Jutak Im Lo Lomor Eo An Jehovah!
“Komin berwõt im jutõk, im lo lomor an Jeova ibemi.”—2 Kronikel 20:17.
1, 2. Etke tarinae eo “Gog in Magog” ej bojak in kõmmane elaplok an kauwatata jen terrorism ibelakin lal?
TERRORISM emwij an jet armij kamelele kake einwõt juõn tarinae nae jukjuk im bed eo an lal, elaptata nae armij otemjej. Alikar, kain jumae rot in jej aikwij lukkun lemnak kake. Iturãjet, ewõr bar juõn jumae elaplok an kauwatata, ak jidik wõt ak enañin ejelok armij ro ilo lal rej lemnak kake. Ta in?
2 Ej jumae eo an “Gog jen enen Magog,” eo me Bible eo ej konono kake ilo Ezekiel chapter 38. Jej kalaplap ke ñe jej ba bwe jumae in enaj laplok an kauwatata jen terrorism eo ej walok ibelakin lal? Jab ñan jidik, kinke jumae eo an Gog enaj ellãlok jen an kokkure wõt kien ko an armij. Enaj jumae kien eo an Anij ilañ! Bõtab, jab einwõt armij ro, me jidik wõt air bõk anjo ion jumae ko nae jukjuk im bed ko air, Ri Kõmanman eo ewõr an maroñ ñan lukkun bõk anjo ion jumae ko relej an Gog.
Juõn Ien Jumae Kien Anij
3. Ta eo rar kir iroij ro an lal bwe ren kõmmane jen 1914, im ewi wãwen rar uak?
3 Tarinae eo ikõtan King eo an Anij ej iroij kiõ im jukjuk im bed eo enana an Satan ej wõnmanlok wõt jen ien eo Ailiñ eo an Anij ear jutak ilañ ilo 1914. Ilo ien eo, rar kejelãik iroij in armij ro bwe ren kõttãik ir ñan Iroij eo Anij ear kãlete. Ak rar makoko in kõmman eindein, einwõt ear kanan kake: “Kiñ ro i lõl rej mõke kajutõk ir; Iroij ro rej jimor bebe nae Jeova, im nae Dri kabit eo An, im ba, Emõn jen mijkõki lukjeir im jolok to ko air jen kij.” (Sam 2:1-3) Jumae iroij eo an Ailiñ eo enaj jemlok ilo ien Gog eo jen Magog ej tarinaik Anij.
4, 5. Ewi wãwen armij ro remaroñ tarinaik kien eo an Anij jejjab maroñ loe ilañ?
4 Jemaroñ lemnak ewi wãwen an armij ro maroñ tarinaik kien eo jejjab maroñ loe ilañ. Bible eo ej kalikar bwe kien in, ej “jibuki im eñoul emen tausan, emwij wiaik jen lõl,” im “Lam eo,” Christ Jesus. (Reveles̃õn 14:1, 3; Jon 1:29) Kinke kien in ekãl ej bed ilañ, rej naetan “lõñ ko rekãl,” ak ro rej kõttãik ir ñan e im jokwe ion lal rar naetair “lõl ekãl.” (Aiseia 65:17; 2 Piter 3:13) Enañin aolep 144,000 ro rej iroij ibben Christ rar mij ilo tiljek ion lal. Rar kamol air tellokin bõk jerbal ko rekãl ilo lañ.
5 Bõtab, juõn bwen edik ian 144,000 rej bed ion lal. Jen ian elõñlok jen 15,000,000 armij ro rar bed ilo kwojkwoj in Kejota eo an Iroij ilo 2002, 8,760 iair rar kwalok air kejatdikdik bwe rar mõttan ro emwij kãlet ir ñan jerbal ilo lañ. Jabdewõt eo ekõnan jumae bwen ro uan Ailiñ eo ej einwõt ñe ej jumae Ailiñ eo an Anij.—Reveles̃õn 12:17.
King eo Ej Wõnmanlok bwe En Bõk Anjo
6. Ewi lemnak eo an Jehovah im Christ kin an armij ro jumae armij ro an Anij?
6 Emwij kar kanan kin lemnak eo an Jehovah kin jumae eo nae Ailiñ eo an emwij an jinoe: “Eo ej jijõt ion tron; Iroij e naj kajirekake ir. Inem E naj konono ñõn ir ilo An illu, im naj kalelñoñ ir ilo An libõpne. Ak ña ij kairoij aõ Iroij ion Zaion, aõ tol ekwojarjar.” (Sam 2:4-6) Emottok ien eo bwe Christ, iumin tel eo an Jehovah, ej “wõnmanlok bwe en bõk anjo.” (Reveles̃õn 6:2) Ewi lemnak eo an Jehovah ikijen ro rej jumae armij ro an ilo tarinae eo eliktata? Ej watõke einwõt ñe rej jumae emake im King eo an. Jehovah ej ba: “Eo ej uñure kwe ej einwõt ñe ej uñure iju in meja.” (Zechariah 2:8, NW) Im Jesus ear kalikar bwe men ko rej kõmmane ak jab kõmmane ñan ri kabit ro an rej einwõt men ko rej kõmmani ak jab kõmmani ñan e.—Matu 25:40, 45.
7. Ta un ko unin an ro rej mõttan “jar eo elap” ilo Reveles̃õn 7:9, bõk kwi eo an Gog?
7 Emol, ro rej rejetak bwen ri kabit ro renaj bareinwõt eñjake kwi eo an Gog. Rein uan “lal eo ekãl” an Anij rej “juõn jar elap” im rar kir ir “jen ailiñ otemjej, im ian bwij otemjej, im driloabjen otemjej, im konono otemjej.” (Reveles̃õn 7:9) Kar konono kaki ir einwõt ro “rej jutõk iman tron eo im iman mejen Lam, kõnõki kin nuknuk ko remouj.” Inem rej jutak einwõt ro emwij kowãppen ir iman Anij im Christ Jesus. Rej kwotak “pam ko ilo peir,” im rej nebar Jehovah einwõt Iroij Bõtata eo iaolepen lañ im lal, ikijen eo ear kairoij e King eo an, Jesus Christ eo ej jijet ion throne, “Lam an Anij.”—Jon 1:29, 36.
8. Ta eo jumae eo an Gog enaj kamakit Christ bwe en kõmmane, im kin tokjen et eo?
8 Jumae eo an Gog enaj kamakit King eo an Anij eo ej jijet ion throne bwe en emmakit im jinoe tarinae in Armageddon. (Reveles̃õn 16:14, 16) Ro rej karmijeteik iroij bõtata eo an Jehovah renaj jako. Ijo turãjet, ro rej kijenmij iumin melejoñ ko ilo air tiljek ñan Ailiñ eo an Anij, renaj jokane ñan indio. Ikijen men in, ri jilek Paul ear je: “Eo kakõle alikar an Anij ekajet jime; bwe En watõk kom ekar ñõn ailiñ in Anij, eo komij bareinwõt iñtan kin E: Elañe ejime an Anij nawõnair kin iñtan ro rej kaiñtan kom, Ak komeo, komij iñtan nawõnami kin kakije ibem ilo kwalok Iroij Jisõs jen lõñ iben enjel ro an kajur eo an, ilo kijeek eurur, im E naj lelok irenwõne ñõn ro re jab bokake gospel an ad Iroij Jisõs Kraist.”—2 Dri Tessalonika 1:5-8.
9, 10. (a) Ewi wãwen an kar Jehovah lelok ñan Judah anjo ion juõn ri kijirãt? (b) Ta eo Ri Christian ro ilo ran kein rej aikwij wõnmanlok in kõmmane?
9 Ilo ien eñtan eo elap, eo enaj jemlok ilo Armageddon, Christ enaj tarinaik nana otemjej. Ak ri kalor ro an renaj jab aikwij bõk kunair ilo tarinae eo, einwõt armij ro jen bwij ko ruo bwijin ailiñ in Judah rar jab aikwij kõmmane elõñ thousand ebeben ko mokta. Tarinae eo an Jehovah, im ear lelok anjo eo. Bwebwenato eo ej ba: “Im ke rej jino air al im nebar Jeova e ar likit ro dri kebao nae ro nejin Amon, Moab, im tol Sier, ro rar itok nae Juda; im ar mõn ir. Bwe ro nejin Amon im Moab rar jutõk nae ro dri jokwe i Sier, im kanuij mõn ir im kokkure ir; im ke emwij air mõn ro dri jokwe i Sier, jabrewõt iair rej jibõñ kokkure dron. In ke dri Juda rar itok ñõn imõn bar eo im ene jemaren, rar reilok ion jar eo; im lo, ubõn armij rej ion brij, im ejelok juõn e ar ko.”—2 Kronikel 20:22-24.
10 Ear walok ilo wãwen eo ejejjet ekkar ñan kanan eo an Jehovah: “E naj ejelok unin ami iri ilo tõrinae.” (2 Kronikel 20:17) Men in ej likit juõn wanjoñok ñan Ri Christian ro bwe ren lore ñe Jesus Christ ej “wõnmanlok bwe en bõk anjo.” Mae ien eo, rej wõnmanlok wõt im tarinaik nana, jab kin kein tarinae ko ilo kanniek, ak kin kein tarinae ko ilo jitõb. Ilo wãwen in, rej “anjo jen nana kin emõn.”—Dri Rom 6:13; 12:17-21; 13:12; 2 Dri Korint 10:3-5.
Wõn Enaj Tel Tarinae eo nae Gog?
11. (a) Ta dolul ko Gog enaj kajerbali ilo tarinae eo an? (b) Ta eo ej kitibuji ilo ad mimij wõt ilo jitõb?
11 Gog in Magog ej Satan Devil eo ear wanlaltak im bed ion lal jen 1914. Einwõt juõn jitõb, ejjab maroñ jumaik kij ilo kajju, ak ej kajerbal dolul in armij ro ñan air kõmmani jerbal ko an. Wõn rein? Bible eo ejjab ba ilo tibdikin, ak ej kwalok jet men ko ñan jibañ kij jelã kajjiir. Ñe men ko rej walok ion lal im kajejjet kien nan in kanan ko an Bible, jidik kin jidik enaj alikar. Armij ro an Jehovah rejjab kajjimelele ak rej mimij wõt ilo jitõb, im jelã bwe makitkit ko ilo politic im kabuñ ko rej kajejjet kitien kanan ko an Bible.
12, 13. Ewi wãwen ri kanan Daniel ear kanan kin jumae eo eliktata ion armij ro an Anij?
12 Ri kanan Daniel ear kalaplok melele ko kin tarinae eo eliktata enaj itok ion armij ro an Anij. ke ear jeje: “[King eo itueañ] enaj ire ilo kwi eo an ñan kajeebeplok im kokkure elõñ. Im enaj kajutak em nuknuk ko an raibujuij ikõtan lomalo eo elap im tol in Kainiknik eo ekwojarjar.”—Daniel 11:44, 45, NW.
13 Ekkar Bible eo, “lomalo eo elap” ear Lomalo in Mediterranean, im “tol eo ekwojarjar” kar Zion, eo me Jehovah ear ba kake: “Ña ij kairoij aõ Iroij ion Zaiõn, aõ tol ekwojarjar.” (Sam 2:6; Joshua 1:4) Inem, ilo juõn wãwen ilo jitõb, ene eo “ikõtan lomalo eo elap im tol eo ekwojarjar” ej kõkkar kin wãwen an Ri Christian ri kabit ro mweie ilo jitõb. Rejjab mõttan lomalo in armij ro rej jenolok jen Anij, im rej kijoror wõt ñan iroij ibben Christ Jesus ilo Ailiñ eo ilañ. Alikar, ri kabit ri karejar ro an Anij, im ro retiljek mõttair jar eo elap, renaj einwõt juõn men in kõjjeroro ñan king eo itueañ ñe enaj jumae ilo lej im kajejjet kitien ñan in kanan eo an Daniel.—Aiseia 57:20; Dri Hibru 12:22; Reveles̃õn 14:1.
Enaj Ewi Lemnak eo an Ro Ri Karejaran Anij?
14. Ta men ko jilu armij ro an Anij renaj kõmmani ñe rej tarinaik ir?
14 Ta eo ri karejar ro an Anij renaj aikwij kõmmane ñe ri kijirãt ro renaj jumae ir? Bar juõn alen, emmakit eo an ailiñ eo an Anij ilo ran ko an Jehoshaphat ej likit juõn wanjoñok. Kememej bwe ro ri ailiñ eo an rar bõk juõn kien ñan kõmman jilu men ko: (1) bedwõt, (2) jutak, im (3) lo lomor eo an Jehovah. Ewi wãwen armij ro an Anij renaj emmakit ekkar ñan nan kein?—2 Kronikel 20:17.
15. Ta melelen ñan armij ro an Jehovah bwe ren bedwõt?
15 Bedwõt: Ilo ejelok bere, armij ro an Anij renaj wõnmanlok wõt ilo air bebe ñan rejetak Ailiñ eo an Anij. Renaj wõnmanlok ilo air bebe ñan jab ebbururu im bõk kunair ilo politic. Renaj ‘bin, im tõt wõt’ ilo air jerbal ilo tiljek ñan Jehovah im renaj wõnmanlok im nebar Jehovah iman mejen armij kin joij im yokwe eo an. (1 Dri Korint 15:58; Sam 118:28, 29) Ejelok jabdewõt ijjibed kiõ ak tokelik emaroñ kamakit ir jen ijo jikiir Anij ear kowãppene.
16. Ilo wãwen et ko ri karejar ro an Jehovah renaj jutak wõt?
16 Jutak: Ri karejar ro an Jehovah rejamin atartar ion kajur eo air make ñan lomoren ir ak renaj atartar wõt ion Jehovah kin aolepen burueir. E wõt emaroñ kanemkwoj ri karejar ro an jen jorrãn ko ibelakin lal, im ear kallimur bwe enaj kõmman eindein. (Aiseia 43:10, 11; 54:15; Lamentations 3:26, NW) Liki Jehovah enaj koba ad liki ial eo jej loe ran kein im ej kajerbale elõñlok jen jibuki yiõ ko ñan kiõ ñan kajejjet kitien karõk ko an. Elaplok jen mokta, Ri Christian ro remol renaj aikwij atartar ion ri kabuñ ro mõttair Jehovah im King eo an rar kãlet ñan tel ir. Emaan rein retiljek renaj tel armij ro an Anij. Elañe jej kajettokjen wãwen tel eo air jenaj jorrãn ilo jemlokin.—Matu 24:45-47; Dri Hibru 13:7, 17.
17. Etke ri karejar ro an Anij retiljek renaj lo lomor eo an Jehovah?
17 Lo lomor eo an Jehovah: Lomor enaj juõn ãjinkij ñan aolep ro rej debij air tiljek einwõt juõn Christian im rej liki Jehovah ñan lomoren ir. Mae awa eo eliktata—im ñan joñan wõt air maroñ—renaj keañ kin itok eo an ran in ekajet eo an Jehovah. Men in kõmanman otemjej rej aikwij jelã bwe Jehovah ej Anij eo emol im bwe ewõr ri karejar ro an retiljek ion lal. Ejamin bar wõr juõn aikwij ñan kõtlok ien ñan uake aitwerõk eo bwe maroñ eo einwõt iroij bõtata ijoko otemjej ej an Jehovah.—Ezekiel 33:33; 36:23, NW.
18, 19. (a) Ewi wãwen al in anjo eo ilo Exodus chapter 15 ej kwalok eñjake ko an ro renaj ellã im mour jen jumae eo an Gog? (b) Ta men eo ekkar armij ro an Anij rej aikwij in kõmmane kiõ?
18 Elikin air kalaplok air kajur, armij ro an Anij renaj deloñ ilo lal eo ekãl, im kijoror wõt ñan al juõn al in anjo, einwõt Ri Israel ro etto rar kõmmane elikin air anemkwoj jen ilujen Lomalo Ekilmir. Kin kamolol eo air ñan indio ñan Jehovah kin an kejbãrok ir, einwõt kajjojo armij im juõn kumi in armij, rej eliji nan ko jen etto: “I naj al ñõn Jeova, bwe emol e kanuij utiej. . . . Jeova e dri tõrinae: etan Jeova. . . . Anbwijmaroñõm, O Jeova, ej ruprupe dri kijirãt eo. Im ilo lapen Am utiej, Kwoj ukõji ro rej jutõk nae Yuk: Kwoj jilkinlok am illu, ej tili ir einwõt mãr e mõra. . . . Ilo Am joij Kwar tel armij ro Kwar wiaik ir; ilo Am kajur Kwar jiniet ñõn ir ial ñõn mweo imõm e kwojarjar. . . . Kwo naj kadreloñlok ir, im kat ir ilo tol in Am jolit, jikin eo, O Jeova, Kwar kapojõk bwe Kwon jokwe iloan, jikin kwojarjar eo, O Jeova, pã ko peõm rar kajure. Jeova e naj kiñ in drio im in drio.”—Exodus 15:1-19.
19 Kiõ ke kejatdikdik eo ñan mour indio ealikarlok wõt jen mokta, ien in ej juõn ien emõn bwe ri karejar ro an Anij ren kwalok air tiljek ñan Jehovah im kõkãl bebe eo air ñan karejar ñan e einwõt King eo air ñan indio!—1 Kronikel 29:11-13.
Kwomaroñ Ke Kamelele?
• Etke Gog enaj tarinaik ri kabit ro im sheep ro jet?
• Ewi wãwen armij ro an Anij renaj bedwõt?
• Ta melelen jutak im tõt?
• Ewi wãwen an armij ro an Anij naj lo lomor eo an Jehovah?
[Pija eo ilo peij 26]
Jehovah ear lelok anjo eo ñan Jehoshaphat im armij ro an, im rejjab aikwij ire ilo tarinae eo
[Pija eo ilo peij 28]
Ri kabit ro im sheep ro jet renaj jimor bõk kunair in debij air tiljek ilo iroij bõtata eo an Jehovah
[Pija eo ilo peij 30]
Einwõt Ri Israel ro etto, mõttan jidik armij ro an Anij renaj al juõn al in anjo