Mare Ko Rerreo Iman Mejen Anij Im Armij
“Juõn belele ilo Kena in Galili . . . im rej jiroñ Jisõs im ro dri kaloran, bwe ren itok ñõn belele eo.”—JON 2:1, 2.
1. Bwebwenato eo kin Jesus ke ear bed ilo Cana ej kalikar ta?
JESUS, jinen, im jet ian ri kalor ro an rar jelã kin lañliñ eo ej walok ibwiljin armij ro an Anij ñe ej wõr juõn ien mare erreo. Christ ear kõmman bwe juõn ien mare en kanuij emõn ikijen an kar kõmman men in kabwilõñlõñ eo an kein kajuõn, eo ear bõktok elaplok lañliñ ñan ien eo. (Jon 2:1-11) Bõlen kwar bed im lañliñ kin ien mare ko an Ri Christian ro me rej kõnan jerbal ñan Jehovah einwõt ri belele ro remõnõnõ me emwij air mare. Ak bõlen kwoj reimanlok ñan am mare ak ñan am jibañ juõn jeram kõmman bwe ien mare eo an en juõn ien aibujuij im emõn. Ta eo emaroñ kõmman bwe ien in en emõn?
2. Ta melele ko rej bed ilo Bible eo kin ien mare ko?
2 Ri Christian ro rar lo bwe nan in kakabilek eo ilo Nan eo an Anij ekakõrmol elap an jibañ ñe juõn emaan im juõn kõrã rej karõk ñan air mare. (2 Timote 3:16, 17) Emol, Bible eo ejjab letok ilo tibdikin kin ta wãwen ko renaj kõmmani ilo ien mare eo an juõn Ri Christian. Alikar menin kinke manit ko im bareinwõt aikwij ko an kien rej oktak jen don ekkar ñan ia eo armij ro rej bed ie im ien ko. Ñan wanjoñok, ilo Israel eo etto ekar ejelok juõn lukkun ien kõmare. Ilo ran in mare eo, leo ej bõktok lio belele ñan mweo imõn ak ñan imweo imõn jemen. (Jenesis 24:67; Aiseia 61:10; Matu 1:24) Buñten nee in im ej alikar iman mejen armij ro rej watõk bwe ej ien mare eo, im rejjab kõmman mare eo einwõt ekkã air kõmman ilo ran kein.
3. Ta men eo ear walok ilo Cana Jesus ear bõk kunan ie?
3 Ri Israel ro rej kile buñten nee in einwõt ien mare eo. Elikin men in, remaroñ bed ilo juõn kwojkwoj in belele, einwõt ej kwalok kake ilo John 2:1. Elõñ ukok in Bible ko rej ukõt eon in einwõt in: “Ear wõr juõn kwojkwoj in belele ilo Cana.” Ak nan eo ilo kajin eo jinoin ejejjet an kajerbal nan in “kwojkwoj in belele.”a (Matu 22:2-10; 25:10; Luk 14:8) Bwebwenato eo ej kalikar bwe Jesus ear bed ilo ien in im kõmman bwe ien kwojkwoj eo ej ekkejellok ibben juõn ien mare an Ri Jew en laplok an kamõnõnõ. Bõtab, point eo elap, eñin bwe juõn ien mare ilo ran ko an Jesus eoktak jen wãwen eo ekkã air kõmmane ilo ran kein.
4. Kain mare rot ko jet Ri Christian rej kãlet ñan air kõmmane, im etke?
4 Ilo elõñ ailiñ ko rainin, Ri Christian ro rekõnan mare rej aikwij kajejjet jet aikwij ko ekkar ñan kien. Elañe ededelok air kõmmane menin, remaroñ mare ilo jabdewõt wãwen ekkar ñan kien. Remaroñ kõmmane juõn ien kõmare edik im lamwan eo me juõn ri ekajet, mayor, ak juõn ri tel in kabuñ ej kõmmane, eo me kien eo an ailiñ eo emwij an kamelimi. Jet rej kãlet ñan air mare ilo wãwen in, bõlen kajitõk ibben jet ian ro nukiir ak Ri Christian ro jerair ñan air bed einwõt ri kamol ro ak ñan baj bed im mõnõnõ ibbeir ilo ien in eaorõk. (Jeremiah 33:11; Jon 3:29) Ejja wãwen dein lok wõt, jet Ri Christian ro remaroñ kãlet bwe ren kõmman kwojkwoj in belele ko rejjab lap bwe en jab bõk elap karõk ko im elap wõnãn. Ak, remaroñ karõk bwe ren kejota ibben jet jerair rebak. Jekdon ta kãlet eo jej kõmmane ikijen menin, jej aikwij kile bwe Ri Christian ro jet reritto emaroñ oktak wãwen air lemnak ikijen menin jen kij.—Dri Rom 14:3, 4.
5. Etke elõñ Ri Christian ro rekõnan bwe en wõr juõn katak kin mour in belele ilo ien mare eo air, im ta eo ej kwalok kake?
5 Enañin aolep Ri Christian ro rej bojak in mare rej kãlet bwe juõn katak jen Bible eo en walok ilo ien eo rej jutak in mare.b Rej kile bwe Jehovah eo ear jino mour in belele im ej letok ilo Nan eo an nan in kakabilek ko remeletlet kin wãwen mour in belele eo enaj lo tõbrak im mõnõnõ. (Jenesis 2:22-24; Mark 10:6-9; Dri Epesõs 5:22-33) Im enañin aolep ri belele ro rekõnan bwe Ri Christian ro jerair im ro nukiir ren bed ilo ien in ekamõnõnõ ñan erro. Ak, ewi wãwen ad lemnak kin men ko relõñ kien ej watõk bwe jen kõmmani, lajrak ko rejimwe, im manit ko ekkã air kõmmani ilo jikin mare eo? Katak in enaj etale wãwen ko rej walok ilo elõñ kajjojo jikin ko. Jet ian wãwen kein emaroñ lap air oktak jen wãwen am jelã ak jen wãwen eo rej kõmmane ilo jikin eo kwoj bed ie. Bõtab, kwomaroñ kile jet kaiñi ko rej einlok wõt juõn ak wãwen ko me raorõk ñan ro ri karejaran Anij.
Mour in Belele eo Erreo—Ekkar ñan Kien
6, 7. Etke jej aikwij itoklimo kin ijo kunan kien ilo mare, im ewi wãwen jemaroñ kalikar menin?
6 Meñe Jehovah eo ear jino mour in belele, kien ko an armij ewõr air maroñ ion ta ko ro rej bojak in mare rej kõmmani. Menin ekkar. Jesus ear ba: “Komin lelok ñõn Sizar men ko an Sizar, im ñõn Anij men ko an Anij.” (Mark 12:17) Eindein, ri jilek Paul ear jiroñ: “Armij otemjej ren kiblie ñõn ro routiej jen ir: bwe ejelok eutiej a jen Anij wõt; im ro rej ber Anij e ar likiti.”—Dri Rom 13:1; Taitõs 3:1.
7 Ilo enañin aolep ailiñ ko, Caesar, ak kien eo an ailiñ eo, ej e eo ej kãlet wõn eo ekkar bwe en mare. Kin menin, ñe ruo Ri Christian me rej anemkwoj ñan air mare ekkar ñan Jeje ko ilo Bible eo im rej kãlet in mare, rej ilo tiljek kate ir bwe ren bokake kien eo an ailiñ eo ikijen mare. Menin emaroñ kitibuj bõk juõn license in mare, kajerbal juõn eo emwij an Kien eo kamaroñe ñan an kõmareik ro rekõnan mare, im bõlen jeje mare eo airro ilo lokbook in kien. Ke Caesar Augustus ear kõmmane juõn kien ñan “jeje,” Mary im Joseph rar bokake, rar illok ñan Bethlehem ‘bwe ren jeje ir.’—Luk 2:1-5.
8. Ta manit ko Ri Kennan ro an Jehovah rejjab kõmmani, im etke?
8 Ñe ruo Ri Christian rej mare ilo juõn wãwen ekkar ñan kien im armij ro rej kile, kwon in ebin iman mejen Anij. Kin un in, Ri Kennan ro an Jehovah rejjab kõmman elõñ ien mare ko, im rejjab kõkãl kallimur in mare ko air, bõlen ilo ien eo rej kememe yiõ eo kein ka 25 ak kein ka 50 in air belele. (Matu 5:37) (Jet kabuñ ko rej kajekdon juõn mare rej kõmmane ilo kien, im ba bwe ejjab juõn mare ekkar elañe juõn bata ak ri tel in kabuñ ejjab kõmmane ak keañ bwe erro rej belen don.) Ilo elõñ ailiñ ko, kien eo ej kamelim juõn Ri Kennan an Jehovah ñan an maroñ kõmareik armij. Elañe ewõr an maroñ, enaj kõnan kõmmane men in im kwalok juõn katak in belele ilo Kingdom Hall eo. Eñin ej jikin eo kin kabuñ eo emol im juõn jikin ekkar ñan kwalok juõn katak kin karõk in, eo Jehovah Anij ear kajutake.
9. (a) Elañe renaj mare ilo kien, ta eo Christian ri belele ro remaroñ kõnan kõmmane? (b) Ewi wãwen karõk ko kin belele eo emaroñ kitibuj elder ro?
9 Ilo ailiñ ko jet, ej juõn menin aikwij ekkar ñan kien eo an ailiñ eo bwe ruo armij ren mare ilo juõn office an kien, einwõt city hall (juõn imõn kien), ak iman juõn ri jerbal in kien emwij an kamelim e. Elikin air lor lajrak in an kien eo, Ri Christian ro ekkã air kõnan kwalok juõn katak kin belele ilo Kingdom Hall eo ilo ejja ran eo wõt ak ilo ran eo tok juõn. (En jab ellã elõñ ran ko ikõtan ien mare eo ilo kien im ien katak kin belele eo jen Bible, kinke emwij air mare iman Anij im armij, ekoba congregation an Christian.) Elañe leo im lio rar mare ilo kien ak rekõnan bwe en walok juõn katak kin belele ilo Kingdom Hall eo, rej aikwij kajitõk lok iman im bõk melim jen elder ro rej ejaake Congregation Service Committee eo. Ijellokin air kamol bwe jutak eo an armij rein ruo ej emõn, overseer rein rej aikwij lale bwe ien kõmare eo en jab kautameik ien kwelok ko an congregation eo ak program ko kar karõki ilo Kingdom Hall eo. (1 Dri Korint 14:33, 40) Renaj bareinwõt lale jabdewõt kebojak ko ilo Kingdom Hall eo ri belele ro rej kajitõk kaki im bebe elañe rej aikwij kõmman juõn kejelã kin air kajerbale.
10. Elañe rej aikwij mare ilo kien, ewi wãwen an men in jelet katak kin belele eo?
10 Elder eo ej kwalok katak in belele eo enaj kate bwe en juõn katak ej kwalok joij, ekõketak ilo jitõb, im kwalok kautiej. Elañe ri belele ro rar mare ilo kien, elder eo ekõnan kalikar bwe rar mare ekkar ñan kien Caesar. Elañe rar jab kwalok kallimur ko air ñan don ke rar mare ilo kien, ri belele ro remaroñ kõmmane ilo ien eo ej walok katak in belele eo.c Elañe emwij air kwalok kallimur ko air ñan don ilo ien eo rar mare ilo kien, ak rekõnan kwaloki iman Jehovah im congregation eo, remaroñ kõmmane ilo juõn wãwen ej kalikar bwe ededelok air kar kallimur ñan don ilo ien lok iman, im emwij kar “kobaik” ir.—Matu 19:6; 22:21.
11. Ilo jet ailiñ ko, ewi wãwen an leo im lio mare, im ej jelet katak in belele ilo wãwen et?
11 Ilo jet jikin ko, ejjab juõn men in aikwij bwe leo im lio ren mare ilo kien ak iman juõn ri jerbal in kien. Mare eo ej walok ñe rej bõklok peba eo rar kanne im signi im lelok ñan ri jerbal in kien eo. Ilo ien in, rej jeje etair ilo juõn peba in mare. Ilo wãwen in rej watõk ir einwõt leo im lio ri belele, im eñin ran in mare eo airro. Einwõt kar kwalok kake lok iman, ri belele ro me rar mare ilo wãwen in, remaroñ kõnan bwe juõn katak in belele eo ej wawa ion Bible eo en mõkaj an walok ilo Kingdom Hall eo. Ri Christian maan eo eritto ilo jitõb me kar kãlete ñan an kwalok katak eo en kejelãik aolep ro rej bed ilo ien eo bwe ri belele ro emwij air mare kinke emwij jeje etair ilo kien. Jabdewõt nan in kallimur ko rej kõmmani ej aikwij ekkar ñan melele eo kar kõlajrake ilo paragraph 10 im ilo footnote eo. Ro rej bed ilo Kingdom Hall eo renaj lañliñ ibben ri belele ro im bõk tokjen jen nan in kakabilek ko rej walok jen Nan eo an Anij.—Al eo an Solomon 3:11.
Mare ko Ekkar ñan Ailiñ eo im an Kien
12. Ta in mare eo ekkar ñan manit ko an ailiñ eo, im ta eo rej rejañ ir ñan air kõmmane elikin juõn mare rot in?
12 Ilo jet ailiñ ko, ri belele ro rej mare ekkar ñan manit ko an ailiñ eo (ak bwij eo). Men in ejjab melelen bwe ruo armij rej baj koba wõt ibben don, im ejjab bareinwõt jitõñlok ñan common-law ñe rej watõk ir einwõt ri mare kinke etto air kar bed ibben don meñe ejelok peba in mare.d Jej konono kin mare ko me armij ro rej kile bwe rar lor manit ko an ailiñ eo ak bwij eo. Men in emaroñ kitibuj air kõllã ak bõk wõnãn lio ri belele. Men in ej kalikar bwe mare eo an ri belele ro ej ekkar ñan kien eo im Jeje ko ilo Bible eo. Kien eo ej watõk mare rot in einwõt ebin, ekkar, im rejjab maroñ ukõte. Elikin air kõmmane men in, ekkã air maroñ jeje etair ilo kien, im ñe rej kõmmane, ri belele ro remaroñ bõk juõn peba in kamol kin mare eo airro jen kien eo. Ñe rej jeje etair ilo kien men in emaroñ juõn kein kejbãrok ñan ir ak ñan lio elañe emij leo im ñan jabdewõt ro nejiir. Congregation eo en rejañ jabdewõt ro rej lor manit in ñan air jeje etair ilo mõkaj ibben kien. Ekaitoktoklimo bwe, iumin Kien Moses, ekkã air kar je ran in mare im lotak ko an armij.—Matu 1:1-16.
13. Elikin air mare ekkar ñan mantin ailiñ eo, kain katak kin belele rot eo enaj ekkar?
13 Leo im lio me rej lor manit rot in rej erom ri belele ro ekkar ñan kien ke rar mare ilo wãwen in. Einwõt kar kamelele kake ilõñ, Ri Christian ro me rej lor manit in mare rot in remaroñ kõnan bwe en walok juõn katak in belele, im kwalok kallimur ko air ñan don, ilo Kingdom Hall eo. Elañe rej kõmmane men in, eo ej kwalok katak eo enaj kamol bwe ri belele ro ededelok air kar mare ekkar ñan kien ko an Caesar. Enaj wõr juõn wõt katak kin belele. Ewõr juõn wõt ien mare, meñe rej lor manit in mare eo an ailiñ eo, im enaj walok juõn wõt katak kin belele. Emõn elañe rej kõmmane men kein ruo ilo ejja ran eo wõt, kinke ej kokwojarjar im kautiej belele in Christian eo ilo bukwon eo.
14. Ta eo juõn Ri Christian en kõmmane elañe emaroñ lor manit in belele ko an ailiñ eo im karõk ko kin belele me kien eo ej lolorjaki?
14 Ilo jet ailiñ ko ijo kien eo ej kowãppen manit in belele ko an ailiñ eo, ewõr bareinwõt karõk ko kin belele ekkar ñan kien im rej naetan civil marriage. Belele rot in ekkã an walok iman juõn ri jerbal in kien, im emaroñ koba an ri belele ro kwalok kallimur ko air ñan don im air signi peba in mare eo. Jet Christian ri belele ro ekkã air kõnan lor karõk in jen air lor manit ko an ailiñ eo. Ejjab juõn men in aikwij bwe ren lor wãwen kein jimor, kinke kien eo ej kowãppen kajjojo iair. Melele eo ej walok ilo paragraph 9 im 10 kin juõn katak kin belele im kallimur ko air ñan don ej jerbal bareinwõt ilo karõk in. Men eo eaorõk ej bwe ri belele ro ren mare ilo juõn wãwen ekwojarjar iman mejen Anij im armij.—Luk 20:25; 1 Piter 2:13, 14.
Kejbãrok Kwojarjar in Belele Eo
15, 16. Ewi wãwen nebar en juõn mõttan eaorõk ilo belele eo?
15 Ke juõn abañ ear walok ilo belele eo an juõn king in Persia, ri kakabilek eo an elap etan Memucan ear lelok juõn nan in kakabilek elap an wõr tokjen—‘bwe limaro beleir otemjej ren lelok nebar ñan lõmaro beleir.’ (Ester 1:20) Ilo belele ko an Christian, juõn king ejjab aikwij kõmman juõn kien rot in; limaro beleir rekõnan kautiej lõmaro beleir. Eindein, Christian lõmaro rej kautiej im nebar limaro beleir. (Jabõn Kennan Ko 31:11, 30; 1 Piter 3:7) Jen jab kõttar mae ien emotlok elõñ yiõ ko inem kwalok kautiej ilo belele eo ad. Jej aikwij kwalok jen jinoin, aet, jen ran in belele eo manlok.
16 Ejjab leo im lio ri belele ro wõt me rej aikwij kwalok kautiej ilo ran in mare eo. Elañe juõn Christian elder enaj kwalok juõn katak kin belele, men in bareinwõt en kwalok kautiej. Kinke katak eo an ej ñan ri belele ro, ñan kwalok an kautiej ir, eo ej kwalok katak eo en jab kobaik nan in kajirere ko ak jabõn kennan ko an lal in. En jab bareinwõt kobaik men ko ej loi ak jelã kin ir me remaroñ kajook ri belele ro im ro rej roñjake. Jen menin, enaj kate bwe katak eo en joij im kõketak, im ej kalikar kin Eo ear Jino mour in belele im nan in kakabilek ko An remõn. Aet, katak eo emõn im ej kwalok kautiej an elder eo enaj kõmman bwe belele eo en bõktok nebar ñan Jehovah Anij.
17. Etke ran in mare ko an Christian rej aikwij lor lajrak ko an kien eo?
17 Bõlen kwar lo elõñ point ko ilo katak in kin ran in mare eo ekkar ñan kien. Jet wãwen ko remaroñ jab jerbal ilo bukwon eo am. Ak, kij aolep jej aikwij kile aorõkin ad kõmman karõk ko kin belele ibwiljin Ri Kennan ro an Jehovah me rej kwalok kautiej ñan kien ko an bukwon eo, im kin men in aikwij ko an Caesar. (Luk 20:25) Paul ear rejañ kij: “Komin lelok ñõn ro otemjej men ko rekar ñõn ir, owõj ñõn eo en bõk owõj, kwojkwoj ñõn eo kwojkwoj ekar, . . . kõnimarmij ñõn eo kõnimarmij ekar.” (Dri Rom 13:7) Aet, ej juõn men ekkar bwe Ri Christian ro, ren jino jen ran in mare eo, ñan air kwalok kautiej kin karõk ko me Anij ear likiti ñan ran kein.
18. Ta men eo juõn ej walok ilo elõñ ien mare ko jej aikwij lemnak kake, im ia eo jemaroñ lo melele ko ie kin men in?
18 Elõñ mare ko an Christian rej kõmman juõn kwojkwoj in belele ak juõn ien mõñã elikin ran in mare eo. Kememej bwe Jesus ear kãlet ñan an bed ilo juõn kwojkwoj rot in. Elañe ewõr juõn kwojkwoj rot in, ewi wãwen nan in kakabilek ko ilo Bible remaroñ jibañ kij kõmman bwe men in bareinwõt en bõktok nebar ñan Anij im kwalok ilo emõn kin ri belele ro rekãl im congregation an Christian? Katak in tok juõn enaj etale kin men in.
[Kamelele ko itulal]
a Ejja nan eo wõt remaroñ kar kajerbale kin juõn ien kwojkwoj me ejjab ekkejellok ibben juõn ien mare.—Ester 9:22, Septuagint.
b Juõn katak 30-minute aetokin kin mour in belele ej naetan “Mour in Belele eo Erreo Iman Mejen Anij” Ri Kennan ro an Jehovah rej kajerbale. Katak in ej letok nan in kakabilek ko remõn jen Jeje ko ilo Bible me rej walok ilo book eo etan The Secret for Family Happiness (Key eo ñan Lo Family eo Elemõnõnõ) im book ko jet an Ri Kennan ro an Jehovah. Katak eo elap an jibañ ro rej mare im ñan aolep ro rej bed ilo ien kõmare eo.
c Elañe kien eo an ailiñ eo ejjab aikwij air kajerbal nan ko jet, ekkã air kajerbal kallimur kein me rej kautiej Anij. Ñan leo: “Ña [etan leo] ij bõk yuk [etan lio] einwõt lio beleiõ, ñan yokwe im kaorõke ekkar ñan kien eo an Anij ilo Jeje Ko ilo Bible ñan Christian lõmaro ri belele, toan wõt arro mour ibben don ion lal ekkar ñan karõk in mare eo an Anij.” Ñan lio: “Ña [etan lio] ij bõk yuk [etan leo] einwõt leo beleiõ, ñan yokwe im kaorõke im kautieje, ekkar ñan kien eo an Anij ilo Jeje Ko ilo Bible ñan Christian limaro ri belele, toan wõt arro mour ibben don ion lal ekkar ñan karõk in mare eo an Anij.”
d The Watchtower (Imõniaroñroñ) ilo May 1, 1962, page 287, ej kamelele kin common-law marriage (belele ko me rej watõk ir einwõt ri mare, meñe ejelok peba in mare, kinke etto air kar bed ibben don).
Kwoj Kamemej Ke?
• Etke jej aikwij itoklimo kin wãwen ko ekkar ñan kien eo im ilo jitõb jimor kin ran in mare ko?
• Elañe ruo Ri Christian rej karõk bwe kien eo en kõmareik ir, ta eo remaroñ kõnan kõmmane elikinlok wõt ien in?
• Etke rej kõmman katak ko kin belele ilo Kingdom Hall eo?
[Pija eo ilo peij 24]
Ilo ien mare eo an Ri Israel ro etto, leo ear bõktok lio ñan mweo imõn ak mweo imõn jemen
[Pija eo ilo peij 25]
Elikin juõn mare me ej lor manit ko an ailiñ eo, Ri Christian ro remaroñ kõnan bwe en walok juõn katak ilo Kingdom Hall eo