‘Komin Beran Im Kajur!’
“Komin mõnõnõ; Ña I ar anjo ion lõl.”—JON 16:33.
1. Kinke elõñ ri kijirãt ro rekajur rar bojak in tarinaik Ri Israel ro ilo Canaan, ta nan in rejañ ko rar bõki?
KE Ri Israel ro rar bojak in kijone River Jordan ñan loan Enen Kallimur eo, Moses ear jiroñ ir: “Kwon bin im beran wõt, kwon jab mijõk im lelñoñ kin ir: bwe Jeova am Anij, Eo ej karwõn yuk.” Inem Moses ear kir Joshua, eo enaj kar tel Ri Israel ro ñan deloñ ilo enen Canaan, im elij nan in kakabilek eo ibben bwe en beran wõt. (Duteronomi 31:6, 7) Tokelik, Jehovah make ear rejañ Joshua, im ba: “Kwon kajur, im kanuij beran . . . Men in wõt, kwon kajur, im kanuij beran.” (Joshua 1:6, 7, 9) Nan kein rar ekkar ñan ien eo. Ri Israel ro renaj kar aikwij beran ñan jelmae ri kijirãt ro rar kõttar ir iturãjet in Jordan.
2. Ta wãwen eo jej bed iloan kiõ ilo ran kein, im ta eo jej aikwij kõmmane?
2 Ilo ran kein, Ri Christian ro remol rej bojak in deloñ ilo lal eo ekãl emwij kallimur kake, im einwõt Joshua, rej aikwij beran bareinwõt. (2 Piter 3:13; Reveles̃õn 7:14) Bõtab, wãwen eo ad ej einjuõn jen wãwen eo an Joshua. Joshua ear tarinae kin jãji im mõri ko. Jej bed ilo juõn tarinae ilo jitõb im jejjab kajerbal kein tarinae ko ilo kanniek. (Aiseia 2:2-4; Dri Epesõs 6:11-17) Bareinwõt, Joshua ear bõk kunan ilo elõñ tarinae ko relej elaptata elikin air deloñlok ilo Enen Kallimur eo. Ak jej bed ilo tarinae ko relap kiõ—mokta jen ad deloñlok ilo lal eo ekãl. Jen lale jet wãwen ko jej aikwij beran kaki.
Etke Jej Aikwij Tarinae?
3. Ta eo Bible eo ej kalikar kin ri jumae eo ad elap?
3 Ri jilek John ear je: “Je jela bwe kij jen Anij, im aolepen lõl ej berwõt ilo dri nana eo.” (1 Jon 5:19) Nan kein rej kwalok unin an Ri Christian ro aikwij tarinae ñan bin wõt ilo air tõmak. Ñe juõn Ri Christian ej tiljek wõt, ilo juõn joñan ej einwõt an kar Satan Devil eo jab bõk anjo. Inem, Satan ej etetal einwõt “juõn laion e rorror” ñan kalelñoñ im kañ Ri Christian ro retiljek. (1 Piter 5:8) Emol, ej tarinaik Christian ri kabit ro im ri jerbal ro mõttair. (Reveles̃õn 12:17) Ilo tarinae in, ej kajerbal armij ro rej jelã kake ak rejaje kake ñan kõtõbar mejenkajjik ko an. Ej aikwij wõr beran ñan jutak bin nae Satan im ri jerbal ro an.
4. Ta nan in kakkõl eo Jesus ear letok, ak ta kadkad eo Ri Christian ro remol rej aikwij kwalok?
4 Kinke Jesus ear jelã bwe Satan im ri jerbal ro an renaj kar jumae news eo emõn, Ear kakkõl ri kalor ro an: “Re naj ketõk kom ñõn iñtan im re naj mõn kom im dri ailiñ otemjelok re naj kijirãte kom kin eta.” (Matu 24:9) Nan kein rar jejjet kitieir ilo ebeben eo kein kajuõn, im rej mol bareinwõt ilo ran kein. Emol, matõrtõr eo Ri Kennan ro an Jehovah ilo ran kein rar aikwij kijenmij kake ear lukkun nana ilo aolepen bwebwenato eo an lal. Bõtab, Ri Christian ro remol rej beran wõt ñe rej jelmae melejoñ ko. Rej jelã bwe “Mijõk armij ej bõktok juõn jen,” im rejjab kõnan lorak ilo juõn jen.—Jabõn Kennan Ko 29:25.
5, 6. (a) Ta wãwen ko ej aikwij wõr ad kwalok beran ie? (b) Ewi lemnak eo an Ri Christian ro retiljek ñe rej melejoñe beran eo air?
5 Ewõr aitwerok ko jet ijellokin matõrtõr ko im kij jenaj aikwij in beran bareinwõt kaki. Ikijen jet ri kwalok ro, konono ibben ro rejaje kajjiir kin news eo emõn emaroñ juõn aitwerok. Beran eo an ri school ro emaroñ bed ilo melejoñ ñe rej aikwij jutak iman flag eo im kallimur bwe renaj tiljek ñan ailiñ eo ak ñan juõn flag. Kinke kallimur rot in ej juõn wãwen kabuñ, Christian ajiri ro rej beek ilo beran ñan jerbal ilo juõn wãwen ej kabuñburuen Anij, im men ko rar kõmmani rar kamõnõnõik e.
6 Bareinwõt jej aikwij beran ñe ri jumae ro rej kareel ri news ro ñan kajededlok report ko renana kin ri karejar ro an Anij ak ñe rej kajeoñ in kabõjrak kabuñ eo emol ilo air kõmman “men in kejorran kin kien.” (Sam 94:20) Ñan wanjoñok, en kar ewi ad lemnak ñe report ko ilo newspaper, radio, ak television kin Ri Kennan ro an Jehovah rejjab jimwe ak reriap? Jej jelã bwe men kein renaj walok. (Sam 109:2) Im jejjab ilbõk ñe jet armij rej tõmak kin report kein reriap, kinke “dri bwebwe eo ej tõmak nan otemjej.” (Jabõn Kennan Ko 14:15) Meñe eindein, Ri Christian ro retiljek rejjab baj tõmak wõt kin jabdewõt nan kin ro jeiir im jatiir, im emol rejjab kõtlok bwe report ko reriap ren kabõjrak air keini in bed ilo kwelok ko an Christian, kadiklok air ien kwalok nan, ak kamõjnoik tõmak eo air. Jen men in, rej “kwalok karkar[ir] einwõt dri jerbal an Anij . . . kin aibujuij im buijinarmij, kin buñbuñ enana im buñbuñ emõn, einwõt dri mon, im kimij mol.”—2 Dri Korint 6:4, 8.
7. Ta kajitõk ko rej tur buruõd jej aikwij kajitõk ibbed make?
7 Paul, ke ear jejelok ñan Timothy, ear ba: “Bwe Anij e ar jab letok ñõn kij jitõb in lelñoñ, a jitõb in kajur . . . Inem kwon jab jok kin kennan an ar Iroij.” (2 Timote 1:7, 8; Mark 8:38) Elikin ad konono nan kein, jemaroñ kajitõk ibbed make: ‘Ij jook ke kin tõmak eo aõ, ak Ij beran? Ilo jikin jerbal eo aõ (ak jikin school eo), Ij kejelãik armij ro ibelakiõ ke bwe Ij juõn Ri Kennan an Jehovah, ak Ij noje men in? Ij jook ke kinke Ij einjuõn jen ro jet, ak Ij mõnõnõ ke kin kõtan eo aõ ibben Jehovah? Elañe jabdewõt armij ej mijak in kwalok nan kin news eo emõn ak kin an jutak ilo juõn wãwen lal in ej kajirere kake, en kememej nan in kakabilek eo an Jehovah ñan Joshua: “Kwon beran im kajur.” Jab meloklok, bwe ejjab lemnak eo an ri jerbal ro mõttad ak ri school ro mõttad raorõk ak ej lemnak eo an Jehovah im Jesus Christ.—Dri Galetia 1:10.
Ewi Wãwen Ad Maroñ Kalaplok Beran
8, 9. (a) Ilo juõn ien, ewi wãwen rar melejoñe beran eo an Ri Christian ro remol? (b) Ewi wãwen Peter im John rar uaki nan in kalelñoñ ko, im ta eo ir im ro jeiir im jatiir rar loe?
8 Ewi wãwen ad maroñ kalaplok beran ñan kamaroñ kij ñan tiljek wõt ilo ien kein renana? Eokwe, ewi wãwen Ri Christian ro jinoin rar kalaplok beran? Lemnak kin ta eo ear walok ke priest ro reutiej im ri tel ro an kabuñ ilo Jerusalem rar jiroñ Peter im John bwe ren bõjrak in kwalok nan ilo etan Jesus. Ijoke, rar kobalok ibben ro jeiir im jatiir ilo tõmak, im rar jar ibben don, im ba: “O Iroij, kwon lale air nan in kalelñoñ: im letok ñõn ro dri korijerõm, bwe kin elap beran ren kwalok Am in nan.” (Jerbal 4:13-29) Ilo uak, Jehovah ear kakajur ir kin jitõb kwojarjar, im einwõt an ri tel ro an Ri Jew ro ba tokelik, rar “kobrõk Jerusalem” kin katak ko air.—Jerbal 5:28.
9 Jen etale kin ta eo ear walok ilo ien eo. Ke ri tel ro an Ri Jew rar kalelñoñ ri kalor ro, rar jab lemnak in bõjrak jen air kwalok nan kinke armij ro rar jibede ir. Jen men in, ri kalor ro rar jar bwe ren beran bwe ren kwalok nan wõt. Inem rar jerbal ekkar ñan men eo rar jar kake, im Jehovah ear kakajur ir kin jitõb eo an. Bwebwenato in air ej kwalok kin ta eo Paul ear jeje kake jejjo yiõ ko tokelik ilo bar juõn wãwen ñan Ri Christian ro ñe rej bõk matõrtõr. Paul ear ba: “I maroñ in kõmõn men otemjej ilo Eo ej kakajur iõ.”—Dri Pilippai 4:13.
10. Ewi wãwen bwebwenato eo an Jeremiah ej jibañ ro rej jook?
10 Bõtab, ta elañe juõn armij ej ejookok. Emaroñ karejar ñan Jehovah ke im wõnmae jumae ilo beran? Aet! Kememej kin uak eo an Jeremiah ke Jehovah ear kãlet e bwe en juõn ri kanan. Likao in ear ba: “Ña juõn laddik wõt.” Alikar, ear lemnak bwe ear ejelok an maroñ. Ak, Jehovah ear rejañ e kin nan kein: “Kwon jab ba, ‘kwe juõn laddik wõt.’ Ak ñan jabdewõt armij enaj kar jilkinlok yuk ñan ibbeir, kwon kennanik ir men otemjej ij jiroñ yuk. Kwon jab mijak iturin mejeir, kinke ‘Ij bed ibbam im naj kejbãrok yuk.’” (Jeremiah 1:6-10, NW) Jeremiah ear liki Jehovah, im tokjen men in, ilo kajur eo an Jehovah ear ellã jen an jenliklik in kwalok nan im ear erom juõn ri kennan eberan ilo Israel.
11. Ta eo ej jibañ Ri Christian ro ilo ran kein bwe ren einwõt Jeremiah?
11 Christian ri kabit ro ilo ran kein ewõr juõn jerbal einlok wõt eo an Jeremiah, im “jar eo elap” in “sheep ro jet” rej jibañ ir, ilo air wõnmanlok in kwalok nan kin karõk ko an Jehovah, meñe rej wõnmae armij ro rejjab itoklimo, rej kajirere, im matõrtõre ir. (Reveles̃õn 7:9; Jon 10:16) Rej bõk rejañ jen nan ko an Jehovah ñan Jeremiah: “Kwon jab mijak.” Rejjab meloklok bwe Anij ear kãlet ir im rej kwalok nan ko an.—2 Dri Korint 2:17.
Joñok ko Reberan Jej Aikwij Kajeoñi
12. Ta wanjoñok eo emõntata kin beran Jesus ear letok, im ewi wãwen an kar rejañ ri kalor ro an?
12 Jemaroñ bõk jibañ ñan kalaplok beran elañe jej kalmenlokjen kin joñok ko an armij ro jet einwõt, Jeremiah, ro rar jerbal ilo beran. (Sam 77:12) Ñan wanjoñok, ñe jej etale jerbal eo an Jesus, jej mõnõnõ kin an beran ke Satan ear kajeoñ in kabo e im ke ear wõnmae jumae eo an ri tel ro an Ri Jew. (Luk 4:1-13; 20:19-47) Ilo kajur eo an Jehovah, Jesus ear jutak bin, im mokta wõt jen an mij, ear ba ñan ri kalor ro an: “Ilo lõl komij iñtan: a komin mõnõnõ; Ña I ar bõk anjo ion lõl. (Jon 16:33; 17:16) Elañe ri kalor ro an Jesus rar lor joñok eo an, ir bareinwõt renaj kar bõk anjo. (1 Jon 2:6; Reveles̃õn 2:7, 11, 17, 26) Ak renaj kar aikwij “beran.”
13. Ta nan in rejañ eo Paul ear lelok ñan Dri Pilippai ro?
13 Jejjo yiõ ko elikin mij eo an Jesus, rar kalbuji Paul im Silas ilo Philippi. Tokelik, Paul ear rejañ congregation in Philippi bwe ren “jutõk ilo juõn wõt jitõb; im kin juõn wõt lemnok [rej] jimor kate [ir] kin tõmak eo in gospel; im ejelok [air] lelñoñ kin ro rej kijirãte [ir].” Ñan kakajur ir ilo men in, Paul ear ba: “Men in ñõn ir kakõllõn liakelok e alikar, a kakõllõn lomor[ir], im men in jen Anij.”—Dri Pilippai 1:27-29.
14. Ta eo ear walok ilo Rome kin an Paul kwalok beran?
14 Ke Paul ear jejelok ñan congregation eo ilo Philippi, ear bar bed ilo kalbuj, ilo ien in ilo Rom. Bõtab, ear wõnmanlok wõt im kwalok nan ilo beran ibben ro jet. Kin tokjen et eo? Ear je: “Ein drein lukwoja ilo Kraist rej alikar ilo aolepen Pritoriõm, im ñõn ro otemjej jet; im elõñ ian jimjãn jimjãten ilo Iroij, ke elaplok air liki kin lukwoja, re kanuij beranlok in konono nan in Anij im jab lelñoñ.”—Dri Pilippai 1:13, 14.
15. Ia eo jemaroñ lo joñok ko remõn kin tõmak im renaj kakajurlok bebe eo ad ñan beran wõt?
15 Joñok eo an Paul ej rejañ kij. Bar eindein joñok ko remõn an Ri Christian ro ilo ran kein rar kijenmij iumin matõrtõr ilo ailiñ ko ri kien ro ak ri tel in kabuñ ro rar iroij ioir. Bwebwenato ko kin elõñ ian armij rein rej bed ilo magazine kein Imõniaroñroñ im Awake! im ilo book eo Yearbooks of Jehovah’s Witnesses. Ñe kwoj reade bwebwenato kein, kememej bwe armij rein rar baj armij wõt einwõt kij; ak ke rar bed ilo ilo melejoñ ko rebin, Jehovah ear kakajur ir bwe ren kijenmij. Jemaroñ tõmak bwe enaj kõmman eindein ñan kij elañe jej bed ilo ejja melejoñ ko wõt im jej aikwij jibañ jen e.
Ad Jutak im Beran Ej kabuñburuen im Kautiej Jehovah
16, 17. Ewi wãwen ad maroñ kwalok beran ilo ran kein?
16 Elañe juõn Ri Christian ej jutak bin ilo mol im wãnik, ej beran. Elañe ej kõmman eindein meñe ej wũdiddid, jutak in elaplok an beran. Emol, jabdewõt Christian emaroñ beran elañe ekõnan kõmanman ankil an Jehovah, elañe emwij an jek ilo buruen bwe en tiljek wõt, elañe ekkeini an atartar ion Anij, im elañe ien otemjej ej kememej bwe Jehovah ear kakajur mokta elõñ armij ro einwõt e. Bareinwõt, ñe jej kile bwe ad jutak ilo beran ej kabuñburuen im kautiej Jehovah, ej kakajurlok bebe eo ad bwe jen jab mõjnolok. Jej bojak wõt ñan kijenmij iumin kajirere ak elaplok kinke ekanuij lap ad yokwe e.—1 Jon 2:5; 4:18.
17 Jab meloklok bwe ñe jej eñtan kin tõmak eo ad, ejjab melelen bwe jar kõmman juõn men enana. (1 Piter 3:17) Jej eñtan kinke jej jutak bin kin iroij bõtata eo an Jehovah, kinke jej kõmman emõn, im kinke jejjab mõttan lal. Kin men in, ri jilek Peter ear ba: “A elañe komij kijenmij ñe kom kõmõn emõn im iñtan kake, men in ej kabuñburuen Anij.” Peter ear bareinwõt ba: “Inem, ro rej iñtan ekar ñõn ankil an Anij, ren likit air, kin kõmõn emõn, ñõn Eo Dri Kõmõnmõn etiljek.” (1 Piter 2:20; 4:19) Aet, tõmak eo ad ej kabuñburuen Anij eo ej yokwe, im ej kautiej e. Men in ej juõn un ekajur unin ad aikwij beran!
Konono Ibben Ro Reutiej ilo Kien
18, 19. Ñe jej jutak ilo beran iman mejen juõn ri ekajet, ta ennan eo jej kwalok?
18 Ke Jesus ear jiroñ ri kalor ro an bwe renaj kar bõk matõrtõr, ear ba bareinwõt: “[Armij ro] re naj ketõk kom ñõn ri dri bebe, im re naj dreñlokwe kom ilo imõn kwelok ko air; im re naj añinlok kom ñõn iroij ro im kiñ ro kin Ña, kin men in kennan ñõn ir im dri ailiñ ko.” (Matu 10:17, 18) Ñan jutak iman juõn ri ekajet ak iroij kin riap ko armij ro rar ba kake nae kij jej aikwij beran. Bõtab, ñe jej beran im kajerbal ien kein ñan kwalok nan ñan armij rein, jej ukõt melejoñ kein rebin ñan juõn ien emõn ñan kõmman juõn men eaorõk. Ilo wãwen in, jej kwalok ñan ro rej ekajete kij nan ko an Jehovah, ilo Sam eo kein ka 2: “Kiõ, O kiñ ro, komin meletlet; iroij in ekajet in lõl, komin katak. Komin jerbal ñõn Jeova ilo mijõk, im lõñliñ kin wurirrir.” (Sam 2:10, 11) Ekkã an walok bwe, ke armij ro rar naruõn Ri Kennan ro an Jehovah ilo jab jimwe ilo imõn ekajet ko, ri ekajet ro rar rejetak kabuñ ilo anemkwoj, im jej kamolol ir kin men in. Bõtab, jet ri ekajet ro rar bo ibben ri jumae ro. Ñan ri ekajet rein, Bible eo ej ba: “Komin katak.”
19 Ri ekajet ro rej aikwij kememej bwe kien eo elaptata ej jen Jehovah Anij. Rej aikwij kememej bwe armij otemjej, rej aikwij uak ñan Jehovah Anij im Jesus Christ. (Dri Rom 14:10) Ñan kij, jekdon elañe jej bõk ekajet eo jen juõn ri ekajet in armij ak jab, jemaroñ beran kinke Jehovah ej rejetak kij. Bible eo ej ba: “Emõnõnõ ro otemjej rej liki E.”—Sam 2:12.
20. Etke jemaroñ mõnõnõ elañe jej kijenmij iumin matõrtõr im nan in kinaak ko?
20 Ilo Katak eo ion Tol eo, Jesus ear ba: “Emõnõnõ kom ñe armij re naj kajirere kake kom, im matõrtõr kom, in naj ba nan ko renana otemjej nae kom, riõp wõt, kin Ña. Komin lõñliñ, im kanuij buñburuemi; bwe elap jinekjij ñõn kom i lõñ; bwe ein drein air matõrtõr dri kanan ro mokta jen kom.” (Matu 5:11, 12) Emol, matõrtõr ejjab juõn men in kamõnõnõ, ak ad jutak bin meñe iumin matõrtõr, ekoba nan in riap ko nae kij jen jikin news ko, ej juõn unin ad lañliñ kake. Ej melelen bwe Jehovah ej buñburuen kake im jenaj bõk juõn ãjenkij. Ad jutak bin ilo beran ej kwalok bwe ewõr tõmak eo emol ibbed im ej kalikar bwe Anij ej buñburuen kake kij. Emol, ej kwalok bwe ewõr liki eo eyu ibbed ilo Jehovah. Liki rot in ej aorõk ñan juõn Ri Christian, einwõt katak in tok ilal enaj kwalok kake.
Ta Eo Kwar Katak Kake?
• Ta wãwen ko ilo ran kein rej aikwij ad kwalok beran ie?
• Ewi wãwen ad maroñ kalaplok beran?
• Wõn ro rar kwalok jet joñok ko remõn kin beran?
• Etke jekõnan jerbal ilo beran?
[Pija ko ilo peij 24]
Jejjab jook kin news eo emõn
[Pija eo ilo peij 25]
Beran eo an Paul ilo kalbuj ear kwalok news eo emõn