“Berwõt Ilo Aõ In Nan”

“Elañe komij berwõt ilo Aõ in nan inem kom dri kalora remol.”​—Jon 8:​31.

1. (a) Ke Jesus ear jeblaklok ñan lañ, ta eo ear likiti ion lal in? (b) Ta kajitõk ko jenaj etali?

KE Jesus Christ, Ri Ejaake eo an mour in Christian, ear jeblaklok ñan lañ, ear jab likit ilikin ilo lal in book ko ear jei, menin ekkal ko ear kaleki, mweiuk aorõk ko ear aini. E ar likit ilikin ri kalor ro, bareinwõt menin aikwij ko ñan an juõn tellokin ri kalor. Ilo mol, ilo Gospel John, jej lo bwe Jesus ear kwalok kin jilu menin aikwij ko elap tokjeir bwe jabdewõt eo ej kõnan bwe en ri kaloran ej aikwij kajejjet kitieir. Ta menin aikwij kein? Ta eo jemaroñ kõmmane ñan ad tõbari? Im ewi wãwen ad maroñ lukkun tõmak bwe jej tellokin ri kaloran Christ rainin?a

2. Ta juõn menin aikwij eo elap tokjen ñan an juõn ri kalor, einwõt emwij je ilo John Gospel?

² Enañin jiljino alliñ mokta jen an mij, Jesus ear etal ñan Jerusalem im kwalok nan ñan jar in armij ro rar kweloklok ijo ñan Kwojkwoj in Imõn Kabbed ko juõn week aetokin. Einwõt juõn tokjen, ilo iolapen lok ran in kwojkwoj ko “elõñ ian jar eo rej tõmak E.” Jesus ear etal wõt im kwalok nan, inem ilo ran in kwojkwoj eo eliktata, bar juõn alen “elõñ rar tõmak e.” (Jon 7:​10, 14, 31, 37; 8:​30) Ilo ien in, Jesus ear kanuij lale ri tõmak ro rekãl im ear kennan kin juõn menin aikwij elap tokjen ñan ri kalor ro, einwõt an kar ri jilek John je: “Elañe komij berwõt ilo Aõ in nan inem kom dri kalora remol.”​​—⁠Jon 8:​31.

3. Ta kadkad eo ej menin aikwij ñan an juõn “bedwõt ilo nan eo” an Jesus?

³ Kin nan kein, Jesus ear jab ba bwe ri tõmak rein rekãl ear jabwe air tõmak. Ak, ear kwalok bwe ebed imair ien eo emõn ñan air oktak im ri kalor ro an remol​​—⁠elañe rar berwõt ilo an in nan, bwe rar kwalok air kijenmij. Rar bõk nan eo an, ak kiõ rar aikwij etal wõt im bed ie. (Jon 4:​34; Dri Hibru 3:​14) Emol, Jesus ear lemnak kin kijenmij einwõt juõn kadkad eaorõk ñan ri kalor ro an bwe ilo ennan eo an eliktata ibben ri jilek ro an, emwij je ilo Gospel John, Jesus ear kõketak ruo alen: “Kwon lor Iõ.” (Jon 21:​19, 22) Elõñ Christian ro ilo jinoin rar kõmmane menin. (2 Jon 4) Ta eo ear jibañ ir ñan kijenmij?

4. Ta eo ear kamaroñ Christian ro jinoin ñan air kijenmij?

⁴ Ri jilek John, juõn ri kalor etiljek an Christ ilo jet 70 yiõ ko, ear jitõñlok ñan juõn mol eo elap tokjen. E ar nebar Christian ro retiljek, im ba: “I ar jejewoj ñõn kom, ro likao bwe komij bin, im nan in Anij ej berwõt ilo kom, im kom ar bõk anjo jen dri nana eo.” Ri kalor rein an Christ rar kijenmij, ak bedwõt ilo nan in Anij, kinke nan in Anij ear bed wõt ilo ir. Rar lukkun kaorõke. (1 Jon 2:​14, 24) Eindein rainin, ñan ad maroñ ‘kijenmij ñan jemlokin,’ jej aikwij kanuij lale bwe nan in Anij en bedwõt ilo kij. (Matu 24:13) Ewi wãwen ad maroñ kõmmane menin? Juõn wanjoñok Jesus ear jiroñ kake ej letok uak eo.

“Roñjake Nan eo”

5. (a) Ta wãwen bũdej ko reoktak jen don Jesus ear kwalok kaki ilo wanjoñok ko an? (b) Ta ine eo im bũdej eo ilo wanjoñok eo an Jesus rej jutak ikijen?

⁵ Jesus ear konono kin juõn wanjoñok kin juõn ri jeor eo ej jeor ine, im emwij je ilo Gospel ko Matu, Mark, im Luk. (Matu 13:​1-9, 18-​23; Mark 4:​1-9, 14-​20; Luk 8:​4-8, 11-​15) Ke kwoj konono bwebwenato ko, kwo naj loe bwe key eo elap kin wanjoñok in ej bwe juõn wõt kain ine in ej wõtlok ion elõñ kajjo kain bũdej ko, im kwalok tokjen ko reinjuõn jen don. Wãwen eo moktata ej bũdej eo ebin, eo kein karuo ebejbej, im eo kein kajilu eobrak kin kãliklik. Wãwen eo kein kemen, ejjab einwõt ko jilu, bwe ej “brij emõn.” Ekkar ñan kamelele eo an Jesus make, ine eo ej ennan eo an ailiñ eo jej loe ilo Nan in Anij, im bũdej eo ej jutak kin armij ro einjuõn wãwen ko ilo burueir. Meñe armij ro rej pijaik ir ikijen kajjo wãwen bũdej im ewõr jet men ko eierlok wõt juõn, armij ro rej pijaik ir kin bũdej emõn ewõr juõn kadkad eo ej kajenolok ir jen ro jet.

6. (a) Ewi wãwen bũdej eo kein kemen ilo wanjoñok eo an einjuõn jen wãwen ko jilu, im ta melelen menin? (b) Ta eo elap tokjen ñan kwalok kijenmij einwõt ro ri kaloran Christ?

⁶ Bwebwenato eo ilo Luk 8:​12-​15 ej kwalok bwe ilo aolepen wãwen ko emen, armij ro rej ‘roñjake nan eo.’ Bõtab, ro ewõr “juõn buru emõn” rej ellãlok jen “roñjake nan eo.” Rej “bõke im jebar leen kin kijenmij.” Bũdej eo emõn, ke ebidodo im mũlal ej kõtlok an okran ine eo ruñlok lallok, im tokjen, ine eo ej jul im jebar leen. (Luk 8:⁠8) Ilo wãwen in lok wõt, ro emõn burueir rej melele im kaorõk im bõk nan in Anij. (Dri Rom 10:10; 2 Timote 2:⁠7) Nan in Anij ej bed ilo ir. Kin menin, rej jebar leen kin kijenmij. Juõn eñjake in buru in kamolol eo emũlal kin Nan in Anij elap tokjen ñan kwalok kijenmij einwõt ro ri kaloran Christ. (1 Timote 4:​15) Ak, ewi wãwen ad maroñ ejaake buru in kamolol rot in kin Nan in Anij?

Wãwen Buru eo im Kalmenlokjen eo Ewõr Melelen

7. Ta makitkit eo ebaklok an koba ibben juõn buru emõn?

⁷ Lale kin ta makitkit eo Bible ej eliji im ej ekkeijaklok ibben juõn buru emõn. “Buruen dru wãnik, ej kalomõnlokjen kin an uak.” (Jabõn Kennan Ko 15:28) “Nan ko jen loõ, im lemnok ko ilo buruõ, ren emõn iman mejõm, O Jeova.” (Sam 19:14) “Kalomõnlokjen in buruõ e naj kin jelalokjen.”​​—⁠Sam 49:⁠3.

8. (a) Ñe jej konono Bible, ta eo jej aikwij bõprae ak ta eo jej aikwij kõmmane? (b) Ta tokjen ko jej tõbari ilo ad jar im kalmenlokjen kin Nan in Anij? (Kobaik box eo “Bin Wõt ilo Mol eo.”)

⁸ Einwõt ri jeje Bible rein, kij bareinwõt jej aikwij kalmenlokjen kin kamolol im kin jar kin Nan in Anij im makitkit eo an. Ñe jej konono Bible ak book ko rej bedbed ion Bible, jej aikwij jab mõkaj im einwõt ñe kij eo jej ekaiuriuri ri aluij ro rej ekaiuriur jen juõn jikin aluij ñan eo tok juõn, bõk elõñ pija ko ak rejjab lukkun lo emõnin ijo rej aluije. Jen an eindein, ñe jej katak Bible, jej kõnan bõk ien ñan bõjrak im mõnõnõ kin eon ko ilo Bible, eindein ilo nan.b Ke jej kejeklokjen im kalmenlokjen kin men eo jej konono, nan in Anij ej jelet buruõd. Ej uñur eñjake ko ad im eiki ad lemnak. Ej bareinwõt kamakit kij ñan ad konono kin lemnak ko ad ibben Anij ilo jar. Kin menin, kobalok eo ad ibben Jehovah ej kajurlok, im yokwe eo ad ñan Anij ej lujur kij ñan ad wõnmanlok wõt im anõk Jesus meñe iumin wãwen ko rebin. (Matu 10:22) Ealikar, bwe kalmenlokjen kin men eo Anij ej ba elap tokjen elañe jej kõnan bwe jen bed wõt ilo ad tiljek ñan jemlokin.​​—⁠Luk 21:⁠19.

9. Ewi wãwen ad maroñ kanuij lale bwe buruõd en bedwõt im bõk nan in Anij?

⁹ Wanjoñok eo an Jesus ej bareinwõt kwalok bwe ewõr kabañbañ ko ñan eddek eo an ine eo, nan in Anij. Kin menin, ñan bedwõt einwõt ri kalor ro retiljek, jej aikwij (1) kile kabañbañ ko kin wãwen ko an bũdej eo ejjab emõn einwõt kar kwalok kake ilo wanjoñok eo im (2) bõk buñten nee ko ñan kajimwe ak bõpraiki. Ilo wãwen in, jenaj lukkun lale bwe buruõd ej bõk ine eo an Ailiñ eo im kejbãrok bwe en elle wõt leen.

“Iturin Ial”​—⁠Rej Boub im Mad

10. Kwalok kin wãwen bũdej eo moktata ilo wanjoñok eo an Jesus, im kamelele melelen.

¹⁰ Kain bũdej eo moktata ine eo ej buñõt ej “iturin ial,” ijo ine eo rej “juri.” (Luk 8:⁠5) Bũdej eo iturin juõn ial eo ej ilok ilo juõn melaj in jikin kallip in wit ebin kin an lõñ ri etetal ro rej etal ielok. (Mark 2:​23) Eindeinlok, ro rej kõtlok an itok im etal makitkit ko an lal in ñan jibed ir kin ien ko air im menin ekaiuriur remaroñ lo bwe elap air boub ñan ejaake jabdewõt eñjake in buruen kamolol kin nan in Anij. Rej roñjake, ak rej likjap in kalmenlokjen kake. Inem burueir ej bed ilo juõn wãwen eo ejjab uak. Mokta jen air ejaake juõn yokwe ñane, “Devil ej itok im bõklok nan jen burueir, bwe ren jab tõmak im mour.” (Luk 8:​12) Remaroñ ke bõprae menin?

11. Ewi wãwen ad maroñ kabõjrak wãwen eo an buruõd jen an oktak im einwõt bũdej eo ebin?

¹¹ Elõñ men ko jemaroñ kõmmane ñan bõprae buru eo jen an oktak im einwõt bũdej eo iturin ial im ejjab kalle. Bũdej eo rej juri im ebin emaroñ oktak im bidodo im kalle elañe rej bwoktake im rej ukõte jen an wa ettõr ie im armij rejjab etetal ie. Ilo wãwen in lok wõt, kõmman ien ñan katak im kalmenlokjen kin Nan in Anij emaroñ walok tokjen ilo an buru eo oktak im einwõt bũdej eo emõn im ekouwa. Key eo ejjab ñan oktak im lap boub kin men ko ilo mour in ran otemjej. (Luk 12:​13-​15) Jen an eindein, kanuij lale bwe kwon karõk ien ñan kalmenlokjen kin “men ko elaplok tokjeir” ilo mour.​​—⁠Philippians 1:​9-​11, NW.

“Ion Dreka”​​—⁠Bed ilo Mijak

12. Ta lukkun un eo bwe jul eo ej aemedlok ilo bũdej eo kein karuo rej kwalok ilo wanjoñok eo an Jesus?

¹² Ñe ine eo ej buñõt ion ial eo kein karuo, ejjab baj bedwõt ion, einwõt ilo wãwen eo kein kajuõn. Ej eddek okran im walok jul ko. Ak ke ej wanliñtak al, jul eo ej bwil kin okmãnãn in al im ej aemedlok. Bõtab, lale tibdik in melele in elap tokjen. Lukkun un eo jul eo ej aemedlok ejjab kin mãnãn eo. Bwe, menin eddek eo ej wanliñtak ilo bũdej eo emõn ej bareinwõt bõk jibañ jen al, ak ejjab aemedlok​​—⁠ilo mol, ej ebbõl. Ta eo ej kõmman oktak? Jul in emõkaj an aimerlok,” Jesus ej kamelele, “bwe ebijbij brij” im “ejelok molawi.” (Matu 13:​5, 6; Luk 8:⁠6) Juõn ejaakin “dreka” ej bed iumin bũdej eo, ej kabõjrak ine eo jen an ruñlok okran bwe en lo molawi im jokkin wõt juõn. Jul eo ej aemedlok kinke bũdej eo ebejbej.

13. Kain armij rot ro rej einwõt bũdej eo ebejbej, im ta un eo emũlallok kin wãwen air emmakit?

¹³ Mõttan in ilo wanjoñok in ej jitõñlok ñan kajjojo armij ro “rej bõk nan im lõñliñ” im ilo kijejeto lor Jesus “kin juõn unin.” (Luke 8:​13, NW) Ñe rej jedmatmat ñan bwil in al kin “iñtan ak matõrtõr,” rej oktak im kin an lap air mijak rej luji lañliñ im kajur eo air im bõjrak jen air lor Christ. (Matu 13:21) Bõtab, un eo emũlallok unin air mijak, ejjab kin jumae. Bwe, million ro ri karejaran Christ rej kijenmij ilo elõñ kajjo kain eñtan, ak rej bedwõt ilo air tiljek. (2 Dri Korint 2:4; 7:⁠5) Un eo emol unin an jet oktak im mijak im ellãlok jen mol eo ej bwe wãwen eo einwõt dekã ilo burueir ej kabõjrak ir jen an mũlal air kalmenlokjen kin men ko remol im men ko ilo jitõb. Kin menin, kamolol eo rej ejaake ñan Jehovah im nan eo an elap an bejbej im mõjno ñan jutak nae jumae. Ewi wãwen an juõn maroñ bõprae men in jen an walok?

14. Ta buñten nee ko juõn armij ej aikwij bõke ñan kabõjrak wãwen buruen jen an oktak im einwõt bũdej eo ebejbej?

¹⁴ Juõn armij ej aikwij kanuij lale bwe en ejelok menin kabañbañ ko einwõt dekã, im ej kõmman an wõr eñjake eo emũlal an meo im ejjab mõkaj an alikar, an juõn itoklimo kake e make, ak men eo einlok wõt an bin ak eñjake ko rittino, men kein rej bed ilo buruen armij eo. Elañe juõn menin kabañbañ eo ededelok an bõk jikin, kajur eo ej bed ilo nan in Anij emaroñ kamakiti. (Jeremiah 23:​29, NW; Dri Epesõs 4:​22; Dri Hibru 4:​12) Kin menin, kalmenlokjen ilo jar enaj lujur im “kaddek ennan eo” ilo tumũlalin buruen armij eo. (Jemes 1:​21) Menin enaj letok kajur ñan kamadmõd ilo ien ko ien ebwer im kõketak ñan bedwõt ilo tiljek jekdon menin melejoñ ko.

“Iolapin Kãliklik Ko”​​—⁠Buru Jebelbel

15. (a) Etke wãwen bũdej eo kein kajilu Jesus ear kwalok kake elaptata an tellokin ad kanuij lale? (b) Ta eo ej etal im walok ibben wãwen bũdej eo kein kajilu, im etke?

¹⁵ Wãwen brij eo kein kajilu, juõn eo ibben kãliklik ko, elap an lap tokjen ñan ad kanuij kalimjeke kinke ilo jet wãwen ko ej einlok wõt brij eo emõn. Einwõt brij eo emõn, bũdej eo eobrak kin kãliklik ej kõtlok bwe ine eo en eddek okran im jul. Ilo jinoin, ejelok oktak ilo an eddek menin eddek eo ekãl ilo kain bũdej kein ruo. Bõtab, kin ien, juõn wãwen eo ej ejaak ej etal im kautameiki menin eddek eo. Ilo an jab einwõt bũdej eo emõn, bũdej in ej oktak im obrak kin kãliklik ko. Ke menin eddek eo edik ej walok liñtak jen bũdej in, ej jelmae aitwerõk jen ‘kãliklik ko rej eddek liñtak ie.’ Iumin jidik ien menin eddek kein jimor rej kate ir ñan õn, meram, im mejatoto, ak kãliklik ko rej etal im kalur menin eddek eo im ‘kautameiki.’​​—⁠Luk 8:⁠7.

16. (a) Armij et ro rej einlok wõt bũdej eo eobrak kin kãliklik? (b) Ekkar ñan bwebwenato ko ilo Gospel ko jilu, ta eo kãliklik ko rej jutak ikijen?​​—⁠Lale footnote eo.

¹⁶ Kain armij rot ro rej einlok wõt bũdej eo eobrak kin kãliklik? Jesus ej kamelele: “Im eo ej buñõt ilo kãliklik ko, rein ro r’ar roñjake, im rej ilok, im lemnok ko, im mweiuk ko, im mõnõnõ ko an mour in rej koutameik ir, im re jab jebar leen emõn.” (Luk 8:​14) Einwõt ine eo an ri jeor eo im kãliklik ko rej eddek ilo bũdej eo ilo ejja ien eo wõt, eindein jet armij ro rej kajeoñ in na jikin nan in Anij im “mõnõnõ ko an mour in” ilo ejja ien eo wõt. Mol eo kin nan in Anij rej jeore ilo burueir, ak ej jelmae aitwerõk jen jibadbad ko jet rej kõmman menin air boub kaki. Buru eo burueir ilo nan in kõkkar ejebel. (Luk 9:​57-​62) Menin ej bõprae ir jen air bõk ebwe ien ñan jar im kalmenlokjen eo ewõr melelen ion nan in Anij. Rej likjap in bõk nan in Anij im ilo wãwen in jabwe air kamolol jen eñjake in buru ke ej menin aikwij ñan kijenmij. Ejjabto, itoklimo ko air ilo men ko ilo jitõb jibadbad ko ilo men ko rejjab ilo jitõb renaj kajur ioir ñan joñan eo rej “koutameik ir.”c Juõn jemlok ekaburomõjmõj ñan ro rejjab yokwe Jehovah kin aolepen burueir!​​—⁠Matu 6:​24; 22:⁠37.

17. Ta jokãlet ko jej aikwij kõmmani ilo mour bwe kãliklik in kõkkar ko rej kwalok kaki ilo wanjoñok eo an Jesus ren jab kautameik kij?

¹⁷ Ilo ad likit mokta men ko ilo jitõb jen lemnak ko kin mweiuk, jej bõprae an metak ko im kamõnõnõ ko an mour in kautameik kij. (Matu 6:​31-​33; Luk 21:​34-​36) Jejjab aikwij kajekdon ad konono Bible im kalmenlokjen kin men eo jej konono. Jenaj lo elaplok ien ñan liñõre im jar ilo kalmenlokjen elañe jej kalamwan mour eo ad joñan wõt ad maroñ. (1 Timote 6:​6-8) Ro ri karejaran Anij ro rar kõmman eindein​​—⁠ro rar, einwõt ilo kõkkar, totake kãliklik ko jen bũdej eo ñan lelok elaplok õn, meram, im jikin ñan menin eddek eo ej jebar leen​​—⁠rej lo kajerammõn ko jen Jehovah. Sandra, 26 yiõ dettan ej ba: “Ñe Ij kalmenlokjen kin jerammõn ko aõ ilo mol eo, Ij kile bwe ejelok men en lal in emaroñ letok ñan keidi ibben!”​​—⁠Sam 84:⁠11.

18. Ewi wãwen ad maroñ bedwõt ilo nan in Anij im kijenmij einwõt Christian ro?

¹⁸ Inem ealikar, bwe kij otemjej, dik im ritto, jenaj bedwõt ilo nan in Anij im kijenmij einwõt ro ri kaloran Christ toan wõt an nan in Anij bed ilo kij. Kin menin, jen kanuij lale bwe bũdej eo ilo buru eo buruõd ilo nan in kõkkar en jab oktak im bin, bejbej, ak obrak kin menin eddek ko rejjab emõn ak en bedwõt ilo an bidodo im mũlal. Ilo wãwen in, jenaj maroñ wõrañlok nan in Anij im “kijenmij ilo air jebar leen.”​​—⁠Luk 8:​15.

[Kamelele ko itulal]

Ta Uak Ko Am?

• Etke jej aikwij ‘bedwõt ilo nan eo an Jesus’?

• Ewi wãwen ad maroñ kõtlok bwe nan in Anij en bedwõt ilo buruõd?

• Kain armij rot ro wãwen bũdej ko emen reoktak jen don rej jutak ikijir im Jesus ear kwalok kake?

• Ewi wãwen am maroñ lo ien ñan am kalmenlokjen kin nan in Anij?

[Bo̦o̦k/Pija eo ilo peij 8]

“BIN WÕT ILO MOL EO”

ELÕÑ ri kalor ro an Christ etto air bed ilo mol eo rej kamol jen yiõ ñan yiõ air “bin wõt ilo mol eo.” (2 Piter 1:​12) Ta eo ej jibañ ir kijenmij? Kalmenlokjen kin uak ko air.

“Ij kajemlok ran ko kajjojo ilo aõ konono Bible im jar. Inem Ij kalmenlokjen kin ta eo Iar read.”​​—⁠Jean, ear baptais ilo 1939.

“Ñe ij kalmenlokjen kin ewi joñan an lap an Jehovah, eo eutiejtata, yokwe iõ ej kainemõn im kakajur iõ bwe in tiljek wõt.”​​—⁠Patricia, ear baptais ilo 1946.

“Ilo aõ bedwõt ilo manit ko remõn ñan katak-Bible im liñõre ‘men ko remũlal an Anij,’ iar maroñ wõnmanlok im karejar ñan Jehovah.”​​—⁠1 Dri Korint 2:​10; Anna, ear baptais ilo 1939.

“Ij konono Bible im book ko rej bedbed ion Bible bwe In etale buruõ im kõnan ko aõ.”​​—⁠Zelda, ear baptais ilo 1943.

“Ien ko remõntata rej ñe ij etetal im konono ibben Jehovah ilo jar im baj kwalok wõt kin ta eo ej bed ilo buruõ.”​​—⁠Ralph, ear baptais ilo 1947.

“Ij jino ran eo ilo aõ reade unin tel in ran im juõn mõttan Bible eo. Men in ej letok juõn men ekãl ñan kalmenlokjen kake ilo ran eo.”​​—⁠Marie, ear baptais ilo 1935.

“Ñan ña, bwebwenato kin eon ko ñan juõn book in Bible eo ej juõn kein lujure iõ.”​​—⁠Daniel, ear baptais ilo 1946.

Ñããt kwoj kalmenlokjen ilo jar kin Nan in Anij?​​—⁠Daniel 6:​10b, NW; Mark 1:​35; Jerbal 10:⁠9.

[Pija eo ilo peij 11]

Ilo ad likit mokta ñan men ko ilo jitõb, jemaroñ “kijenmij ilo ad jebar leen”