Nan In Tel Ko Remeletlet Ñan Ri Belele Ro
“Kõra ro, komin kõtãik kom ñõn lõmaro belemi, einwõt ñõn Iroij. Man ro, komin yokwe limaro belemi.”—DRI EPESÕS 5:22, 25.
1. Ta lemnak eo ejimwe kin mour in mare?
JESUS ear ba bwe mour in mare eo ej ñe Anij ej kobaik juõn emaan im juõn kõrã bwe ren “juõn wõt kõniek.” (Matu 19:5, 6) Ej kitibuj ruo armij ro me kadkad ko kadkadiir reinjuõn jen don im rej katak ñan kaddek men ko rej jimor itoklimo kaki im jerbal ibben don ñan jibadõk mejenkajjik ko eirwõt juõn. Mour in belele ej juõn karõk eo me leo im lio rar beek ñan air bed ibben don toan wõt airro mour, ejjab juõn karõk bajjek me remaroñ rupe tokelik. Ilo elõñ ailiñ ko, ejjab bin ñan jebel jen don, ak iman mejen juõn Christian, mour in mare ej juõn karõk ekwojarjar. Ej jemlok kin juõn wõt un eaorõk.—Matu 19:9.
2. (a) Ta men in jibañ eo ej bellok ñan ri belele maan im kõrã ro? (b) Etke eaorõk bwe jen kate kij ñan kõmman bwe en wõr tõbrak ilo mour in mare eo ad?
2 Juõn ri lelok kakabilek kin mour in mare ear ba: “Tõbrak in mour in mare eo ej kitibuj oktak ko rej kalikar aitwerõk ko rekãl, abañ ko rej walok, im kajerbal men in aikwij ko ilo buñten ne ko kajjojo ilo mour.” Ñan Christian ri belele ro, men in aikwij kein rej kitibuj nan in kakabilek ko remeletlet ilo Bible, rejetak eo an Ri Christian ro mõttad, im juõn kõtan ebak ilo jar ibben Jehovah. Juõn mare eo ewõr tõbrak ie ej kijenmij wõt iumin elõñ yiõ ko, ej bõktok mõnõnõ im jokane ñan ri belele leo im lio. Un eo elaplok, ej kautiej Jehovah Anij, Eo Ear Ejaake Mour in Mare eo.—Jenesis 2:18, 21-24; 1 Dri Korint 10:31; Dri Epesõs 3:15; 1 Dri Tessalonika 5:17.
Kajeoñe Jesus im Congregation eo An
3. (a) Kameleleik nan in kakabilek eo an Paul ñan ri belele maan im kõrã ro. (b) Ta joñok eo emõn Jesus ear likiti?
3 Ruo thousand yiõ ko remotlok, ri jilek Paul ear letok nan in kakabilek eo emeletlet ñan Christian maan im kõrã ro ke ear je: “Ijoke einwõt eklisia ej etã jen Kraist, en ein drein bareinwõt lõmaro ñõn lõmaro beleir ilo men otemjej. Man ro, komin yokwe limaro belemi, einwõt Kraist e ar bareinwõt yokwe eklisia, im mõke lelok E kin e.” (Dri Epesõs 5:24, 25) Ekanuij emõn nan kein rej keidi ijin! Christian kõrã ro rej kõtãik ir ñan lõmaro beleir, rej kajeoñe congregation eo ilo air kile im bokake kien eo kin bõr eo. Lõmaro ri tõmak me rej wõnmanlok ilo air yokwe limaro beleir, elañe ilo ien ko remõn ak nana, rej kwalok bwe rej anõk joñok eo an Christ kin yokwe congregation eo im kejbãrok e.
4. Ewi wãwen ri belele maan ro remaroñ lore joñok eo an Jesus?
4 Christian lõmaro rej bõran family ko air, bõtab ir bareinwõt ewõr bõrair, Jesus. (1 Dri Korint 11:3) Kin men in, einwõt an kar Jesus kejbãrok congregation eo an, eindein ilo yokwe lõmaro rej kejbãrok family ko air ilo juõn wãwen ilo kanniek im jitõb, meñe rej aikwij karmijeteik kõnan ko air. Rej likit aikwij ko an family ko air iman kõnan ko air make. Jesus ear ba: “Inem men otemjej jabrewõt komij kõnan bwe armij ren kõmõnmõn ñõn ir.” (Matu 7:12) Kien in ej jerbal elaptata ñan mour in mare. Paul ear kwalok men in ke ear ba: “Ein drein emõn bwe lõmaro ren bareinwõt yokwe limaro beleir im einwõt enbwiniir. Leo eo ej yokwe lio belen ej mõke yokwe e. Bwe ejelok en e ar mõke kijirãte kõniekin; a ej kakajiririk e; im kaurõk e einwõt an Kraist bareinwõt kõmõn ñõn eklisia.” (Dri Epesõs 5:28, 29) Juõn emaan ej aikwij najirik im kaorõk lio belen ilo ejja wãwen eo wõt ej najirik im kaorõk e make.
5. Ewi wãwen an ri belele kõrã ro maroñ kajeoñe congregation eo an Christian?
5 Kõrã ro rej kabuñ ñan Anij rej reilok ñan congregation eo an Christian einwõt juõn joñok ñan ir. Ke Jesus ear bed ion lal, ri kalor ro an rar mõnõnõ in illok jen jibadbad ko air im lor e. Elikin mij eo an, rar wõnmanlok im kõtãik ir ñan e, im iumin enañin 2,000 yiõ ko remottok, congregation eo emol an Christian ear bedwõt im kõtãik e ñan Jesus im lor tel eo an ilo men otemjej. Ilo ejja wãwen eo wõt, Christian kõrã ro ren jab dike lõmaro beleir ak kadiklok aorõkin karõk in bõran family eo ekkar ñan Bible eo. Jen men in, rej rejetak im kõtãik ir ñan lõmaro beleir, im jibañ im rejañ ir. Ñe leo im lio rej jimor emmakit ilo juõn wãwen ej yokwe, mour in mare eo air enaj lo tõbrak im erro naj lo lañliñ ilo kõtan eo air.
Wõnmanlok im Jokwe Ibbeir
6. Ta nan in kakabilek eo Peter ear lelok ñan ri belele maan ro, im etke ej aorõk?
6 Ri jilek Peter ear lelok nan in kakabilek ko ñan ri belele ro bareinwõt. Ear ba: “Komin jokwe iben belemi kin jelalokjen, im koutiej kõra rõn, einwõt jãbi remõjino jen kom, im ro dri jolit ibemi kin joij im mour: bwe en ejelok men in boprae jar ko ami.” (1 Piter 3:7) Aorõkin nan in kakabilek eo an Peter ej kamelele kake ilo nan ko itujemlokinlok eon in. Elañe leo ej likjap in kautiej lio belen, likjap in enaj jelet kõtan eo an ibben Jehovah. Jar ko an rejamin tõbar Jehovah.
7. Ewi wãwen an maan ro kautiej limaro beleir?
7 Inem, ewi wãwen an lõmaro maroñ kautiej limaro beleir? Ñan kautiej lio belen melelen ej aikwij yokwe, kautiej im kañiãjoik e. Elõñ rar watõk bwe kwalok joij rot in ñan juõn kõrã ebelele ear juõn manit ekãl. Juõn ri Greek eo emeletlet ear je: “Iumin kien eo an Rom ear ejelok maroñ ibben juõn kõrã. Ekkar ñan kien ear einwõt juõn ajiri toan wõt an mour. . . . Ear aikwij kõtãik aolepen mour eo an ñan leo belen, im bed iumin kajur eo an.” Elap an oktak jen katakin ko an Christian! Juõn Christian emaan eo ear kautiej lio belen. Makitkit ko an ibben rar bedbed ion kien ko an Christian, jab ion eñjake ko an make. Bareinwõt, ear joij ñan lio “ekar ñõn jelã,” kinke ear kememej bwe ear mõjno ilo kanniek.
“Juõn Jãbi Emõjino” ilo Wãwen Et?
8, 9. Ilo wãwen et ko kõrã ro rej joñair wõt juõn ibben maan ro?
8 Ilo an ba bwe kõrã eo ej “juõn jãbi emõjino,” Peter ear jab ba bwe kõrã ro rej mõjnolok jen lõmaro ilo lemnak ak jitõb. Emol, elõñ Christian lõmaro ilo congregation eo ewõr jerbal ko raorõk me limaro rejjab maroñ bõki, im ilo family eo limaro rej aikwij kõttãik ir ñan lõmaro beleir. (1 Dri Korint 14:35; 1 Timote 2:12) Mekarta, maan im kõrã ro otemjej rej aikwij jerbale tõmak, kijenmij, im kien ko relap kin mour erreo. Im einwõt an kar Peter ba, leo im lio jimor rej “dri jolit . . . kin joij im mour.” Ikijen bõk lomor, rej joñair wõt juõn ilo air jutak iman mejen Jehovah. (Dri Galetia 3:28) Peter ear jejelok ñan Christian ri kabit ro ilo ebeben eo kein kajuõn. Inem, nan ko an rar kakememej Christian lõmaro bwe einwõt “dri jolit ro iben Kraist,” ir im limaro beleir kejatdikdik eo air ej juõn wõt ñan mour ilañ. Juõn ran, maan im kõrã jimor renaj jerbal einwõt priest im king ro ilo Ailiñ eo an Anij ilañ!—Reveles̃õn 5:10.
9 Christian ri kabit kõrã ro rar jab ettã jen Christian ri kabit ro beleir. Inem, en eindein ibben ro me kejatdikdik eo air ej ñan mour ion lal. Maan im kõrã ro jimor an “jar eo elap” rej kwali nuknuk ko air im kemouri ilo bõtõktõkin Lamb. Maan im kõrã ro jimor rej bõk kunair “ran im boñ” ñan wijtake Jehovah. (Reveles̃õn 7:9, 10, 14, 15) Maan im kõrã ro jimor rej reimanlok ñan ien eo renaj bõk anemkwoj “ilo aibujuij an ro nejin Anij,” ñe renaj lañliñ im bõk “mour eo emol.” (Dri Rom 8:21; 1 Timote 6:19) Jekdon elañe rej mõttan ro uan ri kabit ro ak sheep ro jet, Ri Christian ro aolep rej jerbal ñan Jehovah ibben don einwõt “juõn bwij” iumin “juõn shepherd.” (Jon 10:16) Men in ej juõn un ekajur unin an juõn Christian ri belele maan im kõrã kwalok kautiej ñan don!
10. Ilo wãwen et eo kõrã ro rej ‘jãbi ko remõjno’?
10 Inem, ilo wãwen et eo kõrã ro rej einwõt ‘jãbi ko remõjno’? Bõlen Piter ear jitõñlok ñan mol eo bwe, ekkã an kõrã ro kadulok im mõjnolok jen maan ro. Bareinwõt, kinke jejjab wãppen, jerammõn in kõmman ajiri emaroñ kamõjnoik kõrã ro. Kõrã ro rebojak ñan kõmman ajiri emaroñ eñtan ilo kanniek ien otemjej. Emol bwe rej aikwij bõk jibañ ñan kejbãrok ir ñe rej utame ak aikwij kijenmij im kate ir ñe rej bõroru im kemoure ajiri. Leo belele ej kautiej lio belen, ñe ej jelã jibañ rot eo lio belen ej aikwiji, men in enaj lap an jibañ e ñan debij juõn mour in mare eo elap tõbrak ie.
Ilo juõn Family eo Eoktak Kabuñ ko Air Jen Don
11. Ilo wãwen et eo emaroñ wõr tõbrak ilo mour in mare eo meñe leo im lio rejjab bed ilo juõn wõt kabuñ?
11 Bõtab, ta elañe ri belele ro rej oktak jen don ilo kabuñ kinke juõn iair ear bõk mol eo elikin air mare im eo mõttan ear jab kõnan bõke? Mare rot in emaroñ ke tõbrak? Bwebwenato ko an elõñ rej ba aet. Lõmaro im limaro rebelele eoktak kabuñ ko air jen don remaroñ lo tõbrak ilo mare eo air ilo wãwen eo erro renaj kijenmij im mõnõnõ ibben don. Elaplok jen men in, mour in mare eo air ej emõn wõt iman mejen Jehovah; rej “juõn wõt kõniek.” Inem, Christian ri belele ro rar bõk nan in kakabilek eo bwe ren bed ibben ro mõttair rejjab tõmak elañe rej errã in bedwõt ibbeir. Elañe ewõr ajiri ro, rej bõk tokjen jen tiljek eo an Christian ro jemeir ak jineir.—1 Dri Korint 7:12-14.
12, 13. Ilo ad lor nan in kakabilek eo an Peter, ewi wãwen Christian kõrã ro remaroñ jibañ lõmaro beleir rejjab tõmak?
12 Ilo joij Peter ej kwalok nan in kakabilek ko ñan Christian limaro rej jokwe ibben ro uan family ko air rej bed ilo kabuñ ko jet. Bareinwõt nan ko an remaroñ jerbal ilo juõn wãwen ekkar ñan Christian lõmaro ilo ejja abañ eo wõt. Piter ear je: “Limaro, komin kõtãik kom ñõn lõmaro belemi; bwe elañe jabrewõt e jab bokake nan eo, en rel buruen ñe ejelok nan, kin an beleir ber im kõmõn, ñe rej lo ami etetal ekwojarjar ilo mijõk.”—1 Piter 3:1, 2.
13 Elañe juõn kõrã emaroñ kamelele ilo joij kin tõmak eo an ñan leo belen, ej juõn men emõn. Bõtab, ta elañe ejjab kõnan roñjake? Ej an wõt bebe. Mekarta, ej wõr wõt kejatdikdik, kinke mwilin Christian ej juõn men in kamol elap. Elõñ lõmaro ilo jinoin rar jab itoklimo ak rar jumae kabuñ eo an limaro beleir rar oktak im “likit ir bwe ren mour in drio,” elikin air lo mwilin limaro beleir. (Jerbal 13:48) Meñe leo ejjab kõnan bõk mol eo, mwilin lio belen emaroñ kabuñburuen, im enaj wõr tokjen ko remõn ilo mour in mare eo. Juõn emaan me lio belen ej juõn ian Ri Kennan ro an Jehovah ear kalikar bwe ear jab maroñ mour ekkar ñan kien ko air relap. Meñe eindein, ear make naetan “juõn ri belele eo emõnõnõ kinke lio belen ear lukkun emõn” im ear nebar lio belen im Ri Kennan ro mõttan ilo juõn letter ñan juõn newspaper.
14. Ewi wãwen an maan ro maroñ jibañ kõrã ro beleir rejjab tõmak?
14 Christian maan ro rej jerbale nan ko an Peter rar wini limaro beleir kin mwiliir. Kõrã ro rejjab tõmak rar lo an lõmaro beleir bõk eddo eo ñan tel family eo, jab jolok money ko ñan wia jikka, den in kadõk, im gamble im bõjrak jen air kanejnej. Jet ian kõrã rein rar ion ro jet uan congregation eo an Christian. Rar lukkun bwilõñ kin jitõbõn jimjãn jimjatin eo an Christian, im men eo rar lo ibwiljin ro jeid im jatid ear kebake ir ñan Jehovah.—Jon 13:34, 35.
“Komin Kalitlit Kom ilo Buruemi”
15, 16. Kain mwil rot eo Christian kõrã eo ej aikwij kwalok ñan winitok leo belen ejjab tõmak?
15 Kain mwil rot eo emaroñ winitok leo ebelele? Emol, ej mwilin kõrã ro rej Christian. Peter ej ba: “Komin jab mõke kalitlit kom kin kalitlit eo elikemi, kin birõk kolan bõrõmi, kin inõk gold, ak kin kõnõk nuknuk ko. A komin mõke kalitlit kom ilo buruemi, kin men eo e jamin ijurwewe, kin jitõb e inimõn im joij wõt, eo e kanuij aorõk iman mejen Anij. Bwe ein drein, ilo ien ko remotlok, kõra remõn, ro r’ar kejatrikrik ir ilo Anij, rej mõke kalitlit ir, im mõke kõtãik ir ñõn beleir. Einwõt Sera e ar bõkake Ebream, im naetan iroij: im kom ro nejin kiõ, elañe komij kõmõn emõn, im jamin mijõk kin jabrewõt lelñoñ.”—1 Piter 3:3-6.
16 Piter ej kakabilek juõn Christian kõrã bwe en jab atartar ion ta eo itulikin armij. Ak, en kõmman bwe leo belen en lo wãwen an katakin ko an Bible jelet armij eo iloa. Kõtlok bwe en lo wãwen an armij eo ekãl jerbal ilo buruen lio belen. Bõlen enaj keidi mour eo an lio belen kiõ ibben mour eo an mokta. (Dri Epesõs 4:22-24) Enaj lo bwe jitõb “e inimõn im joij” an lio belen ej juõn men ekaemololo im emmejaja ibben. Jitõb rot in ejjab juõn wãwen ekabuñburuen leo belen wõt ak ej juõn jitõb “e kanuij aorõk iman mejen Anij.”—Dri Kolosse 3:12.
17. Ewi wãwen Sarah ear juõn joñok emõn ñan Christian ri belele kõra eo?
17 Sarah kar kãlet e einwõt juõn joñok, im ej tellokin bwe Christian limaro ren lore jekdon elañe lõmaro beleir rej bed ilo mol eo ak jab. Ejelok bere bwe Sarah ear watõk Abraham einwõt bõran. Meñe ilo buruen, ear naetan “iroij.” (Jenesis 18:12) Ak, men in ear jab kadiklok utiej eo an. Ear juõn kõrã ekajur ilo jitõb im elap an tõmak ilo Jehovah. Emol, ej mõttan juõn “dri kennan, einwõt kõro elap,” eo me joñok eo an ilo tõmak en kar kamakit kij ñan “etõr ilo iaikuij eo emwij likit e imar.” (Dri Hibru 11:11; 12:1) Ejjab juõn men ettã bwe juõn Christian kõrã en kajeoñe Sarah.
18. Ta kien ko rej aikwij jerbali ilo family eo ekajju jen don ilo kabuñ ej aikwij jerbali?
18 Ilo juõn family eo me ro uan rej jen don ilo kabuñ, leo ej bõran family eo wõt. Elañe ej bed ilo mol eo, leo enaj lemnak kin tõmak im eñjake ko an lio belen eo ej bed ilo bar juõn kabuñ ilo ejja ien eo wõt en jab ebbururu kin tõmak eo an. Elañe lio ej bed ilo mol eo, ejamin ebbururu ilo tõmak eo an bareinwõt. (Jerbal 5:29) Meñe eindein, ejamin aitwerõke tel eo an leo belen. Enaj kautiej maroñ eo an ilo family eo im kõttãik e wõt iumin “kien leo belen.”—Dri Rom 7:2.
Tel eo Emeletlet an Bible
19. Ta jet ian melejoñ ko rej melejoñe lukluk in mare eo, ak ewi wãwen jemaroñ bõpraik ijjibed rot kein?
19 Rainin, elõñ men ko remaroñ melejoñe mour in mare eo. Jet lõmaro rej likjap in kajejjet jerbal ko air. Jet kõrã ro rej makoko in kõttãik ir ñan tel eo an lõmaro beleir. Ibben jet ri belele lõmaro im limaro, juõn ri belele emaroñ bõk eñtan ilo kanniek ak ilo nan jen eo mõttan. Ñan Ri Christian ro, abañ ko kin money, likjap ko an armij, im jitõbõn lal in ekoba mour in ãjãj im juõn lemnak ebwid kin ta men ko relijeklok remaroñ melejoñe tiljek eo ad. Ak, Christian maan im kõrã ro rej lore kien ko ilo Bible, jekdon ta abañ ko rej jelmaiki, renaj bõk jerammõn jen Jehovah. Meñe juõn wõt ian ri belele ro rej jerbale kien ko ilo Bible kin mour, emõnlok jen ñe erro jimor rejjab jerbali. Bareinwõt, Jehovah ej yokwe im jurake ri karejar ro an rej tiljek in kajejjet kitien kallimur ko air kin mour in mare eo meñe rej bed ilo melejoñ ko relap. Ejjab meloklok tiljek eo air.—Sam 18:25; Dri Hibru 6:10; 1 Piter 3:12.
20. Ta nan in kakabilek eo Peter ear kwalok ñan Ri Christian ro otemjej?
20 Elikin an kakabilek ri belele maan im kõrã ro, ri jilek Peter ear kajemlok kin nan in rejañ ko rekamãnãn. Ear ba: “En buruemi otemjej wõt juõn, komin tiriamokake dron, komin yokwe einwõt jimjãn jimjãten, komin keni, im en etã buruemi. Komin jab lelok nana kin nana, ak kajirere kin kajirere; a ein juõn, jar; bwe emwij kir kom ñõn men in, bwe komin jolit jerammõn.” (1 Piter 3:8, 9) Emol bwe nan in kakabilek in emeletlet ej ñan armij otemjej, elaptata ñan ri belele maan im kõrã ro!
Kwoj Kememej Ke?
• Ewi wãwen an Christian lõmaro kajeoñe Jesus?
• Ewi wãwen an Christian kõrã ro kajeoñe congregation eo?
• Ewi wãwen an lõmaro maroñ kautiej limaro beleir?
• Ta ial eo emõntata ñan juõn Christian kõrã eo me leo belen ejjab bed ilo tõmak?
[Pija eo ilo peij 27]
Juõn Christian emaan ej yokwe im kabwe aikwij ko an lio belen
[Pija eo ilo peij 27]
Juõn Ri Christian kõrã ej kautiej im nebar leo belen
[Pija eo ilo peij 29]
Ejjab einwõt kien Rom, nan in katakin ko an Christian rej kakien lõmaro ñan kautiej limaro beleir
[Pija eo ilo peij 30]
Maan im kõrã ro jimor rej mõttan “jar eo elap” rej reimanlok ñan bõk mour indio ilo Paradise eo
[Pija eo ilo peij 31]
Sarah ear watõk Abraham einwõt iroij eo an