Ikijen Jet Armij Ewi Wãwen Ad Kememej Ir?
ENAÑIN jilu thousand yiõ ko remotlok, David ear ko jen Saul king in Israel eo. David ear kajitõk ibben Nabal, juõn shepherd emweie ej shepherde sheep im goat, kin mõñã im aebõj. Emol, bwe Nabal ear wõr an muri ibben David im ri kalor ro an kin air kejbãrok bwij eo an Nabal jen ri kwot ro. Bõtab, Nabal ear makoko in karuwaineneik e ñan jidik. Elaptata ear lamõj im kauweik ri jerbal ro an David. Nabal ear likit emake ilo kauwatata, kinke David ear jab juõn kain armij rot eo ekõnan bwe jabdewõt armij ren kakitõtõike.—1 Samuel 25:5, 8, 10, 11, 14.
Lemnak eo an Nabal ear jõkkar ñan mantin ri ailiñ ko ilo Middle East ikijen karuwainene ri lolok im ri ruwamaejet ro. Inem, kain ãt rot eo Nabal ear ejaak kin emake? Bwebwenato eo an Bible ej ba bwe ear “jememe im ankeke ilo kõmõn ko an” im “e jitokjen.” Melelen ãt eo etan ej “bwebwe,” im emol ear mour ekkar ñan etan. (1 Samuel 25:3, 17, 25) Kwokõnan ke bwe armij ro ren kememej yuk einwõt kain armij rot eo? Kwo lej ke im jaje kõmmanwa ñe kwoj jerbal ibben ro jet, elaptata ñe rejjab kanuij bolemeir ñe rej jerbal ibben armij ro jet? Ak kwoj joij, ewõr ke jitõb in karuwainene ibbem, im lemnak kin eñjake ko an ro jet?
Ta Eo Armij Ro Rar Kememej Kake kin Jesus?
Toan an Jesus jerbal ion lal kar jilu im jimettan yiõ wõt. Ak, ilo wãwen et eo ri kalor ro an rar kememej e? Kinke ear wãppen, im ejelok jerawiwi ibben, ear utiej ke buruen? Ear kajur ioir ke kinke ear jelã bwe ear Nejin Anij? Ear kamijak im iun ri kalor ro an ke bwe ren bokake e? Ear lap an lemnak kin emake ke bwe ear jaje kõmman kejak ak ettõñ? Joñan an lap an boub ke bwe ear ejelok an ien ñan bed ibben ro remõjno im renañinmij ak ajiri ro? Ear kõttãik ke armij ro jen ailiñ ko jet im kõrã ro, einwõt an kar lõmaro kõmmani ilo ien ko etto? Ta eo lokbook eo ej jiroñ kij?
Jesus ear itoklimo kin armij. Juõn etale kin jerbal eo an ej kalikar bwe elõñ alen ear kejmoure ro rajkuk im nañinmij. Ear kate wõt e ñan jibañ ro rar aikwij jibañ, im kwalok itoklimo eo an ñan ajiri ro.
Armij ro rar mõnõnõ in bed ibben Jesus. Ear jab kalelñoñ ri kalor ro an, bwe ren jab kwalok burueir. Emol, ear kajitõkin ir bwe ren kwalok lemnak ko air.—Mark 8:27-29.
Rar kememeje Jesus kin elõñ kadkad ko remõn kadkadin einwõt jitõb in karmijeteik kõnan ko an. Ear joñok eo emõntata ñan kwalok yokwe eo ekwojarjar. Jesus ear likit juõn joñok ñan aolep ro rekõnan erom ri kalor ro an. Ewi joñan am lore joñok eo an?—1 Dri Korint 13:4-8; 1 Piter 2:21.
Ewi Wãwen Rej Kememeje Ri Christian ro Ran Kein?
Ilo ran kein, elõñ thousand Ri Christian ro retiljek rar mij, elõñ iair rar rittolok im mij, ro jet rar dik wõt im mij. Ak ir aolep rar likit juõn ãt ebuñbuñ.
Inem ewi wãwen an armij ro naj kememeje yuk? Elañe kwar mij inne, ta eo armij ro renaj ba kin kwe rainin? Bõlen kajitõk in emaroñ kamakit kij ñan kakõmanmanlok wãwen ad jerbal.
Ta eo jemaroñ kõmmane ñan ejaak juõn ãt emõn? Jemaroñ kakõmanmanlok wãwen ad kwalok leen jitõb—yokwe, lejokmen, joij, inemõn, jatõr im kadkad ko eirlok wõt. (Dri Galetia 5:22, 23) Aet, emol, “juõn ãt [emõn] elap tokjen jen oil emõn, im ran in mij jen ran in lotak.”—Ecclesiastes 7:1, New World Translation.