Lõke Jeova, Anij in Kaenõm̦m̦an Otemjej
“Jen nõbar Anij eo Jemãn ad Irooj Jisõs Kraist, Jemãn tũriam̦okake, im Anij in [kaenõm̦m̦an, NW] otemjej.”—2 KORINT 1:3.
1. Ta eo aolep armej rej aikuji?
JÃN ke jaar l̦õtak, jaar aikuji juon bwe en kaenõm̦m̦an kõj. Wãween eo juon niñniñ ej kwal̦o̦k bwe ej aikuj juon ñan kaenõm̦m̦an e ej ñe ej jañ. Bõlen ekwõle ak ekõn̦aan bwe juon en jibwe. Ro rerũtto rej aikuj bar bõk kaenõm̦m̦an jãn ro jet. Kõj aolep ekkã ad aikuj bwe juon en kaenõm̦m̦an kõj, el̦aptata ñe jej iion wãween ko reppen.
2. Ta eo Jeova ej kallim̦uri ro im rej lõke e?
2 Ro ilo baam̦le ko ad kab ro m̦õttad remaroñ kaenõm̦m̦an kõj. Bõtab, ejjab aolep iien remaroñ jipañ kõj ilo wãween ko reppen jej iioni. Jet iien, eo wõt im emaroñ kaenõm̦m̦an kõj ej Anij. Naan eo an, Baibõl̦ eo, ej kallim̦ur ñan kõj: “Jeova ej epaak ñan er otemjej rej kũr ñan E, . . . Enaaj barãinwõt roñjake aer lam̦õj.” (Sam 145:18, 19) Baibõl̦ eo ej bareinwõt ba bwe Jeova “ej lale ro ri wãnik im ej eoroñ kir ko air.” (Sam 34:15, UBS) Bõtab, el̦aññe jekõn̦aan bwe Anij en kaenõm̦m̦an kõj, jej aikuj lõke e. Devid ear ba: “Ñan ro em̦õj kaeñtaan er, Jeova ej juon jikin ijo ejjel̦o̦k jorrããn ie, jikin im ejjel̦o̦k uwõta ie ilo iien ko iien eñtaan. Im ro re jel̦ã Etam̦ renaaj lõke Eok, bwe Kwe O Jeova, Kwaar jab ilo̦k jãn ro rej pukot Eok.”—Sam 9:9, 10.
3. Ewi wãween an kar Jijej kwal̦o̦k kõn joñan an Jeova yokwe armej ro an?
3 Jeova ej kaorõke ro rej karejar ñan e. Jijej ear ba: “Rejjab wiakake lalim bao sparrow kin ruo jãn ke? Bõtab Anij ejjab meloklok juõn iair. Aet emwij bwine aoleben kolan bõrami. Innem komin jab mijak; bwe kajjojo iami elablok an aurõk jen bwijin bao sparrow ko!” (Luk 12:6, 7, UBS) Jeova ear jiroñ ri Israel ro: “Iar yokwe kom ien otemjej, innem ij kwalok wõt ñõn kom aõ yokwe eo ejamin oktak.”—Jeremaia 31:3, UBS.
4. Etke jemaroñ tõmak im lõke bwe enaaj jejjet kitien kallim̦ur ko an Anij?
4 Ñe jej lõke Jeova im tõmak bwe enaaj kajejjet kitien kallim̦ur ko an, men in enaaj kaenõm̦m̦an kõj ilo iien ko jej iion wãween ko reppen. Kõn men in, jej aikuj lõke Anij ãinwõt kar Joshua. Ear ba: “Iroij ami Anij ear lewõj ñõn kom men ko otemjej remmõn ear kallimur kaki. Men ko otemjej ekar kallimur kaki emwij air kirmol; ejjelok juon iair ear likjab.” (Joshua 23:14, UBS) Jemaroñ bareinwõt tõmak bwe meñe jej eñtaan kõn wãween ko reppen jej iioni kiiõ, “Anij e tiljek” im ejamin kejol ri karejar ro an retiljek.—Riit 1 Korint 10:13.
5. Etke jemaroñ in kaenõm̦m̦an ro jet?
5 Rijjelõk Paul ear ba bwe Jeova ej ‘Anij in kaenõm̦m̦an.’ Mel̦el̦ein bwe Jeova enaaj kaenõm̦m̦an ro rej inepata im bũrom̦õj. (Riit 2 Korint 1:3, 4.) Ejjel̦o̦k jabdewõt men Jeova ebane. Emaroñ jipañ armej ro jekdo̦o̦n kain rot wãween eo rej pãd ie. Kõn men in, emaroñ kõm̦m̦ane jabdewõt men ñan an kaenõm̦m̦an ro rej yokwe e. Jemaroñ kaenõm̦m̦an ri tõmak ro m̦õttad ñe rej iion ‘jabdewõt kain jorrããn ko’ kõnke Anij ej kaenõm̦m̦an kõj. Jeova wõt el̦apl̦o̦k an jel̦ã kilen kaenõm̦m̦an kõj!
Men ko Rej Kainepataik im Kabũrom̦õj Kõj
6. Ta jet iaan men ko remaroñ kõm̦m̦an ad inepata im bũrom̦õj?
6 Elõñ men ko rekabũrom̦õjm̦õj rej wal̦o̦k ñan kõj im jej aikuji juon bwe en kaenõm̦m̦an kõj. Juon iaan men ko el̦ap an kabũrom̦õj kõj ej ñe juon eo ejitõnbõro ippãd emej, el̦aptata ñe ej l̦eo pãleed ak lio pãleed ak ajri eo nejid. Jet rej aikuj juon ñan kaenõm̦m̦an er kõn an kalijekl̦o̦k an ro jet kõm̦m̦an ñan er. Bareinwõt, nañinmej, rũttol̦o̦k, jeram̦õl, apañ ko ikõtaan ri pãlele ro, im men ko renana rej wal̦o̦k ilo lal̦ in rej kõm̦m̦an ad aikuji juon ñan kaenõm̦m̦an kõj.
7. (1) Ñe jej iion wãween ko reppen, ta eo jej aikuji? (2) Ta eo Jeova emaroñ kõm̦m̦ane ñan kaenõm̦m̦an ro ‘erup’ bũrueer?
7 Jej eñtaan ñe jej iion wãween ko reppen. Eñin unin jej aikuji juon ñan kaenõm̦m̦an kõj kõnke ad eñtaan ej jelõt bũruod, l̦õmn̦ak ko ad, eñjake ko ad, ãjmour eo ad, im tõmak eo ad. Ñan waanjoñak, l̦õmn̦ak m̦õk kõn bũruod. Baibõl̦ eo ej ba bwe emaroñ “rup” bũruod. (Sam 51:17) Ñe ej ãindein, eokwe Jeova emaroñ jipañ kõj. Ej “kãejmour ro e rup bũrueir, Ej kũtimi kinej ko kinjier.” (Sam 147:3) Meñe jej iion wãween ko reppen, ak Jeova emaroñ kaenõm̦m̦an bũruod el̦aññe jej jar ñan e, lõke e, im pokake kien ko an.—Riit 1 Jon 3:19-22; 5:14, 15.
8. Ewi wãween an Jeova kaenõm̦m̦an kõj ñe jej inepata im l̦õmn̦ak kõn elõñ kain men ko?
8 Kõnke jej iion elõñ kain mãlejjoñ ko, men in ej jelõt l̦õmn̦ak ko ad. Eñin unin jet iien jej aikuj jipañ ñan kaenõm̦m̦an l̦õmn̦ak ko ad. Eo ear je Sam 94:19 ear ba: “Ke elõñ inepata ilo [aõ l̦õmn̦ak, NW], Am̦ naan in kaaenõm̦m̦an ej kalañlõñ aõ.” Bareinwõt, Paul ear je: “Kom̦win jab inepata kõn jabdewõt, a ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruemi im l̦õmn̦ak ko ami ilo Kraist Jisõs.” (Pilippai 4:6, 7) Ñe jej inepata im l̦õmn̦ak kõn elõñ men ko, jej aikuj riiti Baibõl̦ eo im kõl̦mãnl̦o̦kjen̦ kake. Men in enaaj l̦ap an kaenõm̦m̦an kõj.—2 Timote 3:15-17.
9. Ta eo emaroñ jipañ kõj ñe jej bõk eñjake ko rekabwerer?
9 Jet iien jemaroñ bõk eñjake ko rekabwerer. Jemaroñ l̦õmn̦ak bwe epen men ko Jeova ej kajjitõk ippãd bwe jen kõm̦m̦ani ekoba eddo ko ad ilo congregation eo. Jeova emaroñ bar jipañ im kaenõm̦m̦an kõj ilo men in. Ñan waanjoñak: Ke Jeova ear jiroñ Joshua bwe en tõl ri Israel ro n̦ae ri kõjdat ro aer rekajoor, Moses ear ba ñan Joshua: “Kwõn pen im peran wõt, bwe kwõnaaj del̦o̦ñl̦o̦k ippãn jar in ilo ãneo Jeova ear kallim̦ur kake ñan ro jim̦m̦aer bwe En lel̦o̦k ñan er; im kwõn kõm̦m̦an bwe ren bõk aer jolõt. Im Jeova ej ilo̦k im̦aam̦l̦o̦k. Enaaj pãd ippam̦, E jãmin likjab jãn eok, ak ilo̦k jãn kwe. Kwõn jab mijak im jab lõl̦ño̦ñ.” (Duteronomi 31:7, 8) Joshua ear maroñ tõl ro doon Anij ñan Ãne in Kallim̦ur eo im anjo̦ ioon aolep ri kõjdat ro aer kõnke Jeova ear jipañ e. Moses ear bareinwõt bõk jipañ jãn Jeova ke ear tõl ri Israel ro ilo Lom̦al̦o Ekilmir.—Exodus 14:13, 14, 29-31.
10. El̦aññe wãween ko renana jej iioni rej jelõt ãjmour eo ad, ta eo emaroñ jipañ kõj?
10 Men ko renana jej iioni remaroñ jelõt ãjmour eo ad. Em̦ool bwe ñe jej kõjparok ad m̦õñã, kakkije, ekkeini ad exercise, im kõjparok bwe en erreo m̦oko im̦õd kab ãnbwinid, men kein renaaj kõm̦m̦an bwe jen ãjmour. Bareinwõt, el̦aññe jej kõl̦mãnl̦o̦kjen̦ kõn kallim̦ur ko ilo Baibõl̦ kõn raan ko rej pãd im̦aan, men in emaroñ bar jipañ ãjmour eo ad. Innem, ñe jej eñtaan kõn mãlejjoñ ak apañ eo jej iione, enaaj em̦m̦an ñe jej keememej bwe Paul bareinwõt ear eñtaan. Im enaaj bar em̦m̦an ñe jej l̦õmn̦ak kõn naan in rõjañ kein an: “El̦ap kaeñtaan kõm, ak kõmij jañin obab, kõmij pok, a e jañin jako kõjatdikdik; Rej matõrtõre kõm, ak kõm jab make iaam, rej jolal̦l̦o̦k kõm, ak kõm jab jako.”—2 Korint 4:8, 9.
11. Ta eo jemaroñ kõm̦m̦ane el̦aññe jej kile an m̦õjn̦o̦l̦o̦k tõmak eo ad?
11 Jet mãlejjoñ ko jej iioni remaroñ jelõt tõmak eo ad. Jeova emaroñ bar jipañ kõj kõn men in. Baibõl̦ eo ej kallim̦ur ñan kõj: “Jeova ej kejerkak im dãpij ro otemjej re buñ, im kajutak ro otemjej re jillo̦k.” (Sam 145:14) El̦aññe jej kile an m̦õjn̦o̦l̦o̦k tõmak eo ad, jej aikuj kajjitõk jipañ ippãn elder ro. (Jemes 5:14, 15) Bareinwõt, el̦aññe jej kõl̦mãnl̦o̦kjen̦ kõn kõjatdikdik eo ad kõn mour indeeo, men in emaroñ jipañ kõj kijenmej wõt ium̦win mãlejjoñ ko jej iioni.—Jon 17:3.
Ro Anij Ear Kaenõm̦m̦an Er
12. Ewi wãween an kar Jeova kaenõm̦m̦ane Ebream?
12 Eo ear je Sam 119 ear ba ñan Jeova: “Kwõn keememej naan eo ñan karijerõm̦, bwe Kwaar kõm̦m̦an bwe in kõjatdikdik eõ. Eñin aõ men in kaaenõm̦m̦an ilo aõ jorrããn, bwe naan eo Am̦ ear kãejmour eõ.” (Sam 119:49, 50) Rainin, ewõr ippãd Baibõl̦ eo, eo me ej kwal̦o̦k kõn elõñ waanjoñak ko kõn wãween an kar Anij kaenõm̦m̦an ro ri karejaran. Ñan waanjoñak, Ebream ear lukkuun inepata ke ear roñ bwe Jeova ej iten ko̦kkure Sodom. Ear kajjitõk ippãn Anij: “Kwõ naaj ko̦kkure rũ wãnõk ippãn ri jero̦wiwi ke?” Jeova ear kaenõm̦m̦an Ebream ilo an kar kallim̦ur ñan e bwe eban ko̦kkure Sodom el̦aññe ewõr 50 armej ro rewãnõk ie. Bõtab Ebream ear bar kajjitõk l̦alem alen. Ear ba: Ta el̦aññe ear wõr 45 wõt armej ro rewãnõk? ak 40? 30? 20? 10? Jeova ear meanwõd wõt im kwal̦o̦k jouj ñan Ebream. Ear kallim̦uri bwe ejamin ko̦kkure Sodom meñe emaroñ wõr wõt joñoul armej ro rewãnõk ie. Ilo m̦ool, meñe ear eietl̦o̦k jãn joñoul armej ro rewãnõk ilo jikin eo ak Jeova ear lo̦mo̦o̦ren Lot im lim̦aro nejin.—Jenesis 18:22-32; 19:15, 16, 26.
13. Ewi wãween an kar Hanna kwal̦o̦k an lõke Jeova?
13 Hanna, lio ippãn Elkena, ear kanooj kõn̦aan bwe en wõr nejin. Ak ear lukkuun bũrom̦õj kõnke ear jab maroñ neji. Ear jar ñan Jeova kõn men in, im Pris eo El̦ap Ilai ear ba ñan e: “Anij in Israel en lewõj men in kajjitõk eo kwaar kajjitõk Ippãn.” Men in ear lukkuun kaenõm̦m̦an Hanna im “turin mejãn ear jab bar bũrom̦õj.” (1 Samuel 1:8, 17, 18) Hanna ear lõke Jeova im likũt inepata in an n̦a ippãn. Meñe ear jab jel̦ã ta eo enaaj kar wal̦o̦k, ak ear jako an inepata im ear ineem̦m̦an wõt. Tokãlik, Jeova ear uwaake jar eo an. Hanna ear bõro̦ro im keotak juon nejin l̦addik. Im ear n̦aetan Samuel.—1 Samuel 1:20.
14. Etke Devid ear aikuj in bõk kaenõm̦m̦an? Wõn eo ear kajjitõk ippãn bwe en kaenõm̦m̦ane?
14 Bar juon eo im Anij ear kaenõm̦m̦ane ej Kiiñ Devid. Jeova “ej lale bũruon” armej. Innem, ke ear kããlõt Devid bwe en irooj ioon ri Israel ro, ear jel̦ã bwe Devid ear kõn̦aan kõm̦m̦ane men eo ejim̦we im el̦ap an kaorõk kabuñ eo em̦ool. (1 Samuel 16:7; 2 Samuel 5:10) Bõtab tokãlik, Devid ear l̦õñ ippãn Bat-shiba im ear kajjioñ n̦ooje jerawiwi in an jãn ro jet. Ke juon ear jipañ e ñan kile joñan an kar nana men eo ear kõm̦m̦ane, ear jar ñan Jeova: “Kwon jeorilok jerawiwi ko aõ, kin am tiriamo elab! Kwon . . . karreoik iõ jen aõ jerawiwi! Ij kile bwid ko aõ, im ij ememej jerawiwi ko aõ ien otemjej.” (Sam 51:1-3, UBS) Devid ear ukel̦o̦k jãn bũruon kõn jerawiwi eo ear kõm̦m̦ane, im Jeova ear jeorl̦o̦k bõd eo an. Meñe ãindein, Devid ear eñtaan kõn men ko rar wal̦o̦k jãn men eo enana ear kõm̦m̦ane. (2 Samuel 12:9-12) Bõtab, tũriam̦o eo an Jeova ear kaenõm̦m̦ane Devid.
15. M̦okta jãn an kar Jijej mej, ewi wãween an kar Jeova jipañ e?
15 Ke Jijej ear pãd ioon lal̦, elõñ wãween ko reppen ear iioni. Anij ear kõtl̦o̦k bwe en iioni mãlejjoñ kein. Meñe ãindein, Jijej ear dãpij wõt an tiljek. Jijej ear juon armej eweeppãn im aolep iien ear lõke Jeova im pokake e. M̦okta jãn aer kar ketak e im m̦an e, Jijej ear jar ñan Jeova: “En jab ankil aõ a Am̦ wõt.” Innem juon enjel̦ ear wal̦o̦kl̦o̦k ñan Jijej im kakajoor e. (Luk 22:42, 43) Jeova ear kaenõm̦m̦an im kakajoor Jijej ilo iien in me ear aikuj jipañ.
16. El̦aññe mour eo ad epãd ilo kauwõtata kõn tõmak eo ad, ewi wãween Jeova emaroñ jipañ kõj?
16 Meñe mour eo ad emaroñ pãd ilo kauwõtata kõn tõmak eo ad, ak Jeova emaroñ im enaaj jipañ kõj bwe jen dãpij wõt ad tiljek ñan e. Bareinwõt, ñe jej l̦õmn̦ak kõn kõjatdikdik eo bwe Jeova enaaj bar kõmour ro rar mej, men in ej kaenõm̦m̦an kõj. Jej lukkuun reim̦aanl̦o̦k ñan iien eo “enaaj jako” ri kõjdat eo ãliktata, mej! (1 Korint 15:26) Jeova ej keememej aolep ri karejar ro an im rar tiljek wõt ñan mej. Eban mel̦o̦kl̦o̦ke juon ñan jidik. Im enaaj bar kõmour rein. (Jon 5:28, 29, UBS; Jerbal 24:15) Ilo iien ko jej iion matõrtõr, ad tõmak bwe Jeova enaaj bar kõmour ro remej enaaj kaenõm̦m̦an im kakajoor kõj.
17. Ewi wãween Jeova emaroñ kaenõm̦m̦an kõj ñe juon eo ejitõnbõro ippãd emej?
17 Kõnke jejel̦ã bwe ro rejitõnbõro ippãd im rar mej renaaj bar mour ilo lal̦ eo ekããl, men in el̦ap an kaenõm̦m̦an kõj. Ejjel̦o̦k bar men en̦ enaaj kainepataik im kabũrom̦õj kõj. Im jarlepju in ri karejar ro an Jeova im renaaj el̦l̦ã im mour ñe enaaj itok jem̦l̦o̦kin jukjuk im pãd in renaaj bõk juon jeraam̦m̦an el̦ap. Renaaj karwaineneik im katak ippãn ro renaaj bar mour!—Revelesõn 7:9, 10.
Pã ko Pein Anij Rej Kõjparok Kõj ñan Indeeo
18, 19. Ewi wãween an kar Anij kaenõm̦m̦an ro doon ke rar iion matõrtõr?
18 Ri kanaan Moses ear je juon al me ear kaenõm̦m̦an im kakajoor ri Israel ro. Ilo al in, ear ba: “Anij ear ami likibbijñak jen etto; Bã ko bein rej drebij kom ñõn indrio.” (Duteronomi 33:27, UBS) Tokãlik, ri kanaan Samuel ear jiroñ ri Israel ro: “Kom̦win jab jeorl̦o̦k jãn ami l̦oor Jeova, a kom̦win jerbal ñan E kõn aolepen bũruõmi . . . Jeova e jãmin ilo̦k jãn armej ro doon, kõn Etan el̦ap.” (1 Samuel 12:20-22) Jeova ejamin el̦l̦o̦k jãn kõj el̦aññe jej tiljek wõt ñan e. Iien otemjej enaaj jipañ kõj.
19 Anij ej jipañ im kaenõm̦m̦an armej ro doon ilo raan kein ãliktata im el̦ap aer nana. Rainin, elõñ iaan ro jeid im jatid ipel̦aakin lal̦ rar iion matõrtõr im kar kalbuuji er kõn aer karejar ñan Jeova. Bwebwenato ko kõn er rej kam̦ool bwe Jeova ej kaenõm̦m̦an ro doon ñe rej iion mãlejjoñ ko. Ñan waanjoñak, juon jeid im jatid m̦aan ilo Rojia ear pãd ilo kalbuuj ium̦win 23 iiõ kõn tõmak eo an. Ak meñe ear pãd ilo kalbuuj, ak ear jab bõjrak aer jilkinl̦o̦k bok ko ad me rar kakajoor im kaenõm̦m̦an e. Ear ba: “Ium̦win aolepen iiõ ko in aõ pãd ilo kalbuuj, iar katak ñan lõke Jeova im ear kakajoor eõ.”—Riit 1 Piter 5:6, 7.
20. Etke jemaroñ ba bwe Jeova ejamin el̦l̦o̦k jãn kõj?
20 Jekdo̦o̦n ta eo enaaj wal̦o̦k ñan kõj ilju im jekl̦aj, em̦m̦an bwe jen keememej naan kein rekaenõm̦m̦an: ‘Jeova ejamin jol̦o̦k armej ro an; Ejamin el̦l̦o̦k jãn ro doon.’ (Sam 94:14, UBS) Meñe kõj kajjojo jej aikuj bõk kaenõm̦m̦an, ak jemaroñ bareinwõt kaenõm̦m̦an ro jet. Ilo katak in tok juon, jenaaj katak kõn ewi wãween jemaroñ kaenõm̦m̦an ro rej eñtaan ilo lal̦ in enana.
Ta Uwaak eo Am̦?
• Ta ko remaroñ kõm̦m̦an bwe jen inepata im bũrom̦õj?
• Ewi wãween an Jeova kaenõm̦m̦an ro doon?
• El̦aññe mour eo ad ej pãd ilo kauwõtata, ta eo emaroñ kaenõm̦m̦an kõj?
[Box/Pija ilo peij 25]
WÃWEEN JEMAROÑ KIJENMEJ IUM̦WIN MEN KO REJ JELÕT . . .
▪ bũruod Sam 147:3; 1 Jon 3:19-22; 5:14, 15
▪ l̦õmn̦ak ko ad Sam 94:19, UBS; Pilippai 4:6, 7
▪ eñjake ko ad Exodus 14:13, 14; Duteronomi 31:7, 8
▪ ãjmour eo ad 2 Korint 4:8, 9
▪ tõmak eo ad Sam 145:14; Jemes 5:14, 15