Nan eo an Jehovah Ej Mour Wõt

Katak ko Relap Jen Book in Aiseia​—II

AISEIA ilo tiljek ej kõmmane jerbal eo an einwõt juõn ri kanan. Ennan ko an nae bwij ko joñoul bwijin ailiñ in Israel emwij air jejjet im mol. Ak kiõ ebar wõr juõn an ennan kin ilju im jeklaj eo an Jerusalem.

Jikin kwelok in Jerusalem enaj jeebeplok, im armij ro rej jokwe ie naj bõk ir ñan kamakoko. Bõtab, jeebeplok eo an ejamin ñan indio. Elikin juõn ien, kabuñ emol enaj bar jeblak. Eñin ennan eo ilo Aiseia 36:1–66:24.a Jemaroñ bõk tokjen jen ad etale kin ta eo ej ba ilo chapter kein kinke elõñ ian kanan ko ilo mõttan in rej jejjet kitieir ilo ran kein ad ak renaj jejjet kitieir ilo ran ko rebed iman. Mõttan in ilo book in Aiseia ej bareinwõt kwalok kin kanan ko rekairujruj kin Messiah eo.

“LO, RAN KO REJ ITOK”

(Aiseia 36:1–39:⁠8)

Ilo yiõ eo kein ka 14 in an King Hezekiah iroij (732 B.C.E.), Ri Assyria ro rej deloñ im kokkure Judah. Jehovah ej kallimur ñan an jojomare Jerusalem. Kauwatata eo kin kokkure ej jemlok ke enjel eo an Jehovah ej mõn 185,000 ri tarinae ro an Assyria.

Hezekiah ej bõk nañinmij. Jehovah ej uake jar eo an im kejmour e, im kobaiklok bar 15 yiõ ko ñan mour eo an. Ke king in Babylon eo ej jilkinlok armij ro an reutiej ñan air lelok nan in nebar ñane, Hezekiah ilo an jab meletlet ej kwalok ñan ir men ko otemjej an raorõk. Aiseia ej bõklok nan eo an Jehovah ñan Hezekiah, im ba: “Lo, ran ko rej itok ñe re naj bõklok ñõn Babilon men ko otemjej ilo mweo imõm, im men eo ro jimam rar kabinoke ñõn ranin; ejelok e naj berwõt, Jeova ej ba.” (Aiseia 39:​5, 6) Jibuki yiõ ko tokelik, kanan in ear jejjet kitien im mol.

Emwij Uaki Kajitõk ko Rej Bedbed ion Bible:

38:8​—Ta kar “jekairu ko” lur eo ear jeblak liklok ioir? Kinke sundial ko (juõn kein joñe awa me ej kajerbal wãwen an meram in al romak ion juõn joor im lur eo ej walok jene) kar kajerbali ilo Egypt im bareinwõt ilo Babylon ilo ebeben eo kein karualitõk B.C.E., jekairu ak jikin uwe kein remaroñ kar jitõñlok ñan kakõlle ko ion juõn kein joñe awa me jemen Hezekiah, Ahaz, ear bõktoke. Ak emaroñ kar wõr juõn jikin uwe iloan mweo imõn king eo. Juõn joor kar likit iturin jikin uwe eo bõlen jidik kin jidik ej kõmman juõn lur ion jekairu ko, im kõmman bwe ren maroñ jelã jete awa.

Tokjen Katak ko ñan Kij:

36:​2, 3, 22. Meñe emwij door lallok e jen jerbal in lolorjake, ak kar kõtlok bwe Shebna en wõnmanlok wõt im jerbal ñan king eo einwõt juõn ri jeje ñan armij eo ear bõk jerbal in lolorjake eo an. (Aiseia 22:​15, 19) Elañe naj kamakit kij jen juõn jerbal in lolorjake ilo dolul eo an Jehovah kin jet un ko, jejjab aikwij ke wõnmanlok wõt ñan ad karejar ñan Anij ilo jabdewõt wãwen ej kõtlok bwe jen kõmmane?

37:​1, 14, 15; 38:​1, 2. Ilo ien ko jej ion eñtan, ej juõn men in meletlet ñan ad oktaklok ñan Jehovah ilo jar im likit ad liki ilo e.

37:​15-20; 38:​2, 3. Ke Jerusalem ear bed ilo kauwatata jen Ri Assyria ro, inebata eo elap an Hezekiah kar eñin bwe buñ eo an Jerusalem enaj kar bõktok nan enana ion ãt eo etan Jehovah. Ke ear jelã bwe nañinmij eo an ekauwatata ñan mour eo an, elõñ lok men ko ear laplok an inebata kaki jen an inebata kin e make. Men eo elap an kar eddo ilo lemnak eo an ej kin ta eo enaj walok ñan lain in king eo an David elañe enaj mij im ejelok nejin. Ear bareinwõt lemnak kin wõn eo enaj tel tarinae eo nae Ri Assyria ro. Einwõt Hezekiah, jej watõk kokwojarjar etan Jehovah im an jejjet kitien karõk eo an bwe ej men eo elaplok an aorõk jen lomor eo ad make.

38:​9-20. Al in an Hezekiah ej katakin kij bwe ejelok juõn men eaorõk lok ilo mour elaplok jen ad maroñ nebar Jehovah.

“RE NAJ KALEKE”

(Aiseia 40:1–59:​21)

Elikin wõt an kar kanan kin jorrãn eo an Jerusalem im kin jibokwe eo ilo Babylon, Aiseia ej kanan kin ien jeblak eo an kabuñ eo emol. (Aiseia 40:​1, 2) “Re naj kaleke [Jerusalem],” Aiseia 44:28 ej ba. Ekjap ko an Ri Babylon naj bõklok ir einwõt ‘men ko rej bõkto bõktak.’ (Aiseia 46:⁠1) Babylon enaj jeebeplok. Men kein aolep rar jejjet kitieir rubuki yiõ ko tokelik.

Jehovah enaj lelok ro ri karejaran einwõt “maram ñõn ro dri ailiñ ko.” (Aiseia 49:⁠6) “Lõñ ko” an Ri Babylon ro, ak ro rej iroij, renaj “jakolok einwõt baat” im armij ro an “renaj mij einwõt loñ ko”; ak ‘lio nejin Zaion dri jebokwe enaj jelat jen kworan kenwan.’ (Isaiah 51:6; 52:⁠2) Ñan ro rej itok ñan e im roñjake, Jehovah ej ba: “Inaj kõmmõne juõn bujen ibbemi eo enaj bed ñõn indrio; Im inaj lewõj ñõn kom menin jerammõn ko iar kallimur kaki ñõn David.” (Isaiah 55:⁠3) Mour ekkar ñan kien ko rewãnik an Anij ej tellok ñan ad lo ‘lañliñ ilo Jehovah.’ (Aiseia 58:​14) Ak ilo ijo iturãjet, bwid ko an armij ro ej ‘kijbil ir jen air Anij.’​—Aiseia 59:⁠2.

Emwij Uaki Kajitõk ko Rej Bedbed ion Bible:

40:​27, 28​—Etke Israel ear ba: “E nojõk aõ ial jen Jeova, im men in ekajete iõ jime e joko jen aõ Anij”? Jet ian Ri Jew ro ilo Babylon remaroñ kar lemnak bwe ear nojak ak Jehovah ear jab lo air eñtan kin jab ekajet jimwe ko. Kar bar kakememej ir bwe Babylon ejjab ettolok jen Ri Kõmanman eo an lalin, eo im ejamin mõk ak kijelok.

43:​18-21​—Etke kar jiroñ ri jibokwe ro rej jeblak bwe ‘komin jab kememej men ko mokta’? Menin ear jab melelen bwe rej aikwij meloklok jerbal in lomor ko an Jehovah ilo ien ko remotlok. Jen an eindein, Jehovah ear kõnan bwe ren nebar e ikijen “juõn men ekãl” me renaj loe, einwõt ial eo air eainemõn ñan Jerusalem, bõlen ikijen juõn ial ekajju ilo ene jemaden. “Jar elap” eo ej itok jen “iñtan eo elap” enaj bareinwõt wõr juõn un ekãl ñan an kaibujuij Jehovah.​​—Reveles̃õn 7:​9, 14.

49:6​—Ewi wãwen Messiah eo ej “maram ñõn ro dri ailiñ ko,” meñe jerbal eo an ijin ion lal kar ñan ro nejin Israel wõt? Ej eindein kin wõt men eo ear walok elikin mij eo an Jesus. Bible eo ej jerbale Aiseia 49:6 ñan ri jilek ro an. (Jerbal 13:​46, 47) Rainin, Christian ri kabit ro, ro im juõn jar elap in ri kabuñ ro rej jibañ ir, rej jutak einwõt “maram ñõn ro dri ailiñ ko,” ñan katakin armij ro “ñõn jemlokõn lõl.”​​—Matu 24:14; 28:​19, 20.

53:10​—Ilo wãwen et Jehovah ear lañliñ ilo an kõttãik nejin? Emaroñ kar lukkun kõmetak Jehovah, Anij eo elap an joij im tiriamokake, ñan an lo an Nejin ejitenburu eñtan. Meñe eindein, ear lañliñ ilo an Jesus mõnõnõ in bokake im kin men otemjej eñtan im mij eo an renaj kõtõbrake.​—Jabõn Kennan Ko 27:11; Aiseia 63:⁠9.

53:11​—Ikijen ta jelãlokjen eo Messiah eo ‘e naj kowãnik elõñ armij’? Jelãlokjen eo im Jesus ear bõke ej ikijen an kar itok ñan lal in, erom juõn armij, im eñtan meñe ñan mij. (Dri Hibru 4:​15) Kin men in ear letok juõn katok in binmour, eo im kar aikwiji ñan jibañ Christian ri kabit ro im jar eo elap ñan air bõk juõn jutak ewãnik iman mejen Anij.​—Dri Rom 5:19; Jemes 2:​23, 25.

56:6​—Wõn ro “drua maijet,” im ilo wãwen et rej “drebij wõt bujen eo [an Jehovah]”? “Ro drua maijet” rej ‘s̃ip ro jet’ an Jesus. (Jon 10:​16) Rej debij bujen eo ekãl ikijen air bokake kien ko rej ekkejellok ibben bujen in, bokake karõk ko rej itok ikijen, im bõk ejja mõñã ko wõt ilo jitõb einwõt ri kabit Ri Christian ro, im rejetak ir ilo jerbal in kwalok im kõmman ri kalor an Ailiñ eo.

Tokjen Katak ko ñan Kij:

40:​10-14, 26, 28. Jehovah ekajur im joij, ekajur im meletlet bõtata, im ekanuij lap an melele ellã jen joñan ad maroñ jelã.

40:​17, 23; 41:29; 44:9; 59:⁠4. Kõtan ko ibben kien im ekjap ko rej ‘men bata.’ Ejelok tokjen ad liki men kein.

42:​18, 19; 43:⁠8. Ilo ad kil mejed jen Nan eo an Anij emwij jeje im kil lojilñid jen nan in jiroñ ko an rej itok ikijen “dri korijer e tiljek im meletlet” ej melelen jej bilo im jaroñroñ ilo jitõb.​—Matu 24:⁠45.

43:25. Jehovah ej jeorlok jerawiwi ko kin tokjen eo ñan e make. Ad rõlok jen ad kamakoko ñan jerawiwi im mij im bõk mour indio ej men eo kein karuo jen kokwojarjar im kaibujuij ãt eo etan Jehovah.

44:⁠8. Jehovah ej bed ilikid, eo ejamin makitkit einwõt juõn dekã ebin. Jejamin aikwij mijak ñan ad kwalok im kennan bwe ej Anij eo Eutiejtata!​—2 Samuel 22:​31, 32.

44:​18-20. Kabuñ ñan ekjap ej kakõllan juõn buru enana. En ejelok jabdewõt men en bõk ijo jikin Jehovah ilo buruõd.

46:​10, 11. Maroñ eo ñan kõmman ‘An bebe jutõk,’ ak, ñan kajejjet karõk eo an, menin ej lukkun kamol bwe Jehovah ej Anij eo Eutiejtata.

48:​17, 18; 57:​19-21. Elañe jej reilok ñan Jehovah kin lomor, ruaklok ñan e, im bokake kien ko an, ainemõn eo ad enaj obrak einwõt den ko rej toor jen juõn river im jerbal ko ad rewãnik einwõt no ko relõñ ilo lometo. Ro im rejjab roñjake im bokake Nan eo an Anij rej “einwõt lometo e limajnono.” Ejelok air ainemõn.

52:​5, 6. Ri Babylon ro ilo bwid rar lemnak bwe Anij eo emol emõjno. Rar jab kile bwe unin an Ri Israel ro bed ilo kamakoko ej kinke Jehovah ear jab buñburuen ibbeir. Ñe jorrãn ej buñõt ro jet, ej menin meletlet ñan ad jab bõk jemlok eo bwe ewõr unin.

52:​7-9; 55:​12, 13. Ewõr jilu un ko unin jej bõk kunad ilo lañliñ ilo jerbal in kwalok im kõmman ri kalor an Ailiñ eo. Nee ko need re wõleo ñan ro ettã burueir ro rej kwuli kin men ko lor jitõb. Jej lo Jehovah ilo ad “jelmae dron,” melelen ewõr juõn kõtan ebake. Bareinwõt jej lañliñ kin jerammõn ko ilo jitõb.

52:​11, 12. Ñan ad maroñ tellokin ñan inek “jãbi ko an Jeova”​—menin letok ko an kin jerbal ekwojarjar​—jej aikwij erreo ilo jitõb im ilo kanniek.

58:​1-14. Kwalok jerbal ko rekwojarjar im wãnik ilo mon ej men bata. Ri kabuñ ro remol rej aikwij obrak kin nan ko rekwojarjar im jerbal ko kin yokwe ro jeiir im jatiir.​—Jon 13:35; 2 Piter 3:⁠11.

59:15b-19. Jehovah ej lale jerbal im makitkit ko an armij im emmakit im ukõt wãwen ko ilo ien eo emwij an karõke.

LIO “NAJ BAREINWÕT JUÕN BOKRÕNAT E WÕLEO”

(Aiseia 60:​1–66:​24)

Ilo an jitõñlok ñan bar jeblak eo an kabuñ emol ilo ien ko etto im bareinwõt ilo ran kein ad, Aiseia 60:1 ej ba: “Kwon jerkak, kwon romak; bwe am maram E mottok, im aibujuij in Jeova e ar tak iom.” Zion “naj bareinwõt juõn bokrõnat e wõleo ilo pein Jeova.”​—Aiseia 62:⁠3.

Aiseia ej jar ñan Jehovah kin ri ailiñ eo an, ro im renaj ukwelok jen bwid ko air ilo ien eo rej jibokwe ilo Babylon. (Aiseia 63:⁠15–64:​12) Elikin an kwalok oktak eo ikõtan ri karejar ro remol im ri karejar ro rewan, ri kanan eo ej kwalok kin wãwen an Jehovah naj kajerammõn ro rej karejar ñan E.​—Aiseia 65:1–66:⁠24.

Emwij Uaki Kajitõk ko Rej Bedbed ion Bible:

61:​8, 9​—Ta “bujen in drio,” im wõn ro “ineir”? Eñin bujen eo ekãl me Jehovah ear kõmmane ibben Christian ri kabit ro. Im ro “ineir” rej ‘sheep ko jet’​—million ro im rej eoroñ im emmakit ñan ennan eo an Christian ri kabit ro.​​—Jon 10:⁠16.

63:5​—Ewi wãwen illu eo an Anij ej jebõk e? Illu eo an Anij ej juõn eñjake ewõr an maroñ ion​—illu eo an ewãnik. An illu elap ej jurak e im kamakit e ñan an bõktok ekajet eo an ewãnik

Tokjen Katak ko ñan Kij:

64:⁠6. Armij ro rejjab wãppen rejjab maroñ lomoren ir make. Ikijen air kõllã wõnãn jerawiwi ko air, jerbal ko air rewãnik ejelok tokjeir einwõt nuknuk ko retton.​—Dri Rom 3:​23, 24.

65:​13, 14. Jehovah ej kajerammõn ro ri karejaran retiljek, im kabwe aikwij ko air ilo jitõb.

66:​3-5. Jehovah ej kitõtõkake jerbal in mon.

“Komin Mõnõnõ”

Kanan ko kin bar jeblak eo an kabuñ emol ear juõn nan in kainemõn ñan Ri Jew ro retiljek me rar jibokwe ilo Babylon! “Komin mõnõnõ,” Jehovah ear ba, “im lõñliñ in drio kin men ko Ij kõmõni; bwe lo, Ij kõmõn Jerusalem men in mõnõnõ, im armij ro an bwe ren lõñliñ.”​—Aiseia 65:⁠18.

Kij bareinwõt jej mour ilo juõn ien me marok ej kalibubuik lal im ailiñ ko kin juõn marok jiliñliñ. (Aiseia 60:⁠2) “Ien ko renana” rej walok kiõ. (2 Timote 3:⁠1) Kin menin, ennan eo an Jehovah kin lomor me ej bed ilo Bible eo ilo book in Aiseia ej juõn nan in rejañ elap ñan kij.​—Dri Hibru 4:⁠12.

[Kamelele ko itulal]

[Pija eo ilo peij 28]

Kwo jelã ke un eo elap kin etke Hezekiah ear jar bwe en bõk lomor jen Ri Assyria ro?

[Pija eo ilo peij 31]

“Re nañin wõlio ilo tol ko neen eo ej bõktok nan emõn!”