“Kam̦m̦oolol Anij kõn an Em̦m̦an Am̦ Lol̦o̦kjen̦”

Devid, eo ear mour ilo iien ko etto ilo Israel, ear ba naan in nõbar kein an ilõñ ñan juon kõrã ear iioone. Etan kõrã in ej Abigeil. Ta eo ear kõm̦akũt Devid bwe en nõbare, im ta ko jemaroñ katak jãn joñak eo an Abigeil?

Devid ear iioone Abigeil ilo tõre eo ear ko im kũttiliekek jãn Kiiñ Saul. L̦eo pãleen Abigeil etan Nebal, ekar juon rũm̦weiie im elõñ nejin menninmour rej pãd ilo juon jikin el̦ap im elõñ tol̦ ie ilo turõkin Juda. Devid im l̦õm̦aro m̦õttan rar ãinwõt juon wõrwõr ilo jikin in kõnke rar “kõjparok” jabõt ro an Nebal kab menninmour ko nejin. Juon iien Devid ear jilkinl̦o̦k jet iaan l̦õm̦aro doon ñan ippãn Nebal bwe ren kajjitõk ippãn ñe emaroñ lel̦o̦k jabdewõt m̦õñã emaroñ lil̦o̦k. (1 Sa. 25:8, 15, 16, UBS) Kõnke Devid im l̦õm̦aro doon rar lali im kõjparoki men ko m̦weien Nebal, ekar jab nana aer kajjitõk ippãn Nebal bwe en lel̦o̦k kijeer m̦õñã.

Bõtab Nebal ear kwal̦o̦k an lukkuun jejjet ãt in etan ñane. Etke? Kõnke ãt in etan ej mel̦el̦ein “Bwebwe.” Ke ear uwaake l̦õm̦aro doon Devid, ear lukkuun nana im eddo an kõnnaan ñan er im ear kaalikkar an jab kõn̦aan jipañ er. Kõn men in, Devid ear pojakin kaje Nebal kõn an eddo naan ko an im jab jim̦we an kõm̦m̦an ñan er. Kõn an kar Nebal kwal̦o̦k an jab mãlõtlõt, e im baam̦le eo an renaaj kar pãd ilo jorrããn.​—1 Sa. 25:2-13, 21, 22, UBS.

Abigeil ear kile jorrããn ko rel̦l̦ap renaaj kar wal̦o̦k jãn pepe in me Devid im l̦õm̦aro doon rej pojakin kõm̦m̦ane. Innem ear kwal̦o̦k an peran im kajjioñ bõbrae an naaj wal̦o̦k men in. Ear kwal̦o̦k an kautiej Devid ke ear kõnono ippãn im akwel̦ap ñane bwe en l̦õmn̦ak kõn kõtaan eo an ippãn Jeova. Im ear bũkl̦o̦k elõñ m̦õñã kijen Devid, eo im enaaj kiiñ, kab l̦õm̦aro doon. Devid ear kile bwe Jeova ear kõjerbale kõrã in ñan bõbraiki jãn an kõm̦m̦ane juon bõd el̦ap im̦aan mejãn Anij. Devid ear ba ñan Abigeil: “Kam̦m̦oolol Anij kõn an em̦m̦an am̦ lol̦o̦kjen̦ im kõn men in kwaar kõm̦m̦ane rainin ilo am̦ bõbraik eõ jãn aõ naaj kar urur im idenon̦e ñan eõ make.”​—1 Sa. 25:18, 19, 23-35, UBS.

Ealikkar, jejjab kõn̦aan bwe jen ãinwõt kar Nebal ilo ad jab kwal̦o̦k kam̦m̦oolol kõn men ko rem̦m̦an ro jet rej kõm̦m̦ani ñan kõj. Bareinwõt, ñe jej kile bwe juon men enana ej pojakin wal̦o̦k, jen kwal̦o̦k lol̦o̦kjen̦ ilo ad pukot juon wãween ekkar ñan bõbraiki m̦okta jãn an wal̦o̦k. Ejjel̦o̦k pere bwe jej errã ilo naan ko an juon iaan rijeje Sam ke ear ba ñan Anij: “Kwõn letok mãlõtlõt kab jel̦ãl̦o̦kjen̦.”​—Sam 119:66, UBS.

Ro jet remaroñ kile ad kwal̦o̦k mãlõtlõt, ak lol̦o̦kjen̦, ilo men ko jej kõm̦m̦ani. Meñe remaroñ jab ba tok ñan kõj, ak remaroñ bõk ejja l̦õmn̦ak eo wõt an kar Devid ke ear ba: ‘‘Kam̦m̦oolol Anij kõn an em̦m̦an am̦ lol̦o̦kjen̦.”