajur otem kajur, eñtan eo ej itok jen e. Ri jeje book eo The Clementine Homilies, juõn book kar jab kakõrmole ilo ebeben eo kein karuo, ear ba bwe Anij ej iroij kin ruo pã ko pein. Kin “anmiñ,” Devil eo, ej kaeñtan im kõmetak armij, im kin “anbwijmaroñ,” Jesus, ej lomoriir im kajerammõn ir.

Bar ro jet, rejjab kõnan tõmak bwe Anij ej kõtlok eñtan meñe jab unjen eñtan eo, rej ba bwe ejelok eñtan ñan jidik. “Nana ej juõn ettõnak bajjek, im ejelok bedbed ñan tõmak bwe ewõr,” Mary Baker Eddy ear jeje. “Elañe jej melele bwe ejelok jerawiwi, nañinmij, im mij, renaj jako.”​—Science and Health With Key to the Scriptures.

Kin an walok jorrãn ko iaolepen bwebwenato ko an armij, elaptata jen ien tarinae eo kein kajuõn an lal ñan ran kein ad, elõñ rar tõbar juõn jemlok bwe ejelok an Anij maroñ ñan kajemlok eñtan.

Bõtab, ñan ba bwe Anij ewõr kunan ilo eñtan ko, ak bwe eban kabõjrake, ak eñtan ej juõn ettõnak bajjek, rejjab maroñ kainemõn ro rej eñtan. Im elaplok an aorõk, bwe lemnak kein rej idaptõk ibben kadkadin Anij eo ej wãnik, kajur, im yokwe einwõt an Bible eo kalikare. (Job 34:10, 12; Jeremiah 32:​17, New World Translation; 1 Jon 4:⁠8) Inem, ta eo Bible ej ba kin unin an kõtlok eñtan?

Ewi Wãwen Eñtan Ear Jinoe?

Anij ear jab kõmanman armij bwe ren eñtan. Jen men in, ear lelok ñan armij ro ruo moktata, Adam im Eve, lolãtãt im enbwin ko rewãppen, keboje juõn jikin kallip eaibujuij bwe ren jokwe ie, im lelok juõn jerbal elap tokjen ñan ir. (Jenesis 1:​27, 28, 31; 2:⁠8) Bõtab, ñan kõmman bwe mõnõnõ eo air en wõnmanlok wõt, men in ear atartar ion air kile iroij eo an Anij im maroñ eo an ñan beek ñan ir ta eo emõn im ta eo enana.

Men in buromõj bwe, Adam im Eve rar jab bokake Anij. Juõn enjel in jumae, Satan Devil eo, ear kabo Eve ñan mõñã jen wijki in jela emõn im nana.” (Jenesis 2:17) Kin an lorak ilo kejatdikdik eo ñan anemkwoj jen Anij, Eve ear mõñã leen wijki eo, im ejjabto tokelik Adam ear kõmman eindein.

Kin air karmijeteik iroij eo ekwojarjar, Anij ear kadiojlok ir jen Paradise eo im rar nañinmij, eñtan, rittolok, im mij. Eñtan ear jino bõk jikin ilo wãwen mour an armij.​—Jenesis 5:​29.

Uake Kajitõk eo

Juõn armij emaroñ kajitõk, ‘Anij ear jab maroñ baj kajekdon wõt jerawiwi eo an Adam im Eve ke?’ Jaab, kinke men in enaj kar kalaplok air jab kautiej maroñ eo an, bõlen rejañ ro jet tokelik ñan jumae im kalaplok eñtan ko. (Ekklisiastis 8:​11) Kobatok ibben men in, kajettokjen kain kiblia rot in enaj kar kõmman bwe Anij einwõt ñe ear bõk kunan ilo jerawiwi in. Ñan jerbal ekkar ñan kien ko an make, Anij ear aikwij kõtlok bwe Adam im Eve ren eñtan ekkar ñan kiblia eo air.

Etke Anij ear jab kokkure armij rein moktata ilo mõkaj ibben Satan Devil, eo jejjab maroñ loe ñan lujure ir ñan jumae? Ear wõr an maroñ ñan kõmman eindein. Adam im Eve ren kar jab kõmman ro nejiir rej jolet eñtan im mij jen ir. Bõtab, ñan kajerbal kajur eo ekwojarjar ilo wãwen rot in ejamin kar kamol jimwe im maroñ eo an Anij ion armij ro remeletlet. Bareinwõt, elañe ear ejelok nejin Adam im Eve ke rar mij, inem enaj kar melelen bwe en likjap eo ñan karõk eo an Anij ñan kobrak lal kin ro nejiir rewãppen. (Jenesis 1:​28) Im “Anij ejjab einwõt armij . . . Jabdewõt men ej kallimur kake, enaj kajejjet kitien; ej konono, im enaj kõmmane.”​—Numbers 23:​19, Today’s English Version.

Kin meletlet eo an ewãppen, Jehovah Anij ear beek ñan an kõtlok bwe jumae en wõnmanlok iumin jidik wõt ien. Enaj lelok ien ñan ri jumae ro ñan lo jerata ko rej waloktok jen air anemkwoj jen Anij. Men ko rej walok ilo aolepen ien mour eo an armij renaj kamol ilo ejelok bere bwe armij ro rej aikwij jibañ jen lañ im kin utiejen iroij eo an Anij ion iroij eo an armij ak an Satan.

Juõn Jemlok ñan Eñtan

Karmijeteik iroij eo an Anij ear tellok ñan elap eñtan. Inem, ej juõn men ekkar, bwe Anij en kajerbal juõn men ejejuan kin iroij eo an ñan kajemlok eñtan im kajejjet kitien karõk eo an jinointata kin lal in. Jesus ear konono kin karõk in ekwojarjar ke ear katakin ri kalor ro an ñan jar: “Jememiuij i lõñ, . . . en itok Am ailiñ. Ren kõmõnmõn ankil am einwõt i lõñ, bareinwõt ion lõl.”​—Matu 6:​9, 10.

Ien eo Anij ear ear kõtlok bwe armij ro ren kajeoñ in iroij ioir make ebak an jemlok. Ñan kajejjet kitien kanan in Bible eo, ear kajutak Ailiñ eo an ilañ ilo 1914 ibben Jesus Christ einwõt King eo an. Mõttan jidik, enaj juri im kokkure kien ko otemjej an armij.​—Daniel 2:​44, NW.

Ilo ien jerbal eo an ion lal ilo tukaduin, Jesus ear letok juõn wanjoñok kin jerammõn ko iroij eo ekwojarjar enaj bõktok ñan armij ñe ej jeblaktok. Book in Gospel ko rej letok kamol ko bwe Jesus ear tiriamokake ro uan jukjuk im bed in armij eo ear bed ilo eñtan. Ear kejmour ri nañinmij ro, najidik ro rekwuli, im kajerkakbijeik ro remij. Bareinwõt kajur ko imejatoto rar bokake ainikien. (Matu 11:5; Mark 4:​37-​39; Luk 9:​11-​16) Baj lemnak mõk kin ta eo Jesus enaj kõtõbrake ilo ran ko rej itok! Bible eo ej kallimur bwe ikijen iroij eo an Christ, Anij “e naj kõmõraik jen mejeir dren in kemjãlãl, naj ejelok bar mij, iñtan, ak jõñ; bwe men ko mokta re joko.”​—Reveles̃õn 21:4.

Kainemõn Ñan Ro Rej Eñtan

Ej juõn kõketak elap ñan jelã bwe adwõj Anij eo ej yokwe, kajur otem kajur, Jehovah, ej ierõke kij im bwe mõttan jidik enaj bõktok ainemõn im jokane ñan armij otemjej! Kwon liki wõt bwe jerammõn ko an Ailiñ eo an Anij rej ebak elañe kwoj bokake nan in kakabilek ko ilo Bible: “Komin bukot Jeova ke kwo maroñ in lo E; komin kir ñõn e ke Ej ebak.”​—Aiseia 55:⁠6.

Ñan jibañ yuk ñan kõmmane men in, kwon kõmman bwe konono im lukkun katak ilo tibdikin Nan in Anij ej aikwij eo moktata ilo mour eo am. Kwon jelã kajjen Anij im eo ear jilkintok, Jesus Christ. Kwon katakin yuk ñan mour ekkar ñan kien ko an Anij im kwalok bwe kwoj mõnõnõ in kõttãik yuk ñan iroij eo an. Ial rot in enaj bõktok ñan yuk mõnõnõ eo elaplok meñe kwoj jelmae melejoñ ko. Im ilo ran ko tokelik, enaj jemlok ilo am lañliñ im mour ilo juõn lal eanemkwoj jen eñtan.​—Jon 17:3.

[Pija eo ilo peij 5]

Adam im Eve rar karmijeteik iroij eo ekwojarjar