Report Eo An Ri Keañ Ro An Ailiñ Eo

Rej “Roñjake” Ennan eo an Ailiñ eo ilo Brazil

ÑAN KWALOK nan kin news eo emõn kin Ailiñ eo ilo jikin Ri Jaroñroñ ro, elõñ Ri Kennan ro an Jehovah ilo Brazil rar bõk jerbal eo ebin ñan katak kajin jaroñroñ ilo Brazilian Sign Language. Kin air kate wõt ir kin jerbal in rar jebar leen, einwõt bwebwenato ko tok ilal rej kalikari.

Eva,a juõn kõrã eo ej jaroñroñ ilo São Paulo, ear jino katak kajin jaroñroñ elikin e im ajiri ro jilu rar jokwe ibben juõn emaan e jaroñroñ. Ilo juõn jikin kaikujkuj ak shopping mall, Eva im likao eo jeran rar wõnmae juõn jar in Ri Kennan ri jaroñroñ ro im rar kir erro ñan juõn kwelok ilo Kingdom Hall eo. Rar errã, kinke rar lemnak bwe kwelok in kar juõn ien kamao ibben don.

Kinke ear jab lukkun jelã kajin jaroñroñ eo, Eva ear jab lukkun melele kin ta eo rar konono kake ilo kwelok eo. Tokelik, jejjo Ri Kennan ro rar kir ir ñan mweo imwiir bwe ren kamao lal. Ilo air kajerbal picture ko ilo Mour ilo Mõnõnõ ion Lal ñan Indio!, rar kamelele kin kallimur eo an Anij kin juõn paradise eo ej itok ion lal. Eva ear mõnõnõ kin men eo ear katak kake im ear jino bed ilo kwelok ko ilo week otemjej.

Ejjabto tokelik, Eva ear ilok jen likao eo jeran bwe en mour ekkar ñan kien ko an Bible. Meñe ro uan family eo an rar jumae e, ear wõnmanlok wõt ilo jitõb im baptais ilo 1995. Jiljino alliñ ko tokelik, Eva ear bõk jerbal in pioneer, ak ri kwalok eo an Ailiñ eo full-time. Jen ien eo ñan kiõ ear jibañ emen ri jaroñroñ ro bwe ren wujleplok im baptais.

Carlos ear jaroñroñ jen ien ear lotak. Jen ien ear ajiri ear bõk uno ko rekajur ilo jõkkar, mour in ejej, im kwot. Ke ro uan jar in ri ire ro rar bukõt e ñan mõne, ear ko ñan São Paulo im bedwõt ibben João. João, einwõt Carlos, ear jaroñroñ im mour ilo juõn wãwen enana.

Jejjo yiõ ko tokelik, Carlos ear katak kin ennan eo an Ailiñ im ear kamakit e bwe en karreoik mour eo an im mare ekkar ñan kien eo an lal. Elikin an tõbar aikwij ko ekkar ñan kien Bible, Carlos ear kalikar an wujleplok mour eo an ñan Jehovah ilo baptais. Ilo ejja ien eo wõt, ilo an Carlos jab jelã kake, João bareinwõt ear katak kin news eo emõn, im ear kõmman elõñ oktak ko ilo mour eo an. Ke ear katak bwe Jehovah ear jõjõik ekjap ko, João ear jolok aolep ekjap ko an. Elikin an wutik mour eo mokta, João bareinwõt ear baptais.

Carlos im João rar lukkun mõnõnõ ke rar ion don ilo juõn imõn kwelok ak Kingdom Hall im lo oktak ko erro jimor rar kõmmani ilo mour ko air! Erro jimor rej tel family ko air ilo jimwe kiõ im jerbal einwõt ri keañ ro rekijejeto an Ailiñ eo.

Ilo Brazil, ewõr kiõ 30 congregation im 154 kumi ko rej konono ilo kajin jaroñroñ, im elõñlok jen 2,500 ri kwalok ro, 1,500 iair rej jaroñroñ rej kwelok ibben don. Ilo Brazil 2001 ilo kwelok ko relap etan “Ri Katakin ro an Nan in Anij” District Convention ko ñan ro rejaroñroñ, elõñlok jen 3,000 rar kwelok ijo, im 36 iair rar baptais. Ikijen kajerammõn eo an Jehovah, jej kejatdikdik bwe elõñlok ri jaroñroñ ro renaj bõk im tõmak ilo ennan eo an Ailiñ eo.

[Kamelele ko itulal]