Ri Christian Ro Rej Kwalok Aibujuij Eo An Jehovah

“A emõnõnõ mejemi, bwe rej lo; im lojiliñemi, bwe rej roñ.”​—MATU 13:16.

1. Ta kajitõk eo jej lemnak kake kin ta eo Ri Israel ro rar kõmmane ke rar lo Moses iturin Tol Sinai?

RI ISRAEL ro iturin Tol Sinai ear wõr un ko remõn ñan air ruaklok ñan Jehovah. Emol, ear kanemkwoj ir jen Egypt. Ke rar bed ilo ene jemaden, ear kabwe aikwij ko air ilo an lelok kijeir im limiir. Tokelik, ear jibañ ir bwe ren bõk anjo ion jar in tarinae eo an Amalek. (Exodus 14:26-31; 16:2–17:13) Ke rar jokwe ilo em nuknuk ko air ilo ene jemaden iturin Tol SinaiSinai, rar lukkun mijak im wũdiddid kin an jorur im jarom. Tokelik, rar lo an Moses wanlaltak jen Tol Sinai, im turin mejen ear kwalok aibujuij eo an Jehovah. Ak, jen air mõnõnõ im kamolol, rar jenliklik. Rar “lelñoñ in kebak ñõn [Moses].” (Exodus 19:10-​19; 34:30) Etke rar mijak in lo aibujuij eo an Jehovah, eo ear lukkun jibañ ir?

2. Etke Ri Israel ro rar lelñoñ ke rar lo aibujuij eo an Anij romak jen turin mejen Moses?

² Emaroñ unin an Ri Israel ro kar lelñoñ ilo ien in ej ikijen juõn men ear walok mokta. Kin air jab bokake Jehovah im jek juõn ekjap in kon in cow gold, ear kajeik ir. (Exodus 32:4, 35) Rar katak ke jen kaje eo rar bõk jen Jehovah im kamolol kake? Jaab, enañin aolepeir rar jab. Ilo jemlokin mour eo an, Moses ear kakememej Ri Israel ro kin ien eo rar jek juõn ekjap in kon in cow gold im kin men ko jet rekiblia rar kõmmani. Ear ba ñan armij ro: “Kom ar kabata nae kien Jeova ami Anij, im kom ar jab tõmak E, im jab eoroñ ainiken. Kom ar dri kabata nae Jeova jen ran eo I ar jela kom.”​—Duteronomi 9:15-24.

3. Ta eo Moses ear kõmmane ke ear kalibubuik turin mejen?

³ Lemnak kin ta eo Moses ear kõmmane ke Ri Israel ro rar lelñoñ. Bwebwenato eo ej ba: “Im ke Moses e ar kamwijlok an konono ibeir, e ar likit veil ion turin mejen. A ke Moses e ar dreloñlok ilo imõn Jeova, bwe en konono iben, e ar wutik veil eo, mae ien e ar drioijtok; im e ar drioijtok im konono ñõn ro nejin Israel men ko emwij jiroñ e. Im ro nejin Israel rar lo turin mejen Moses, bwe e jatõltil kilin turin mejen; im Moses e ar bar likit veil ion turin mejen, mae ien an dreloñ in konono iben.” (Exodus 34:33-35) Etke Moses ear kalibubuik turin mejen? Ta eo jemaroñ katak jen men in? Uak ko ñan kajitõk kein remaroñ jibañ kij ñan lemnak kin kõtan eo ad ibben Jehovah.

Ien ko Remõn Rar jab Bõki

4. Ta eo ri jilek Paul ear kwalok kin unin an Moses kajerbal veil eo?

⁴ Ri jilek Paul ear kamelele bwe wãwen lemnak im buruen Ri Israel ro ear kõmman an Moses aikwij kajerbal veil eo. Paul ear je: “Ro nejin Israel r’ar jab maroñ in kalimjek mejen Moses kin an aibujuij turin mejen ... A burueir r’ar bin.” (2 Dri Korint 3:7, 14) Ej juõn wãwen ekaburomõjmõj! Ri Israel ro rar armij ro me Jehovah ear kãlet ir, im ear kõnan bwe ren ruaklok ñan e. (Exodus 19:4-6) Ak, rar makoko in kalimjek aibujuij eo an Anij. Inem burueir im lemnak ko air rar ellok jen Jehovah im rar jab yokwe e.

5, 6. (a) Ri Israel ro ilo ran ko an Moses rar einwõt wõn ro ilo ebeben eo kein kajuõn? (b) Ta oktak eo ear walok ikõtan ro rar roñjake Jesus im ro rar jab roñjake?

⁵ Ilo men in, jej lo juõn men einlok wõt in ear walok ilo ebeben eo kein kajuõn C.E. Ke Paul ear oktak im juõn Ri Christian, Jesus Christ, Moses eo Elaplok, ear kilajrak bwe bujen eo ekãl en bõk jikin bujen Kien eo. Ilo nan im jerbal, Jesus ear kwalok aibujuij eo an Jehovah ilo juõn wãwen ewãppen. Paul ear je kin Jesus eo emwij an kar jerkakbiji: “Ej romak kin meram in aibuijuij an Anij; ej lukkun einwõt Anij ilo men otemjej.” (Dri Hibru 1:3) Ear juõn ien elap an emõn ñan Ri Jew ro! Rar maroñ roñjake nan ko rej lelok mour indio jen Nejin Anij! Ekaburomõj bwe, enañin aolep armij ro me Jesus ear kwalok nan ibbeir rar jab roñjake. Kin ir, Jesus ear elij nan in kanan eo Jehovah ear kwalok ñan Isaiah: “Bwe buruen armij rein re benawia, im lojiliñir rej roñjamõn, im mejeir re kilik; elañe jab einwõt, jet ien re naj lo kin mejeir, im roñjake kin lojiliñir, im naj jela kin burueir, im naj oktõk, im I naj kemour ir.”​—Matu 13:15; Aiseia 6:9, 10.

⁶ Ewõr juõn oktak ealikar ikõtan Ri Jew rein im ri kalor ro an Jesus, ro me Jesus ear konono kake: “A emõnõnõ mejemi, bwe rej lo; im lojiliñemi, bwe rej roñ.” (Matu 13:16) Ri Christian ro remol relukkun kõnan jelã kin Jehovah im karejar ñan e. Rej mõnõnõ in kõmanman ankil an, ekkar ñan ta eo Bible ej ba. Im Christian ri kabit ro rej kwalok aibujuij eo an Jehovah ilo air jerbal kin bujen eo ekãl, im ro rej mõttan kumi in s̃ip ro jet rej bareinwõt kõmman eindein.​—2 Dri Korint 3:6, 18.

Etke News Eo Emõn Ear Nojak

7. Etke jejjab bwilõñ kin an lõñ armij rej karmijeteik news eo emõn?

⁷ Einwõt emwij ad loe, ilo ran ko an Jesus im Moses, enañin aolep Ri Israel ro rar karmijeteik juõn ien ejejuan ñan bõk news eo emõn. Ej einlok wõt ilo ran kein ad. Enañin aolep armij rej karmijeteik news eo emõn jej kwaloke. Jejjab bwilõñ kin men in. Paul ear jei: “A elañe e binjõk am gospel, e binjõk ñõn ro re joko. Ilo ir anij in lõl in e ar kabilo lemnok an ro re jab tõmak, bwe maram in gospel in aibujuij an Kraist, eo wãwen Anij, en jab rome ir.” (2 Dri Korint 4:3, 4) Kobalok ibben jibadbad ko an Satan ñan binej news eo emõn jen armij, elõñ armij rej kabiloik ir make kinke rejjab kõnan lo mol eo.

8. Ewi wãwen jajelokjen ej kabiloik elõñ armij, im ewi wãwen ad maroñ kejbãrok bwe en jab jelet kij?

⁸ Jajelokjen ej kabiloik elõñ armij jen air lo mol eo. Bible eo ej konono bwe ri ailiñ ko rej “emarok ilo air lolãtãt, im rej drua maijet jen mour an Anij, kin jaje eo ilo ir, kin an bin burueir.” (Dri Epesõs 4:18) Mokta jen an kar erom juõn Christian, Paul, eo ear lukkun jelã kin Kien eo, joñan an kar bilo ilo jitõb kin jajelokjen eo an ear matõrtõre congregation eo an Anij. (1 Dri Korint 15:9) Ak, Jehovah ear kwalok mol eo ñan e. Paul ear kamelele: “A kin men in, Anij e ar tiriamokake iõ, bwe Kraist Jisõs en kwalok ilo ña mokta meanwõr otemjej, kin joñok ñõn ro re naj liki E tokelik ñõn mour in drio.” (1 Timote 1:16) Einwõt Paul, elõñ ian ro rar jumae mol eo an Anij mokta ak kiõ rej karejar ñan e. Eñin unin jekõnan wõnmanlok im kwalok nan ñan ro rej jumae kij. Inem jej aikwij keini in katak Nan in Anij im melele kake kiõ, im enaj kejbãrok kij jen ad jerbal ilo jajelokjen im kaillu Jehovah.

9, 10. (a) Ewi wãwen Ri Jew ro ilo ebeben eo kein kajuõn rar kwalok bwe rej jab kõnan katak im rar binwõt ilo lemnak ko air make? (b) Ewõr ke juõn wãwen einlok wõt ilo kabuñ ko rewan rainin? Kamelele.

⁹ Ñan elõñ armij, lolokjen eo air ilo jitõb emaroñ binjak kinke rejjab kõnan katak im ebin burueir. Elõñ Ri Jew ro rar karmijeteik Jesus im katak ko an kinke rar kõnan bedwõt iumin Kien ko Moses ear bõki. Emol, jet ien ear wõr armij ro rar roñjake. Ñan wanjoñok, elikin an kar Jesus jerkakbiji, “elap jaran pris ro rej bokake tõmak eo.” (Jerbal 6:7) Mekarta, ikijen Ri Jew ro, Paul ear je: “A ñõn ran in, jabrewõt ien rej konono jeje an Moses, veil ej ber ion burueir.” (2 Dri Korint 3:15) Paul ear jelã kin ta eo Jesus ear ba mokta ñan ri tel in kabuñ ro an Ri Jew ro: “Komij bukot ilo Jeje ko, bwe ilo ir komij lemnok ami mour in drio; im kein rej kennan kin Iõ.” (Jon 5:39) Jeje ko an Anij me rar lukkun etali renaj kar jibañ ir bwe ren kile bwe Jesus ej Messiah eo. Bõtab, Ri Jew ro rar bõk lemnak ko air make, im meñe Nejin Anij ear kõmman men in bwilõñ ko men kein rar jab karel burueir.

¹⁰ Ej eindein ilo elõñ kabuñ ko rewan rainin. Einwõt Ri Jew ro ilo ebeben eo kein kajuõn, “bwe eor kijejeto ñõn Anij ibeir, a e jab ekar ñõn jela.” (Dri Rom 10:2) Meñe jet armij rej katak kin Bible eo, rejjab tõmak kin ta eo ej ba. Rejjab kõnan tõmak bwe Jehovah ej katakin armij ro an ikijen ri karejar eo etiljek im meletlet in ri kabit ro an Christian. (Matu 24:45) Bõtab, jej melele bwe Jehovah ej katakin armij ro an im bwe melele eo kin mol eo an Anij ej alikarlok wõt. (Jabõn Kennan Ko 4:18) Ñe jej kõtlok bwe Jehovah en katakin kij, jenaj bõk jelãlokjen kin karõk im ankil an.

11. Ewi wãwen tõmak kin men ko rekõnan rej binej mol eo?

¹¹ Armij ro jet rej bilo kinke rej tõmak kin men ko rekõnan. Kar kanan bwe jet armij renaj kajirere kake armij ro an Anij im ennan eo rej kwalok kake kin bed eo an Jesus. Ri jilek Peter ear je: “Bwe rej kõnan meloklok men in,” bwe Anij ear bõktok juõn ibwijleplep ion lal ilo ran ko an Noah. (2 Piter 3:3-6) Ilo ejja wãwen in lok wõt, elõñ armij ro me rej ba rej Ri Christian rej kamol bwe Jehovah ej kwalok tiriamo, joij, im jeorlok bwid; ak rej kajekdon ak karmijeteik mol eo bwe ej kajeik wõt ir kin bwid ko air. (Exodus 34:6, 7) Ri Christian ro remol rej kate ir ñan melele kin ta eo Bible ej katakin.

12. Ewi wãwen manit ko an lal rar kabiloik armij ro?

¹² Manit ko an ailiñ eo rej kabiloik elõñ ri kabuñ ro. Jesus ear ba ñan ri tel in kabuñ ko ilo ran ko an: “Kom ar kejekron kien Anij kin ami bwebwenato.” (Matu 15:6) Ilo kijejeto Ri Jew ro rar bar kajutak kabuñ eo emol elikin air jeblak jen Babylon, ak priest ro rar utiej burueir im kowãnik ir make. Rar baj kõmman wõt kwojkwoj ko ilo kabuñ ko air, ak burueir ear etolok jen Anij. (Malachi 1:6-8) Ilo ran ko an Jesus, Scribe im Pharisee ro rar kãreik elõñ manit ko ibben Kien Moses. Jesus ear kajedmatmate maan rein einwõt ri jelã mon, kinke rar kabiloik ir make jen kien ko rewãnik me Kien eo ear wawa ion. (Matu 23:23, 24) Ri Christian ro remol rej aikwij lale bwe manit ko an kabuñ ko an lal ren jab kamad ir jen kabuñ eo erreo.

“Lo Eo Re Ban Lo E”

13. Ilo wãwen et ko ruo Moses ear lo aibujuij eo an Anij?

¹³ Moses ear kajitõk elañe emaroñ lo aibujuij eo an Anij ion tol eo, im ear lo meram eo ear walok elikin an aibujuij eo an Jehovah ellã jen e. Ke ear deloñ iloan imõn kabbed eo, ear jab kajerbal veil eo. Moses ear lukkun kajur ilo tõmak im ear kõnan kõmanman ankil an Anij. Meñe ear lo jidik in aibujuij eo an Jehovah ilo vision, ilo bar juõn wãwen emwij an kar lo Anij kin mejen buruen. Bible eo ej ba bwe Moses ear “kijenmij einwõt an lo Eo re ban lo E.” (Dri Hibru 11:27; Exodus 34:5-7) Im ear kwalok aibujuij eo an Anij jab ilo ien eo wõt ke meram ear romaklok jen mejen ak ilo an kate wõt im jibañ Ri Israel ro bwe ren jelã kin Jehovah im karejar ñan e.

14. Ewi wãwen Jesus ear lo aibujuij eo an Anij, im ta eo ear mõnõnõ in kõmmane?

¹⁴  Jesus ear lo aibujuij eo an Anij kin mejen ke ear bed ilo lañ elõñ buki yiõ ko lok iman mokta jen kõmanman lañ im lal. (Jabõn Kennan Ko 8:22, 30) Ilo ien eo, Jesus im Jehovah Anij rar ejaak juõn kõtan ebak ñan don. Jehovah Anij ear lukkun kwalok yokwe ñan Nejin eo ear men in kõmanman eo an moktata. Jesus ear bareinwõt kwalok yokwe eo emũlal ñan Anij, eo ear lelok mour ñan e. (Jon 14:31; 17:24) Ear wõr juõn yokwe ewãppen ikõtan Jemen im Nejin. Einwõt Moses, Jesus ear mõnõnõ in kwalok aibujuij eo an Jehovah ilo men ko ear katakin kake.

15. Ilo wãwen et eo Ri Christian ro rej kalmenlokjen kin aibujuij eo an Anij?

¹⁵ Einwõt Moses im Jesus, ri Kennan ro an Anij ilo ran kein rej kijoror in kalmenlokjen kin aibujuij eo an Jehovah. Rar jab karmijeteik news eo emõn eaibujuij. Ri jilek Paul ear je: “Ijoke ñe ej oktõk ñõn Iroij, veil eo ej joko.” (2 Dri Korint 3:16) Jej katak Bible eo kinke jekõnan kõmanman ankil an Anij. Jej mõnõnõ in lo aibujuij eo an Anij ilo turin mejen Jesus Christ, Nejin, eo Jehovah ear kãlete bwe en King, im jekõnan kajeoñe joñok eo an. Einwõt Moses im Jesus, emwij ad bõk juõn jerbal emõn ñan katakin ro jet kin Anij eo jej kabuñ ñan e.

16. Etke ej juõn jerammõn ñan jelã kin mol eo?

¹⁶ Jesus ear jar: “Ij kamolol Yuk O Jema, . . . bwe Kw’ar noj men kein jen ro dri meletlet im dri jelalokjen, im Kw’ar kwaloki ñõn niñniñ rõn.” (Matu 11:25) Jehovah ej lelok melele kin karõk ko an im kadkad ko kadkadin ñan ro emol burueir. (1 Dri Korint 1:26-28) Ej kejbãrok im katakin kij​—ñan bõk tokjen ko remõntata ilo mour. Jen bõk ien ko remõn ñan ruaklok ñan Jehovah, im kamolol e kin men in letok ko an ñan ad jelã kajjen im bed ebak ñan e.

17. Ewi wãwen jemaroñ kalaplok ad jelã kin kadkad ko kadkadin Jehovah?

¹⁷ Paul ear jejelok ñan Christian ri kabit ro: “A kij otemjej, ejelok veil iman mejer, jej kalimjek, einwõt ilo kapjur, aibujuij an Iroij, im jej kejakilkil ñõn wãwen eo jen aibujuij ñõn aibujuij.” (2 Dri Korint 3:18) Jekdon elañe kejatdikdik eo ad ej ñan mour ilañ ak ion lal, ñe jej kalaplok ad jelã kin Jehovah​—kadkad ko an ekkar ñan Bible eo​—elaplok ad naj einwõt e. Elañe jej kalmenlokjen ilo kamolol kin mour, jerbal, im katak ko an Jesus Christ, jenaj kalaplok wãwen ad kwalok kadkad ko kadkadin Jehovah. Ej kamõnõnõik kij ñan jelã bwe jej bõktok nebar ñan Anij eo ad, im jekõnan kwalok wõt kin aibujuij eo an!

Kwoj Kememej Ke?

• Etke Ri Israel ro rar jab kõnan lo aibujuij eo an Anij me Moses ear kwaloke?

• Ilo wãwen et ko news eo emõn ear “binjõk” ilo ebeben eo kein kajuõn? im ilo ran kein ad?

• Ewi wãwen ad kwalok aibujuij eo an Anij?

[Pija eo ilo peij 9]

Ri Israel ro rar jab maroñ kalimjek turin mejen Moses

[Pija ko ilo peij 11]

Einwõt Paul, elõñ ro rar jumae mol eo an Anij mokta rej karejar ñan E kiõ

[Pija eo ilo peij 13]

Ri karejar ro an Jehovah rej mõnõnõ in kwalok aibujuij eo an Anij