Jehovah, Ej ‘Jikin Kone Eo Ad Ilo Ien Jorrãn’
“Lomor an ro remõn jen Jeova, E air me ekajur ilo ien jorran.”—SAM 37:39.
1, 2. (a) Ta eo Jesus ear jar kake ikijen ri kalor ro an? (b) Ta eo ankil an Anij kin armij ro an?
JEHOVAH ej kajur bõtata. Ewõr kajur ibben ñan kejbãrok ri kabuñ ro retiljek ilo jabdewõt wãwen ekõnan. Bareinwõt emaroñ kajenolok armij ro an ilo kanniek jen armij ro jet ion lal im likit ir ilo juõn jikin kone im ainemõn. Bõtab, ikijen ri kalor ro an, Jesus ear jar ñan Jemen ilañ: “I jab jar bwe Kwon bõk ir jen lõl, a bwe Kwon kejbãrok ir jen eo enana.”—Jon 17:15.
2 Jehovah ear kãlet bwe jen jab “ilok jen lõl.” Ak, ej ankil an bwe jen jokwe ibben armij ro jet ilo lal in bwe jen kwalok nan kin kejatdikdik eo im kainemõn ro jet. (Dri Rom 10:13-15) Ak, einwõt an kar Jesus kwalok kake ilo jar eo an, ilo ad jokwe ilo lal in, “dri nana eo” emaroñ jelet kij. Armij ro rekiblia im jitõb ro renana rej bõktok elap eñtan im illu, im Ri Christian ro rejjab jenolok jen inebata kein.—1 Piter 5:9.
3. Ta wãwen eo ri kabuñ ro retiljek an Jehovah bareinwõt rej aikwij jelmae, ak ta nan in kainemõn eo jej lo ilo Nan in Anij?
3 Iumin melejoñ rot kein, ej ekkar ñan wãwen armij bwe jen buromõj jet ien. (Jabõn Kennan Ko 24:10) Bible eo ej obrak kin bwebwenato ko kin ro retiljek rar inebata. “Elõñ iñtan an ro remõn,” ri jeje sam ej ba, “a Jeova ej lomorir jen ir otemjej.” (Sam 34:19) Aet, men ko renana remaroñ walok ñan “ro rewãnik.” Einwõt an ri jeje David ba, jet ien jemaroñ “barõk im kanuij eobõp.” (Sam 38:8) Ak, ej juõn men in kainemõn ñan jelã bwe “Jeova ej ebak ñõn ro eruj burueir, im Ej lomoren ro retã wõt ilo air.”—Sam 34:18; 94:19.
4, 5. (a) Ekkar ñan Jabõn Kennan Ko 18:10, ta eo jej aikwij kõmmane ñan bõk kejbãrok jen Anij? (b) Ta jet ian buñten ne ko jej aikwij kõmmani ñan bõk jibañ jen Anij?
4 Ekkar ñan jar eo an Jesus, Jehovah ej kejbãrok kij. Ej ad “me ekajur ilo ien jorran.” (Sam 37:39) Book in Jabõn Kennan ej kajerbal nan ko einlok wõt in ñe ej ba: “Etan Jeova juõn imõn bar e kajur; dru wãnik ej kone inem ejelok an uota.” (Jabõn Kennan Ko 18:10) Eon in ej kwalok juõn katak emol kin wãwen an Jehovah yokwe men in kõmanman ko an. Anij ej bojak in kejbãrok elaptata ro rewãnik rej bukõte ilo kijejeto, einwõt jej ettõr ñan loan juõn imõn bar eo im kejbãrok kij.
5 Ñe jej jelmae abañ ko, ewi wãwen ad maroñ ettõr ñan Jehovah bwe en kejbãrok kij? Jen etale jilu buñten ne ko raorõk jej aikwij kõmmani ñan bõk jibañ jen Jehovah. Moktata, jej aikwij kebak Jemed ilañ ilo jar. Kein karuo, jej aikwij jerbal ekkar ñan jitõb kwojarjar eo an. Im kein kajilu, jej aikwij kõttãik kij ñan karõk eo an Jehovah ilo ad kobalok ibben Ri Christian ro mõttad rej bojak in jibañ kij ilo ien jorrãn.
Kajur eo jen Jar
6. Ewi lemnak eo an Ri Christian ro remol kin jar?
6 Jet ri kabel ro kin ejmour rej rejañ armij ñan jar einwõt juõn wãwen kamadmõde buromõj im inebata. Meñe emol bwe jemaroñ ainemõn ñe jej bed ilo juõn jikin ejelok keroro ie im kalmenlokjen einlok wõt ien jar, ainikien men in kõmanman ko remour im jab mour ak ñe juõn armij ej kabite kij remaroñ kainemõn kij bareinwõt. Ri Christian ro remol rejjab kadiklok aorõkin jar ilo air baj watõke einwõt kein kainemõn lemnak eo air. Jej watõk jar einwõt juõn ial in konono ibben Ri Kõmanman eo. Jar ej kitibuj ad kabuñ im liki Anij. Aet, jar ej mõttan kabuñ eo ad.
7. Ta melelen jar ilo liki, im ewi wãwen jar rot kein rej jibañ kij ñan kijenmij ilo ien jej eñtan?
7 Jar ko ad rej koba ibben ad liki Jehovah. Ri jilek Jon ear je: “Eñin beran eo iber ñõn E, bwe elañe jej kajitõk iben kin jabrewõt men eo ekar ñõn ankil An, Ej roñjake kij.” (1 Jon 5:14) Jehovah, Ekajur Bõtata, Anij eo emol im utiejtata, ej lukkun roñjake jar ko an ri kabuñ ro an. Ej juõn men in kainemõn ñan kij ilo ad jelã bwe ad Anij eo ej yokwe kij ej roñjake kij ñe jej kwalok inebata im abañ ko ad ñan e.—Dri Pilippai 4:6.
8. Etke Ri Christian ro retiljek rejjab aikwij jook ñe rej kebak Jehovah ilo jar?
8 Ri Christian ro retiljek rejjab aikwij jook, ak eñjake bwe rej betkake ak ejelok air liki ñe rej kebak Jehovah ilo jar. Emol, bwe ñe jej ebwer ak obrak kin abañ ko, jemaroñ jenliklik in kebak Jehovah ilo jar. Ilo ien ko jej aikwij kememej bwe Jehovah ej “tiriamo kake dri jorran ro An im ej “kainemõne ro rej etã.” (Aiseia 49:13; 2 Dri Korint 7:6) Elaptata ilo ien jorrãn bwe jen reilok ilo liki ñan Jemed ilañ eo ej jikin kone eo ad.
9. Ta kunan tõmak eo ñe jej jar ñan Anij?
9 Ñan lukkun bõk tokjen jen jerammõn in jar, jej aikwij tõmak eo emol. Bible eo ej ba bwe “eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabujot E.” (Dri Hibru 11:6) Tõmak ej juõn kadkad elaplok jen ad baj tõmak bwe Anij “ej bed.” Tõmak eo emol ej kitibuj juõn tõmak ekajur ilo maroñ eo an Anij im kõnan eo an ñan kajerammõn kij kin ad bokake e. “Mejen [Jeova] rej lale ro remõn, im lojilñin rej ñõn jar ko air.” (1 Piter 3:12) Ad kememej wõt ien otemjej kin wãwen an Jehovah yokwe kij ej kalaplok aorõkin jar ko ad.
10. Jar ko ad rej aikwij einwõt ta elañe jekõnan bõk men in aikwij ko ilo jitõb jen Jehovah?
10 Jehovah ej roñjake jar ko ad ñe jej jar kin aolepen buruõd. Ri jej sam ear je: “I ar kir kin aolepen buruõ; Kwon uak iõ, O Jeova.” (Sam 119:145) Jab einwõt jar ko rej elijinmen ilo elõñ kabuñ ko, jejjab jar ilo nan wõt ak kin juõn buru ejjab eyu. Ñe jej jar ñan Jehovah kin “aolepen buruer,” nan ko ad ewõr tokjeir. Elikin jar rot kein jen buruõd, jenaj jino bõk ainemõn eo ej itok jen ad “jolok inek eo [ad] ion Jeova.” Einwõt an Bible eo kallimur kake, “E naj baur” kij.—Sam 55:22; 1 Piter 5:6, 7.
Jitõbõn Anij Ej Ri Jibañ eo Ad
11. Ta eo ej juõn ian wãwen ko Jehovah ej uake kij ñe jej “kajitõk wõt” kin jibañ eo an?
11 Jehovah ejjab baj juõn Ri Roñjake jar ak ej Juõn Ri Uak bareinwõt. (Sam 65:2) David ear je: “Ilo ran in aõ jorran I naj kij ñõn Kwe, bwe kwo naj uak iõ.” (Sam 86:7) Inem, Jesus ear rejañ ri kalor ro an bwe ren “kajitõk wõt” kin jibañ jen Jehovah kinke “Jemeruij i lõñ” enaj “lelok Jitõb Kwojarjar ñõn ro otemjej rej kaitõk iben.” (Luk 11:9-13) Aet, kajur eo ej jerbal an Anij ej jerbal einwõt juõn ri jibañ, ak ri kainemõn, ñan armij ro an.—Jon 14:16.
12. Ewi wãwen an jitõbõn Anij maroñ jibañ kij ñe abañ ko ad rekanuij lap?
12 Meñe jej jelmae melejoñ ko, jitõbõn Anij emaroñ kakajur kij kin “maroñ eo e kanuij lap en jen Anij.” (2 Dri Korint 4:7) Ri jilek Paul, eo ear kijenmij iumin elõñ kain melejoñ ko, ear ba ilo liki: “I maroñ in kõmõn men otemjej ilo Eo ej kakajur iõ.” (Dri Pilippai 4:13) Ilo ejja wãwen in wõt, Ri Christian ro ran kein rar eñjake juõn jitõbõn in kajur eo ilo jitõb im eñjake eo ej uake jar ko air. Ekkã en walok bwe, abañ ko rej inebata kaki rejjab kanuij lap elikin air bõk jibañ jen jitõbõn Anij. Kin kajur eo Anij ear letok, jemaroñ ba, einwõt an kar ri jilek ro ba: “Ilo ial ko otemjej, kimij obrõk, a jab jobõj; kimij biuk a e jañin joko kejatrikrik; rej matõrtõr kim, a kim jab mõke iam; a kim jab joko.”—2 Dri Korint 4:8, 9.
13, 14. (a) Ewi wãwen an kar Jehovah kamol bwe ej jikin kone eo ad ikijen Nan eo an? (b) Ewi wãwen an jerbale kien ko an Bible ej jibañ yuk?
13 Jitõb kwojarjar eo ear kakõrmol im kejbãrok Nan in Anij bwe jen bõk tokjen jen e. Ikijen Nan eo an ewi wãwen an kar Jehovah kamol bwe ear jikin kone eo ad ilo ien inebata ko? Juõn wãwen ej ilo an letok ñan kij meletlet eo emõn im maroñ eo ñan lemnak ilo jimwe. (Jabõn Kennan Ko 3:21-24) Bible eo ej katakin maroñ in lemnak ko ad im ej kakõmanmanlok maroñ eo ad ñan kõmmanwa. (Dri Rom 12:1) Ikijen ad keini read im katak kin Nan in Anij, ekoba ad jerbali nan in kakabilek ko an, emaroñ wõr ibbed “maroñ in jelã emõn im nana.” (Dri Hibru 5:14) Bõlen emwij am lo wãwen an kien ko ilo Bible jibañ yuk ñan kõmman bebe ko remeletlet ke kwar jelmae abañ ko. Bible eo ej kamaroñ kij ñan kwalok meletlet eo emaroñ jibañ kij ñan kamadmõde abañ ko rej kainebataik kij.—Jabõn Kennan Ko 1:4.
14 Nan in Anij ej bar juõn wãwen kakajur kij—kejatdikdik in lomoren armij. (Dri Rom 15:4) Bible eo ej jiroñ kij bwe men ko renana rejamin walok im bed ñan indio. Jabdewõt melejoñ jej jelmae renaj jako. (2 Dri Korint 4:16-18) Ewõr ibbed “kejatrikrik kin mour in drio, eo Anij E ban riõp, emwij An kalimur kake mokta jen eto im eto.” (Taitõs 1:2) Elañe jej lañliñ ilo kejatdikdik eo, im kalmenlokjen wõt kin ilju eo emõn me Jehovah ej kallimur kake, jemaroñ kijenmij iumin melejoñ ko.—Dri Rom 12:12; 1 Tessalonika 1:3.
Congregation Eo—Juõn Wãwen Yokwe an Anij
15. Ewi wãwen an Ri Christian ro maroñ jibañ don?
15 Bar juõn men in letok eo jen Jehovah emaroñ jibañ kij ilo ien inebata eo ej ilo ien ad kamao ibben don ilo Christian congregation eo. Bible eo ej ba: “Juõn jeran ej yokwe ien otemjej; im jein im jãtin, e ar lotak bwe en dri jibõñ ilo ien jorran.” (Jabõn Kennan Ko 17:17) Nan in Anij ej rejañ bwe aolep ro rej bed ilo congregation eo ren kautiej im yokwe don. (Dri Rom 12:10) “Ejelok armij en kabukot men eo ej jibõñ e mõke, a men eo ej jibõñ dri turin,” ri jilek Paul ear je. (1 Dri Korint 10:24) Lemnak rot in emaroñ jibañ kij ñan lale aikwij ko an armij ro jet jen ad lemnak kin melejoñ ko ad make. Ñe jej lelok kij make ñan jibañ ro jet, jejjab jibañ ir wõt ak jej lo lañliñ im kajuburuõd im kamaroñ kij ñan kijenmij iumin melejoñ ko ad.—Jerbal 20:35.
16. Ewi wãwen an Ri Christian ro kajjojo rejañ don?
16 Maan im kõrã ro reritto ilo jitõb remaroñ bõk kunair ilo juõn wãwen eaorõk ñan kakajur ro jet. Ñan kakajur ro jet, rej bojak wõt ñan jibañ ro jet jabdewõt ien. (2 Dri Korint 6:11-13) Congregation eo elukkun bõk jerammõn ñe aolep iloan rej kamolol im nebar ajiri im jodikdik ro, kakajur ri tõmak ro rekãl, im rejañ ro rej inebata kin abañ ko. (Dri Rom 15:7) Yokwe jimjãn jimjatin enaj jibañ kij bwe jen liki don. Jen jab lemnak ilo mõkaj bwe rumij in jerbale nan in kakabilek eo ej juõn kakõllan mõjno ilo jitõb. Eñin unin Paul ej rejañ Ri Christian ro bwe ren “kaberan ro rej kũmkũm.” Bible eo ej kwalok bwe Ri Christian ro rej inebata bareinwõt.—Jerbal 14:15.
17. Ta ien ko remõn ewõr ibbed ñan kakajur lukluk in Christian jimjãn jimjatin?
17 Kwelok ko an Christian rej letok ien ko remõn ñan kij bwe jen kainemõn im rejañ ro jet. (Dri Hibru 10:24, 25) Wãwen yokwe in ejjab jerbal ñan kwelok ko an congregation wõt. Ak, armij ro an Anij rej bukõt ien ko remõn ñan kamao ibben don ilo jabdewõt ien emõn. Ñe inebata ko rej walok, jenaj mõnõnõ in jibañ don kinke lukluk in jimjera eo emwij an jutak. Ri jilek Paul ear je: “Bwe en ejelok kiojõljõl ilo enbwin, a bwe ra ko otemjej ren jimor kejbãrok dron. Im ñe juõn ra ej iñtan, ra ko otemjej rej iñtan iben; ak ñe juõn ra e aibujuij, ra ko otemjej rej lõñliñ iben.”—1 Dri Korint 12:25, 26.
18. Ta wãwen eo ekkã an armij ro reburomõj kõmmane jej aikwij bõprae?
18 Jet ien, joñan ad buromõj jejjab mõnõnõ in kamao ibben Ri Christian ro mõttad. Jej aikwij jumae eñjake rot in bwe jemaroñ mõnõnõ in bõk nan in kainemõn im jibañ jen ri tõmak ro mõttad. Bible ej kakkõl kij im ba: “Eo ej mõkelok ian, ej kabukot kõnan eo an, im ej lej nae meletlet otemjej e keie.” (Jabõn Kennan Ko 18:1) Ro jeid im jatid ilo tõmak ej einwõt juõn wãwen an Anij kwalok yokwe ñan kij. Elañe jej kile im kaorõk men in ear letoke ilo yokwe, jenaj lo ainemõn ilo ien inebata ko.
Debij juõn Lemnak Emõn
19, 20. Ewi wãwen Jeje ko ilo Bible remaroñ jibañ kij ñan karmijeteik lemnak ko rejjab emõn?
19 Ñe jej buromõj, ebidodo ad lemnak kin men ko rej kabwer ak kaburomõj kij. Ñan wanjoñok, ñe juõn melejoñ ak abañ ewalok, jet armij remaroñ bere kin mour eo air ilo jitõb, im lemnak bwe abañ eo rej bed ie ej kakõllan bwe rejjab kabuñburuen Anij. Bõtab, kememej bwe, Jehovah ejjab kabo jabdewõt kin “men ko renana.” (Jemes 1:13) “[Anij] ejjab likit ilo buruen bwe en kametak ak kaburomõj armij ro,” Bible ej ba. (Lamentations 3:33, NW) Jen an eindein, Jehovah elukkun buromõj ñe ro ri karejaran rej bõk eñtan.—Aiseia 63:8, 9; Zechariah 2:8, NW.
20 Jehovah ej “Jemen tiriamokake, im Anij in ainemõn otemjej.” (2 Dri Korint 1:3) Ej kea kin kij, im enaj kautiej kij ilo ien eo an. (1 Piter 5:6, 7) Ad kememej ien otemjej kin wãwen an Anij yokwe kij enaj jibañ kij ñan debij juõn lemnak emõn, im kalañliñ kij bareinwõt. Jemes ear je: “Ro jatiõ, komin likit e men in lõñliñ otemjej ñe melejoñ kaju wãweir rej kabol kom.” (Jemes 1:2) Etke? Ej uak: “Bwe ñe emwij kamol e e naj bõk belin mour eo Iroij e ar [kallimur] kake ñõn ro rej yokwe E.”—Jemes 1:12.
21. Jekdon ta melejoñ ko jej jelmae, ta eo Anij ej kallimur in lelok ñan ro rej tiljek ñan e?
21 Einwõt an kar Jesus kakkõl kij, jej eñtan ilo lal in. (Jon 16:33) Ak Bible eo ej kallimur bwe ejelok jabdewõt “iñtan, ak matõrtõr, ak ñitta, ak kelwan, ak uõta” enaj kejebel kij jen yokwe eo an Jehovah im Nejin. (Dri Rom 8:35, 39) Ej juõn men elap an kainemõn kij ñan ad jelã bwe jabdewõt inebata jej jelmae ejamin bed ñan indio! Ilo ien in, mae ien jemlokin eñtan otemjej an armij, Jehovah, Jemed eo ej yokwe kij, enaj kejbãrok kij. Elañe jenaj ettõr lok ñan e bwe en kejbãrok kij jen jorrãn, enaj “jikin eutiej ilo ien ko ien iñtan.”—Sam 9:9.
Ta Eo Jaar Katak Kake?
• Ta eo Ri Christian ro rej aikwij kõtmene bwe renaj ione ilo ien in rej bed ilo lal in enana?
• Ewi wãwen jar ko ad remaroñ kakajur kij ñe jej jelmae melejoñ ko?
• Ewi wãwen jitõb eo an Anij ej juõn ri jibañ?
• Ta eo jemaroñ kõmmane ñan jibañ don?
[Pija eo ilo peij 12]
Jej aikwij bukõt Jehovah einwõt ñe jej ettõr lok ñan juõn imõn bar
[Pija ko ilo peij 14]
Ro reritto ilo jitõb rej kajerbal ien ko remõn otemjej ñan nebar im rejañ ro jet