Kamol Am Tõmak kin Wãwen Mour eo Am

“Ein drein tõmak, elañe jerbal ko re jab iben, e mõke mij.”​—JEMES 2:⁠17.

1. Etke Ri Christian ro mokta rar lukkun lemnak kin tõmak im jerbal ko?

ILO mol, Ri Christian ro mokta rar kamol tõmak eo air ilo wãwen air mour. Ri kalor eo James ear rejañ aolep Ri Christian ro: “A komin dri kõmõnmõn nan eo, im jab dri roñjake wõt.” Ear kobaik: “Bwe einwõt enbwin e jibil jen an, e mij, ein drein tõmak e jibil jen jerbal emij.” (Jemes 1:22; 2:​26) Enañin 35 yiõ ko elikin an jeje nan kein, elõñ Ri Christian ro rar kamol tõmak eo air kin jerbal ko rekkar. Ak ekaburomõjmõj, bwe jet iair rar jab. Jesus ear nebar congregation in Smyrna; ak ñan elõñ ilo congregation eo an Sardis, ear ba: “I jela jerbal ko am, bwe ebuñbuñ bwe kwoj mour, im kwoj mij.”​—Reveles̃õn 2:​8-11; 3:⁠1.

2. Ta eo Ri Christian ro rej aikwij kajitõkin ir make kin tõmak eo air?

² Eñin unin, Jesus ear rejañ armij ro ilo Sardis​—ekoba aolep ro renaj kar konono nan ko an tokelik​—bwe ren kamol yokwe eo air mokta kin mol eo an Christian im ekkõl wõt ilo jitõb. (Reveles̃õn 3:​2, 3) Kij aolep jemaroñ kajitõk ibbed make: ‘Ta kin jerbal ko aõ? Kõmman ko aõ rej kalikar ke bwe ij kõmman joñan wõt aõ maroñ ñan kamol tõmak eo aõ ilo men otemjej ij kõmmani, ekoba men ko rejjab mõttan jerbal in kwalok nan ak kwelok ko an congregation?’ (Luk 16:​10) Jemaroñ lemnak kin elõñ wãwen ko kin mour, ak jenaj bwebwenato kin juõn wõt: kamao im ikkure ibben don, ekoba ien kamõnõnõ ko ekkã air walok elikin ien mare eo an Christian.

Ien Ko Redik Jej Ibben Don

3. Ta eo Bible ej ba kin iiaio ko?

³ Enañin kij aolep jekõnan bed ilo ien kamõnõnõ ko ibben Ri Christian ro relemõnõnõ. Jehovah ej juõn “Anij e mõnõnõ” im ekõnan bwe ro ri karejaran ren mõnõnõ. (1 Timote 1:​11) Ear kõmman bwe Solomon en kobaik mol in ilo Bible eo: “Inem I ar nebar men in tõñ, bwe iben juõn armij ejelok iomin al emõnlok jen bwe en mõña, im irak, im mõnõnõ: bwe men eo e naj ber iben ilo an jerbal ran otemjej in mour eo an.” (Ekklisiastis 3:​1, 4, 13; 8:​15) Ien kalañliñ rot kein remaroñ walok ilo ien ko juõn family ej mõñã ibben don ak ñe ri kabuñ ro remol rej karõk ien iiaio ko redik.​—Job 1:​4, 5, 18; Luk 10:​38-42; 14:​12-14.

4. Armij eo ej karõk juõn ien ibben don ej aikwij itoklimo kin ta?

⁴ Elañe kwoj bõk eddo eo ñan karõk iiaio ko, kwoj aikwij lukkun lemnak kin ta eo enaj walok ilo ien eo, meñe kwoj kir wõt jet ian ri tõmak ro mõttam ñan ami mõñã im bwebwenato ibben don. (Dri Rom 12:​13) Kwon lale bwe “ren kõmõn men otemjej ekar im ilo lajrõk” im “meletlet jen lõñ,” en tel ir. (1 Dri Korint 14:40; Jemes 3:​17) Ri jilek Paul ear je: “Inem elañe komij mõña ak irak ak kõmõn jabrewõt, komin kõmõn men otemjej ñõn aibujuij an Anij. Komin jab lõkatipi” armij. (1 Dri Korint 10:​31, 32) Ta jet ian men ko kin ien ibben don ko jej aikwij etali? Ñe kwe im ro kwar kir ir komij lemnak lok iman kin men kein emaroñ jibañ kom ñan lale ta eo komij aikwij kõmmane ñan kamol tõmak eo am.​—Dri Rom 12:⁠2.

Ien Iiaio eo Enaj Kain Ien Rot Eo?

5. Etke ri tel eo an juõn ien iiaio en lukkun lemnak mokta elañe ekõnan lelok den ko einwõt wain im biia im kõtlok bwe en wõr kajañjañ ko?

⁵ Elõñ ri lale ien ibben don ko rar aikwij bebe elañe enaj wõr den ko einwõt wine im biia ilo ien eo ak jab. Men in ejjab juõn men in aikwij ñan kõketak don ilo ien iiaio in. Kememej bwe Jesus ear najidik juõn jar in armij elap ke rar kebak e, ilo an korlok bilawã im ek ko. Ak bwebwenato eo ejjab ba bwe ilo kabwilõñlõñ ear lelok wain ñan ir, meñe ear wõr an maroñ ñan kõmmane men in. (Matu 14:​14-21) Elañe kwoj bebe in lelok den ko einwõt wain im biia ilo ien iiaio eo, kwon lale bwe en jab le jen joñan am lelok, im kwoj aikwij lale bwe en wõr den ko jet renno bwe ro jet ren maroñ idak elañe rekõnan. (1 Timote 3:​2, 3, 8; 5:23; 1 Piter 4:⁠3) Kwon bõpraik yuk jen am iun juõn bwe en idak juõn den me emaroñ kiji “einwõt juõn serpent.” (Jabõn Kennan Ko 23:​29-32) Ta kin al im kajañjañ? Elañe ien eo kwoj kõmmane enaj wõr al im kajañjañ, ejelok bere bwe kwoj aikwij bõk eddo eo ñan lukkun lale kain al im kajañjañ rot ko kom naj roñjake, ekoba wãwen beat in kajañjañ eo im nan ko ie. (Dri Kolosse 3:8; Jemes 1:​21) Elõñ Ri Christian ro rar lo bwe air kajañ Kingdom Melodies (Kajañjañ Ko An Ailiñ Eo) ak al ibben don kin al kein rar ejaak juõn jitõb emãnãn im emõn ikõtan don. (Dri Epesõs 5:​19, 20) Im, ej aikwij emakijkij am lale ewi joñan ainikien kajañjañ ko bwe en jab lap ainikien inem ri lotok ro rejjab maroñ bwebwenato ibben don ak ej kauwaroñ ro ri turõm.​—Matu 7:⁠12.

6. Ewi wãwen eo ej bõk eddon in ien iiaio eo emaroñ kwalok bwe tõmak eo an emour wõt ilo ien bwebwenato ibben don ak makitkit ko jet?

⁶ Ilo ien ibben don eo, Ri Christian ro remaroñ konono ibben don kin elõñ bwebwenato ko, read juõn katak ilo juõn ainikien emõn joñan ñan an armij ro maroñ roñjake, ak kwalok jet bwebwenato ko rekaitoktoklimo. Elañe rej jino bwebwenato kin men ko rejõkkar ñan mour an Christian, eo ej bõk eddo in ien eo emaroñ ukõte ilo joij bwe ren bwebwenato ilo jimwe im mol. Ej aikwij lale bwe en jab juõn wõt armij ej konono. Elañe ej lo bwe abañ in ej jino walok, ilo juõn wãwen emeletlet im joij emaroñ bõk eddo eo ñan konono im kobaik armij ro jet ilo bwebwenato eo, bõlen ilo an kajitõk ibben jodikdik ro kin lemnak ko air ak kwalok juõn bwebwenato me elõñ rej jelã kake inem remaroñ bõk kunair ilo bwebwenato eo bareinwõt. Ro reritto im redik jimor renaj mõnõnõ in bõk kunair ilo mõttan in ilo ien iiaio eo. Einwõt eo ej karõk ien eo, elañe kwoj tel ilo meletlet im joij, am ‘kamanwa enaj alikar’ iman armij ro otemjej ilo ien ibben don in. (Dri Pilippai 4:⁠5) Renaj kile bwe tõmak eo am emour, im ej jelet wãwen otemjej ilo am mour.

Ien Belele im Kwojkwoj in Belele Ko

7. Etke jej aikwij lukkun lemnak kin karõk ko kin ien belele im ien kamõnõnõ ko rej ekkejel ibben?

⁷ Juõn ien ejejuan ñan lañliñ ibben don ej ien belele eo an Christian. Ri karejar ro an Anij ilo ien ko etto, ekoba Jesus im ri kalor ro an, rar mõnõnõ in bõk kunair ilo ien kein rekamõnõnõ, ekoba mõñã ibben don. (Jenesis 29:​21, 22; Jon 2:​1, 2) Bõtab, ilo ran kein, emwij ad lo aikwij eo bwe jen kate wõt kij ñe kwojkwoj ko kin belele rej ekkejel ibben ien mare eo. Ilo wãwen in enaj kalikar lemnak ko rekõmmanwa im jokkin wõt juõn einwõt juõn Ri Christian. Ak, wãwen kein rej mõttan wãwen mour, im ej kabellok ñan juõn Ri Christian juõn ien emõn ñan an kamol tõmak eo an.

8, 9. Ewi wãwen manit ko elõñ rej kõmmani ilo ien belele eo air rej kamol nan ko ilo 1 Jon 2:​16, 17?

⁸ Elõñ armij ro me rejjab jelã ak ejelok air itoklimo kin ta eo kien ko ilo Bible rej ba kin belele, kin menin remaroñ watõk ien kein einwõt juõn ien ñan kõmman manit ko rejõkkar, ak rej baj kõtlok wõt kinke elõñ rej kõmman eindein. Ilo juõn magazine ilo Europe, juõn kõrã ej kab belele ear kamelele kin ien belele eo an bwe ear einwõt maaj an juõn “iroij”, im ear ewõr juõn jar in ri kajañjañ ro rej etetal ibben. Ikijen kwojkwoj eo lio ear ba: ‘Mõñã im kajañjañ ko rar lukkun emõn. Aolep men ko rar walok einwõt iar kõnan. Iar eñjake bwe mour eo aõ kar einwõt juõn iroij ilo ran eo.’

⁹ Meñe manit ko remaroñ oktak jen don jen ailiñ ñan ailiñ, eñjake rot kein rej kamol nan ko ri jilek John ear je: “Bwe men ko otemjej ilo lõl, mõm an kõniek, mõm an mej ko, im wuj wan an mour in, re jab an Jemer a rej an lõl.” Kwoj lemnak ke bwe Christian emaan im kõrã ro reritto ilo jitõb renaj kõnan mare ilo wãwen eo einlok wõt “iroij” ro im kõmman juõn kwojkwoj elap? Jen men in, rej aikwij kememej bwe “eo ej kõmõnmõn ankil an Anij ej berwõt in drio.”​—1 Jon 2:​16, 17.

10. (a) Ñan kõmman juõn ran in belele emõn, etke eaorõk bwe jen karõklok iman kin ran eo? (b) Ewi wãwen ad maroñ bebe kin wõn ro jemaroñ kirtok ñan ien belele eo?

¹⁰ Christian ri belele ro rekõnan jerbal ilo mol im kõmmanwa, im Bible eo emaroñ jibañ ir. Meñe ran in belele eo ej juõn ran eaorõk, rejelã bwe ej jinoin mour in belele eo ikõtan ruo Ri Christian ro me rej reimanlok ñan ien air naj mour indio. Rejjab aikwij kõmman juõn kwojkwoj elap kin mõñã im mõnõnõ ibben elõñ armij. Elañe rekõnan kõmman juõn kwojkwoj, rej aikwij lemnak kin wõnãn im kain kwojkwoj rot eo renaj kõmmane. (Luk 14:​28) Ilo air mour ibben don einwõt Christian, leo enaj bõran lio ekkar ñan Bible eo. (1 Dri Korint 11:3; Dri Epesõs 5:​22, 23) Inem leo ej aikwij bõk eddo eo ñan lale kwojkwoj in belele eo. Emol bwe, ilo yokwe enaj bõk lemnak eo an lio kin wõn ro rekõnan kirtok ñan kwojkwoj eo airro im men ko jet rej jelet ien in belele eo air. Bõlen rejjab maroñ kirtok aolep ro jerair im nukiir; inem, rej aikwij kwalok ettã buru ñe rej kõmman bebe ko kin jet ian men kein. Leo im lio ri belele rej aikwij liki bwe elañe rejjab maroñ kir jet Ri Christian ro mõttair, rein renaj melele im jab lõkatip.​—Ekklisiastis 7:⁠9.

“Iroij in Kwojkwoj Eo”

11. Ta jerbal eo juõn “iroij in kwojkwoj eo” ej aikwij kõmmane ilo ien belele eo?

¹¹ Elañe leo im lio rekõnan kõmman juõn kwojkwoj in belele, ewi wãwen remaroñ kejbãrok bwe kwojkwoj eo en kwalok wõt kautiej? Iumin elõñ yiõ ko, Ri Kennan ro an Jehovah rar kile bwe emenin meletlet ñan kobaik juõn karõk einlok wõt eo ear walok ilo kwojkwoj eo Jesus ear bed ie ilo Cana. Ear wõr juõn “iroij in kwojkwoj eo,” juõn ri tõmak mõttair me rar liki ñan lolorjake men ko. (Jon 2:​9, 10) Eindein lok wõt, leo emeletlet enaj kãlet juõn Christian emaan eritto ilo jitõb bwe en bõk eddo in eaorõk. Elikin an eo ej lolorjake Kwojkwoj eo bwebwenato ibben leo belele im bõk lemnak ko an kin ta men ko ekõnan kõmmani, iroij in kwojkwoj in enaj lolorjake bebe ko an ilo tibdikin mokta im ilo ien kwojkwoj eo.

12. Ta eo leo belele ej aikwij lemnak kake ikijen den ko einwõt wain im biia ilo kwojkwoj in belele eo?

¹² Ekkar ñan ta eo paragraph 5 ear kamelele kake, jet ri belele maan im kõrã ro rej beek bwe ren jab lelok den ko einwõt wain im biia ilo kwojkwoj in belele eo air ñan bõprae jabdewõt abañ ko renaj walok im kokkure ien belele eo air emõnõnõ. (Dri Rom 13:13; 1 Dri Korint 5:​11) Ak, elañe rej kõtlok bwe en wõr den kein ilo ien eo, leo belele ej aikwij lale bwe ren jab lelok ellã jen joñan. Rar lelok wain ilo kwojkwoj in belele eo Jesus ear bed ie ilo Cana, im ear kõmman im lelok wain emõn bareinwõt. Ekaitoklimo bwe, iroij in kwojkwoj eo ear ba: “Armij otemjej rej letok wain eo emõn mokta; im ke elap air irak, inem eo enana; a kw’ar kejbãrok wain eo emõn ñõn ien in.” (Jon 2:​10) Emol bwe Jesus ear jab kõnan kakadõk armij, bwe ear watõk kadõk juõn men enana. (Luk 12:​45, 46) Ilo an kwalok an bwilõñ kin emõn in wine eo, iroij in kwojkwoj eo ear kalikar bwe ear lo ien ko ke jet ian ro rar itok ñan belele eo rar kadõk. (Jerbal 2:15; 1 Dri Tessalonika 5:⁠7) Inem, leo belele im juõn Ri Christian etiljek ej kãlete einwõt iroij in kwojkwoj eo rej aikwij jimor lale aolep ro kar kir ir bwe ren bokake nan in jiroñ eo ealikar: “Komin jab karek kin wain, ijo eor dõr.”​—Dri Epesõs 5:18; Jabõn Kennan Ko 20:1; Hosea 4:⁠11.

13. Ta eo leo im lio ri belele rej aikwij lemnak kake ikijen kajañjañ ko ilo kwojkwoj in belele eo, im etke?

¹³ Einwõt ilo kwojkwoj ko jet, elañe enaj wõr kajañjañ ko, jej aikwij kõmman bwe en emõn joñan ainikien kajañjañ eo bwe ro rej bwebwenato ibben don ren jab uwaroñ. Juõn Christian elder ear ba: “Ñe kwojkwoj eo ej wõnmanlok wõt ilo joten eo, im elaplok air bwebwenato ibben don ak ej jino air eb, jet ien joñan ainikien kajañjañ eo ej laplok bareinwõt. Meñe ilo jinoin ear emõn joñan ainikien kajañjañ eo ak tokelik emaroñ laplok im kokkure an armij ro bwebwenato ibben don. Kwojkwoj in belele eo ej juõn ien emõn ñan kamao ibben don. Ej juõn men in kaburomõj elañe kajañjañ eo elaj ainikien ear kokkure ien in emõn ñan kamao ibben don!” Ikijen men in bareinwõt, leo belele im iroij in kwojkwoj eo rej aikwij beran wõt im jerbal ilo jimwe, im jab kõtlok bwe ri kajañjañ ro, meñe rej kõllã wõnãir ak jab, ren make beek kin kain al rot im ewi joñan ainikien kajañjañ ko. Paul ear je: “Men ko jabrewõt komij kõmõnmõni, ilo nan ak ilo jerbal, komin kõmõn otemjej ilo etan Iroij Jisõs.” (Dri Kolosse 3:​17) Ñe ro kar kir ir rej jeblak ñan moko imwiir elikin kwojkwoj eo, renaj kememej ke bwe kajañjañ ko rar kalikar bwe leo im lio ri belele rar kõmman men otemjej ilo etan Jesus? Men in ej aikwij eindein.

14. Ta men ko Ri Christian ro rej aikwij kememej kaki kin ien belele eo?

¹⁴ Aet, ñe ej emõn wãwen ad keboje ien belele eo ad, armij ro renaj mõnõnõ in kememej e. Adam im Edyta, ro rar belele iumin 30 yiõ ko, rar kwalok air lemnak kin juõn ien belele: “Kwar maroñ eñjake jitõbõn Christian. Rar kajañ al ko ñan nebar Jehovah im kõmman men in kamõnõnõ ko jet remõn. Eb im kajañjañ ko rar watõki einwõt men ko kein karuo aorõkiir. Ear juõn ien emõn im kõketak, im men kein aolep rar ekkar ñan Bible eo.” Alikar, ri belele ro remaroñ kõmman elõñ men ko ñan kamol tõmak eo air ikijen jerbal ko air.

Men in Lelok ko Ilo Ien Belele

15. Ta nan in kakabilek eo ilo Bible jemaroñ etale ikijen men in lelok ko kin belele?

¹⁵ Ilo elõñ ailiñ ko ro jerair im ro nukiir ekkã air kõnan lelok men in lelok ko ñan ro renaj belele. Elañe kwokõnan kõmman eindein, ta eo kwoj aikwij kememej? Eokwe, kememej wõt nan ko an ri jilek John kin “wuj wan an mour” eo an armij. Ear ekkeijaklok wuj wan rot in, jab ibben Ri Christian ro me rej kwalok tõmak eo air ilo kõmman ko air, ak ibben ‘lal eo ejakolok.’ (1 Jon 2:​16, 17) Ekkar ñan nan in kakõrmol eo an John, ri belele ro rekãl rej aikwij ke kwalok iman mejen armij otemjej etan armij ro kajjojo rar lelok men in lelok ko ñan ir? Ri Christian ro ilo Macedonia im Achaia rar lelok jabawõt ko ñan ro jeiir im jatiir ilo Jerusalem, ak rar jab kwalok iman mejen armij ro kin wõn ro rar jabawõt ñan ir. (Dri Rom 15:​26) Elõñ Ri Christian ro me rej lelok men in lelok ko ñan ri belele ro rejjab kõnan kwalok etair iman mejen ro jet. Kin men in, jemaroñ etale nan in kakabilek eo an Jesus ilo Matu 6:​1-4.

16. Ewi wãwen ri belele ro rekãl remaroñ kejbãrok ir jen air kalõkatip ro jet ñe rej bõk men in lelok ko jen ir?

¹⁶ Kejelãik armij ro kin wõn ro rej lelok men in lelok ko emaroñ “kaillu dron” kin air keidi kin ewi eo emõnlok ak elaplok wõnãn. Kin un in, Christian ri belele ro rekãl im meletlet rejamin kejelã kin etan armij eo ear lelok men in lelok eo. Kejelã kin etan ri lelok ro emaroñ kajook ro jet me rar jab maroñ lelok jabdewõt men. (Dri Galetia 5:26; 6:​10) Emol bwe, ejjab nana elañe leo im lio ri belele rekõnan jelã wõn ro rar lelok men in lelok ko ñan ir. Remaroñ jelã kin men in ikijen card eo kar kobaiki ibben men in lelok eo meñe rejjab kalikar etan ri lelok eo iman mejen armij. Ñe jej wiaik, lelok, im bõk men in lelok ko kin belele, ej kabellok juõn ien ñan kij aolep bwe jen kamol bwe makitkit ko ad meñe ilo ittino, rej jelet tõmak eo ad.

17. Ta mejenkajjik eo an Ri Christian ro ikijen tõmak im jerbal ko air?

¹⁷ Kamol tõmak eo ad ej kitibuj elõñlok men ko jen ad baj mour ilo erreo wõt, bed ilo kwelok ko an Christian, im bõk kunad ilo jerbal in kwalok nan. Kij kajjojo jej aikwij kõmman bwe tõmak eo ad en mour wõt im bwe en jelet men otemjej jej kõmmani. Aet, jej kwalok tõmak eo ad kin kõmman ko ad re “wãppen,” ekoba ilo men ko emwij ad katak kaki ilõñ.​—Reveles̃õn 3:⁠2.

18. Ewi wãwen nan ko ilo Jon 13:17 rej mol ikijen ien mare ko an Christian im iiaio ko?

¹⁸ Elikin an kar Jesus likit juõn joñok emõn ñan ri jilek ro an retiljek ilo an kwale neiir, ear ba: “Elañe kom jela men kein, kom mõnõnõ elañe komij kõmõnmõni.” (Jon 13:​4-17) Ilo jikin ko jej jokwe ie rainin, bõlen jejjab aikwij kwale neen armij ro, einwõt ri lotok ro ad. Bõtab, einwõt emwij ad bwebwenato kake ilo katak in, ebar wõr wãwen ko jet ilo mour eo ad jemaroñ kwalok tõmak eo ad ikijen makitkit ko jej kõmmani ilo yokwe im joij, ekoba makitkit ko kin iiaio im ien belele ko an Christian. Emaroñ eindein jekdon elañe jej ri belele ro renaj mare ak renaj bed ilo ien mare eo ak juõn iiaio eo emõnõnõ an Ri Christian ro me rekõnan kwalok tõmak eo air kin men ko rej kõmmani.

Ewi Wãwen Kwonaj Uak?

Ewi wãwen kwomaroñ kamol tõmak eo am

• ñe kwoj karõk im kõmman juõn kwojkwoj?

• ñe kwoj karõk juõn ien mare ak kwojkwoj in belele?

• ñe kwoj lelok ak bõk men in letok ko kin belele?

[Pija eo ilo peij 29]

Meñe jej kir jejjo wõt armij, jen kõtlok bwe “meletlet jen lõñ” en tel kij