M̦õn̦õn̦õ kõn Leen Jerbal ko Am̦
1. Etke emaroñ dikl̦o̦k ad kijejeto ilo kwal̦o̦k naan?
1 Kar kõm̦anm̦an armej bwe ren ‘m̦õn̦õn̦õ kõn leen jerbal ko aer.’ (Ekl. 2:24, UBS) Bõtab, el̦aññe jejjab lo tõprak ko rej wal̦o̦k jãn jerbal in kwal̦o̦k naan, men in emaroñ kõm̦m̦an bwe en jako ad lañlõñ im en dikl̦o̦k ad kijejeto. Ta ko remaroñ jipañ kõj bwe jen m̦õn̦õn̦õ wõt im jab ebbeer?
2. Etke jen jab kõtmãne bwe jenaaj tõpar bũruon aolep armej ro?
2 En Jim̦we Ad Kõtmãne: Keememej bwe meñe eiet armej rar eo̦roñ Jijej, bõtab ear lo el̦ap tõprak ilo jerbal in kwal̦o̦k naan. (Jon 17:4) Jijej ear kwal̦o̦k juon waanjoñak kõn juon ri kallib im ine ko. Ear kaalikkar bwe ine kein me rej jitõñl̦o̦k ñan ennaan eo kõn Aelõñ eo an Anij reban tõpar bũruon enañin aolep armej ro. (Matu 13:3-8, 18-22) Meñe ãindein, el̦ap tõprak ko rej wal̦o̦k kõnke jej kijejeto im kate kõj ilo jerbal in kwal̦o̦k naan.
3. Ewi wãween jej jebar leen ilo kwal̦o̦k naan meñe jejjo wõt rej m̦õn̦õn̦õ in roñjake?
3 Wãween eo Jej Jebar Elõñ Leen: Ekkar ñan waanjoñak eo an Jijej, ro rej eo̦roñ ennaan eo renaaj “jebar im le.” (Matu 13:23) Ta mel̦el̦ein? Eokwe, l̦õmn̦ak kõn wãween eo me wheat ej jebar im le. Ñe wheat ej eddek im jebar leen, ejjab kalle wheat jiddik ko, ak ej kalle ine. Ilo ejja wãween in wõt, leen ko jej jebari ilo jerbal in kwal̦o̦k naan rejjab jitõñl̦o̦k ñan ro jej jipañ er ñan erom rũkal̦oor ro rekããl. Wãween eo me Kũrjin ro rej jebar leen ej ilo aer kajededl̦o̦k ennaan eo kõn Aelõñ eo an Anij. Men in ej kõm̦m̦an bwe jen “m̦õn̦õn̦õ” wõt kõn jerbal in ad, jekdo̦o̦n ñe armej ro rej roñjake ak jaab. Jej m̦õn̦õn̦õ bwe jej bok kun̦aad ñan kokwõjarjar etan Anij, Jeova. (Ais. 43:10-12; Matu 6:9) Jej m̦õn̦õn̦õ kõn jeraam̦m̦an eo ippãd ñan jerbal ippãn Anij. (1 Ko. 3:9) Im ñe jej kwal̦o̦k naan, men in ej “leen tied” im ej kam̦õn̦õn̦õik Jeova.—Hi. 13:15, 16.
4. Ta tõprak ko jemaroñ jab loi me rej wal̦o̦k jãn ad jerbal in kwal̦o̦k naan?
4 Bareinwõt, kõnke jej kate kõj, emaroñ lõñ tõprak ko renaaj wal̦o̦k meñe jemaroñ jab loi. Emaroñ kar lõñ ro me Jijej ear kwal̦o̦k naan ñan er, bõtab rar jab erom rũkal̦ooran ilo kar tõre eo ear pãd ioon lal̦ in. Remaroñ kar erom rũkal̦ooran ãlikin an kar jepl̦aak ñan lañ. Ãindein, ine eo ak ennaan eo kõn Aelõñ eo me jej kajededl̦o̦k emaroñ jab kajju tõpar bũruon armej ro. Bõtab, tokãlik armej rein remaroñ del̦o̦ñ ilo m̦ool eo meñe jejaje. Em̦ool, elõñ tõprak ko rem̦m̦an rej wal̦o̦k jãn jerbal in kwal̦o̦k naan. Kõn men in, jen wõnm̦aanl̦o̦k wõt im “jebar elõñ leen” im kam̦ool bwe jej rũkal̦ooran Jijej.—Jon 15:8.