Kõmman Bebe Ko Juõn Aitwerõk Jejjab Maroñ Bõprae
“JELÃ kilen kõmman bebe ko ej juõn jerbal elukkun bin, ak elañe juõn armij emaroñ kõmmane men in, alikar ej juõn maroñ ekanuij lap tokjen ibben,” Napoleon Bonaparte, iroij eo an France ilo ebeben eo kein 19, ear ba. Bõlen kwomaroñ errã ibben nan ko an ñan kõmman bebe ko, kinke armij ro rekin mour ekkar ñan lemnak ko air make. Ilo ejja ien eo wõt, rar kile bwe jet ien emaroñ bin ñan kõmman bebe ko.
Jekdon elañe ebidodo ak ebin kõmmane, ej aikwij kõmman bebe ko. Jej aikwij kõmman bebe ko jen ran ñan ran. Elikin ad ruj ilo jibboñ, jej aikwij beek kin ta eo jej naballed, ta eo jej mõñã ilo jibboñ, im elõñ men ko jet jej aikwij bebe kaki ñan aolepen ran eo. Enañin aolep bebe kein ewõr jidik tokjeir. Ejeja ad aikwij lukkun lemnak kake mokta jen ad bebe kaki. Ejeja ad jab kiki kin ad inebata elañe bebe ko jar kõmmani rar jimwe ak jab.
Ijo turãjet, jet bebe ko renaj lo tõbrakiir tokelik. Elõñ armij ro emõn ded ilo lal rainin rej aikwij bebe kin ta mejenkajjik ko rekõnan jibadõki. Rej aikwij beek kin kain jelãlokjen rot eo rej aikwij im ewi joñan air aikwiji. Elañe jab kiõ inem tokelik enañin aolep rej aikwij bebe elañe rekõnan mare ak jab. Ro rekõnan mare rej aikwij bebe: ‘Ebwe detta im i ritto ke ilo jitõb ñan mare? Kain mõtta rot eo ikõnan, ak men eo eaorõklok, kain mõtta rot eo ij aikwiji?’ Eiet bebe ko ilo mour eo ad rej jelet kij elaplok jen jokãlet eo ad kin kain ri belele rot jekõnan bõke.
Ikijen men ko raorõk, ej juõn men eaorõk bwe jen kõmman bebe ko rejimwe im meletlet, kinke mõnõnõ eo ad ej bedbed ion ad kõmman eindein. Jet armij remaroñ eñjake bwe ebwe air maroñ in kõmman bebe kein im remaroñ makoko in bõk jibañ. Ej juõn men in meletlet ke? Jen lale.
[Etan eo ear kõmman pija ilo peij 3]
Napoleon: Jen book eo The Pictorial History of the World