“E ar Warõñlok Mij Ñõn In Drio”
BAJ LEMNAK mõk elañe kwar lo nan kein ilo news. Emol bwe, ejelok juõn newspaper emaroñ kwalok kin ennan rot in. Ak nan kein rej bed ilo juõn book kar je elõñ thousand yiõ ko remotlok—Bible eo.
Bible eo ej kamelele kin ta in mij. Bareinwõt, ejjab kwalok wõt kin etke jej mij ak ej letok juõn kejatdikdik kin ro ad jitenburu remij. Eliktata, ej konono kin juõn ien renaj ba: “Mour emwij an kokkure mij im lukkun bõk anjo!”—1 Dri Korint 15:54.
Bible eo ej kamelele ilo alikar kin ta in mij. Ñan wanjoñok, elõñ alen ej kamelele bwe mij ej einwõt ñe juõn armij ej ‘kiki,’ im ej kamelele bwe ro remij rej “kiki ilo mij.”—Sam Ko 13:3; 1 Dri Tessalonika 4:13; Jon 11:11-14.
Alikar, Jesus Christ enaj lap kunan ilo an kokkure mij. Ear ba bwe ear itok ñan lal “bwe En jerbal ñõn ir, im lelok An mour bwe En binmour ñõn ro relõñ.” (Matu 20:28) Wãwen in ej einwõt ñe juõn ri kwot ear kwote juõn armij, im wãwen eo wõt kwomaroñ bar lo armij eo ej bwe kwon kõllã ñan wiaik mour eo an. Eokwe, ilo ejja wãwen in wõt, Jesus ear lelok mour eo an ewãppen ñan kanemkwoj kij jen jerawiwi im mij.—Jerbal 10:39-43.
Mij ej juõn ri kijirãt. Ebar wõr men ko jet rej kijirãte armij, einwõt nañinmij im rittolok im men kein rej kaeñtan armij. Anij ear kallimur bwe enaj jolok aolep men kein rej kijirãte armij ekoba men eo elaptata an kaeñtan armij. “Dri kijirãt eliktata im e naj joko, mij.”—1 Dri Korint 15:26.
Elikin an jejjet kitien kallimur in, armij ro renaj bõk mour eo ewãppen im lo mõnõnõ, ilo juõn jikin ejelok jerawiwi im mij ie. Mae ien eo, jej bõk kainemõn in jelã bwe ro rejitenburu ibbed rej kiki ilo mij, im elañe Anij ej kememej wõt ir, renaj jerkakbiji ilo ien eo emwij an karõke.
“O Mij, Ewi Am Ken Iri?”
Alikar, ñe jej melele kin wãwen ro remij jemaroñ bõk juõn lemnak ejokkin wõt juõn kin mour. Ejjab aikwij bin ñan ad melele kin mij. Jemaroñ mour ilo mõnõnõ im jab mijake ri kijirãt in. Im kinke jejelã bwe mij ej jamin kokkure kij ñan indio, jen jab bõk lemnak in bwe “ekadu ien mour” inem jej mour wõt ñan ad bukõt men in kamõnõnõ ko. Kinke jej jelã bwe Anij ej kememej wõt ro rejitenburu ibbed rej kiki ilo mij im rej kõttar ien air jerkakbiji, men in ej kainemõn kij im rejañ kij ñan ad kijenmij wõt im mour manlok.
Aet, ilo liki jej reimanlok ñan ilju eo ñe Jehovah Anij, Eo Ej Letok Mour, enaj jolok mij ñan indio. Enaj juõn jerammõn ñe jemaroñ kajitõk ilo ran ko tokelik: “O mij, ewi am anjo? O mij, ewi am ken iri?”—1 Dri Korint 15:55.