Jehovah ej “Lelok Jitõb Kwojarjar ñõn Ro Otemjej rej Kajitõk Iben”
“Inem elañe komeo dri nana, kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?”—LUK 11:13.
1. Ñããt eo jej aikwij bõk jibañ jen jitõb kwojarjar eo?
‘IJJAB maroñ kijenmij kin men in kin kajur eo aõ make. Ikijen jibañ eo jen jitõb kwojarjar inaj maroñ kijenmij kin melejoñ in!’ Kwonañin ke kar bõk kain eñjake rot in? Enañin aolep Ri Christian ro ej eindein air lemnak. Bõlen kar eindein ñan kwe elikin am bõk juõn nañinmij ekauwatata. Ak bõlen kar ilo ien eo ke eo beleõm ear mij. Ak bõlen kar ilo ien eo ke eñjake in mõnõnõ eo am ear oktak im kiõ elap am buromõj im kõnan ebwer. Ilo ien ko elap am eñtan ilo mour, bõlen kwar lemnak bwe kwoj mour wõt kinke jitõb kwojarjar eo an Jehovah ear lewõj “maroñ eo e kanuij lap.”—2 Dri Korint 4:7-9; Sam Ko 40:1, 2.
2. (a) Ta aitwerõk ko Ri Christian ro remol rej jelmae? (b) Ta kajitõk ko jenaj uaki ilo katak in?
2 Ri Christian ro remol rej aikwij kijenmij kin ijjibed im jumae ko rej laplok wõt ilo lal in enana ilo ran kein. (1 Jon 5:19) Bareinwõt, Satan Devil eo ej tarinaik aolep ri kalor ro an Christ, ro im rej “kejbãrok kien ko an Anij, im kennan an Jisõs ibeir.” (Reveles̃õn 12:12, 17) Eñin unin, an laplok ad aikwiji jibañ eo jen jitõb eo an Anij kiõ jen mokta. Ta eo jej aikwij kõmmane bwe en laplok ad bõk jitõb kwojarjar eo an Anij? Im etke jemaroñ liki bwe elap an Jehovah mõnõnõ in kakajur kij ñe jej jelmae melejoñ ko? Jemaroñ lo uak ko ñan kajitõk kein ilo wanjoñok ko ruo an Jesus.
Jab Jokwod Ad Jar
3, 4. Ta wanjoñok eo Jesus ear kwalok, im ewi wãwen ear jerbale ñan jar?
3 Juõn ian ri kalor ro an Jesus ear kajitõk: “Iroij, kwon katakin kim kin jar.” (Luk 11:1) Ñan uak, Jesus ear lelok ñan ri kalor ro an ruo wanjoñok ko. Wanjoñok eo kein kajuõn kar ikijen juõn emaan eo ej karuwaineneik juõn ri lotok, im eo kein karuo ej ikijen juõn jemen eo ej roñjake nejin. Jen etale wanjoñok kein ruo.
4 Jesus ear ba: “Elañe juõn iami enaj kar ilok ñõn mweo imõn eo jeran ilo lukõn boñ im ba ñõne, ‘Jera, imaroñ ke murik jilu loaf in bread ibbam? Eor juõn jera eo ej kab itaktok mweo imõ jen ke ear ejjerakrõk, ak ejjelok jabdrewõt mõñã bwe in lelok ñõne!’ Im elañe jeram enaj uak jen iloan mweo imõn, ‘Kwon jab kabnõnõik iõ! Emwij aõ lake mwe, ña im ajiri rã nejũ kimij kiki, im ijjab maroñ jerkak im lewõj jabdrewõt ñõn yuk!’ Innem ekijkan? Ij jiroñ kom, jekdron ñe emakoko in jerkak im lewõj bread ñõn yuk kinke kwoj jeran, ak kin am jab mõk in akwelab enaj jerkak im lewõj jabdrewõt am aikwij.” Inem Jesus ear kamelele kin ewi wãwen wanjoñok in ej jerbal ñan jar, ilo an ba: “Innem ij ba ñõn kom: Kajjitõk, im kom naj bõke; kabbukõt, im kom naj loe; kallallal, im aor enaj bellok ñõn kom. Bwe ro otemjej rej kajjitõk renaj bõk, im eo ej kabbukõt enaj loe, im aor enaj bellok ñõn eo ej kallallal.”—Luke 11:5 -10.
5. Wanjoñok eo kin emaan eo ejjab mõk in akwelap ej katakin kij bwe en ewi lemnak eo ad ñe jej jar?
5 Wanjoñok in ealikar kin juõn emaan eo ej akwelap ej kwalok kin en ewi lemnak eo ad ñe jej jar. Lale bwe Jesus ej ba bwe emaan eo ear lo tõbrak ñan bõk aikwij ko an kin an “jab mõk in akwelab.” (Luke 11:8) Nan in Greek eo rar ukõte einwõt “jab mõk in akwelab” ej walok juõn wõt alen ilo Bible eo. Ej itok jen juõn nan eo ej melelen “ejaje jook” ak emejel kilin einwõt kilin liele. Jet ien jaje jook emaroñ juõn kadkad enana. Bõtab, ñe jej kajerbal nan in jab jook ak emejel kilin kin juõn un emõn, emaroñ juõn kadkad emõn. Kar eindein emaan eo ilo wanjoñok in. Ear jab jook in bar kajitõk elõñ alen kin ta eo ej aikwiji. Kinke Jesus ej kwalok kin emaan in einwõt juõn wanjoñok ñan kij, ñe jej jar jen jab ãliklik ak jook in bar kajitõk elõñ alen. Jehovah ekõnan bwe jen ‘wõnmanlok im kajitõk, wõnmanlok im bukõte, wõnmanlok im kallallal.’ Ilo uak, enaj “lelok Jitõb Kwojarjar ñõn ro otemjej rej kajitõk iben.”
6. Ilo ran ko an Jesus, ewi kar lemnak eo air kin manit in karuwaineneik armij?
6 Jesus ejjab kwalok wõt kin ewi wãwen ad aikwij jar—ilo ad jab mõk in jar—ak ear bareinwõt kwalok kin etke jej aikwij in kõmmane. Ñan lukkun melele ilo alikar kin katak in, jej aikwij lemnak kin ro rar roñjake Jesus ke ear konono kin wanjoñok in kin emaan eo ejjab mõk in jar im ewi wãwen rar watõk manit eo kin karuwaineneik armij. Elõñ eon ko ilo Bible rej kwalok bwe ilo ien ko etto, manit eo ñan lale aikwij ko an ri lotok ro kar juõn eo elukkun aorõk, elaptata ibben ri karejar ro an Anij. (Jenesis 18:2-5; Dri Hibru 13:2) Ear juõn men ekajookok elañe rar likjap in karuwaineneik armij. (Luk 7:36-38, 44-46) Kin men in, jen bar etale bwebwenato eo an Jesus.
7. Etke leo ilo wanjoñok eo an Jesus ear jab jook in kworuje jeran?
7 Ilo wanjoñok eo juõn ri lotok ej itok ñan mweo imõn leo ilo lukwõn boñ. Buruen leo ej kamakiti bwe en najidik ri lotok eo an ak ear ejelok jabdewõt men ear maroñ “likite iman.” Ekkar ñan lemnak eo an, ien eo ear juõn ien ejidimkij! Ej aikwij bõktok jet bilawã kiõ, jekdon jete wõnãn ej aikwij kõllã ak ta eo ej aikwij kõmmane ñan bõktoki. Inem ej etal ñan mweo imõn juõn jeran im ilo an beran ak jab jook ej kworuje. Ej lamõj im ba, “Jera, kwon letok ñõn iõ jilu ion bred.” Ejjab bõjrak in kajitõk mae ien ej bõk men eo ej aikwiji. Enaj juõn ri karuwainene emõn elañe enaj wõr bread ibben ñan an lelok.
Elaplok Ad Aikwiji—Naj Laplok Ad Kajitõk Kake
8. Ta eo enaj kamakit kij ñan ad kate wõt im jab mõk in jar kin jitõb kwojarjar?
8 Ta eo wanjoñok in ej kwalok kin unin ad aikwij jab mõk in jar? Emaan eo ear jab mõk in kajitõk kinke ear lemnak bwe ear juõn men in aikwij bwe en wõr bread ibben ñan an maroñ kajejjet jerbal eo an einwõt juõn ri karuwainene emõn. (Aiseia 58:5-7) Elañe ear ejelok bread ibben, enaj kar likjap jen an juõn ri karuwainene emõn. Ilo ejja wãwen dein lok wõt, kinke jejelã bwe jej aikwiji jitõb kwojarjar eo ñan kajejjet jerbal eo ad einwõt Ri Christian ro remol, jej jar wõt ñan Anij, im kajitõk kin jitõb eo an. (Zechariah 4:6) Kinke elañe ejjab bed ibbed, jenaj likjap. (Matu 26:41) Jen wanjoñok in kwomaroñ ke lo ta men eo eaorõk jej aikwij kõmmane? Elañe jej watõk bwe jitõb eo an Anij ej juõn men jelukkun aikwiji, jenaj kate im jab bõjrak jen ad kajitõk kake.
9, 10. (a) Kwalok juõn wanjoñok kin unin ad aikwij kate im jab mõk in kajitõk ibben Anij kin jitõb eo an. (b) Ta kajitõk eo jej aikwij kajitõkin kij make kake, im etke?
9 Ñan jerbale katak in ilo mour eo ad ilo ran kein, jen baj ba bwe juõn uan family eo am ej bõk juõn nañinmij ilo lukwõn boñ. Kwonaj ke kar kworuji juõn doctor bwe en jibañ yuk? Kwojamin kõmman eindein elañe jidik wõt an armij eo nañinmij. Bõtab, elañe menono eo an ej bõjrak jen an jerbal, kwojamin ãliklik in kir doctor eo. Etke? Kinke ej bed ilo kauwatata kiõ. Kwoj kile bwe ej aikwij jibañ jen juõn doctor ekabel. Elañe kwojjab kajitõk kin jibañ enaj mij.Ejja wãwen dein, Ri Christian ro remol rej bed ilo juõn wãwen ekauwatata. Emol bwe Satan Devil eo ej einwõt juõn “laiõn erorror,” im ekõnan kañ kij. (1 Piter 5:8) Ñan ad kajur wõt ilo jitõb, jej aikwiji jitõb eo an Anij ñan jibañ kij. Mour eo ad emaroñ kauwatata elañe jejjab kajitõk kin jibañ jen Anij. Kin men in, jen jab mõk in kajitõk ibben Anij bwe en letok jitõb kwojarjar eo an. (Dri Epesõs 3:14-16) Ilo ad kõmman eindein jenaj maroñ debij wõt kajur eo jej aikwiji ñan ‘kijenmij ñan jemlokin.’—Matu 10:22; 24:13.
10 Kin men in ej juõn men eaorõk ñan kij bwe jen bõjrak jidik im kajitõkin kij make, ‘Ilo mol, ewi joñan an ikutkut aõ jar?’ Kememej bwe, ñe jej lukkun kile bwe jej aikwij jibañ jen Anij, enaj laplok ad jar im kajitõk kin jitõb kwojarjar eo.
Ta eo Ej Kamakit Kij bwe Jen Jar ilo Liki?
11. Ewi wãwen Jesus ear jerbale wanjoñok eo kin juõn jemen im nejin ñan ien jar?
11 Wanjoñok eo an Jesus kin emaan eo ejjab mõk in akwelap ej kalikar kin ta lemnak eo an eo ej jar—ri tõmak eo. Wanjoñok eo kein karuo ej kalikar kin lemnak eo an eo ej roñjake jar ko—Jehovah Anij. Jesus ear kajitõk: “Eor ke iami lõma, enaj kar lelok ñõn nejin juõn serpent ñe ej kajjitõk eek? Ak ñe ej kajjitõk lib kom naj lelok juõn medrebeb ke?” Jesus ear wõnmanlok im jerbale wanjoñok eo im ba: “Meñe kom ri nana, ak kom jelã lelok men ko remmõn ñõn ro nejimi. Innem enaj kanuij lablok an Jememi ilõñ lelok Jitõb Kwojarjar ñõn ro rej kajjitõk ibben.”—Luke 11:11-13.
12. Ewi wãwen wanjoñok eo kin juõn jemen eo ej roñjake nejin ñe ej kajitõk kin juõn men ej kalikar kin mõnõnõ eo an Jehovah ñan uaki jar ko ad?
12 Ikijen wanjoñok in kin juõn jemen ke ear uake nejin, Jesus ej kalikar kin ewi lemnak eo an Jehovah kin ro rej jar ñan e. (Luk 10:22) Moktata, lale kin oktak eo. Einjuõn jen emaan eo ilo wanjoñok eo kein kajuõn me ear makoko in lelok jibañ, Jehovah ej einwõt juõn jemen ak jinen ej yokwe nejin im ej bojak in jibañ nejin. (Sam Ko 50:15) Bareinwõt Jesus ej kalikar kin ewi lemnak eo an Jehovah kin kij ilo an keidi juõn jemen ñan Jemed ilañ. Ej ba bwe elañe juõn jemen ion lal, meñe e “dri nana” kin an jolet jerawiwi, ej lelok juõn men in lelok emõn ñan nejin, enaj laplok ad kõtmene bwe Jemed ilañ, kin an joij, enaj letok jitõb kwojarjar ñan family eo an rej kabuñ ñan e!—Jemes 1:17.
13. Ta eo jemaroñ liki ñe jej jar ñan Jehovah?
13 Ta eo jemaroñ katak jen wanjoñok in? Jemaroñ liki bwe ñe jej kajitõk ibben Jemed ilañ kin jitõb kwojarjar eo, elap an mõnõnõ in uake jar eo ad. (1 Jon 5:14) Ñe jej jar ñan e elõñ alen, Jehovah ejamin ba: “Kwon jab kabnõnõik iõ! Emwij aõ lake mwe.” (Luk 11:7) Jen men in, Jesus ear ba: “Kajjitõk, im kom naj bõke; kabbukõt, im kom naj loe; kallallal, im aor enaj bellok ñõn kom.” (Luke 11:9, 10) Aet, Jehovah “ej ebak ñõn ir otemjej rej kir ñõn E.”—Sam Ko 145:18.
14. (a) Ta lemnak eo ebwid ej kainebataik jet armij ro rej jelmae melejoñ ko? (b) Ñe jej jelmae melejoñ ko, etke jemaroñ jar ilo liki ñan Jehovah?
14 Bareinwõt wanjoñok eo an Jesus kin juõn jemen ej yokwe nejin ej kalikar bwe emõn eo an Jehovah elaplok jen emõn eo an jabdewõt jemen ak jinen ion lal. Inem, jen jab lemnak bwe melejoñ ko jej jelmaiki ej kwalok bwe Anij ejjab buñburuen kake kij. Ri kijirãt eo ad elap, Satan, ekõnan bwe jen bõk kain lemnak rot in. (Job 4:1, 7, 8; Jon 8:44) Ejelok bedbed ilo Bible eo ñan ad ekajete kij make. Jehovah ejjab kabo kij kin “men ko renana.” (Jemes 1:13) Ejjab letok men ko rej kaeñtan im kõmetak kij. Jemed ilañ ej letok “men ko remõn ñõn ro rej kajitõk iben.” (Matu 7:11; Luk 11:13) Emol, ñe elaplok ad kamolol kin emõn eo an Jehovah im an mõnõnõ in jibañ kij, enaj laplok ad jar ñan e ilo liki. Ñe jej kõmman eindein, jenaj bareinwõt kwalok lemnak ko einwõt ri jeje sam eo me ear jeje: “A emol Anij e ar roñjake iõ; E ar lale ainiken aõ jar.”—Sam Ko 10:17; 66:19.
Ewi Wãwen Jitõb Kwojarjar eo Ej Ri Jibañ eo Ad
15. (a) Ta kallimur eo Jesus ear kõmmane ikijen jitõb kwojarjar eo? (b) Ta wãwen eo jitõb kwojarjar eo ej jibañ kij?
15 Mokta wõt jen an kar mij, Jesus ear bar elij kallimur eo ear kwalok ilo wanjoñok ko an. Ke ear konono kin jitõb kwojarjar eo, ear jiroñ ri jilek ro an: “I naj jar im kajitõk iben Jema, im E naj lewoj ñõn kom bar juõn Dri Kainemõn, bwe En ber ibemi in drio.” (Jon 14:16) Inem Jesus ear kallimur bwe ri jibañ eo, ak jitõb kwojarjar eo, enaj bed ibben ri kalor ro an ilo ran ko renaj itok, ekoba ran kein ad. Ta juõn ian wãwen ko raorõk rainin me jej lo kain jurake rot in? Jitõb kwojarjar eo ej jibañ kij ñan kijenmij iumin elõñ kain melejoñ ko. Ewi wãwen? Ri jilek Paul, eo me ear jelmae elõñ melejoñ ko, ear kalikar ilo juõn letter ñan Ri Christian ro ilo Corinth kin ewi wãwen jitõb eo an Anij ear jibañ e. Jen lale ilo tukadu kin ta eo ear jeje kake.
16. Ewi wãwen ad maroñ bed ilo ejja wãwen eo wõt Paul ear bed ie?
16 Moktata, ilo alikar Paul ear jiroñ ri tõmak ro mõttan bwe ear kijenmij kin juõn melejoñ kin “juõn kãliklik ilo [kõniekin].” Inem, ear ba: “I ar akwelap ñõn Iroij [Jehovah] kin men in alen jilu, bwe en joko jen iõ.” (2 Dri Korint 12:7, 8) Meñe Paul ear akwelap ñan Anij bwe en jolok men eo ear kaeñtan e, ear bedwõt. Bõlen kwoj bed ilo juõn melejoñ einlok wõt in rainin. Einwõt Paul, kwar niknik wõt ilo jar im ilo liki, kwar kajitõk ibben Jehovah ñan jolok melejoñ eo. Bõtab, meñe kwar kajitõk elõñ alen, abañ eo ej bedwõt. Ej melelen ke bwe Jehovah ear jab uake jar ko am im jitõb eo an ejjab jibañ yuk? Jaab ñan jidik! (Sam Ko 10:1, 17) Lale kin ta eo ri jilek Paul ear ba tokelik.
17. Ewi wãwen Jehovah ear uaki jar ko an Paul?
17 Ñan uake jar ko an Paul, Anij ear jiroñ e: “Aõ joij e bwe ñõn yuk, bwe Aõ kajur e wãppenlok ilo mõjino.” Paul ear ba: “Inem I naj kanuij mõnõnõ in kimjãje kin mõjino ko aõ, bwe kajur an Anij en ber ioõ.” (2 Dri Korint 12:9; Sam Ko 147:5) Inem, Paul ear lo bwe ikijen Christ, kajur eo an Anij ear kalibubuik im kejbãrok e einwõt juõn em nuknuk. Ran kein, Jehovah ej uaki jar ko ad ilo ejja wãwen in lok wõt. Ej erlokwe men in kejbãrok eo an im kalibubuik ri karejar ro an einwõt juõn em nuknuk.
18. Etke jemaroñ kijenmij iumin melejoñ ko?
18 Emol bwe, juõn em nuknuk ejjab kabõjrak wõt ko jen an wõtlok jen lañ ak kõto eo, ak ej kejbãrok kij jen men kein. Eindein, men in kejbãrok eo jen “kajur eo an Christ” ejjab kabõjrak melejoñ ko jen air buñõt kij ak abañ ko jen air kabañ kij. Ak, ej letok kejbãrok ilo jitõb nae men ko rej kaeñtan kij ilo lal in im jumae ko jen iroij eo an, Satan. (Reveles̃õn 7:9, 15, 16) Kin men in, meñe kwoj bed ilo juõn melejoñ ‘etto an bed,’ kwomaroñ liki bwe Jehovah ejelã kin melejoñ ko am im ear uake “ainiken am lamij.” (Aiseia 30:19; 2 Dri Korint 1:3, 4) Paul ear jeje: “Anij e tiljek, im E jamin likit bwe ren kabo kom elap jen ami maroñ; a ilo men in kabo E naj kõmõn ial in ko, bwe komin maroñwe.”—1 Dri Korint 10:13; Dri Pilippai 4:6, 7.
19. Ta eo kwoj aikwij beek ilo buruõm ñan am kõmmane, im etke?
19 Emol, bwe “ien ko renana” rej alikar ilo “ran [kein] eliktata” an lal in enana. (2 Timote 3:1) Meñe eindein, ri karejar ro an Anij remaroñ kijenmij wõt ilo ien kein. Etke? Kinke jitõb kwojarjar eo an Anij ej jurake im kejbãrok kij, im Jehovah emõnõnõ in lelok ñan aolep ro rejjab mõk in kajitõk kake im ilo liki. Inem, jen beek ilo buruõd ñan ad jab bõjrak in jar kin jitõb kwojarjar eo ran otemjej.—Sam Ko 34:6; 1 Jon 5:14, 15.
Ewi Wãwen Kwonaj Uak?
• Ta eo kwoj aikwij kõmmane ñan bõk jitõb kwojarjar eo an Anij?
• Etke jemaroñ liki bwe Jehovah enaj uaki jar ko ad ikijen jitõb kwojarjar eo?
• Ewi wãwen jitõb kwojarjar eo ej jibañ kij ñan kijenmij iumin melejoñ ko?
[Pija eo ilo peij 13]
Ta eo jemaroñ katak kake jen wanjoñok eo an Jesus kin emaan eo ear jab mõk in akwelap?
[Pija eo ilo peij 14]
Kwoj jar wõt ke im jab bõjrak in kajitõk kin jitõb kwojarjar eo an Anij?
[Pija eo ilo peij 15]
Ta eo jej katak kake kin Jehovah jen wanjoñok eo kin juõn jemen ej yokwe nejin?