“Kwon Kajejit Jerbal Eo Am”

“Kwon eyu ilo am kõmman jerbal in kwalok nan.” ​—2 TIMOTHY 4:5, Byington.

1, 2. Meñe aolep Ri Christian ro rej ri evanjel ro, ekkar ñan Jeje ko ilo Bible ta eo elder ro rej aikwij kõmmane ekkar ñan Jeje ko ilo Bible?

KWOJ juõn ri keañ ke an Ailiñ eo? Elañe aet, kwon kamolol Jehovah Anij kin jerammõn in eaibujuij. Kwoj juõn elder ke ilo congregation eo? Ej bar juõn jerammõn jen Jehovah. Ak jejjab kõnan meloklok bwe ejjab jelãlokjen eo jen school im maroñ eo ad make ñan konono ilo melak rej kamaroñ kij ñan kwalok nan ak tel congregation eo. Jehovah ej kamaroñ kij ñan bõk jerbal in kwalok nan, im ej kinke jet maan ro ibwiljid rar jerbale kien ko ilo Bible rej tellokin air bõk jerbal in overseer.​—2 Dri Korint 3:​5, 6; 1 Timote 3:​1-7.

² Aolep Ri Christian ro emwij air wujleplok air mour rej kõmman jerbal in evanjel, ak elaptata ro rej overseer, ak elder ro, rej aikwij likit juõn joñok emõn ilo jerbal in kwalok nan. Elder ro rej boub ilo jerbal in “nan im katakin” Anij im Christ rej kile ir, im ro mõttair rej Ri Kennan ro an Jehovah. (1 Timote 5:​17; Dri Epesõs 5:​23; Dri Hibru 6:​10-​12) Iumin aolep wãwen kein, wãwen katakin eo an juõn elder ej aikwij kakajurlok mour in jitõb eo an ro rej roñjake, kinke ri jilek Paul ear jiroñ overseer eo Timote: “Bwe ien e naj itok ñe re naj drike katak emõn, a kin mõm ko air re naj koorlok ro dri kaki ñõn ir mõke, eremõm lojilñiir im re naj okõtõklok lojiliñiir jen mol, im naj illok ñõn bwebwenato rewan. A kwon jadõr ilo men ko otemjej, kwon kijenmij ilo iñtan ko, kwon kõmõn jerbal an dri evanjel, kwon kajejit jerbal eo am.”​—2 Timote 4:​3-5.

3. Ta eo rej aikwij kõmmane bwe mour in jitõb eo an congregation eo en jab jorrãn?

³ Ñan kejbãrok bwe katak ko rewan ren jab kabañ mour in jitõb eo an congregation eo, juõn overseer ej aikwij jerbale nan in kakabilek eo an Paul: “Kwon jadõr ilo men ko otemjej, . . . Kwon eyu ilo am kõmman jerbal in kwalok nan.” (2 Timote 4:5, Byington) Emol, juõn elder ej aikwij ‘kamwijlok im eyu ilo jerbal in kwalok nan eo an.’ Ej aikwij kõmmane ilo wãwen eo ejelok likjap ie, ilo likieo. Juõn elder eo ej kõmman eindein ilo jerbal eo an ej ineke aolep eddo ko rej tellokin juõn elder, im jab jerwane ak kõmman jimettan in jerbal eo an. Kain emaan rot in ej tiljek ilo men ko redik bareinwõt.​—Luk 12:48; 16:10.

4. Ta eo emaroñ jibañ kij ñan kamwijlok jerbal in kwalok nan eo ad ilo eyu?

⁴ Kamwijlok jerbal eo ad ilo eyu ejjab aikwij aolep ien elaplok ien, ak ej aikwiji ad kajerbal ien eo ad ilo jejjet im jimwe. Ekkeini air kajerbal ien ilo juõn joñan ejokkin wõt juõn emaroñ jibañ aolep Ri Christian ro ñan kamwijlok men ko ilo jerbal in kwalok nan. Ñan kalaplok am ien ñan kwalok nan, juõn elder ej aikwij kejbãrok juõn lajrak emõn ibben make im jelã kin ta eddo ko enaj ajej ñan ro jet im ewi wãwen emaroñ kõmmane men in. (Dri Hibru 13:17) Emol, juõn elder rej kautieje ej aikwij inek eddo ko an make, einwõt Nihimaia, eo ear bõk kunan ilo jerbal in kalek worwor ko an Jerusalem. (Nihimaia 5:​16) Im aolep ri karejar ro an Jehovah rej aikwij keini air kwalok nan kin Ailiñ eo.​—1 Dri Korint 9:​16-​18.

5. En kar ewi lemnak eo ad kin jerbal in kwalok nan?

⁵ Juõn jerbal ekalañliñ im lap ej bed ibbed einwõt ri keañ ro ñan Ailiñ in lañ eo emwij an jutak! Emol bwe jej kaorõk jerammõn eo ad ñan kwalok news eo emõn ilo aolepen lal mokta jen an itok jemlokin. (Matu 24:14) Meñe jejjab wãppen, jemaroñ bõk rejañ jen nan ko an Paul: “A men in aurõk in ibem ej ilo jãbi brij ko, bwe maroñ eo e kanuij lap en jen Anij, im jab jen kim.” (2 Dri Korint 4:7) Aet, jemaroñ kõmman jerbal in emõn​—ak kin kajur im meletlet eo Anij wõt ear letoki.​—1 Dri Korint 1:​26-​31.

Kwalok Aibujuij eo an Anij

6. Ta oktak eo ear walok ikõtan Israel eo ilo kanniek im Israel eo ilo jitõb?

⁶ Ikijen Christian ri kabit ro, Paul ej ba bwe Anij ear “kamaroñ kim dri jerbal in kalimur ekãl.” Ri jilek eo ear kwalok oktak eo ikõtan bujen eo ekãl kar kõmmane ibben Ri Israel ilo jitõb ikijen Jesus Christ im bujen Kien eo mokta kar kõmmane ibben Israel eo etto ikijen Moses. Paul ej ba bareinwõt bwe ke Moses ear wanlaltak jen Tol Sinai im dekã ko ruo kin Kien ko Joñoul, joñan an meram mejen Ri Israel ro rar jab maroñ kalimjeke. Bõtab, tokelik, bar juõn men elaplok an kauwatata ear walok kinke “burueir r’ar bin” im juõn veil ear bed ion burueir. Bõtab, ke rar kebak Jehovah kin aolepen burueir, rar wutik veil eo. Ilo an jitõñlok kiõ ñan jerbal eo ear lelok ñan ro rej bed ilo bujen eo ekãl, Paul ej ba: “Kij otemjej, ejelok veil iman mejer, jej kalimjek, einwõt ilo kapjur, aibujuij an Iroij.” (2 Dri Korint 3:​6-8, 14⁠-⁠18; Exodus 34:29-​35) “Bar jet [an Jesus] s̃ip” ilo ran kein rej bareinwõt bõk jerammõn eo ñan kwalok aibujuij eo an Jehovah.⁠—Jon 10:16.

7. Ewi wãwen an armij ro maroñ romak kin aibujuij eo an Anij?

⁷ Ewi wãwen an armij ro rejerawiwi maroñ kwalok aibujuij eo an Anij, ñe ejelok armij emaroñ lo mejen im mour wõt? (Exodus 33:20) Jej aikwij kile bwe, ijellokin aibujuij eo an Jehovah, ebar wõr karõk eo an eaibujuij ñan karreoik iroij bõtata eo an ikijen Ailiñ eo an. Katak ko remol kin Ailiñ eo rej mõttan “men ko relap an Anij” ro rar bõk jitõb kwojarjar eo ilo Pentecost 33 C.E. rar kwaloki. (Jerbal 2:​11) Kin tel eo an jitõb eo, rar maroñ kamwijlok jerbal eo rar lelok ñan ir.​—Jerbal 1:8.

8. Ikijen jerbal in kwalok nan, ta eo Paul ear beek ilo buruen bwe en kõmmane?

⁸ Paul ear beek ilo buruen bwe ejelok juõn men enaj kar kejbãrok e jen an kamwijlok jerbal eo an. Ear je: “Inem ke jerbal in ibem, einwõt kim ar bõk tiriamo, kin jab ebwer a kim ar illok jen men ko retino men in kajok, im jab etetal ilo mon, im jab kariõp nan in Anij a kin kalikar mol, kim kwalok karkarim ñõn bõklikõt an armij otemjej iman mejen Anij.” (2 Dri Korint 4:​1, 2) Ilo an Paul ba, “jerbal in,” mol eo ej alikar im meram eo ilo jitõb ej jededlok ilo jikin ko jet.

9, 10. Ewi wãwen ad maroñ romak kin aibujuij eo an Jehovah?

⁹ Ikijen Unjen meram ilo kanniek im jitõb, Paul ear je: “Bwe Anij eo E ar ba, Jen marok en romak maram, E ar romak ilo buruem, bwe En letok maram in jela aibujuij an Anij ilo mejen Jisõs Kraist.” (2 Dri Korint 4:6; Jenesis 1:​2-5) Kinke emwij ad bõk jerammõn eo elap einwõt ri jerbal ro an Anij, jen kejbãrok ad erreo bwe jen einwõt kapjur eo im romak aibujuij eo an Jehovah.

¹⁰ Armij ro rej bed ilo marok eo ilo jitõb rejjab maroñ lo aibujuij eo an Jehovah ak wãwen an romak jen Jesus Christ, Moses eo Elaplok. Ak einwõt ri karejar ro an Jehovah, jej bõk meram eo eaibujuij jen Jeje ko im rome meram eo ñan ro jet. Elañe ro rej bed ilo marok eo ilo jitõb rekõnan ko jen ien jeebeplok eo, rej aikwij bõk meram jen Anij. Kin lañliñ im kijejeto elap, jen bokake kien eo ekwojarjar jen Anij bwe jen romak meram ñan aibujuij Jehovah.

En Romak Am Meram ilo Katak ko an Bible ilo Mweo

11. Ta eo Jesus ear ba kin romak meram eo ad, im juõn ta ian wãwen ko ñan kõmmane men in ilo jerbal in kwalok nan eo ad?

¹¹ Jesus ear jiroñ ri kalor ro an: “Kom maram in lõl. Jikin kwelok eo ej ber ion tol, re ban noje. Armij re jab tili lamp im likit e iomin jãbi, a ion jikin lamp; im ej kamramlok ro otemjej iloan im. Ein drein en romak ami maram iman mejen armij, bwe ren lo ami jerbal ko remõn, im nebar Jememi i lõñ.” (Matu 5:​14-​16) Mwil eo emõn emaroñ kamakit armij ro jet bwe ren kaibujuij Anij. (1 Piter 2:​12) Im ad kõmman jerbal in evanjel ilo elõñ wãwen ej letok elõñ ien ko remõn ñan an romak ad meram. Juõn ian mejenkajjik ko relap ñan an romak meram eo ilo jitõb jen Nan in Anij ilo ad katak Bible ilo bolemen ilo moko imõn armij ro. Eñin juõn wãwen eaorõk ñan kamwijlok jerbal in kwalok nan eo ad ilo eyu. Ta nan in kakabilek ko remaroñ jibañ kij ñan katak Bible ibben armij ro ilo juõn wãwen ej tõbar buruen ro rej bukõt mol eo?

12. Ewi wãwen jar ej jelet jerbal in katak Bible eo ibben armij ro ilo moko imwiir?

¹² Jar ñan Jehovah ñan katak Bible ibben elõñ armij ej kwalok bwe jelukkun kõnan katak Bible ibben armij ro. Bareinwõt ej kwalok bwe jej lo aorõkin jibañ ro jet ñan bõk jelãlokjen eo an Anij. (Ezekiel 33:​7-9, NW) Emol bwe Jehovah enaj uake jar ko ad im kajerammõn jibadbad eo ad ñan kate wõt ilo jerbal in kwalok nan. (1 Jon 5:​14, 15) Ak jejjab jar ñan bukõt wõt ro rekõnan katak Bible ilo mweo imwiir. Elikin ad jino katak Bible ibben juõn armij, jar im kalmenlokjen kin aikwij ko an ri katak Bible eo enaj jibañ kij ilo ien ko kajjojo ñan katakin ir ilo juõn wãwen ebolemen.​—Dri Rom 12:12.

13. Ta eo emaroñ jibañ kij ñan katak Bible ibben armij ro ilo bolemen?

¹³ Ñan kõmman katak Bible ibben armij ro, jej aikwij lukkun kabojak ñan kajjojo ien. Elañe jej lemnak ejjabwe ad maroñ in kõmmane menin, emaroñ emõn ñan lale kin wãwen an juõn Congregation Book Study overseer tel katak eo ilo kajjojo week. Jet ien, jemaroñ jerbal ibben ri kwalok ro an Ailiñ eo me rar lo tõbrak ke rar katak Bible ibben armij ro. Emol, ewõr tokjen ad lemnak kin wãwen an Jesus Christ katakin armij im lemnak eo an.

14. Ewi wãwen ad maroñ tõbar buruen juõn ri katak Bible?

¹⁴ Jesus ear lañliñ in kõmanman ankil an Jemen ilañ im bwebwenato ibben ro jet kin Anij. (Sam 40:8) Ear inemõn im lo tõbrak iloan tõbar buruen ro rar roñjake e. (Matu 11:28-​30) Inem jen kate wõt kij ñan tõbar buruen ri katak Bible ro. Elañe jekõnan kõmman eindein, jej aikwij keboje kajjojo katak ekkar ñan aikwij ko an ri katak eo. Ñan wanjoñok, elañe ej itok jen juõn ailiñ eo ejaje kin Bible eo, jemaroñ aikwij in kamol ñan e bwe Bible eo emol. Ilo ien eo, elõñ eon ko ilo Bible jej aikwij konono im kameleleiki.

Jibañ Ri Katak Bible ro ñan Melele kin Pija im Wanjoñok ko

15, 16. (a) Ewi wãwen ad maroñ jibañ juõn ri katak eo ejjab melele kin juõn wanjoñok ilo Bible eo? (b) Ta eo jemaroñ kõmmane elañe ilo juõn ian book ko ad ej kajerbal juõn wanjoñok eo juõn ri katak Bible ejjab melele kake?

¹⁵ Juõn ri katak Bible emaroñ jab kanuij melele kin juõn wanjoñok ilo Bible eo. Ñan wanjoñok, emaroñ jab melele kin ta melelen an kar Jesus konono kin juõn lamp rar likiti ion jikin lamp eo. (Mark 4:​21, 22) Jesus ear konono kin juõn lamp oil eo etto emwij tile. Kain lamp eo rar likite ion juõn jikin lamp ejejuan im ear kameram aolep jikin ko ilo juõn em. Kamelele ko ilo katak ko “Lamp” im “Jikin Lamp” eo ilo book eo Insight on the Scriptures emaroñ juõn men in aikwij ñan kalikarlok wanjoñok eo an Jesus.a Ak ej juõn men ekajju buru elap ñan bõktok juõn kamelele eo me ri katak Bible eo emelele im mõnõnõ kake!

¹⁶ Juõn book ñan katak Bible eo emaroñ kajerbal juõn wanjoñok ebin an juõn ri katak melele kake. Kwon bõk ien ñan kamelele kake, ak kajerbal bar juõn wanjoñok emõn an kwalok ejja point eo wõt. Bõlen juõn book ej kalikar kin juõn belen emõn im wãwen an leo im lio ri belele mõnõnõ in jibañ don rej aorõk ilo mour in belele eo. Ñan wanjoñok kake men in, jemaroñ jitõñlok ñan juõn emaan ej toto jen juõn trapeze, ej kõtlok pein jen trapeze eo im ekkãke ilo mejatoto, im atartar ion bar juõn armij bwe en bauri. Ilo bar juõn wãwen, aikwij eo ñan bõk juõn belen emõn im emõnõnõ in jibañ jemaroñ wanjoñok kake ilo juõn wãwen ri jerbal ro rej jerbal ibben don ñan leto-letak box ko ñan don ñe rej ekto mweiuk jen tima eo.

17. Ta eo jemaroñ katak jen Jesus kin wanjoñok ko?

¹⁷ Ilo ad kajerbal bar juõn wanjoñok emaroñ melelen ad kabojak lok iman. Ak, eñin juõn wãwen ñan kwalok ad itoklimo kin juõn ri katak Bible eo. Jesus ear kajerbal wanjoñok ko relamwan ñan kalikar katak ko rebin. Katak eo an ion Tol eo ej kwalok elõñ wanjoñok ko kin men in, im Bible eo ej kwalok bwe katak ko an rar jelet ro rar roñjake e ilo jimwe. (Matu 5:1–​7:​29) Ilo meanwõd Jesus ear kamelele kin men ko kinke ear itoklimo kin armij ro jet.​—Matu 16:​5-​12.

18. Ta men eo emõn jemaroñ kõmmane kin chapter im eon ko jen Bible eo rej bed ilo book ko ad?

¹⁸ Ad itoklimo kin ro jet enaj kamakit kij ñan kamelele ilo ‘kõmmanwa jen Bible eo.’ (Jerbal 17:​2, 3) Melelen men in bwe jej aikwij katak im jar jen buruõd im kajerbal ilo meletlet book ko “dri kõmñe eo etiljek” ear litoki. (Luk 12:42-​44) Ñan wanjoñok, book eo Jelãlokjen Eo Ej Tellok ñan Mour Indio ej kwalok elõñ eon ko ilo Bible nan kin nan.b Kinke ejabwe page ko ilo book in, jet iair rej kwalok chapter im eon wõt. Ilo ien katak Bible eo ibben juõn armij, ej aorõk bwe jen konono im kameleleik jet jeje ko ilo Bible me rej baj kwalok wõt chapter im eon ko. Kinke katak ko ad rej wawa ion Nan in Anij, elap an kajur. (Dri Hibru 4:​12) Ilo ien ko kajjojo jej katak Bible eo ekkã ad kõnan jitõñlok ñan Bible eo, lukkun kamelele jen jeje ko ilo Bible jej loi ilo paragraph ko. Jibañ ri katak ro ñan lale ta eo Bible ej ba kin juõn katak ak bebe ñan kõmmane. Kwon kate yuk ñan kwalok ñan e kin ewi wãwen enaj bõk tokjen jen ad bokake Anij.​—Aiseia 48:17, 18.

Kwalok Kajitõk ko Rej Kworuj Lemnak

19, 20. (a) Etke jekõnan kajerbal kajitõk ko me rej kalikar ta lemnak eo an armij ñe jej katak Bible ibbeir ilo mweo imõn? (b) Ta eo jemaroñ kõmmane elañe jej aikwij kalaplok ien ñan etale juõn katak?

¹⁹ Wãwen an kar Jesus kajerbal kajitõk ko ilo kabel ear jibañ armij ro ñan kõmmanwa. (Matu 17:24-​27) Elañe jej kajitõk kin kajitõk ko rejjab kajook ri katak Bible eo, uak ko an remaroñ kalikar ta lemnak eo an kin juõn katak. Jemaroñ lo bwe ej tõmak wõt ilo katak ko ejelok bedbed ion Bible eo. Ñan wanjoñok, emaroñ tõmak ilo Trinity ak Jilu Anij ilo Juõn. Ilo chapter 3, ilo book eo Jelãlokjen ej kwalok bwe nan eo “Trinity” ak Jilu Anij ilo Juõn ejjab bed ilo Bible eo. Book eo ej kwalok jeje ko ilo Bible eo nan kin nan ak chapter im eon ko wõt bwe Jehovah ejjab Jesus im bwe jitõb kwojarjar eo ej kajur eo ej jerbal an Anij, ejjab juõn armij ilo jitõb. Konono im bwebwenato kin jeje kein ilo Bible eo emaroñ ñan kamole katak kein. Ak ta elañe jej aikwij elõñlok men in kamol ko? Bõlen ilo jemlokin am katak ibben tokelik, kwomaroñ bõk ien ñan bwebwenato kin katak in jen bar juõn book an Ri Kennan ro an Jehovah, einwõt brochure eo Should You Believe in the Trinity? (Kwoj Aikwij Tõmak ke ilo Jilu Anij ilo Juõn?) Inem, tokelik wõnmanlok im katak jen book eo Jelãlokjen.

²⁰ Ta elañe uak eo an ri katak eo ñan kajitõk eo ej kailbõk ak kaburomõj yuk. Elañe ej kitibuj kajerbal jikka, ak bar juõn katak ej jelet e, jemaroñ ba jenaj wõnmanlok kin katak kein bar juõn ien tokelik. Kin ad jelã bwe ri katak eo ej kõbatat wõt ej kamaroñ kij ñan bukõt kamelele ko jet ñan jibañ e bwe en wõnmanlok ilo jitõb. Ñe jej kate wõt kij ñan tõbar buruen ri katak eo, jemaroñ jar bwe Jehovah en jibañ e ñan rittolok ilo jitõb.

21. Ta eo emaroñ walok elañe jej ukõt kilen katakin eo ad ñan aikwij ko rejejjet an juõn ri katak Bible?

²¹ Ilo ad kebojak ilo bolemen im bõk jibañ jen Jehovah, ejelok bere bwe jemaroñ ukõt kilen ad katakin armij ekkar ñan aikwij ko rejejjet an ri katak Bible eo. Im tokelik, jemaroñ jibañ e ñan kaddek yokwe eo emũlal ñan Anij. Bareinwõt jemaroñ lo tõbrak ñe jej ejaak juõn jitõbõn kautiej im kamolol kin dolul eo an Jehovah iloan. Im elap an kajju buruõd ñe ri katak Bible ro rej kile bwe ‘Anij ej bed ibbed’! (1 Dri Korint 14:24, 25) Inem jen bolemen in katak Bible ibben armij ro im kamaat ad maroñ ñan jibañ ro jet bwe ren erom ri kalor ro an Jesus.

Juõn Men in Aorõk ñan Kaorõke

22, 23. Ta eo jej aikwiji elañe jekõnan kamwijlok jerbal in kwalok nan eo ad ilo eyu?

²² Ñan kamwijlok jerbal eo ad ilo eyu, jej aikwij atartar ion kajur eo jen Anij. Ikijen jerbal in kwalok nan, Paul ear jejelok ñan Christian ri kabit ro mõttan: “A men in aurõk in ibem ej ilo jãbi brij ko, bwe maroñ eo e kanuij lap en jen Anij, im jab jen kim.”​—2 Dri Korint 4:7.

²³ Ri kabit ro im ro rej “bar jet [an Jesus] s̃ip” rej jimor einwõt jãbi ko remõjno an lal. (Jon 10:16) Ak, Jehovah emaroñ letok kajur eo ñan kamwijlok jerbal ko ad jekdon ta ijjibed ko jej wõnmaiki. (Jon 16:13; Dri Pilippai 4:​13) Inem jen liki Jehovah kin aolepen buruõd, kaorõk jerbal in kwalok nan, im kamwijlok jerbal in kwalok nan eo ad ilo eyu.

[Kamelele ko itulal]

Ewi Wãwen Am Naj Kar Uak?

• Ta eo elder ro remaroñ kõmmane ñan kamwijlok jerbal in kwalok nan eo air ilo bolemen?

• Ewi wãwen ad maroñ kakõmõnmõnlok bolemen in katak Bible ibben armij ro ilo moko imwiir?

• Ta eo kwonaj kar kõmmane elañe juõn ri katak Bible ear jab melele kin juõn wanjoñok ak ear aikwij kalaplok melele eo an kin juõn katak?

[Pija eo ilo peij 24]

Christian elder ro rej katakin ilo congregation eo im jibañ ri tõmak ro mõttair ilo jerbal in kwalok nan

[Pija eo ilo peij 26]

Katak Bible ilo bolemen ibben armij ro ilo moko imwiir ej juõn wãwen romak ilo meram eo ad