Kwonaj Kwalok Ke Aibujuij Eo An Anij?

“Kij otemjej . . . jej kalimjek, einwõt ilo kapjur, aibujuij an Iroij.”​—2 DRI KORINT 3:18.

1. Ta eo Moses ear loe, im ta eo ear walok tokelik?

EAR juõn ian vision ko rekabwilõñlõñ jabdewõt armij remaroñ kar loe. Ke Moses ear make ian ion Tol Sinai, ear bõk juõn jerammõn ejejuan. Ear lo juõn men armij otemjej rejañin kar loe​—aibujuij eo an Jehovah. Emol, Moses ear jab lukkun lo Jehovah kin mejen. Joñan an lap aibujuij eo an Anij, ejelok juõn armij emaroñ kar loe kin mejeir im mour wõt. Ak, Jehovah ear kalibubuik Moses kin “pein” mae ien enjel eo ear binej jenkwon Anij ear ellã jen e. Inem Jehovah ear kõtlok bwe Moses en lo aibujuij eo an elikin an kar ellã jen e. Bareinwõt Jehovah ear kajerbal juõn enjel ñan konono ibben Moses. Bible eo ej kwalok kin ta eo ear walok: “Im ke Moses e ar wõnlõltok jen tol Sinai, im tebel in kennan ko ruo ilo pein Moses, ke ear wõnlõltok jen tol eo, Moses e ar jaje bwe e jatõltil kilin turin mejen, kin An konono iben.”​—Exodus 33:⁠18–​34:​7, 29.

2. Ta eo ri jilek Paul ear jeje kake kin aibujuij eo Ri Christian ro rej kwaloke?

² Baj lemnak mõk elañe kwar bed ibben Moses ilo tol eo. Enaj kar juõn ien ekamõnõnõ elap ñan am lo aibujuij eo an Anij Ekajur Bõtata im roñjake nan ko an! Enaj kar juõn jerammõn elap ñan wanlaltak jen Tol Sinai ibben Moses, ri kilajrak eo an Kien eo! Ak, kwar jelã ke bwe ilo jet wãwen ko Ri Christian ro remol rej kwalok aibujuij eo an Anij ilo juõn wãwen elaplok jen Moses ke ear kwaloke ilo ien ko etto? Ri jilek Paul ear jeje kin lemnak in ekabwilõñlõñ ilo letter eo an. Ear je bwe Christian ri kabit ro rej kwalok “einwõt ilo kapjur, aibujuij an Iroij.” (2 Dri Korint 3:7, 8, 18) Ilo juõn wãwen, Ri Christian ro me rej kejatdikdik in mour indio ion lal, rej kwalok aibujuij eo an Anij bareinwõt.

Ewi Wãwen Ri Christian ro Rej Kalikar Aibujuij eo an Anij

3. Ewi wãwen jej jelã kin Jehovah ilo wãwen ko Moses ear jaje kaki?

³ Ewi wãwen ad maroñ kwalok aibujuij eo an Anij? Jejañin lo ak roñ ainikien Jehovah einwõt kar Moses. Bõtab, emwij ad jelã kajjen Jehovah ilo wãwen ko Moses ear jaje kaki. Jesus ejañin kar itok einwõt Messiah eo mae enañin 1,500 yiõ ko elikin an kar Moses mij. Kin men in, Moses ear jab jelã kin ewi wãwen Jesus enaj kar kajejjet kitien Kien eo. Jesus ear mij bwe en wiaik armij ro jen jerawiwi im mij. (Dri Rom 5:20, 21; Dri Galetia 3:19) Bareinwõt ear jab bwe an kar Moses melele kin karõk eo eaibujuij an Jehovah, eo ear wawa ion Ailiñ eo an Messiah eo im Paradise eo enaj bõktok ion lal. Inem jejjab lukkun lo aibujuij eo an Jehovah kin mejed ilo kanniek, ak kin mejen buruõd eo ej bedbed ion katak ko ilo Bible. Bareinwõt, emwij ad roñ ainikien Jehovah, jab ikijen juõn enjel, ak ikijen Bible eo, elaptata jen Gospel ko, me rej kamelele ilo juõn wãwen eaibujuij kin katak im jerbal ko an Jesus.

4. (a) Ewi wãwen an Christian ri kabit ro kwalok aibujuij eo an Anij? (b) Ewi wãwen ro rej kejatdikdik ñan mour indio ion lal rej kwalok aibujuij eo an Anij?

⁴ Meñe Ri Christian ro rejjab kwalok aibujuij eo an Anij einwõt meram ej romak jen mejeir, ak turin mejeir ej kwalok air mõnõnõ ñe rej kwalok nan ibben ro jet kin kadkad ko kadkadin Jehovah im karõk ko an. Ikijen ran kein ad, ri kanan Aiseia ear kanan bwe armij ro an Anij “re naj kwalok Aõ aibujuij iolapin dri ailiñ ko.” (Aiseia 66:19) Bareinwõt, ilo 2 Dri Korint 4:1, 2, jej konono: “Inem ke jerbal in ibem . . . , kim ar illok jen men ko retino men in kajok, im jab etetal ilo mon, im jab kariõp nan in Anij; a kin kalikar mol, kim kwalok karkarim ñõn bõklikõt an armij otemjej iman mejen Anij.” Paul ear kamelele kin Christian ri kabit ro me rar “dri jerbal in kalimur ekal.” (2 Dri Korint 3:6) Ak jerbal eo air ear jelet elõñ armij ro me rar bõk kejatdikdik eo ñan mour indio ion lal. Jerbal eo an kumi kein ruo ej kitibuj air kwalok aibujuij eo an Jehovah jab ilo men ko rej katakin armij wõt ak bareinwõt ilo wãwen air mour. Ej juõn ad eddo im jerammõn ñan kwalok aibujuij eo an Anij eo Eutiejtata!

5. Ad mweie kin men ko ilo jitõb ej kamol ta?

⁵ Rainin, jerbal in kwalok gospel eo eaibujuij kin Ailiñ eo an Anij ej walok ibelakin lal, einwõt Jesus ear kanan kake. (Matu 24:14) Armij ro kajjojo jen ailiñ otemjej, bwij ko, armij ro, im lo ko otemjej, rar mõnõnõ im bõk gospel eo im ukwelok im mour ekkar ñan ankil an Anij. (Dri Rom 12:2; Reveles̃õn 7:9) Einwõt Ri Christian ro mokta, rejjab maroñ bõjrak jen air konono kin men ko rar loi im roñjaki. (Jerbal 4:20) Elõñlok jen jiljino million armij ro, jen jabdewõt ien mokta, rej kwalok kin aibujuij eo an Anij rainin. Kwoj juõn iair ke? Mour in Christian eo emweie an armij ro an Anij ej kamol bwe Jehovah ej kajerammõn im kejbãrok ir. Im elap an alikar bwe jitõb eo an Jehovah ej bed ibbed kinke ej jibañ kij jutak nae jitõb ro renana rej bed ibelakid im rebojak ñan tarinaik kij. Kiõ jen lale etke men in ej eindein.

Ro Don Anij Rejamin Bõjrak Air Kwalok Nan

6. Etke jej aikwij kwalok tõmak im beran elañe jekõnan jutak wõt ibben Jehovah?

⁶ Elañe kar jiroñ yuk bwe kwoj aikwij naruin juõn ri kowadoñ ilo imõn ekajet eo. Ak kwo jelã bwe ri kowadoñ eo ewõr juõn an dolul ekajur im nana im enaj kamaat an maroñ ñan kabõjrak yuk jen am konono nae e. Kwoj aikwij beran im liki bwe kien eo an lal enaj kejbãrok yuk jen jorrãn, elañe kwonaj kinaak ri kowadoñ eo. Jej bed ilo ejja wãwen in wõt. Ñe jej kennan kin Jehovah im karõk ko an, jej konono nae Satan Devil eo, im kamol bwe ej juõn ri uror im juõn ri riap eo ej kabiloik aolepen lal. (Jon 8:44; Reveles̃õn 12:9) Ñan am maroñ jutak wõt ibben Jehovah im jumae Devil eo kwoj aikwij kwalok am tõmak im beran.

7. Ewi kajurin kareelel eo an Satan, im ta eo ej kajeoñ in kõmmane?

⁷ Emol, Jehovah ej Eo Eutiejtata. Ej kajurlok jen Satan. Jehovah ewõr an maroñ im ej kijoror in kejbãrok kij ñe jej karejar ñan e ilo tiljek. (2 Kronikel 16:9) Mekarta, Satan ej iroij ion dimon ro im ion aolep armij ro rej jenolok jen Anij. (Matu 12:24, 26; Jon 14:30) Kinke kar jolaltak e ñan lal im “elap an illu,” Satan ej jumae ri karejar ro an Jehovah im ej kajerbal lal in ej iroij ion ñan kilek loñin ro rej kwalok nan kin gospel eo. (Reveles̃õn 12:7-9, 12, 17) Ewi wãwen ej kõmman men in? Ilo jilu wãwen ko.

8, 9. Ewi wãwen an Satan kajerbal yokwe eo ejjab jimwe, im etke jej aikwij lukkun lale wõn ro jej kamao ibbeir?

⁸ Juõn wãwen Satan ej kajeoñ in kamad kij ej ikijen inebata ko an mour. Armij ro ilo ran kein eliktata rej arõk money, yokwe ir make, im yokwe men in kamõnõnõ ko. Rejjab yokwe Anij. (2 Timote 3:1-4) Kinke rej mad kin inebata ko an mour, enañin aolep armij rej ‘jab jelã’ kin gospel eo ri kwalok ro rej bõklok ñan ir. Ejelok air itoklimo in katak kin mol eo. (Matu 24:37-39) Juõn lemnak rot in ekabobo, im ej kõmman bwe jen mejki ilo jitõb. Elañe jej kaddeklok juõn yokwe kin mweiuk ko ilo kanniek im men in kamõnõnõ ko, yokwe eo ad kin Anij enaj mololok.​—Matu 24:12.

⁹ Kin men in, Ri Christian ro rej aikwij lukkun lale wõn ro rej kamao ibbeir. King Solomon ear je: “Kwon etetal iben ro dri meletlet, inem kwo naj meletlet; a eo ej komao iben ro dri bwebwe, e naj jorran kake.” (Jabõn Kennan Ko 13:20) Jen ‘etetal’ ibben ro rej kwalok aibujuij eo an Anij. Elap an emõn ñan kõmman men in! Ñe jej kobalok ibben ro jeid im jatid ilo kwelok ko ad im ien ko jet, jej bõk rejañ jen yokwe, tõmak, lañliñ, im meletlet eo air. Kamao rot in ej kakajurlok bebe eo ad ñan kijenmij ilo jerbal in kwalok nan.

10. Ilo wãwen et ko Satan ear kajerbal kajirere nae ro rej kwalok aibujuij eo an Anij?

¹⁰ Wãwen eo kein karuo Satan ej kajeoñ in kabõjrak aolep Ri Christian ro jen air kwalok aibujuij eo an Anij ej ikijen kajirere. Jejjab aikwij bwilõñ kin wãwen in ekabwerer. Ilo ien eo Jesus Christ ear kwalok nan ion lal, armij ro rar kajirere kake​—rar kakitõtõiki, im kaploiki. (Mark 5:40; Luk 16:14; 18:32) Armij ro rar bareinwõt kakitõtõik Ri Christian ro mokta. (Jerbal 2:13; 17:32) Ri karejar ro an Jehovah ilo ran kein rej jelmae ejja melejoñ rot in. Ekkar ñan ri jilek Peter, armij ro rar watõk ir “ri kanan wan.” Peter ear kanan bwe, “Ilo ran ko eliktata, eor dri kajirere re naj itok im kajirere, im etetal ilo mõm ko air, im ba, Ej ber ia kalimur eo kin An itok? Bwe, . . . men ko otemjej r’ar berwõt einwõt air ber jen jinoin kõmõnmõn.” (2 Piter 3:3, 4) Rar kajirere kin armij ro an Anij im ba bwe lemnak eo air etolok jen mol eo. Ri kajirere ro rej ba bwe kien ko ilo Bible rejjab jerbal ñan ran kein. Ekkar ñan lemnak an elõñ armij, rej ba bwe ennan eo jej kwaloke ej juõn nan in bwebwe. (1 Dri Korint 1:18, 19) Einwõt Ri Christian ro, jemaroñ jelmae kajirere ilo jikin school, jikin jerbal, im jet ien ibben ro uan family eo ad. Jekdon ta eo enaj walok, jenaj wõnmanlok im kwalok aibujuij eo an Anij ilo ad jerbal in kwalok nan, im jelã einwõt Jesus bwe Nan in Anij ej mol.​—Jon 17:17.

11. Ewi wãwen Satan ear kajerbal matõrtõr ñan kabõjrak Ri Christian ro jen air kwalok nan?

¹¹ Wãwen eo kein kajilu Devil eo ej kajerbale ñan kabõjrak jerbal eo ad ej ikijen jumae ak matõrtõr. Jesus ear ba ñan ri kalor ro an: “Ien eo re naj ketõk kom ñõn iñtan, im re naj mõn kom: im dri ailiñ otemjelok re naj kijirãte kom kin eta.” (Matu 24:9) Emol, einwõt Ri Kennan ro an Jehovah, jej bok matõrtõr ilo elõñ jikin ko ion lal. Jen kememej bwe Jehovah ear kanan bwe enaj wõr kijirãt, ikõtan ro rej karejar ñan Anij im ro rej karejar ñan Satan Devil eo. (Jenesis 3:15) Bareinwõt ñe jej kijenmij iumin melejoñ, jej kamol bwe iroij bõtata eo an Jehovah ejimwe wõt. Ad jelã men in emaroñ kakajur kij ñan kijenmij iumin melejoñ ko relaptata. Ejelok jabdewõt matõrtõr emaroñ kabõjrak ad kwalok nan ñan indio elañe jej kate kij ñan kwalok aibujuij eo an Anij.

12. Etke jej lañliñ ñe jej tiljek wõt iumin matõrtõr eo an Satan?

¹² Kwoj jumae ke kareelel eo an lal im kamol am tiljek meñe kwoj bõk kajirere im jumae? Inem ewõr unin am lañliñ. Jesus ear kallimur ñan ro renaj lor e: “Emõnõnõ kom ñe armij re naj kajirere kake kom, im matõrtõr kom, im naj ba nan ko renana otemjej nae kom, riõp wõt, kin Ña. Komin lõñliñ, im kanuij buñburuemi; bwe elap jinekjij ñõn kom i lõñ: bwe ein drein air matõrtõr dri kanan ro mokta jen kom.” (Matu 5:11, 12) Am kijenmij ej kamol bwe jitõb kwojarjar eo an Jehovah ej bed iom, im ej kakajur yuk ñan kwalok aibujuij eo an.​—2 Dri Korint 12:9.

Kijenmij Ej Itok Jen Jehovah

13. Ta un eo eaorõk unin ad kijenmij ilo jerbal in kwalok nan?

¹³ Un eo eaorõk unin ad kijenmij wõt ilo jerbal in kwalok nan ej bwe jej yokwe Jehovah im lo mõnõnõ ilo ad kwalok aibujuij eo an. Armij ro rej anõk ro rej yokwe im kautieje, im ejelok bar juõn elaplok jen Jehovah Anij rekõnan anõke. Kinke elap an yokwe armij, ear jilkintok Nejin ñan lal bwe en kennan kin mol eo im wiaik armij ro rekiblie. (Jon 3:16; 18:37) Einwõt Anij, je kõnan bwe armij ro jen wãwen ko otemjej ren ukwelok im bõk lomor; eñin unin jej kwalok nan ñan ir. (2 Piter 3:9) Kõnan in, ekoba bebe eo ad ñan kajeoñe Anij, rej kamakit kij bwe jen kate wõt im kwalok aibujuij eo an ilo jerbal in kwalok nan eo ad.

14. Ewi wãwen Jehovah ej kakajur kij ñan kijenmij ilo jerbal in kwalok nan?

¹⁴ Bõtab, ilo jemlokin, kajur eo ad ñan kijenmij ilo jerbal in kwalok nan ej itok jen Jehovah. Ej kakajur kij ikijen jitõb eo an, dolul eo an, im Bible eo. Jehovah ej letok “kijenmij” ñan aolep ro rej mõnõnõ in kwalok aibujuij eo an. Ej uaki jar ko ad im kameletlet kij bwe jen kijenmij iumin melejoñ ko. (Dri Rom 15:5; Jemes 1:5) Bareinwõt, Jehovah ejamin kõtlok bwe jen bed ilo melejoñ eo jejjab maroñ anjo ion. Elañe jej liki Jehovah, enaj kabellok juõn ial bwe jen wõnmanlok im kwalok aibujuij eo an.​—1 Dri Korint 10:13.

15. Ta eo ej jibañ kij ñan kijenmij?

¹⁵ Kijenmij ilo jerbal in kwalok nan ej kamol bwe jitõbõn Anij ej bed ibbed. Ñan wanjoñok: Bõlen juõn armij ear kajitõk bwe kwon leto-letak juõn kain bilawa jen em ñan em, im ejelok wõnãn. Ej jiroñ yuk bwe kwoj aikwij kajerbal money im awa ko am make ñan kõmman jerbal in. Bareinwõt, ejjabto tokelik kwoj lo bwe eiet armij rekõnan bõk bilawa eo am; jet iair rej jumae am leto-letak. Kwoj lemnak ke bwe kwonaj wõnmanlok ilo jerbal eo am jen alliñ ñan alliñ, im yiõ ñan yiõ? Bõlen jaab. Ak, bõlen kwar kajerbal ien im money ko am make ñan kwalok kin news eo emõn iumin elõñ yiõ. Etke? Kinke kwar yokwe Jehovah im ikijen jitõb eo an ear kajerammõn jibadbad ko am ilo an jibañ yuk ñan kijenmij? Aet!

Juõn Jerbal Jej Aikwij Kememeje

16. Kijenmij ilo jerbal eo ad ej melelen ta ñan kij im ñan ro rej roñjake kij?

¹⁶ Aolep jerbal ko rej ekkejel ion bujen eo ekãl rej juõn men in letok eo ejejuan. (2 Dri Korint 4:7) Ilo ejja wãwen in wõt, jerbal eo ro rej mõttan kumi in sheep ro jet rej kõmmane ibelakin lal ej juõn men in letok eo eaorõk. Ñe kwoj kijenmij wõt ilo jerbal in kwalok nan eo am, kwomaroñ “lomoren yuk, kab ro rej roñjake yuk,” einwõt Paul ear jeje kake ñan Timote. (1 Timote 4:16) Kwon lemnak kin ta melelen men in. News eo emõn kwoj kwalok kake ñan ro jet ej kabellok juõn ien emõn ñan air bõk mour indio. Kwomaroñ ejaake juõn jimjera ebak ibben armij ro kwoj jibañ ir ñan kakajurlok air tõmak. Kwonaj lukkun mõnõnõ ñe kwoj mour indio ilo Paradise ibben armij ro kwar jibañ ir katak kin Anij! Emol bwe rejamin meloklok jibadbad ko kwar kõmmani ñan jibañ ir. Men in ej juõn men ekamõnõnõ!

17. Etke ran kein ad ej juõn ien ejejuan ilo aolepen bwebwenato eo an armij?

¹⁷ Kwoj mour ilo juõn ien ejejuan ilo aolepen bwebwenato eo an armij. Jejamin bar kwalok nan kin news eo emõn ibwiljin juõn lal ejenolok jen Anij. Noah ear mour ilo lal rot in, im ear loe an jako. Ealikar bwe ear lukkun lañliñ ke ear kõmanman ankil an Anij ilo tiljek ñan kalek juõn wa, eo ear lomoren e im family eo an! (Dri Hibru 11:7) Kwe bareinwõt kwomaroñ kõmman eindein. Kalmenlokjen kin ewi naj wãwen lemnak eo am ñe kwoj bed ilo lal eo ekãl im lemnak kin aolep jerbal ko kwar kõmmani ilo ran ko eliktata, im jelã bwe kwar kamaat am maroñ ñan kalaplok men ko an Ailiñ eo an Anij.

18. Ta eo Jehovah ej kallimuri im rejañ ri karejar ro an kake?

¹⁸ Inem, jen kwalok wõt aibujuij eo an Anij. Jejamin meloklok ñan indio bwe jaar kõmman men in. Bareinwõt Jehovah ej kememej jerbal ko ad. Bible eo ej letok nan in rejañ in: “Bwe Anij e wãnik wõt, im E jamin meloklok ami jerbal im yokwe, eo kom ar kwalok kin etan, kin ami jibõñ ro remõn mokta im kiõ. A kim kõnan bwe komin otemjej niknikemi wõt juõn ñõn obrõk in kejatrikrik, aet, ñõn jemlokõn: Bwe komin jab jowõn, a komin dri kajeoñwe ro rej bõk air jokit men in kalimur ko, kin tõmak im kijenmij.”​—Dri Hibru 6:10-12.

Kwomaroñ Ke Kamelele?

• Ewi wãwen an Ri Christian ro kwalok aibujuij eo an Anij?

• Ta jet ian wãwen ko Satan ej kajerbali ñan kabõjrak armij ro an Anij jen air kwalok nan?

• Ta eo ej kamol bwe jitõbõn Anij ej bed ibbed?

[Pija eo ilo peij 5]

Turin mejen Moses ear romak aibujuij eo an Anij

[Pija ko ilo peij 6]

Jej romak aibujuij eo an Anij ilo jerbal in kwalok nan eo ad