Yokwe Ej Kakajur Beran

“Bwe Anij e ar jab letok ñõn kij jitõb in lelñoñ, a jitõb in kajur im yokwe im kajime.”​—2 TIMOTE 1:⁠7.

1, 2. (a) Yokwe emaroñ kamakit juõn armij bwe en kõmman ta? (b) Etke beran eo an Jesus ear einjuõn?

RUO ri belele ro me rej kab mare rar tulok ilo juõn jikin ebak ñan juõn bukwon ej bed iturear in Australia. Ke rar walokliñtak juõn bako ear kũple kõrã eo. Ilo beran, leo ear iunlok lio belen jen bako eo im kõtlok bwe bako eo en kij e. “Ear lelok mour eo an kin iõ,” kõrã eo ear ba ilo ien ilomij eo.

² Aet, yokwe emaroñ kamakit armij ro ñan air kwalok elap beran. Jesus Christ make ear ba: “Ejelok yokwe iben armij elap jen yokwe in, bwe armij en lelok an mour kin ro jeran.” (Jon 15:​13) Ediklok jen 24 awa ko elikin an Jesus ba nan kein, ear lelok mour eo an make, jab kin juõn wõt armij, ak kin armij otemjej. (Matu 20:​28) Bareinwõt, Jesus ear jab lelok mour eo an ilo jidimkij im ilo juõn emmakit eberan. Ear jelã lok iman bwe armij ro renaj kar kajirere kake im lej ñan e, ekajete ilo jab jimwe, im mõn e ñan mij ion juõn alal in eñtan. Ear bareinwõt keboj ri kalor ro an kin men in, ilo an ba: “Lo, jej wõnliñlok ñõn Jerusalem: im naj ketõk Nejin armij ñõn pris relap, im ñõn skraib ro; im re naj liakelok E ñõn mij, im re naj ketõk E ñõn ro dri ailiñ ko; Im re naj kajirere kake, im naj iyelok E, im naj dreñlok E, im naj mõn E.”​—Mark 10:​33, 34.

3. Ta eo ear kõmman bwe en lap an Jesus beran?

³ Ta eo ear kõmman bwe en lap an Jesus beran? Tõmak im mijak Anij ear lap an jibañ. (Dri Hibru 5:7; 12:⁠2) Bõtab, ilõñin men otemjej, beran eo an Jesus ear walok jen yokwe eo an, ñan Anij im armij jimor. (1 Jon 3:​16) Ijellokin tõmak im mijak Anij, elañe jej kaddeklok yokwe rot in, kij bareinwõt jenaj maroñ kwalok beran einwõt kar Christ. (Dri Epesõs 5:⁠2) Ewi wãwen jemaroñ kaddeklok yokwe rot in? Jej aikwij kile Unjen yokwe eo.

“Yokwe E Jen Anij”

4. Etke jemaroñ ba bwe Jehovah ej Unjen yokwe?

⁴ Jehovah ej jimor joñok eo emõntata im Unjen yokwe. “Kom, ro jitenburu,” ri jilek John ear je, “jen yokwe dron: bwe yokwe e jen Anij; im ro otemjej rej yokwe, emwij keutak ir jen Anij, im re jela Anij. Eo e jab yokwe e jab jela Anij; bwe Anij yokwe.” (1 Jon 4:​7, 8) Inem, yokwe ekwojarjar emaroñ ejaak wõt ñe juõn armij ej ruaklok ñan Jehovah ikijen an bõk jelãlokjen eo ejimwe im jerbale ilo an mour.​—Dri Pilippai 1:9; Jemes 4:8; 1 Jon 5:⁠3.

5, 6. Ta eo ear jibañ ri kalor ro an Jesus jinoin ñan air kaddek ejja yokwe eo wõt Christ ear kwalok?

⁵ Ilo jar eo an eliktata ibben ri jilek ro an retiljek 11, Jesus ear kwalok kõtan eo ikõtan jelã Anij im eddeklok ilo yokwe, ilo an ba: “Im I ar kwalok etõm ñõn ir, im I naj kwalok e; bwe yokwe eo, Kw’ar yokwe Iõ kake, en ber ilo ir, im Ña ilo ir.” (Jon 17:​26) Jesus ear jibañ ri kalor ro an ñan air kaddeklok yokwe rot eo ear bed ikõtan im Jemen, ilo an kwalok ikijen nan im joñok jimor kin ta eo etan Anij ej jutak ikijen​—kadkad ko remõn kadkadin Anij. Kin men in, Jesus ear maroñ ba: “Eo e ar lo Ña, e ar lo Jema.”​—Jon 14:​9, 10; 17:⁠8.

⁶ Yokwe rot eo Christ ear kwalok ej walok ikijen jitõb kwojarjar an Anij. (Dri Galetia 5:​22) Ke Ri Christian ro jinoin rar bõk jitõb kwojarjar eo kar kallimur kake ilo Pentecost 33 C.E., rar jab kememej wõt kin men ko me Jesus ear katakin ir kaki ak ear bareinwõt laplok air melele kin Jeje ko ilo Bible eo. Alikar bwe melele in emũlallok ear kakajurlok yokwe eo air ñan Anij. (Jon 14:26; 15:​26) Ta tokjen eo ear walok jen men in? Meñe mour eo air ear bed ilo kauwatata, rar kwalok kin news eo emõn ilo beran im kijejeto.​—Jerbal 5:​28, 29.

Kwalok Beran im Yokwe

7. Ta eo Paul im Barnebas rar aikwij kijenmij kake ilo trip in missionary eo airro?

⁷ Ri jilek Paul ear je: “Bwe Anij e ar jab letok ñõn kij jitõb in lelñoñ, a jitõb in kajur im yokwe im kajime.” (2 Timote 1:⁠7) Paul ear konono jen iminene eo an make. Lemnak kin ta eo erro Barnabas ar iione ilo trip in missionary eo airro. Rar kwalok nan ilo elõñ jikin kwelok ko, ekoba Antioch, Iconium, im Lystra. Ilo kajjojo jikin kwelok kein, jet armij rar oktak im ri tõmak, ak ro jet rar erom ri jumae ro relej. (Jerbal 13:​2, 14, 45, 50; 14:​1, 5) Ilo Lystra juõn jar in ri jumae me rar lukkun illu rar kade Paul, im illok jen e kinke rar lemnak emij! “A ke dri kalor rej jutõk im kabol e, ej jerkak im dreloñ iloan jikin kwelok eo. Im ke ilju e kab Barnebas rejro ilok ñõn Derbe.”​—Jerbal 14:​6, 19, 20.

8. Ewi wãwen beran eo an Paul im Barnabas ear kalikar yokwe eo air emũlal kin armij ro?

⁸ Ien in ekauwatata ke rar kajeoñ in mõn Paul ear kamijak ke erro Barnabas ñan air ebwer im bõjrak jen air kwalok nan? Jaab! Elikin air “kõmõn bwe elõñ dri kalor” ilo Derbe, lõmarein ruo rar “bar jeblak ñõn Listra, im Aikoniõm, im Antiok.” Etke? Bwe ren rejañ ro rekãl ñan air kajur wõt ilo tõmak. Jej aikwij “dreloñ ilo ailiñ in Anij kin elõñ iñtan,” Paul im Barnabas rar ba. Alikar bwe, beran eo air ear walok jen yokwe eo air emũlal kin “s̃ip” ro an Christ. (Jerbal 14:​21-23; Jon 21:​15-17) Elikin air likit elder ro ilo kajjojo congregation ko rekãl, lõmarein ruo rar jar im “lelok ir ñõn Iroij, eo re kar liki E.”

9. Ilo wãwen et eo elder ro jen Ephesus rar emmakit ñan yokwe eo Paul ear kwalok kin ir?

⁹ Kinke Paul ear juõn armij ear lukkun yokwe im beran, elõñ Ri Christian ro jinoin rar lukkun yokwe e. Kememej ta eo ear walok ilo juõn kwelok me Paul ear kõmmane ibben elder ro jen Ephesus, ijo ear jerbal ie iumin jilu yiõ ko im iion elõñ jumae. (Jerbal 20:​17-31) Elikin an rejañ ir ñan shepherde bwij eo an Anij kar likit ilo peiir, Paul ear bukwelõlõ ibbeir im jar. Inem, “ir otemjej elap air jõñ, im buñ ion kenwan Paul, im mejenmaike. Im tiriamo elap jen men otemjej kin nan ko e ar konono, bwe re jamin bar lo mejen.” Elap an lõmarein jein im jatin Paul yokwe e! Emol, ke ear ien air etal, Paul im ri ito-itak ro mõttan rar aikwij kate bwe ren ‘ilok jen ir,’ kinke elder ro rar abwin kõtlok ir.​—Jerbal 20:36–21:⁠1.

10. Ewi wãwen Ri Kennan ro an Jehovah ilo ran kein rar kwalok air yokwe kin don ilo beran?

¹⁰ Rainin, elap ad yokwe overseer ro rej ito-itak, elder ro ilo congregation eo, im elõñ ro jet kin beran eo rej kwalok kin sheep ro an Jehovah. Ñan wanjoñok, ilo ailiñ ko rejorrãn kin tarinae ak ijo emwij an kien eo kemo jerbal in kwalok nan eo ad, overseer ro rej ito-itak im limaro beleir rar mõnõnõ in likit mour im anemkwoj eo air ilo kauwatata bwe ren maroñ lolok congregation ko. Bareinwõt, iroij ro relej im ri jibañ ro air rar mõn elõñ Ri Kennan ro kinke rar jab kwalok kajjen Ri Kennan ro mõttair im kwalok ia eo rar bõk ekan ko lor jitõb jen e. Elõñ thousand ro jet rar bõk matõrtõr, eñtan, im mij kinke rar jab bõjrak jen air kwalok kin news eo emõn ak kamao ibben ri tõmak ro mõttair ilo kwelok ko an Christian. (Jerbal 5:​28, 29; Dri Hibru 10:​24, 25) Jej aikwij kajeoñe tõmak im yokwe eo an rein jeid im jatid maan im kõrã reberan!​—1 Dri Tessalonika 1:⁠6.

En Jab Mololok Yokwe eo Am

11. Ilo wãwen et ko Satan ej tarinaik ri karejar ro an Jehovah ilo juõn tarinae ilo jitõb, im ta eo rej aikwij kõmmane?

¹¹ Ke kar jolaltak Satan, ear beek ilo buruen ñan kwalok an illu nae ri karejar ro an Jehovah kinke rar “kejbãrok kien ko an Anij, im kennan an Jisõs ibeir.” (Reveles̃õn 12:​9, 17) Juõn ian kõl ko Satan ej kajerbale ej matõrtõr. Bõtab, kõl in emakijkij an jab wõr tõbrakin kinke ekkã an armij ro an Anij ebake lok don ilo yokwe im ej kamakit ir bwe en laplok air kijejeto. Bar juõn kõl Satan ej kajerbale ej ikijen jab wãppen ko an armij. Eoktak beran eo jej aikwiji ñan jumae kõl in kinke tarinae eo ej nae kõnan ko ad make, mõm ko ilo ‘buruõd ejelã mon.’​—Jeremiah 17:9; Jemes 1:​14, 15.

12. Ewi wãwen an Satan kajerbal “jitõb õn lõl” ñan kajeoñ in kamõjnolok yokwe eo ad ñan Anij?

¹² Bar juõn kein tarinae elap Satan ej kajerbale ej​—“jitõb õn lõl,” melelen kõnan eo an ekajur, me ej nae jitõb kwojarjar an Anij. (1 Dri Korint 2:​12) Jitõb in lal in ej kowõnmanlok kibbon im arõk mweiuk​—eo ej “mõm an mej ko.” (1 Jon 2:16; 1 Timote 6:​9, 10) Meñe mweiuk ko im money rejjab nana ak kauwatata, elañe yokwe eo ad kin men kein ej laplok jen ad yokwe Anij, inem Satan ear bõk anjo. “Kajur ko” an jitõb in lal in ej bed ilo kareelel ko ñan kannieked ejerawiwi, ilo an etao, im ilo an jab bõjrak ak diklok, im einwõt mejatoto eo, ej bed ibelakid. Kwon jab kõtlok bwe jitõb eo an lal in en jelet buruõm!​—Dri Epesõs 2:​2, 3; Jabõn Kennan Ko 4:⁠23.

13. Ewi wãwen beran eo ad ñan kejbãrok mour erreo emaroñ bed ilo melejoñ?

¹³ Bõtab, ñan jumae im karmijete jitõb eo enana an lal in jej aikwij beran im kejbãrok mour erreo eo ad. Ñan wanjoñok, ej aikwij ad beran ñan jutak im dioj jen juõn imõn aluij pija ak ñan kune computer ak TV eo ñe pija ko retton rej walok. Ilo beran jej aikwij jutak nae ijjibed ko renana an ro dettad wõt im kabõjrak ad kamao ibben ro renana. Bareinwõt, jej aikwij beran ñan rejetak kien ko im nan in kakabilek ko an Anij meñe ri school ro mõttad, ri jerbal ro mõttad, ro ri turid, ak ro nukid rej kajirere kake kij.​—1 Dri Korint 15:33; 1 Jon 5:⁠19.

14. Ta eo jen kõmmane elañe jitõb eo an lal in ear jelet kij?

¹⁴ Inem elap an aorõk bwe jen kakajurlok yokwe eo ad ñan Anij im kin ro jeid im jatid maan im kõrã ilo jitõb! Bõk ien ñan etale mejenkajjik ko am im wãwen mour eo am ñan lale elañe jitõb eo an lal in ear jelet yuk ilo jabdewõt wãwen. Elañe ear, meñe jidik wõt, inem kwon jar ñan Jehovah bwe en kaberan yuk ñan am jolok bwe en lukkun jako. Jehovah ejamin kajekdon kajitõk rot kein remol. (Sam Ko 51:​17) Bareinwõt, jitõb eo an elaplok an kajur jen eo an lal in.​—1 Jon 4:⁠4.

Jelmae Melejoñ ko Am Ilo Beran

15, 16. Ewi wãwen yokwe eo Christ ear kwalok emaroñ jibañ kij kijenmij kin melejoñ ko ad make? Kwalok juõn wanjoñok.

¹⁵ Melejoñ ko jet me ro ri karejaran Jehovah rej aikwij jelmaiki rekoba tokjen ko renana rej walok kin jab wãppen im ad rittolok, me ekkã an bõktok nañinmij, jorrãn ilo enbwinid, buromõj, im elõñ abañ ko jet. (Dri Rom 8:​22) Yokwe eo Christ ear kwalok emaroñ jibañ kij ñan kijenmij kin melejoñ kein. Lemnak kin joñok eo an Namangolwa, eo ear rittolok ilo juõn Christian family ilo Zambia. Ke ear ruo an yiõ, Namangolwa ear bõk juõn nañinmij in utame ilo enbwinin. “Iar jook,” lio ej ba, “kinke iar lemnak bwe armij renaj kar ilbõk kin baotokiõ. Ak ro jeiõ im jatiõ ilo jitõb rar jibañ iõ ñan bõk juõn lemnak eoktak. Tokjen men in, iar anjo ion aõ jook, im tokelik iar baptais.”

¹⁶ Meñe ewõr juõn an Namangolwa wheelchair, ekkã an aikwij tõbalbal kin pein im bukien ñe ebokbok ial eo. Ak, ej bõk kunan ilo jerbal in kwalok nan einwõt juõn auxiliary pioneer enañin ruo alliñ ilo kajjojo yiõ. Juõn ri mweo ear jañ ke Namangolwa ear kwalok nan ñan e. Etke? Kinke tõmak im beran eo an ear lap an jelet buruen. Einwõt juõn kein kamol kin kajerammõn eo an Jehovah, lalem ian ri katak ro an Namangolwa rar baptais, im juõn iair ej jerbal einwõt juõn elder ilo congregation eo. “Ekkã an lukkun metak nee ko neiõ,” lio ej ba, “ak ijjab kõtlok bwe men in en kabõjrak iõ.” Kõrã ri tõmak in ej juõn ian elõñ Ri Kennan ro ibelakin lal me emõjno enbwiniir ak jitõb eo air ekajur kinke elap air yokwe Anij im ro ri turiir. Aolep rein raorõk ilo mejen Jehovah!​—Haggai 2:⁠7.

17, 18. Ta eo ej jibañ elõñ ñan kijenmij kin nañinmij im melejoñ ko jet? Kwalok jet wanjoñok ko ilo bukwon eo am.

¹⁷ Nañinmij ko relap remaroñ bareinwõt kaburomõj im kabwer kij. “Ilo kumi in book study eo ij bed ie,” juõn elder ilo congregation eo ear ba, “juõn kõrã ri tõmak ej eñtan kin nañinmij in diabetes (tõñal) im ejorrãn deke in jibke eo an, eo juõn ewõr cancer ibben, ruo rekũrro, im bar juõn ewõr nañinmij in lupus (kij ko rekin kejbãrok enbwinõm mokta rej oktak im kokkure mõttan ko ilo enbwinõm) im fibromyalgia (juõn bar nañinmij in kũrro elap an kõmetak). Jet ien rej buromõj. Ak, rej jako jen kwelok ko ilo ien ko wõt elap air nañinmij ak ñe rej deloñ ilo hospital. Aolepeir rej keini air kwalok nan. Rej kakememej iõ kin Paul, eo ear ba: ‘Ñe I mõjino, inem I kajur.’ Ij nebar ir kin yokwe im beran eo air. Bõlen wãwen ejmour eo air ej kõmman bwe ren kile ta eo elap an aorõk ilo mour.”​—2 Dri Korint 12:⁠10.

¹⁸ Elañe kwoj aikwij kijenmij kin am mõjno, nañinmij, ak kin abañ ko jet, ‘en jab jokwõr am jar’ kin jibañ bwe kwon jab ebwer. (1 Dri Tessalonika 5:​14, 17) Emol, kwonaj mõnõnõ jet ien im buromõj jet ien, ak kajeoñ lemnake kin men ko remõn, men ko lor jitõb, elaptata kejatdikdik eo ad kin Ailiñ eo. “Ñan ña, jerbal in kwalok nan ej einwõt juõn uno,” juõn kõrã ri tõmak ear ba. Ñe ej jaketo-jaketak news eo emõn ñan ro jet, men in ej jibañ e ñan kejbãrok juõn lemnak ejimwe im emõn.

Yokwe Ej Jibañ Ro Rar Kõmman Bwid Ñan Air Jeblak ñan Jehovah

19, 20. (a) Ta eo emaroñ jibañ ro rar jerawiwi ñan kalaplok air beran bwe ren jeblak ñan Jehovah? (b) Ta eo jenaj etale ilo katak in tok juõn?

¹⁹ Elõñ ro me ear mõjnolok mour in jitõb eo air ak rar jerawiwi rej lo bwe ebin air jeblak ñan Jehovah. Ak elañe enaj mol an armij rein ukwelok im kakajurlok yokwe eo air ñan Anij renaj bõk beran eo rej aikwiji. Lemnak kin Mario,a eo ej jokwe ilo United States. Mario ear illok jen Christian congregation eo, erom juõn ri kadõk im ear bõk uno ko rekajur im, elikin 20 yiõ, kar kalbuji. “Iar jino lemnak kin ilju im jeklaj eo aõ im ñan bar konono Bible eo,” Mario ej ba. “Tokelik, iar kamolol kin kadkad ko kadkadin Jehovah, elaptata kin tiriamo eo an, eo ekkã aõ jar kake. Elikin aõ dioj jen kalbuj, iar bõprae aõ kamao ibben ro kar mõtta mokta, iar etal ñan kwelok ko an Christian, im eliktata kar kajeblak iõ ñan dolul eo an Jehovah. Ilo enbwiniõ, ij madmõde men ko iar jeori, ak ewõr juõn kejatdikdik eaibujuij. Ijjab maroñ bõjrak jen aõ kamolol Jehovah kin tiriamokake im jeorlok bwid eo an.”​—Sam Ko 103:​9-13; 130:​3, 4; Dri Galetia 6:​7, 8.

²⁰ Emol, ro rej bed ilo wãwen ko einwõt Mario rej aikwij kate ir ñan air jeblak ñan Jehovah. Ak yokwe eo air me ebar kajurlok ej kin tokjen air katak Bible, jar, im kalmenlokjen, enaj lelok ñan ir beran im bebe eo ebin rej aikwiji. Kejatdikdik kin Ailiñ eo ear bareinwõt kakajur Mario. Aet, ekoba ibben yokwe, tõmak, im mijak Anij, kejatdikdik emaroñ juõn kajur elap ilo mour eo ad. Ilo katak in tok juõn, jenaj lukkun etale men in letok in eaorõk ilo jitõb.

[Kamelele eo itulal]

Kwomaroñ Ke Uak?

• Ewi wãwen yokwe ear jelet beran eo elap an Jesus?

• Ewi wãwen yokwe kin ro jeiir im jatiir ear lelok ñan Paul im Barnabas beran eo elap?

• Ilo wãwen et ko Satan ej kajeoñ in kokkure yokwe eo an Christian ro?

• Yokwe Jehovah emaroñ kaberan kij ñan ad kijenmij kin melejoñ rot ko?

[Pija eo ilo peij 15]

Yokwe eo an Paul kin armij ear lelok ñan e beran ñan an kijenmij

[Pija eo ilo peij 16]

Jej aikwij beran ñan rejetak kien ko an Anij

[Pija eo ilo peij 16]

Namangolwa Sututu