Jutak Bin Ñe juõn Ajiri Ej Jumae

JUÕN Christian kõrã me jenaj naetan Joy ear kate ñan katakin ladik eo nejin bwe en rittolok im yokwe Jehovah Anij. Ke ear tõbar ien jodikdik, likao in ear jumae im illok jen mweo imõn. “Ear men eo elaptata an kõmetak buruõ iar iione,” Joy ej ba. “Iar eñjake an rup buruõ im buromõj. Lemnak nana ko rar kabwer iõ.”

Bõlen kwe bareinwõt kwar kate yuk ñan katakin ro nejõm ñan air yokwe im karejar ñan Anij​—ak tokelik juõn ak elõñlok iair rar illok jen katak ko am. Ewi wãwen kwomaroñ kijenmij kin juõn wãwen ekabwerer einwõt in? Ta eo enaj jibañ yuk ñan jutak bin ilo jerbal eo am ñan Jehovah?

Ke Lõmaro Nejin Jehovah Rar Jumae

Buñten nee eo moktata ej ñan kile bwe Jehovah emelele kin eñjake eo am. Ilo Aiseia 49:​15, jej konono: “Juõn kõra e maroñ meloklok niñniñ eo an bwe en jab tiriamo kake ladrik e nejin lojen ke? Aet rein re maroñ in meloklok, a I jamin meloklok yuk.” Aet, Jehovah ewõr eñjake ko ibben einwõt ko ekkã an wõr ibben ro jemen im jinen. Inem, lemnak kin joñan an kar mõnõnõ ke aolep enjel ro nejin rar nebar im karejar ñan e. Ke ear uake ri patriarch eo Job “jen aire eo,” Jehovah ear kememej ien ko rekamõnõnõ ibben family in jitõb ro an, ilo an ba: “Kwar ber ia ke I ar likit loñtõk ko loñtõn lõl? . . . Ke iju ko in ran rar jimor al, im ro nejin Anij otemjej rar lamij kin lõñliñ?”​—Job 38:​1, 4, 7.

Tokelik, juõn ian enjel ro rewãppen nejin Anij eo emol ear jino jumae im erom Satan, melelen ilo Hebrew “Ri Jumae.” Jehovah ear bareinwõt lo an eo nejin moktata ijin ion lal, Adam, im lio belen ewãppen, Eve, koba ibben ilo jumae eo. (Jenesis 3:​1-6; Reveles̃õn 12:⁠9) Tokelik, enjel ro jet nejin Anij “r’ar illok jen jikiir” im jumae Anij.​—Jud 6.

Jeje ko ilo Bible rejjab jiroñ kij kin wãwen kar eñjake eo an Jehovah ke jet ian ro nejin rewãppen rar lor ial in jumae. Bõtab, Bible eo ej ba ilo alikar: “Im Jeova e ar lo bwe elap nana ko an armij ion lõl, im bwe lemnok otemjej i buruen renana wõt aolepen ien. Im Jeova e ar ukwelok iben kin An kar kõmõnmõn armij ion lõl, im e buromõj buruen.” (Jenesis 6:​5, 6) Jumae eo an armij ro Jehovah ear kãlet ir, Israel, ear bareinwõt “kaburomõj” e.​—Sam Ko 78:​40, 41.

Ejelok bere bwe Jehovah ewõr an tiriamo kin ro jemen im jinen me rej eñtan kin buromõj im metak ko rej itok jen tokjen mwil nana eo an ro nejiir rebõt. Ilo Nan eo an, Bible eo, ear letok nan in kakabilek im nan in rejañ ko remõn ñan jibañ ro jemen im jinen ñan air kijenmij kin wãwen ko rej jelmaiki. Anij ear rejañ ir ñan jolok inebata ko air ion, ñan kõttãik ir, im ñan jutak bin nae Satan Devil eo. Jen lale ewi wãwen am lor nan in kakabilek in emaroñ jibañ yuk ñan jutak bin ñe eo nejõm ej jumae.

Jolok Inebata ko Am Ion Jehovah

Jehovah ejelã bwe ro jemen im jinen elap air inebata ñe rej lemnak bwe ro nejiir rej bed ilo kauwatata ñan kokkure ir make ak bwe ro jet rej kajorrãn ir. Ri jilek Peter ear kwalok kin juõn wãwen jemaroñ kijenmij kin men in im kin inebata ko jet. Ear jeje: “Im komin likit ami inebata otemjej na iben [Jehovah], bwe Ej ierki kom.” (1 Piter 5:⁠7) Etke nan in rejañ im kallimur in elaptata an jejjet ñan ro jemen im jinen juõn ajiri ebõt im ej jumae?

Ke eo nejõm ear dik, kwar kate ñan kejbãrok e jen jorrãn ko, im ekkã an kar uak ilo emõn ñan tel eo am eyokwe. Bõtab, ke ear rittolok ear diklok kilam ion, ak kõnan eo am ñan kejbãrok e jen jorrãn ko ear jab diklok. Ilo mol, bõlen ear laplok.

Kin men in, ñe eo nejõm ej jumae im iion jorrãn ko ilo jitõb, eñjake, ak ilo enbwin, bõlen kwoj bõk lemnak eo bwe ewõr ruõm. Joy, eo kar konono kake mokta, ear bõk lemnak in. Ej ba: “Kajjojo ran, iar lemnak kin men ko rar walok ilo ien ko remotlok ñan lale ta eo ebwid iar kõmmane.” Elaptata ilo ien kein Jehovah ekõnan bwe kwon “likit [am] inebata otemjej na iben.” Elañe kwoj kõmmane, emaroñ jibañ yuk. “Kwon jolok inek eo am ion Jeova,” ri jeje sam ear ba, “im E naj baur yuk: E jamin likit ro remõn bwe ren makõtkit.” (Sam Ko 55:​22) Joy ear iion kainemõn rot in. Ej kamelele: “Iar konono ibben Jehovah kin aolep men ko rar bed ilo buruõ. Iar kwalok aolep eñjake ko aõ remũlal, im ear lap an kainemõn iõ.”

Kinke kwoj juõn jemen ak jinen ejjab wãppen, bõlen kwar kõmman bwid ko ke kwar kakajiririk eo nejõm. Ak kwojjab aikwij lemnak wõt kin bwid kein. Alikar, Jehovah ejjab, kinke ri jeje sam iumin kakõrmol an Anij ear al: “Elañe Kwe, O Jeova, kwo naj kakõle jerawiwi ko, O Iroij, wõn e naj jutõk?” (Sam Ko 130:⁠3) Jekdon elañe kwoj juõn jemen ak jinen eo ear jab kõmman bwid ko, eo nejõm emaroñ kar jumae wõt. Inem kwalok eñjake ak lemnak ko am ñan Jehovah ilo jar, im enaj jibañ yuk ñan kijenmij. Bõtab, elañe kwokõnan jutak bin ilo am karejar ñan Jehovah im bõprae am jorrãn jen kõmman ko an Satan, elaplok men ko kwoj aikwij kõmmani.

Kõttãik Yuk

“Inem komin kõtãik kom iomin pein Anij ekajur,” Peter ear jeje, “bwe En koutiej kom ilo ien ekar.” (1 Piter 5:⁠6) Etke kwoj aikwij kwalok ettã buru ñe eo nejõm ej jumae? Ijellokin an kõmetak buruõm im kõmman bwe kwon eñjake bwe ewõr ruõm, juõn ajiri ebõt im jumae emaroñ kajook yuk. Kwomaroñ inebata bwe kõmman ko an eo nejõm rar kokkure etan family eo, elaptata elañe congregation eo ear aikwij bukwelok. Eñjake in jook emaroñ kabwer yuk jen am bed ilo kwelok ko an Christian.

Ñe kwoj kamadmõde juõn wãwen einwõt in, kwoj aikwij kwalok meletlet emõn. Jabõn Kennan Ko 18:1 ej kakkõl: “Eo ej mõkelok ian, ej kabukot kõnan eo an, im ej lej nae meletlet otemjej e keie.” Ilo am keini in bed ilo kwelok ko an Christian meñe kwoj buromõj, kwonaj maroñ bõk nan in katakin im rejañ ko raorõk. “Ilo jinoin, iar jab kõnan lo jabdewõt armij,” Joy ear ba. “Ak iar kakememej iõ make kin aorõkin manit eo aõ kin men ko lor jitõb. Bareinwõt, elañe iar bedwõt ilo mweo, inaj kar lemnak wõt kin abañ ko aõ. Kwelok ko rar jibañ iõ ñan kalmenlokjen wõt kin men ko rekõketak ilo jitõb. Elap aõ mõnõnõ bwe iar jab kamakelok iaõ im likjap jen aõ bõk tokjen jen rejetak eo an ro jeiõ im jatiõ ilo jitõb.”​—Dri Hibru 10:​24, 25.

Kememej, bareinwõt, bwe kajjojo uan juõn family ej aikwij make “inek kwonan” einwõt juõn Ri Christian. (Dri Galetia 6:⁠5) Jehovah ej kõtmene bwe ro jemen im jinen ren yokwe im katakin ro nejiir. Ej bareinwõt kõtmene bwe ajiri ro ren bokake im kautiej jemeir im jineir. Elañe ro jemen im jinen rej kõmman joñan wõt air maroñ ñan katakin ro nejiir “ilo kaje im kowe an Iroij” renaj bõk juõn ãt emõn ibben Anij. (Dri Epesõs 6:​1-4) Elañe juõn ajiri ej jumae katak ko reyokwe an jemen im jinen, ãt eo etan ajiri eo enaj jorrãn. “Aet, juõn ajiri ej mõke kwalok e kin kõmõn ko an, elañe jerbal eo an erreo, im elañe e jime,” Jabõn Kennan Ko 20:11 ej ba. Jumae eo an Satan ear jab kokkure etan Jehovah ibwiljin ro rejelã mol eo.

Komin Jutak Bin Nae Devil eo

“Komin jadõr, komin ekil,” Peter ear kakkõl. “Dri kijirãte kom, devil eo, einwõt laiõn e rorror, ej etetal wõt im bukot eo ej maroñ in kõñi.” (1 Piter 5:8) Einwõt juõn lion, Devil eo ekkã an kõjjeroroik ro redik im ejelok air iminene. Ilo ien ko etto, lion ko rar etetal ilujen Israel im ear kauwatata ñan menin mour ko jet. Elañe juõn lamb ear jebwãbwe jen bwij eo, enaj kar bidodo an lion eo kañe. Juõn sheep kokõrã emaroñ likit mour eo an ilo kauwatata ñan an kajeoñ in kejbãrok eo nejin. Bõtab, juõn sheep emõn ded ejjab maroñ jutak nae juõn lion. Kin men in, rar aikwij ri lale sheep ro reberan ñan air kejbãrok bwij eo.​—1 Samuel 17:​34, 35.

Ñan kejbãrok sheep ro an ilo kõkkar jen “laiõn e rorror” eo, Jehovah ear karõk bwe shepherd ro ilo jitõb ren lale bwij eo iumin “S̃eperd elap,” eo Jesus Christ. (1 Piter 5:⁠4) Peter ej lelok nan in kakabilek in ñan maan rein kar jitõñ ir: “Komin s̃eperd bwijin Anij ej ber ibemi, im lale e, jab ilo makoko, a kin ami kõnan, ekar ñõn ankil an Anij; jab kin wõnan dala, a kin ami yokwe.” (1 Piter 5:​1, 2) Kin karejar im jerbal ko ami einwõt juõn jemen ak jinen, shepherd rein renaj maroñ jibañ juõn jodikdik ñan kajimwe ial eo an ilo jitõb.

Ñe Christian shepherd ro rej aikwij lelok kaje ñan eo nejõm ejumae, kwomaroñ kõnan kejbãrok e jen kaje eo. Bõtab, elañe kwoj bõk ial in enaj juõn bwid elap. Peter ej ba: “Komin jutõk jumae im bin [nae Devil eo]”​—jab nae shepherd ro ilo jitõb.​—1 Piter 5:9.

Ñe Kaje Eo Elap

Elañe eo nejõm ejjab ukwelok im ej juõn Ri Christian emwij an baptais, emaroñ bõk kaje eo elaptata​—ñe rej bukwelok jen congregation eo. Kin joñan eo kwonaj maroñ kebak e ej wawa ion ewi dettan im ikijen wãwen ko jet.

Elañe ajiri eo ejjab lukkun ritto im ej jokwe ilo mweo imõm, kwoj aikwij wõnmanlok im lale aikwij ko an ilo kanniek. Ej aikwij bareinwõt bõk katak ko kin mwil emõn im nana, im ej eddo eo am ñan katakin e kin men kein. (Jabõn Kennan Ko 1:​8-18; 6:​20-22; 29:​17) Kwomaroñ aikwij katak Bible ibben, eo ej kitibuj an bõk kunan. Kwomaroñ kareilok e ñan jet eon ko ilo Bible im ñan book ko me “dri korijer e tiljek im meletlet” ej litoki. (Matu 24:​45) Kwomaroñ bareinwõt bõk eo nejõm ñan kwelok ko an Christian im kõmman bwe en jijet ibbam. Kwomaroñ kõmman aolep men kein ilo am kejatdikdik bwe enaj bokake nan in kakabilek ko ilo Bible.

Wãwen eo enaj oktak elañe eo ej bukwelok eritto im ej jokwe ilo bar juõn jikin. Ri jilek Paul ear kakabilek Ri Christian ro ilo Corinth eo etto: “Komin jab kõmao iben juõn armij elañe naetan jimjãn jimjãten im e dri lũñ, ak dri ankwõnak, ak dri kabuñ ñõn ekjõp, ak dri kajirere, ak dri karek, ak dri koaroñ; emõn jab mõña iben juõn einwõt.” (1 Dri Korint 5:​11) Meñe jet ien kwonaj aikwij kebak eo ebukwelok ñan lale jet men in aikwij ko an family eo, juõn Christian jemen ak jinen ej aikwij kate bwe en jab kamao ibben elañe ejjab aikwij.

Ñe eo nejõm ear kõmman bwid ej bõk kaje jen Christian shepherd ro, ejamin juõn men in meletlet elañe kwar karmijete ak kajettokjen bebe eo air ej bedbed ion Bible eo. Elañe kwoj jeb ibben eo nejõm ej jumae, men in ejamin kejbãrok e jen Devil eo. Ilo mol, kwonaj likit ejmour eo am ilo jitõb ilo kauwatata. Ijo turãjet, ilo am jurake jibadbad ko an shepherd ro, kwonaj jutak im “bin ilo [am] tõmak” im kwonaj lelok jibañ eo emõntata ñan eo nejõm.​—1 Piter 5:⁠9.

Jehovah Enaj Jibañ Yuk

Elañe eo nejõm ej jumae, kememej bwe kwojjab make iam. Christian ro jet me ewõr nejiir rar iion ejja men kein wõt. Jekdon ta melejoñ ko jej iioni, Jehovah emaroñ jibañ kij.​—Sam Ko 68:⁠19.

Atartar ion Jehovah ilo jar. Keini am kamao ibben congregation in Christian eo. Jurake kaje eo an shepherd ro. Ilo am kõmman men kein, kwonaj maroñ jutak bin. Im joñok eo am emõn emaroñ jibañ eo nejõm ñan an uak ilo emõn ñan kir eo eyokwe jen Jehovah ñan an jeblaktok ñan ibben.​—Malachi 3:​6, 7.

[Pija ko ilo peij 9]

Bõk kakajur jen jar im congregation in Christian eo