Jeova Ej Yokwe Ro Rej “Kijenmej ilo Aer Jebar Leen”

1, 2. (1) Etke jej bõk kõketak jãn ro rej tiljek wõt ilo aer kwal̦o̦k naan ilo teretore ko armej rejjab m̦õn̦õn̦õ in roñjake? (Lale pija eo itulõñ.) (2) Ta eo Jesus ear ba kõn kwal̦o̦k naan ilo “aelõñ eo an”? (Lale kõmel̦el̦e eo itulal̦.)

RIPPÃLELE ro Sergio im Olinda rej bainier im 80 jim̦a aerro iiõ im rej jokwe ilo Amedka. Kiiõ epenl̦o̦k aerro em̦m̦akũtkũt kõn an metak neerro. Bõtab, ãinwõt aerro kõn kõm̦m̦ane ium̦win elõñ iiõ ko m̦aantak, aolep jibboñ erro ej etetall̦o̦k ñan ijo ekkã an lõñ armej ie ilo bukwõn eo im ñe rej tõparl̦o̦k ijo ejimjuon awa. Erro kõn jutak iturin juon jikin kõttar bus im lel̦o̦k an armej ro bok ko ad me rej pedped ioon Baibõl̦. Enañin aolep armej ro rej kõjekdo̦o̦ne erro, ak meñe ãindein erro ej jutak wõt ijo rej pãd ie im mejãn m̦õn̦õn̦õl̦o̦k ñan ro rej kalimjek erro. Ilo ãlikin raelep, erro ej jino ajãdikl̦o̦k ñan m̦weo im̦weer. Ilo jibboñõn raan eo tok juon ke ej 7 awa, erro ej bar jutak im pãd ijo. Ilo m̦ool, rippãlele rein rej kijejeto in kwal̦o̦k naan kõn Aelõñ eo 6 alen ilo juon wiik aolep iiõ.

² Ãinwõt Sergio im Olinda, elõñ ro jeid im jatid retiljek ipel̦aakin lal̦ in eto aer kwal̦o̦k naan ium̦win elõñ iiõ ko ilo teretore ko me armej rejjab roñjake. El̦aññe apañ in ej ãinl̦o̦kwõt wãween eo kwõj iioone, el̦ap ammim nõbar eok kõn am̦ kijenmej!a (Lale kõmel̦el̦e eo itulal̦.) Am̦ tiljek wõt ilo am̦ karejar ñan Jeova ej juon menin kõketak ñan aolep, ekoba rũttõmak ro el̦ap imminene ko ippãer. L̦õmn̦ak m̦õk kõn naan kein an jet em̦m̦aan ro rej lol̦o̦k eklejia ko. Rar ba: “Ñe ij jerbal ippãn ro jeid im jatid ilo kwal̦o̦k naan, el̦ap aõ bõk kõketak jãn joñak ko aer.” “Aer tiljek wõt ej rõjañ eõ ñan wõnm̦aanl̦o̦k wõt im peran ilo aõ kwal̦o̦k naan ñan armej.” “Joñak kein aer el̦ap aer tõpar bũruõ.”

3. Ta kajjitõk ko jilu jenaaj etali, im etke?

³ Ñan kõkajoor kõj bwe jen kadedel̦o̦k jerbalin kwal̦o̦k naan eo Jesus ear kappeik kõj kake, jen etale uwaak ko ñan kajjitõk kein jilu: Etke ewõr iien jenaaj ebbeer? Ewi wãween ad maroñ jebar leen? Im ta eo enaaj jipañ kõj ñan kijenmej wõt ilo ad jebar leen?

ETKE EWÕR IIEN JENAAJ EBBEER?

4. (1) Ewi wãween an kar men ko renana RiJu ro rar kõm̦m̦ani im aer kar jab kõn̦aan roñjake rar jelõt Paul? (2) Etke Paul ear bõk eñjake kein?

⁴ El̦aññe kwaar ebbeer ke kwaar kwal̦o̦k naan ilo teretore ko armej ro ie rejjab m̦õn̦õn̦õ in roñjake, eokwe kwõnaaj mel̦el̦e kõn eñjake eo an rijjilõk Paul. Ilo enañin 30 iiõ ko in an kwal̦o̦k naan, ear jipañ elõñ armej ro ñan oktak im rũkal̦ooran Christ. (Jrb. 14:21; 2 Ko. 3:2, 3, UBS) Bõtab, ear jab lo tõprak ñan kõm̦akũt elõñ RiJu ro bwe ren rũkabuñ ro rem̦ool. Ijello̦kun, elõñ rar jab kõn̦aan roñjake Paul im jet rar kaeñtaane. (Jrb. 14:19; 17:1, 4, 5, 13) Ewi wãween an kar men ko renana RiJu ro rar kõm̦m̦ani im aer kar jab kõn̦aan roñjake rar jelõt Paul? Ear kwal̦o̦k m̦ool im ba: “Ij kõnono m̦ool ilo Christ, . . . Bwe el̦ap aõ bũrom̦õj im ejjab jokwõd metak ilo bũruõ.” (Rom 9:1-3) Etke Paul ear bõk eñjake kein? Kõnke ear l̦ap an kaorõk jerbalin kwal̦o̦k naan. Ear kwal̦o̦k naan ñan RiJu ro kõnke ear l̦ap an kea kake er. Innem, Paul ear metak ke ear lo an armej rein kõjekdo̦o̦n tũriam̦o eo an Anij.

5. (1) Ta eo ej kõm̦akũt kõj ñan kwal̦o̦k naan ñan ro rũturid? (2) Etke ewõr iien jej itõn ebbeer?

⁵ Ãinwõt Paul, jej kwal̦o̦k naan ñan armej ro kõnke jej yokwe im kea kake er. (Matu 22:39; 1 Ko. 11:1) Etke jej ãindein? Kõnke kõj make em̦õj ad loe wãween an Jeova kõjeraam̦m̦an ro rej karejar ñane. Ñe jej l̦õmn̦ak kõn armej ro kajjojo ilo teretore ko ad, jej ba ippãd make im ba, ‘Yokwe bwe ren kar kile joñan an em̦m̦an ñan karejar ñan Jeova!’ Kõn men in, jej kate wõt kõj ñan rõjañ er bwe ren katak m̦ool eo kõn Jeova im karõk ko an ñan armej. Ej ãinwõt ñe jej ba ñan ro jej kwal̦o̦k naan ñan er: ‘Kõmar bõktok juon menin lewaj em̦m̦an. Jouj im bõke.’ Innem ñe armej ro rej m̦akoko in bõke menin lel̦o̦k eo, ejjel̦o̦k pere bwe ej ‘metak bũruod’ kõn men in. Bõtab ejjab mel̦el̦ein bwe edik ad tõmak ñe jej bõk eñjake in, ak ej kaalikkar ad kaorõk jerbalin kwal̦o̦k naan. Innem meñe ewõr iien jej ebbeer, ak jej kijenmej wõt. Elena, juon eo ear bainier elõñl̦o̦k jãn 25 iiõ, ej kwal̦o̦k eñjake eo an me elõñ iaad rej bar bõke. Ear ba: “Ij kile bwe jerbalin kwal̦o̦k naan ej juon jerbal epen. Meñe ãindein ak ejjel̦o̦k bar juon jerbal ikõn̦aan kõm̦m̦ane ijello̦kun jerbal in.”

EWI WÃWEEN AD MAROÑ JEBAR LEEN?

6. Ta kajjitõk eo jenaaj etale kiiõ?

⁶ Etke jej tõmak bwe jemaroñ jebar leen ilo ad jerbalin kwal̦o̦k naan jekdo̦o̦n ia eo jej kwal̦o̦k naan ie? Ñan uwaake kajjitõk in eaorõk, jen etale waanjoñak ko ruo an Jesus kõn aikuj eo ñan ‘jebar leen.’ (Matu 13:23) Waanjoñak eo jinoin ej kõn juon wõjke vain.

7. (1) Wõn “rũkallib eo,” “wõjke vain eo,” im “ra ko” rej jitõñl̦o̦k ñani? (2) Kajjitõk ta eo jekõn̦aan pukot uwaakin?

⁷ Riit Jon 15:1-5, 8. L̦õmn̦ak m̦õk kõn naan kein an Jesus ñan rijjilõk ro an: “Ilo men in Jema ej aiboojoj, bwe kom̦ij jebar elõñ leen; im ãindein kom̦ naaj rũkal̦oora.” Jesus ear kõnono kõn Jeova ãinwõt juon “rũkallib,” e ãinwõt juon wõjke “vain em̦ool,” im rũkal̦oor ro an rej “ra ko.”b (Lale kõmel̦el̦e eo itulal̦.) Innem, ta leen ko rũkal̦oor ro an Christ rej aikuj jebari? Ilo waanjoñak in, Jesus ear jab kajju kwal̦o̦k ta leen ko rej jitõñl̦o̦k ñani. Bõtab ear tipdikitok mel̦el̦e ko me remaroñ jipañ kõj ñan jel̦ã uwaak eo.

8. (1) Ilo waanjoñak in, etke leen ko rejjab jitõñl̦o̦k ñan ro rej erom rũkal̦oor? (2) Ewi joñan an Jeova kajjitõk bwe jen kõm̦m̦ani men ko ekõn̦aan?

⁸ Ke Jesus ear kõnono kõn Jemãn ear ba: “Jabdewõt ra ilo Ña ejjab jebar leen, Ej bõkl̦o̦k” ak jol̦o̦ke. Mel̦el̦ein bwe wãween eo wõt Jeova emaroñ watõk kõj ãinwõt rũkarejar ro an ej ñe jej jebar leen. (Matu 13:23; 21:43) Innem, ilo waanjoñak in, leen ko me kajjojo Kũrjin ro rej aikuj jebari rejjab jitõñl̦o̦k ñan aer kõm̦m̦an rũkal̦oor. (Matu 28:19) El̦aññe kar mel̦el̦e eo in, ro jeid im jatid retiljek me rejjab lo tõprak ilo aer kõm̦m̦an rũkal̦oor renaaj kar ãinwõt ra ko rejjab jebar leer ilo waanjoñak eo an Jesus. Bõtab ejjab mel̦el̦e eo in ñan jidik! Jejjab maroñ iuuni armej ro ñan erom rũkal̦oor. Kõnke Jeova ej juon Anij in yokwe eban jol̦o̦k armej ro rej karejar ñane ñe rejjab maroñ kõm̦m̦ani men ko me el̦ap jãn joñan aer maroñ. Jabdewõt men Jeova ej kajjitõk bwe jen kõm̦m̦ani, aolep iien jemaroñi.​—Dt. 30:11-14.

9. (1) Jej jebar leen ilo ad bõk kun̦aad ilo jerbal rot? (2) Ta waanjoñak eo jenaaj etale, im etke?

⁹ Innem ta leen ko jej aikuj jebari? Ealikkar bwe leen ko rej jitõñl̦o̦k ñan juon jerbal me kajjojo iaad emaroñ bõk kun̦aad ie im kõm̦m̦ane. Ta jerbal in me ej jitõñl̦o̦k ñan ad “jebar leen”? Ej jerbalin kwal̦o̦k naan kõn Aelõñ eo an Anij.c (Lale kõmel̦el̦e eo itulal̦.) (Matu 24:14) Waanjoñak eo an Jesus kõn rũkallib ine eo enaaj kam̦oole men in. Jen etale kiiõ waanjoñak in kein karuo.

10. (1) Ilo waanjoñak in, ta ine eo im bwidej eo rej jitõñl̦o̦k ñane? (2) Ta eo juon wiit ej jebare?

¹⁰ Riit Luk 8:5-8, 11-15. Ilo waanjoñak eo kõn rũkallib ine eo, “naanin Anij” ej ine eo ak ennaan eo kõn Aelõñ eo. Bwidej eo ej jitõñl̦o̦k ñan bũruon juon armej. Ine eo ear wõtlo̦k ilo bwidej eo em̦m̦an ear ejaak okar, jul̦ im jen ba bwe ear eddek im erom juon kããn wiit. Innem, ear “jebar leen jibukwi kõn juon.” Ak ewi wãween an naaj kalle? Enaaj ke kalle kããn wiit jiddik ko? Ejjab, enaaj jebar ine ko me tokãlik remaroñ bar eddek im erom juon kããn wiit. Ilo waanjoñak in, juon wõt ine ej jebar jibukwi ine ko. Ewi wãween an men in jitõñ tok ñan jerbal in kwal̦o̦k naan?

11. (1) Ewi wãween an waanjoñak eo kõn rũkallib ine eo jitõñl̦o̦k ñan jerbalin kwal̦o̦k naan? (2) Ewi wãween ad jebar leen Aelõñ eo?

¹¹ Ñan keidi men in, jen ba bwe ilo kar iiõ ko remootl̦o̦k jet Ri Kõnnaan ro an Jeova ak ro jemãd im jined rar kwal̦o̦k naan ñan kõj kõn Aelõñ eo. Ejjel̦o̦k pere rar lañlõñ ke rar kile an m̦ool bũruod im m̦õn̦õn̦õ in katak kõn ennaan eo kõn Aelõñ eo. Ãinwõt an kar ine eo maroñ eddek ilo bwidej eo em̦m̦an ilo waanjoñak eo an Jesus, jaar m̦õn̦õn̦õ in roñjake ennaan eo im dãpiji wõt. Tokjãn men in, ennaan eo kõn Aelõñ eo me ej ãinwõt juon ine ilo kõkkar ear ejaak okar ilo bũruod, eddek ñan juon kããn wiit, im tokãlik pojak ñan an jebar leen. Im ãinwõt an juon kããn wiit jebar ine im jab kããn wiit jidik ko, jej jebar ilo ad kalle ine in Aelõñ eo im jab ilo ad kõm̦m̦an rũkal̦oor.d (Lale kõmel̦el̦e eo itulal̦.) Ewi wãween ad jebar leen Aelõñ eo? Aolep iien ñe jej kwal̦o̦k naan ilo jabdewõt wãween ko kõn Aelõñ eo, jej koorl̦o̦k ak kajeedede ilo kõkkar ine eo me kar kalibwini ilo bũruod. (Luk 6:45, UBS; 8:1, UBS) Kõn men in, waanjoñak in ej katakin kõj bwe el̦aññe jej wõnm̦aanl̦o̦k wõt im kwal̦o̦k naan kõn Aelõñ eo, jej ‘kijenmej ilo ad jebar leen.’

12. (1) Ta eo jemaroñ katak jãn waanjoñak ko an Jesus kõn wõjke vain eo im rũkallib ine eo? (2) Ewi wãween an men in jelõt eok?

¹² Ta eo jemaroñ katak jãn waanjoñak ko an Jesus kõn wõjke vain eo im rũkallib ine eo? Rej jipañ kõj ñan mel̦el̦e bwe ñan ad jebar leen, ejjab wawa ioon an armej ro ilo teretore ko m̦õn̦õn̦õ in roñjake. Ijello̦kun, ej wawa ioon ad tiljek wõt ilo jerbalin kwal̦o̦k naan. Paul ear ba ejja men in wõt. Ear ba: “Kajjo iaaer enaaj bõk on̦ããn ekkar ñan an make jerbal.” (1 Ko. 3:8) Jeova enaaj n̦aon̦ãd ekkar ñan ad kõm̦m̦ane jerbal eo im ejjab ekkar ñan tõprak eo. Matilda, juon eo 20 iiõ in an bainier ej ba: “El̦ap aõ m̦õn̦õn̦õ ñan jel̦ã bwe Jeova ej n̦aon̦ãd jãn ad kate kõj ilo jerbalin kwal̦o̦k naan.”

TA EO ENAAJ JIPAÑ KÕJ ÑAN KIJENMEJ WÕT ILO AD JEBAR LEEN?

13, 14. Ekkar ñan Rom 10:1, 2, ta unin an kar Paul jab ebbeer im bõjrak jãn an jipañ ro rar jab m̦õn̦õn̦õ in roñjake ennaan eo kõn Aelõñ eo?

¹³ Ta eo enaaj jipañ kõj ñan kijenmej wõt ilo ad jebar leen? Ãinwõt kar kwal̦o̦k kake, Paul ear bũrom̦õj im nana an mour ke RiJu ro rar jab kõn̦aan roñjake ennaan eo kõn Aelõñ eo. Meñe ãindein, ak ear jab ebbeer im bõjrak jãn an jipañ er. L̦õmn̦ak m̦õk kõn ta eo ear ba ilo lõta eo an ñan Kũrjin ro ilo Rom. Ear kwal̦o̦k kõn eñjake eo an kõn RiJu ro ke ear ba: “El̦ap aõ kõn̦aan kõn aolepen bũruõ bwe armej ro aõ ren bõk lo̦mo̦o̦r! El̦ap aõ jar ñan Anij kõn er! Bwe imaroñ ri kõnnaan kõn er bwe el̦ap aer kijejeto ñan Anij. Bõtab aer kijejeto ejjab wawa ioon jel̦ãl̦o̦kjen̦ em̦ool.” (Rom 10:1, 2, UBS) Ta un eo Paul ear kaalikkare kõn unin an kar wõnm̦aanl̦o̦k wõt im kwal̦o̦k naan?

¹⁴ M̦oktata, Paul ear kwal̦o̦k unin an kar wõnm̦aanl̦o̦k wõt im kwal̦o̦k naan ñan RiJu ro. Ear em̦m̦akũt ñan kõm̦m̦ane men in kõnke ear juon ‘kõn̦aan jãn aolepen bũruon.’ Paul ear kõn̦aan bwe ren bõk lo̦mo̦o̦r. (Rom 11:13, 14, UBS) Kein karuo, Paul ear ba bwe “ear l̦ap an jar ñan Anij kõn er.” Ear akwel̦ap im jar ñan Anij bwe en jipañ RiJu ro kajjojo bwe ren m̦õn̦õn̦õ in eo̦roñ ennaan eo em̦m̦an kõn Aelõñ eo. Kein kajilu, Paul ear ba: “El̦ap aer kijejeto ñan Anij.” Ear lo em̦m̦an eo an armej ro. Ñe juon armej ej kijejeto kõn men ko rem̦m̦an, emaroñ oktak im kijejeto ãinwõt juon rũkal̦ooran Christ. Eñin men eo Paul ear kile ippãn armej ro.

15. Ewi wãween ad maroñ jebar leen ãinwõt Paul? Kwal̦o̦k jet waanjoñak.

¹⁵ Ewi wãween ad maroñ anõke Paul? M̦oktata, jen kate kõj bwe en wõr juon kõn̦aan ippãd ñan pukot ro em̦ool bũrueer ñan bõk mour indeeo. Kein karuo, jen akwel̦ap ñan Jeova ilo jar ñan kõpel̦l̦o̦k bũruon ro rej roñjake im em̦ool bũrueer. (Jrb. 16:14) Silvana, juon eo ekepaake 30 iiõ in an bainier ej ba: “M̦okta jãn aõ em̦ ñan em̦, ij jar ñan Jeova im kajjitõk ippãn bwe en jipañ eõ ñan bõk l̦õmn̦ak ko rejim̦we.” Jen bareinwõt jar ñan Anij bwe enjel̦ ro ren tõl kõj ñan ro em̦ool bũrueer. (Matu 10:11-13; Rev. 14:6) L̦õmn̦ak m̦õk kõn Robert, juon eo elõñl̦o̦k jãn 30 iiõ in an bainier. Ej ba: “Aõ jel̦ã bwe ij jerbal ippãn enjel̦ ro me rejel̦ã ta ko rej wal̦o̦k ñan armej ro ilo m̦õko jej kwal̦o̦k naan ie el̦ap an kãitoktoklimo.” Kein kajilu, jen kajjioñ in lo em̦m̦an eo an armej ro. Carl, juon eo ej lale eklejia ko im ear peptaij elõñl̦o̦k jãn 50 iiõ ko kiiõ ej ba: “Ij kajjioñ in kappok jabdewõt men meñe edik im ej kaalikkar bwe em̦ool bũruon armej ro ij kwal̦o̦k naan ñan er, bõlen emaroñ aer mejãn m̦õn̦õn̦õ, rejouj, ak rej m̦ool ilo aer kwal̦o̦k kajjitõk.” Aet, ãinwõt Paul, jemaroñ kijenmej ilo ad jebar leen.

“KWÕN JAB DÃPIJ PEIM̦” JÃN AM̦ JERBAL

16, 17. (1) Ta eo jemaroñ katak jãn naanin tõl ko ilo Ekklisiastis 11:6? (2) Kwal̦o̦k juon waanjoñak kõn wãween ad kallib ine jelõte ro rej lale kõj.

¹⁶ Meñe jemaroñ l̦õmn̦ak bwe ennaan eo jej kwal̦o̦ke kõn Aelõñ eo ejjab tõpar bũruon armej ro, ak jen jab pere wãween an jerbal in nãj jelõt armej ro. (Riit Ekklisiastis 11:6.) Em̦ool bwe elõñ armej ro rejjab roñjake kõj, bõtab rej lale im kalimjek kõj. Rej kile an erreo wãween ad nuknuk, em̦m̦an m̦wilid, im ad mejãn m̦õn̦õn̦õ l̦o̦k ñan er. Im kõn an em̦m̦an m̦wilid men in emaroñ bõlen jipañ ro jet ñan kile bwe l̦õmn̦ak ko aer kõn kõj rejjab m̦ool. Sergio im Olinda, me kar kwal̦o̦k kake er m̦oktal̦o̦k, rar lo oktak in ippãn armej ro.

¹⁷ Sergio ej ba: “Kõn am̦ro kar nañinmej, kõm̦ro ear jab kwal̦o̦k naan ilo jikin eo kõm kõn etal ñane ium̦win jidik iien. Ke kõm̦ro ear bar ro̦o̦ll̦o̦k, armej ro rar kajjitõk, ‘Ta eo ear wal̦o̦k? Kõmar oñkake kom̦.’” Olinda ear ba naan kein: “Ro rar kattõri bus ko rar bye bye tok im jet iaaer rar lamõjtok im ba, ‘Komiro em̦m̦ool!’ Joñan rar kajjitõk aer bokin riit.” Rippãlele rein rar bwilõñ ke juon em̦m̦aan ear bõjrakl̦o̦k iturin waan bwilbwil eo im lel̦o̦k wũt ñan erro, im ear kam̦m̦oolole er kõn jerbal eo rej kõm̦m̦ane.

18. Etke kwõj kate eok ñan ‘kijenmej ilo am̦ jebar leen’?

¹⁸ Em̦ool bwe el̦aññe jejjab ‘dãpij peid’ jãn ad jerbal im kallib ine in Aelõñ eo, jej bõk kun̦aad ilo jerbal eo eaorõk ñan kwal̦o̦k naan “ñan aelõñ otemjel̦o̦k.” (Matu 24:14) El̦aptata, jej lukkuun m̦õn̦õn̦õ kõnke jejel̦ã bwe Jeova ej m̦õn̦õn̦õ ippãd, ãinwõt ke ej yokwe aolep ro rej “kijenmej ilo aer jebar leen!”