Jemaroñ Bõk Tokjen Jen Ad Kijenmij Ilo Eñtan
“Jej likit ir remõnõnõ ro r’ar kijenmij.”—JEMES 5:11.
1, 2. Ta eo ej kwalok bwe Jehovah ear jab kõnan bwe armij en eñtan?
EJELOK juõn armij ekõnan eñtan; im Ri Kõmanman eo ad, Jehovah Anij, ejjab kõnan bwe armij ro ren bed ilo eñtan. Jemaroñ lo men in ñe jej etale Nan in kakõrmol eo an im lale ta eo ear walok elikin wõt an kõmanman maan im kõrã eo. Mokta, Anij ear kõmanman emaan eo. “Jeova Anij e ar kõmõn im nawãwen armij jen bõñõlñõl in ene; im E ar ukwi ilo bodin menono in mour; im armij eo ej mour.” (Jenesis 2:7) Adam ear wãppen ilo enbwin im lemnak, im ear jab aikwij bõk nañinmij ak mij.
2 Ta kin jikin jokwe eo an Adam? “Im Jeova Anij e ar kalibwin juõn jikin kallip i rear, i Iden; im ijo E ar likit armij eo E ar kõmõne. Im Jeova Anij ear kadrek jen ene wijki otemjej re wõleo ñõn mej, im remõn ñõn mõña.” (Jenesis 2:8, 9) Aet, jikin jokwe eo an Adam ear lukkun aibujuij. Kar ejelok eñtan ilo Eden.
3. Ta kejatdikdik ko kar bed ibben armij ro ruo moktata?
3 Jenesis 2:18 ej jiroñ kij: “Im Jeova Anij e ar ba, E jab emõn bwe armij eo en mõke ian; I naj kõmõn rajitan.” Jehovah ear kõmanman juõn kõrã ewãppen bwe en lio belen Adam, im men in, ear kabellok juõn kejatdikdik emõn bwe en wõr juõn mour in family elemõnõnõ. (Jenesis 2:21-23) Bible eo ej bareinwõt jiroñ kij: “Im Anij e ar kejerammõn ir: im Anij e ar ba ñõn ir, Komin timon im orlok, im kobrõk lõl, im kajur jen e.” (Jenesis 1:28) Armij ro ruo moktata rar maroñ bõk jerammõn eo eaibujuij ñan kalaplok tõrerein Paradise in Eden mae ien eo, aolepen lal in en juõn paradise. Im renaj kar keotak ajiri ro nejiir remõnõnõ im anemkwoj jen eñtan. Ear juõn ien ekabwilõñlõñ ilo jinoin!—Jenesis 1:31.
Ien Eñtan Ej Jinoe
4. Ekkar ñan bwebwenato ko an lal, ta eo ej alikar kin armij ro?
4 Ak, ñe jej lale wãwen makitkit ko an family ko jen ien etto mantak ñan kiõ, alikar bwe juõn men ear kõmman bwe wãwen ko ren oktak im kanuij nana. Men ko renana rar walok, im bõktok elap eñtan ion armij ro. Iumin elõñ buki yiõ ko, aolep ro nejin im jibwin Adam im Eve rar bõk nañinmij, rittolok, im mij. Alikar bwe lal in ejjab juõn paradise eobrak kin armij ro remõnõnõ. Dri Rom 8:22 elukkun jejjet an kwalok kin wãwen in ñe ej ba: “Aolepen men in kõmõn e mat im ñõr, im mat im iñtan ñõn ien in.”
5. Ewi wãwen jemed im jined moktata rar bõktok eñtan ion armij otemjej?
5 Ejjab Jehovah eo ear kõmman bwe aolep eñtan ko ren walok jen ien ko etto ñan kiõ. (2 Samuel 22:31) Jet ien eñtan kein rej itok jen armij. “Re nana, r’ar kõmõnmõn jerbal ko renana otem nana; ejelok juõn iair ej kõmõn emõn.” (Sam 14:1) Ilo jinoin Anij ear lelok men ko remõntata ñan jemed im jined moktata. Men eo wõt rar aikwij kõmmane ej bwe ren wõnmanlok im bokake Anij, ak Adam im Eve rar beek ñan jibadõk juõn ial ejenolok jen Jehovah. Kinke jemed im jined moktata rar karmijeteik ak illok jen Jehovah, rar oktak im jab wãppen. Kiõ jidik kin jidik rar rittolok mae ien eo rar mij. Jaar jolet jab wãppen in jen ir.—Jenesis 3:17-19; Dri Rom 5:12.
6. Ta eo Satan ear kõmmane ñan bõktok eñtan?
6 Bareinwõt jen jinoin eñtan otemjej, enjel eo me ear erom Satan Devil, ear bõk kunan ilo eñtan ko. Kar wõr ibben maroñ eo ñan kãlet ta eo ekõnan kõmmane. Bõtab, ear kãlet ñan kajerbal maroñ in ilo jab jimwe, ilo an kajeoñ in kõmman bwe armij ro ren kabuñ ñan e. Ak, jej aikwij kabuñ ñan Jehovah wõt, im jab ñan men in kõmanman ko an. Kar Satan eo ear kabo Adam im Eve bwe ren bukõt air jenolok jen Jehovah, bwe ren ‘einwõt Anij kin air jela emõn im nana.’—Jenesis 3:5.
Jehovah Wõt Ewõr An Maroñ ñan Iroij
7. Ta eo tokjen ko renana rej waloktok jen jumae Jehovah rej kamole?
7 Tokjen ko renana rej waloktok jen jumae rej kamol bwe Jehovah, Eo Ej Iroij Bõtata ijoko otemjej ilañ im ion lal, e wõt ewõr an maroñ ñan iroij im bwe wãwen an iroij wõt ewãnik. Iumin elõñ thousand yiõ ko kar kwalok bwe Satan, eo ear erom “iroij in lõl in,” ear kajutak juõn wãwen iroij enana, jab wãnik, im lej. Wãwen iroij rot in elukkun jõkkar. (Jon 12:31) Wãwen iroij rot in enana im etto an armij bed iumin kajur eo an Satan ear kalikar bwe ejelok air maroñ ñan iroij ilo jimwe. (Jeremiah 10:23) Inem, aolep wãwen iroij eo an armij, ijellokin wãwen iroij eo an Jehovah, renaj likjap. Ejelok bere bwe bwebwenato ko etto an lal rar kamole men in.
8. Ta karõk eo an Jehovah kin aolep wãwen kien ko an lal, im ewi wãwen enaj kajejjet kitien karõk in an?
8 Kinke Jehovah ear kõtlok elõñ thousand yiõ ko bwe armij ren kajeoñ in ejaak elõñ kain kien ko rejenolok jen e, ewõr bedbedin an jolok aolep wãwen iroij ko air jen lal in im ejaak kien eo an make ñan bõk jikiir. Juõn nan in kanan ej ba: “Ilo ien an king rein iroij [iroij ro an armij], Anij in lõñ enaj kajutak juõn ailiñ [kien eo an ilañ iumin pein Christ] eo ejamin jebeblok, ak enaj kejebeblok aoleben ailiñ ko jet, im enaj bed ñõn indrio.” (Daniel 2:44) Wãwen iroij eo an demon im armij ro renaj jemlok, im Ailiñ eo an Anij wõt ilañ enaj bed im iroij ion lal. Christ enaj King, im 144,000 armij ro retiljek me emwij bõki jen lal renaj iroij ibben.—Reveles̃õn 14:1.
Bõk Tokjen Jen Eñtan
9, 10. Ewi wãwen an kar Jesus bõk tokjen jen men ko ear eñtan kaki?
9 Ej juõn men ekaitoktoklimo bwe jen etale men in aikwij ko me ro rej iroij ilo Ailiñ eo ilañ rej aikwij jerbali. Mokta, Christ Jesus ear kwalok kin ewi joñan emõnin an jerbal einwõt King. Ear bed ibben Jehovah iumin elõñ ebeben ko ñan kõmanman ankil an Jemem, einwõt “juõn dri mejerik.” (Jabõn Kennan Ko 8:22-31) Ke Jehovah ear karõk bwe en wanlaltak ñan lal, Jesus ear mõnõnõ in bokake. Ijin ion lal ear boub in jiroñ ro jet kin iroij bõtata eo an Jehovah im kin Ailiñ eo. Jesus ear likit joñok eo emõntata ilo an kõttãik e kin aolepen buruen ñan iroij bõtata in.—Matu 4:17; 6:9.
10 Jesus ear eñtan kin air matõrtõr e, im ilo jemlokin rar mõn e ñan mij. Ilo ien eo ear kwalok nan ion lal, ear lo wãwen an kar armij ro ibelakin eñtan. Ear wõr ke tokjen an kar lo men kein im ilo an make eñtan? Aet. Dri Hibru 5:8 ej ba: “Meñe Nejin, E ar katak im bokake kin men ko E ar iñtan kaki.” Men ko Jesus ear ioni ke ear bed ion lal rar jibañ e bwe en kwalok joij im tiriamokake. Ear lo wãwen mour an armij ro ke ear bed ibwiljiir. Ear maroñ tiriamokake ro rej eñtan im ear laplok an melele kin jerbal eo an ñan lomoriir. Lale wãwen eo ri jilek Paul ej kalikar men in ilo book in Ri Hibru: “Inem ej ekar ñõn E bwe En einwõt ro jãtin ilo men otemjej, bwe En pris elap e tiriamo im etiljek ilo men ko an Anij, bwe En dri Mirik kin jerawiwi ko an armij rõn. Bwe kin An iñtan ke ar kabo E, ej maroñ in jibõñ ro kabo ir.” “Bwe ar Pris elap e jab juõn ej ban tiriamokake mõjino ko ar; a emwij kabo E kin men ko otemjej, einwõt kij, ijoke ejelok jerawiwi iben. Inem jen beran im kebak ñõn tron in joij, bwe jen bõk tiriamokake, im lo joij im jibõñ ilo ien aikwij.”—Dri Hibru 2:17, 18; 4:14-16; Matu 9:36; 11:28-30.
11. Kin air iminene in mour ion lal, ewi wãwen men in emaroñ wõr tokjen ñan king im priest rein ñe renaj iroij ion armij?
11 Jemaroñ ba eindein kin 144,000, ro “emwij wiaik ir” jen lal bwe ren iroij ibben Christ Jesus ilo Ailiñ eo ilañ. (Reveles̃õn 14:4) Rar lotak ion lal einwõt armij, rittolok ilo juõn lal eobrak kin eñtan ibelakiir, im rar make bõk eñtan bareinwõt. Elõñ iair rar bõk matõrtõr, im jet iair rar mõn ir kinke rar tiljek wõt ñan Jehovah im mõnõnõ in lor Jesus. Ak rar ‘jab jok in kennan kin Iroij eo air, im bõk mõttan eñtan ko kin gospel.’ (2 Timote 1:8) Kin air imminene in mour ion lal, men in ej kamaroñ ir ñan bed ilañ im ekajete armij ro ion lal. Rar katak bwe ren tiriamo, joij, bojak ien otemjej ñan jibañ armij ro.—Reveles̃õn 5:10; 14:2-5; 20:6.
Mõnõnõ ñan Ro Rej Kejatdikdik in Mour ion Lal
12, 13. Ewi wãwen ro rej kejatdikdik in mour ñan indio ion lal remaroñ bõk tokjen jen eñtan?
12 Eñtan ko ilo ran kein remaroñ ke bõktok jabdewõt tokjen ko remõn ñan ro rej kejatdikdik in mour ñan indio ilo juõn paradise ion lal ijo enaj ejelok nañinmij, buromõj, im mij? Tokjen ko renana rej waloktok jen eñtan ko jejjab mõnõnõ in bõki. Ak ñe jej kijenmij ilo eñtan, men in enaj jebar mõnõnõ im jemaroñ kakõmõnmõnlok kadkad ko kadkadid.
13 Kalmenlokjen kin ta eo Nan in kakõrmol an Anij ej ba kin men in: “A elañe kom iñtan kin kwojarjar, kom mõnõnõ wõt.” “Elañe rej kajirere kake kom kin etan Kraist, komij mõnõnõ.” (1 Piter 3:14; 4:14) “Emõnõnõ kom ñe armij re naj kajirere kake kom, im matõrtõr kom, im naj ba nan ko renana otemjej nae kom, riõp wõt, kin Ña. Komin lõñliñ, im kanuij buñburuemi; bwe elap jinekjij ñõn kom i lõñ.” (Matu 5:11, 12) “Emõnõnõ armij eo ej kijenmij ilo melejoñ: bwe ñe emwij kamol e e naj bõk belin mour.”—Jemes 1:12.
14. Ilo wãwen et eo eñtan emaroñ kamõnõnõik ri kabuñ ro an Jehovah?
14 Emol bwe jejjab mõnõnõ ñe jej eñtan. Ak mõnõnõ, im juburu, rej itok jen ad jelã bwe jej eñtan kinke jej kõmanman ankil an Jehovah im lor joñok eo an Jesus. Ñan wanjoñok, ilo ebeben eo kein kajuõn, jet ri jilek ro rar bed ilo kalbuj im kar bõklok ir ñan imõn ekajet eo elap an Ri Jew ro im kõrraate ir kin air kwalok nan kin Jesus Christ. Rar deñõt ir inem kõtlok ir. Kar ewi lemnak eo air? Lokbook eo ilo Bible eo ej ba bwe rar “ilok jen iman mejen ro dri bebe, im lõñliñ bwe emwij likit ir im tellokõn kin air iñtan kin Ãt eo.” (Jerbal 5:17-41) Rar mõnõnõ, jab kin an ri kijirãt ro deñõt im kõmetak ir, ak kin air melele bwe melejoñ kein rar walok kin air tiljek ñan Jehovah im lor jenkwon nee ko neen Jesus.—Jerbal 16:25; 2 Dri Korint 12:10; 1 Piter 4:13.
15. Ewi wãwen kijenmij iumin eñtan ko kiõ remaroñ jibañ kij ilo ran ko rej bedotok?
15 Elañe jej kijenmij iumin jumae im matõrtõr im debij juõn lemnak ejimwe, emaroñ kalek kijenmij iload. Men in enaj jibañ kij ñan kijenmij ilo jabdewõt eñtan rej bed imad. Jej read: “Ro jãtiõ, komin likit e men in lõñliñ otemjej ñe melejoñ kaju wãweir rej kabol kom; Bwe kom jela men in kamol ami tõmak ej jerbale kijenmij.” (Jemes 1:2, 3) Ilo ejja wãwen in lok wõt, Dri Rom 5:3-5 ej jiroñ kij: “Jej lõñliñ ilo iñtan ko ar: im je jela bwe iñtan ej jerbale kijenmij; im kijenmij melejoñ; im melejoñ kejatrikrik; im kejatrikrik e jab kajok.” Inem ñe elaplok ad aikwij kijenmij kiõ kin melejoñ ko kin ad mour einwõt juõn Ri Christian, enaj laplok ad bojak ñan kijenmij kin melejoñ ko jet ilo jukjuk im bed in enana.
Jehovah Enaj Idenwõne
16. Ta eo Jehovah enaj kõmmane kin ro renaj king im priest ilo ran ko rej bedotok ñan nawõnãir kin air eñtan?
16 Meñe jej luji men ko mweied kin an armij ro jumae ak matõrtõre kij kinke jej jutak bin einwõt juõn Ri Christian, jemaroñ jokane wõt kinke jej jelã bwe Jehovah enaj kajerammõn kij ñan maat joñan. Ñan wanjoñok, ri jilek Paul ear jejelok ñan jet ian ro rej kejatdikdik in mour ilañ: “Kom ar . . . mõnõnõ ilo rakimi mweiuk ko mweiemi, kin ami jela bwe ñõn kom ilo jikin emõn, men ko ami remõnlok im re naj berwõt” einwõt iroij ro ilo Ailiñ eo an Anij. (Dri Hibru 10:34) Im baj lemnak mõk kin lañliñ eo ibbeir ñe Jehovah im Jesus Christ rej tel ir ñan leto-letak jerammõn ko raibujuij ñan ro renaj jokwe ilo juõn lal ekãl. Elap an mol nan ko an ri jilek Paul ñan Ri Christian ro retiljek: “Bwe ij watõk iñtan ko ilo ien in jekron ñe keire iben aibujuij eo e naj walok ñõn kij.”—Dri Rom 8:18.
17. Ta eo Jehovah enaj kõmmane ñan ro rej tiljek ñan e kiõ im rej kejatdikdik in mour ñan indio ion lal?
17 Eindein lok wõt, jekdon ta eo ro rej kejatdikdik in mour indio ion lal renaj luji ak karmijete ilo mõnõnõ kin air karejar ñan Jehovah, enaj lap an kajerammõn ir kin ta eo enaj kõmmane ñan ilju im jeklaj. Enaj lelok ñan ir mour indio im wãppen ilo juõn paradise ion lal. Ilo lal eo ekãl, Jehovah “E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan.” (Reveles̃õn 21:4) Ej juõn kallimur ekabwilõñlõñ! Ejelok juõn men ilo lal in jej karmijete ilo mõnõnõ ak jab mõnõnõ kin etan Jehovah emaroñ joñan wõt aorõkin mour eo ekabwilõñlõñ eo ej itok, im enaj lelok ñan ri karejar ro an retiljek elañe rej kijenmij ilo eñtan.
18. Ta kallimur eo ekainemõn Jehovah ej letok ñan kij ekkar ñan Nan eo an?
18 Jabdewõt eñtan jej bõke im aikwij kijenmij kake ejamin bõprae kij jen ad lañliñ ñe jej mour indio ilo lal eo ekãl an Anij. Wãwen ko rekabwilõñlõñ im aibujuij ilo lal eo ekãl renaj bõk jikin eñtan ko otemjej. Aiseia 65:17, 18 ej jiroñ kij: “Im jamin kememej men ko mokta. A komin mõnõnõ im lõñliñ in drio kin men ko Ij kõmõni.” Kin men in, kar juõn men ekkar bwe Jemes, likao eo jãtin Jesus en ba: “Jej likit ir remõnõnõ ro r’ar kijenmij.” (Jemes 5:11) Aet, elañe jej kijenmij ilo tiljek ñe jej bed ilo eñtan, jemaroñ bõk tokjen kiõ im ilo ran ko rej bedotok.
Ewi Wãwen Kwonaj Uak?
• Ewi wãwen armij ro rar jino bõk eñtan?
• Eñtan emaroñ bõktok ta tokjen ko ñan ro renaj iroij ilañ im ro renaj jokwe ion lal ilo ran ko rej bed imair?
• Etke jemaroñ mõnõnõ kiõ meñe jej eñtan?
[Pija eo ilo peij 11]
Jemed im jined moktata kar wõr juõn ilju im jeklaj eaibujuij Anij ear likit imair
[Pija eo ilo peij 13]
Ilo an Jesus lo eñtan ko ear keboje bwe en jerbal einwõt juõn King im Priest Elap im emõn
[Pija eo ilo peij 15]
Ri jilek ro rar “lõñliñ bwe emwij likit ir im tellokõn kin air iñtan” kin tõmak eo air