En Ewi Wãwen Lemnak Eo Ad Kin Armij Ñe Ran Eo An Jehovah Ebaktok?

“Iroij e jab kemmer kin An kalimur, . . . a Ej meanwõr ñõn kom, im jab kõnan bwe jabrewõt en joko, a bwe ren otemjej itok im ukwelok ibeir.”​—2 PITER 3:9.

1, 2. (a) Ewi wãwen an kar Jehovah lemnak kin ir? (b) Ta kajitõk ko jej aikwij kajitõk ibbed make?

RI KARERJAR ro an Jehovah rej jerbal ñan “kõmõn dri ailiñ ko otemjej bwe ren dri kalor [ro].” (Matu 28:19) Ñe jej kajejjet kitien jerbal in im kõttar “ran eo an Iroij,” jej aikwij bõk juõn lemnak einwõt e kin armij. (Zephaniah 1:​14, NW) Im ewi wãwen lemnak eo an Jehovah kin armij? Ri jilek Peter ej ba: “Iroij e jab kemmer kin An kalimur, einwõt jet rej watõk rumij; a Ej meanwõr ñõn kom, im jab kõnan bwe jabrewõt en joko, a bwe ren otemjej itok im ukwelok ibeir.” (2 Piter 3:9) Anij ej watõk kajjojo armij einwõt ro remaroñ ukwelok. Anij ej “Eo e kõnan lomoren armij otemjej, im bwe ren item jela mol.” (1 Timote 2:4) Alikar, Jehovah emõnõnõ “ñe ri nana eo ej ukwelok im mour wõt”!​—Ezekiel 33:​11, NW.

² Jej errã ke kin lemnak eo an Jehovah kin armij? Einwõt e, jej watõk armij ro kajjojo jen ailiñ im kil otemjej einwõt ro remaroñ erom “s̃ip ko jen melaj eo an”? (Sam 100:3; Jerbal 10:34, 35) Jen lale kiõ ruo wanjoñok ko rej kwalok kin aorõkin ad bõk lemnak eo an Anij. Ilo wanjoñok kein ruo, ien kokkure eo ear ebaktok, im ri karejar ro an Jehovah rar jelãlok iman kin kokkure kein. Wanjoñok kein elap aorõkiir ñe jej kõttar ran eo elap an Jehovah.

Abraham Ear Bõk Lemnak eo an Jehovah

3. Kar ewi wãwen lemnak eo an Jehovah ikijen armij ro ilo Sodom im Gomorrah?

³ Wanjoñok eo kein kajuõn ej ikijen ri patriarch eo etiljek Abraham im jikin kwelok ko renana Sodom im Gomorrah. Ke Jehovah ear eoroñ “ainiken Sodom im Gomorra elap,” ear jab kokkure jikin kwelok kein im ri ailiñ ro air ilo mõkaj. Ear etali ijõkein mokta. (Jenesis 18:20, 21) Ear jilkinlok ruo enjel ñan Sodom, im rar jokwe ilo mweo imõn emaan eo ewãnik Lot. Ilo boñin eo enjel ro rar itok, “man ro ilo jikin kwelok eo . . . rar kabol mweo, ridto im ladrik, armij otemjej jen ijo ko otemjej,” bwe ren babu ibben enjel ro. Alikar, mour in ejej eo an ro rar jokwe ilo jikin kwelok eo ear tellokin jeebeplok. Ak, enjel ro rar jiroñ Lot: “E bar or ke nukõm i enin? nejõm eman, im lõmaro nejõm im limaro nejõm, im jabrewõt men ko am i jikin kwelok in, kwon ãñinlok ir jen jikin kwelok in!” Jehovah ear kabellok juõn ial ñan lomoren jet armij ro jen jikin kwelok in, ak ilo jemlokin, Lot im ledik ro ruo nejin rar rõlok jen kokkure eo.​—Jenesis 19:​4, 5, 12, 16, 23-​26.

4, 5. Etke Abraham ear eowor kin armij ro ilo Sodom, im lemnak eo an kin armij ro ear ekkar ke ñan lemnak eo an Jehovah?

⁴ Kiõ, jen wõnliklok ñan ien eo ke Jehovah ear kwalok kin unin an etale jikin kwelok in Sodom im Gomorrah. Ilo ien eo Abraham ear eowor: “Bwelen limñoul dru wãnik iloan jikin kwelok en: kwo naj kokkure, im jab likit ir kin limñoul ro rej bwe iloan ke? En etolok jen Kwe bwe Kwon kõmõn eindrein, im mõn ro dru wãnik iben ro dri jerawiwi, im bwe dru wãnik rej einwõt dri jerawiwi; en etolok jen Kwe: Eo ej Iroij in ekajet ñõn aolepen lõl E jamin kõmõn wãnik ke?” Abraham ear kajerbal nan eo “en etolok jen kwe” ruo alen. Jen men ko ear jelã kake mokta, Abraham ear jelã bwe Jehovah ejamin kokkure ro rewãnik ibben ro renana. Ke Jehovah ear ba bwe ejamin kar kokkure Sodom elañe ekar wõr “limñoul dru wãnik iloan jikin kwelok eo,” Abraham ear kaeitlok orair mae joñoul wõt orair.​—Jenesis 18:22-​33.

⁵ Jehovah enaj kar roñjake ke eowor ko an Abraham elañe rar jõkkar ñan lemnak ko an? Alikar jaab. Einwõt “Jeran Anij,” Abraham ear jelã im errã ibben lemnak eo an. (Jemes 2:​23) Ke Jehovah ear lale im etale Sodom im Gomorrah, ear mõnõnõ in uake kajitõk ko an Abraham. Etke? Kinke Jemed ilañ ejjab kõnan bwe “jabrewõt en joko, a bwe ren otemjej itok im ukwelok ibeir.”

Lemnak eo an Jonah kin Armij Ear Jab Eindein

6. Kar ewi wãwen lemnak eo an Ri Nineveh ro kin nan in kejelã eo an Jonah?

⁶ Kiõ jen etale wanjoñok eo kein karuo​—ikijen Jonah. Jikin kwelok eo ear bojak in jeebeplok kar Nineveh. Kar jiroñ ri kanan Jonah bwe en kwalok nan kin nana otemjej rar walok ilo jikin kwelok eo rar ‘wanliñlok ñan ibben Jehovah.’ (Jonah 1:​2, NW) Ekoba itulikin jikin kwelok in, Nineveh ear juõn jikin kwelok elap, “eo kwoj aikwij jilu ran ñe kwoj etetal jen jabõn ñan jabõn.” Ke Jonah ej kab bokake im deloñ ilo Nineveh, ear kwalok nan im ba: “Mõttan wõt eñoul ran ko, im Nineveh enaj buñ.” Ilo ien eo, “lõmaro ilo Nineveh rar jino tõmak ilo Anij, im rar kejelã kin juõn ien jitlok im kõnak nuknuk ko remor.” King eo an Nineveh ear ukwelok bareinwõt.​—Jonah 3:​1-6, NW.

7. Kar ewi wãwen lemnak eo an Jehovah kin Ri Nineveh ro rar ukwelok?

⁷ Lemnak eo air ear einjuõn jen lemnak eo an Sodom! Ewi wãwen an kar Jehovah watõk Ri Nineveh ro rar ukwelok? Jonah 3:​10 (NW) ej ba: “Anij ear buromõj kin an ekajete ir; im ear jab kokkure ir.” Jehovah ear “buromõj” ilo wãwen eo ear ukõt bebe eo an kin ir kinke rar ukõt wãwen ko air. Kien ko an Anij rar jab oktak, ak Jehovah ear ukõt bebe eo an elikin an lo an Ri Nineveh ro ukwelok.​—Malachi 3:​6, NW.

8. Etke Jonah ear jememe?

⁸ Ke Jonah ear kile bwe Nineveh ejamin kar jako, ear errã ke ibben lemnak eo an Jehovah? Jaab, kinke ear jiroñ kij: “ñan Jonah, ear jab juõn men ear buñburuen kake, inem ear lap an illu.” Bar ta eo Jonah ear kõmmane? Bwebwenato eo ej ba: ‘Inem ear jar ñan Jehovah im ba: “Kiõ, O Jehovah, abañ in kar aõ ke, ñe ear bed ijo jikiõ? Eñin unin iar ko ñan Tarshish; kinke iar jelã bwe kwe juõn Anij in joij im tiriamokake, erumij am illu im elap am joij ilo yokwe, im buromõj kin jorrãn eo.’ ” (Jonah 4:​1, 2, NW) Jonah ear jelã kin kadkad ko kadkadin Jehovah. Bõtab, ilo ien eo, ri kanan eo ear iten jememe im jab errã ibben lemnak eo an Anij kin Ri Nineveh ro rar ukwelok.

9, 10. (a) Ta katak eo Jehovah ear lelok ñan Jonah? (b) Etke jemaroñ ba bwe Jonah ear kajimwe lemnak eo an kin Ri Nineveh ro tokelik?

⁹ Jonah ear ilok jen Nineveh, kalek juõn imõn kabbed, im jijet iumin lurin “im kõttar im lale ta eo enaj kar walok ñan jikin kwelok eo.” Jehovah ear kõtlok bwe juõn ut en eddek im kalure Jonah. Bõtab, juõn ran tokelik, ut eo ear mij. Ke Jonah ear illu, Jehovah ear ba: “Kwar inebata kin ut eo . . . Im, ña, ejjab eindein ke aõ buromõj kin Nineveh jikin kwelok eo elap, ijo elõñlok jen jibuki im roñoul armij rejañin jelã kin oktak eo ikõtan anmiñ im anmoon, im elõñ men in mour ko?” (Jonah 4:​5-​11, NW) Ej juõn katak elap tokjen ñan Jonah ikijen lemnak eo an Jehovah kin armij!

¹⁰ Ejelok nan ilo jeje ko kin eñjake eo an Jonah kin an buromõj kin armij ro ilo Nineveh. Bõtab, ej alikar bwe ri kanan in ear kajimwe lemnak eo an kin Ri Nineveh ro rar ukwelok. Jej bõk jemlok in kinke Jehovah ear kajerbal e bwe en jeje bwebwenato in emwij kakõrmole.

Ta Ian Lemnak Kein Ibbam?

11. En kar ewi wãwen lemnak eo an Abraham kin armij ro rej mour ilo ran kein?

¹¹ Ran kein, jej jelmae bar juõn ien kokkure​—ej ikijen jeebeplok eo an jukjuk im bed in enana ilo ran eo elap an Jehovah. (Luk 17:26-​30; Dri Galetia 1:4; 2 Piter 3:​10) En kar ewi wãwen lemnak eo an Abraham kin armij ro rej mour ilo lal in eo enaj jako iumin jidik wõt ien? Bõlen enaj buromõj kin ro rejañin roñjake “gospel eo an ailiñ eo.” (Matu 24:14) Elõñ alen Abraham ear eowore Anij ñan lomoren ro rewãnik ilo Sodom. Jej buromõj ke kin armij ro renaj karmijeteik lal in eo ej bed iumin pein Satan elañe ewõr ien ñan air ukwelok im karejar ñan Anij?​—1 Jon 5:​19; Reveles̃õn 18:​2-4.

12. Etke ebidodo ejaak juõn lemnak einwõt Jonah kin armij ro jej jelmae ilo jerbal in kwalok nan, im ta eo jemaroñ kõmmane kin men in?

¹² Ej juõn men ekkar ñan kijoror kin ien jemlokin nana. (Habakkuk 1:​2, 3, NW) Ak, ebidodo ad kaddek juõn lemnak einwõt Jonah, im jab kea kin mour eo an armij ro remaroñ ukwelok. Ej mol men in, elaptata ñe jej aolep ien jelmae armij ro rejjab itoklimo, rejumae, ak relej ñe jej kwalok ibbeir kin ennan eo an Ailiñ eo ilo moko imwiir. Jemaroñ jab kea kin ro me Jehovah enaj aintok ir jen jukjuk im bed in enana. (Dri Rom 2:4) Elañe jej lukkun etale im lo meñe jidik wõt joñan bwe lemnak eo ad ej einwõt lemnak eo an Jonah kin Ri Nineveh ro, jemaroñ jar im bõk jibañ ñan kajimwe lemnak eo ad im bõk lemnak eo an Jehovah.

13. Etke jemaroñ ba bwe Jehovah ej itoklimo kin armij ro ran kein?

¹³ Jehovah ej itoklimo kin ro rejañin karejar ñan e, im ej roñjake jar ko an armij ro an emwij wujleplok air mour. (Matu 10:11) Ñan wanjoñok, “e naj mõkõj an [kõmman] ekajet” ilo an uaki jar ko air. (Luk 18:​7, 8) Bareinwõt, Jehovah enaj kajejjet aolep kallimur im karõk ko an ilo ien eo an. (Habakkuk 2:​3, NW) Men in enaj koba an jolok nana otemjej jen lal in, einwõt ear kokkure Nineveh elikin an kar ro rej jokwe ie bar wõnmanlok ilo manit ko air renana.​—Nahum 3:​5-7, NW.

14. Ta eo jej aikwij kõmmane ñe jej kõttar kin ran eo elap an Jehovah?

¹⁴ Mae ien an jukjuk im bed in enana jako ilo ran eo elap an Jehovah, jenaj kõttar ke ilo meanwõd, boub wõt ilo ad kõmanman ankil an? Jejañin jelã kin ewi joñan an laplok jerbal in kwalok nan eo ad jenaj kõtõbrake mae ien an itok ran eo an Jehovah, ak jej jelã bwe jenaj kwalok nan kin news eo emõn ibelakin lal mae ien an Anij juburu kake mokta jen an kajemlok jukjuk im bed in. Im emol bwe jej aikwij itoklimo wõt kin “men ko remõn” jej aikwij bõktok ñe Jehovah ej kobrak mweo iman kin aibujuij eo ​—Haggai 2:​7, NW.

Lemnak ko Ad Rej Alikar ilo Jerbal ko Ad

15. Ta eo emaroñ kalaplok kamolol eo ad kin jerbal in kwalok nan?

¹⁵ Bõlen jej mour ilo juõn jikin armij ro rejjab itoklimo kin jerbal in kwalok nan eo ad im ejelok ad maroñ ñan emmakit ñan bar juõn jikin elaplok an aikwiji ri keañ ro an Ailiñ eo ie. Ta elañe jemaroñ lo joñoul armij ro ilo territory eo ad mokta jen an itok jemlokin lal. Jej lemnak ke bwe elap tokjen ad bukõt im lo armij rein joñoul? Jesus ear “tiriamokake” jar in armij ro kinke rar “barok, im jibliklik einwõt s̃ip ko ejelok air s̃eperd.” (Matu 9:​36) Ilo ad katak Bible im etale ilo tibdikin katak ko ilo magazine kein Imõniaroñroñ im Awake!, jemaroñ kalaplok lolokjen eo ad kin abañ ko an lal in. Inem, wãwen in emaroñ kalaplok ad kamolol kin aikwij eo ñan kwalok nan kin news eo emõn. Bareinwõt, kajerbal kein katak ko ilo kamolol jen “dri korijer eo e tiljek im meletlet” emaroñ kalaplok maroñ eo ad ñan kareel buruen armij ro ilo jikin ko ekkã ad kwalok nan ie.​—Matu 24:45-​47; 2 Timote 3:​14-​17.

16. Ewi wãwen ad maroñ kalaplok bolemen eo ad ilo jerbal in kwalok nan?

¹⁶ Ad kea kin ro me remaroñ bõk ennan in Bible eo ej letok mour emaroñ kamakit kij ñan lemnak in ukõt ien ko ad ñan kwalok nan im lemnak kin wãwen ko jemaroñ kebak ri mweo ilo jerbal in kwalok nan. Jej lo ke bwe elõñ rejjab bed imoko imwiir ñe jej kwalok nan ie? Elañe aet, inem jemaroñ kalaplok bolemeir kwalok nan eo ad ilo ad ukõt ien im jikin ko ilo jerbal in kwalok nan eo ad. Ri eñwõd ro rej eñwõd ñe ewõr ek. Jemaroñ ke kõmman eindein ilo jerbal in eñwõd ilo jitõb kin armij? (Mark 1:​16-​18) Etke jejjab kwalok nan ilo jota im kajerbal telephone ñan kwalok nan, ilo jikin ko jerbal kein rejjab jumae kien? Jet ri kwalok rar lo bwe jikin parking lot ko, jikin ko wa kileplep waan ettõr ko rej bõjrak jidik ie, jikin gas, im jikin wia ko rej ‘jikin eñwõd ko’ rekouwa. Ad bõk juõn lemnak einwõt Abraham emaroñ alikar bareinwõt ñe jej kwalok nan ilo jabdewõt ien emõntok.

17. Ilo wãwen et ko jemaroñ rejañ missionary ro im ro jet rej kwalok nan ilo ailiñ ko retolok?

¹⁷ Elõñ rejañin roñ kin ennan eo an Ailiñ eo. Ijellokin ad kwalok nan, jemaroñ ke kwalok ad itoklimo kin armij meñe jejañin etal jen mweo imõd? Eokwe, jej jelã ke kajjen missionary ro ak ro rej kwalok nan full-time ilo jikin ko retolok? Elañe aet, enaj wõr tokjen elañe jej jejelok ñan ir im kamolol ir kin jerbal ko air. Ewi wãwen am maroñ kwalok am itoklimo kin armij otemjej? Letter ko ad ñan rejañ, nebar, im kamolol ir remaroñ kakajur missionary ro bwe ren bedwõt ilo jikin ko rar karõk bwe ren kwalok nan ie, im jibañ elõñlok armij ro bwe ren bõk jelãlokjen eo kin mol eo. (Dri Ekajet 11:40) Bareinwõt jemaroñ jar kin missionary ro im ro rej kwuli kin mol eo ilo ene ko jet. (Dri Epesõs 6:​18-​20) Bar juõn wãwen ñan kwalok itoklimo eo ad ej ikijen ad jabawõt kin jerbal in kwalok nan eo an Ri Kennan ro an Jehovah ibelakin lal.​—2 Dri Korint 8:​13, 14; 9:​6, 7.

Kwonaj Kar Maroñ Ke Emmakit?

18. Ta eo jet Ri Christian ro rar kõmmani ñan kowõnmanlok jerbal ko an Ailiñ eo ilo ailiñ eo rej bed ie?

¹⁸ Ro rar emmakit ñan jikin ko ear laplok air aikwij ri keañ ro an Ailiñ eo ie rar bõk jerammõn kin air karmijeteik kõnan ko air make. Bõtab, meñe rar jokwe ilo kabijukneir, Ri Kennan ro jet an Jehovah rar jino katak kin bar juõn kajin bwe ren jibañ armij ro ilo bukwon eo rej jen bar juõn ailiñ. Emol kain karõk rot kein rar bõk jerammõn jen e. Ñan wanjoñok, jiljilimjuõn Ri Kennan ro an Jehovah rej jibañ Ri China ro ilo juõn jikin kwelok ilo Texas, U.S.A., rar karuwainenetok 114 armij ro ñan bed ilo kwojkwoj in Kejota eo an Iroij eo ilo 2001. Ro rej jibañ kain armij rot rein rar lo bwe jikin jonikõn eo air ebojak kiõ.​—Matu 9:​37, 38.

19. Ta eo kwomaroñ kõmmane elañe kwokõnan emmakit ñan bar juõn ailiñ etolok im kwalok nan kin Ailiñ eo ijo?

¹⁹ Bõlen kwe im family eo am kom maroñ emmakit ñan bar juõn jikin ijo elaplok air aikwiji ri kwalok nan ro an Ailiñ eo ie. Ak, moktata, ej juõn men in meletlet bwe kwon “jijõt mokta, im bebe kin wõnan.” (Luk 14:28) Men in ej juõn men in aikwij ñe juõn armij ej lemnak in emmakit ñan bar juõn ailiñ etolok. Jabdewõt eo ej lemnak bwe emaroñ kõmman eindein ej aikwij kalmenlokjen kin kajitõk kein: ‘Imaroñ ke kabwe aikwij ko an family eo aõ ilo kanniek? Imaroñ ke bõk juõn visa ekkar? Ij konono ke kajin eo an ailiñ eo, ak imõnõnõ ke in katak kin kajin eo an? Emwij ke aõ lemnak kin ewi joñan an bwil ak molo ijo im ta mantin ailiñ eo? Imaroñ ke einwõt juõn men in “kainemõn” im jab juõn eddo ñan ri tõmak ro mõttad ilo ailiñ eo?’ (Dri Kolosse 4:​10, 11) Ñan jelã ewi joñan air aikwiji jibañ ilo ailiñ eo kwokõnan emmakit ñan e, ej juõn men ekkar ñan am jejelok ñan ra eo ak branch office eo an Ri Kennan ro an Jehovah eo ej bõk eddon jerbal in kwalok nan ilo jikin eo.a

20. Ewi wãwen an juõn Christian jodikdik kar kalaplok jerbal eo an ñan jibañ ri tõmak ro mõttan im ro jet ilo juõn ailiñ etolok?

²⁰ Juõn Ri Christian eo ear bõk kunan ilo jerbal in kalek Kingdom Hall ko ilo Japan rar kile bwe rar aikwiji ri ekkal ro rekabel ñan kalek juõn mõn kwelok ilo Paraguay. Kinke ear jañin mare im emõn ded, ear emmakit ñan ailiñ eo im iumin ralitõk alliñ ear make ian im jerbal full-time ñan kalek mõn kwelok eo. Ilo ien eo ear bed ie, ear katak kajin Spain im katak Bible ibben armij ro. Ear lo bwe rar aikwiji ri kwalok ro an Ailiñ eo ilo ailiñ eo. Meñe ear jeblak ñan Japan, ejjabto tokelik ear jeblak ñan Paraguay im jibañ in aintok armij ro ilo ejja Kingdom Hall eo wõt ear kaleke.

21. Ta men eo elaptata jej aikwij itoklimo im lemnak kake ñe jej kõttar kin ran eo elap an Jehovah?

²¹ Anij enaj lo bwe jerbal in kwalok nan en jejjet kitien ilo eyu, im ekkar ñan ankil an. Ran kein, ej kamõkajlok jerbal in jonikõn eo ilo jitõb. (Aiseia 60:22) Ñe jej kõttar kin ran eo an Jehovah, jej aikwij kijejeto wõt im bõk kunad ilo jerbal in jonikõn eo im watõk armij ro einwõt Anij in yokwe eo ad ej watõk ir.

[Kamelele ko itulal]

Kwoj Kememej Ke?

• Ñe jej kõttar kin ran eo an Jehovah, en kar ewi wãwen lemnak eo ad kin armij?

• Kar ewi wãwen lemnak eo an Abraham kin ro rewãnik rar jokwe ilo Sodom?

• Kar ewi wãwen lemnak eo an Jonah kin Ri Nineveh ro rar ukwelok?

• Ewi wãwen ad maroñ kwalok bwe emwij ad bõk lemnak eo an Jehovah kin armij ro rejañin roñjake news eo emõn?

[Pija eo ilo peij 14]

Abraham ear bõk ejja lemnak eo einwõt Jehovah kin armij

[Pija eo ilo peij 15]

Jonah ear kajimwe lemnak eo an im bõk lemnak eo an Jehovah kin Ri Nineveh ro rar ukwelok

[Pija ko ilo peij 16]

Itoklimo kin armij ej kamakit kij ñan lemnak kin ien ko im wãwen ko remõn ñan kwalok nan kin news eo emõn ñan ir