Jen Jimor Leliñlok Etan Jehovah

“O komin koutiej Jeova, im jen jimor leliñlok etan.”​​—SAM 34:⁠3.

1. Ta joñok eo emõn Jesus ear likiti ke ear kõmmane jerbal in kwalok nan eo an ijin ion lal?

ILO boñin Nisan 14, 33 C.E., Jesus im ri jilek ro an rar al im nebar Jehovah ibben don ilo bo eo ilõñin juõn em ilo Jerusalem. (Matu 26:​30) Kar ien eo eliktata Jesus ear maroñ bed im kõmmane menin ibben ri jilek ro an. Bõtab, ear ekkar bwe en kar kajemlok kwelok eo an ibben rein ilo wãwen in. Jen jinoin jerbal in kwalok nan eo an ijin ion lal ñan jemlokin, Jesus ear nebar Jemen im niknik ilo an kwalok kin Etan. (Matu 4:​10; 6:9; 22:​37, 38; Jon 12:28; 17:⁠6) Ilo mol, ear bar eliji nan in kir eo emãnãn an ri jeje sam: “O komin koutiej Jeova, im jen jimor leliñlok etan.” (Sam 34:⁠3) Ej juõn joñok emõn jej aikwij anõke!

2, 3. (a) Ewi wãwen ad jelã bwe Sam 34 ear juõn nan in kanan? (b) Ta eo jenaj etale ilo katak in im eo tok juõn?

² Jet awa ko elikin air al al in nebar ko ibben Jesus, ri jilek John ear lo juõn wãwen elap an oktak. Ear lo an Master eo an im ri nana ro ruo mij ion alal in eñtan ko. Ri tarinae ro an Rome rar bwiloke neen ri nana ro ruo bwe en mõkaj air mij. Bõtab, John ear kwalok bwe rar jab bwiloke neen Jesus. Ke ri tarinae ro rar itok ñan ibben Jesus, emwij an kar mij. Ilo Gospel eo an, John ear kamelele bwe men in ear walok bwe en kajejjet kitien mõttan eo juõn ilo Sam 34: “Ejelok iair im e moruj.”​​—Jon 19:​32-​36; Sam 34:​20, Septuagint.

³ Ilo Sam 34 elõñ point ko jet rekaitoktoklimo ñan Ri Christian ro. Kin menin, ilo katak in im eo tok juõn, jenaj eliji wãwen ko rar bed ilo ien eo David ear jeje sam eo inem etale kobban sam in ekõketak.

Ien eo David ear Ko Jen Saul

4. (a) Etke kar kabiti David einwõt king eo tok juõn an Israel? (b) Etke Saul ear ‘kanuij yokwe’ David?

⁴ Ke David ear dik, Saul ear king ilo Israel. Bõtab, Saul ear oktak im jab bokake im ear luji buñburu eo an Jehovah. Kin un in, ri kanan eo Samuel ear jiroñ e: “Emwij an Jeova kekel kiñ ion Israel jen kwe ranin, im E ar lelok ñõn juõn dri turõm, emõnlok jen yuk.” (1 Samuel 15:​28) Tokelik, Jehovah ear tel Samuel ñan an kabit David, ladik eo ediktata nejin Jesse, ñan an erom king eo tok juõn an Israel. Ilo ejja ien eo wõt, ke kar debij jitõb eo an Anij, King Saul ear eñtan kin eñjake in buromõj. David, juõn eo ekabel ilo kajañjañ, kar bõktok ñan Gibeah bwe en jerbal ñan king eo, im kajañjañ ko an David rar kainemõn Saul, eo me “e ar kanuij yokwe e.”​​—1 Samuel 16:​11, 13, 21, 23.

5. Etke lemnak eo an Saul kin David ear oktak, im ta eo David ear aikwij kõmmane?

⁵ Ke ear motlok elõñ ien ko, Jehovah ear kamol an bed ibben David. Jehovah ear jibañ e ñan an anjo ion ri inea in Philistia eo Goliath im jurake David ke ear itok ñan Israel bwe ren kajerammõn e kin an kabel ilo jelã tarinae. Bõtab, jerammõn ko an Jehovah ion David rar kõmman bwe Saul en ebanban, im ear laplok an dike David. Ruo alen ke David ear kajañjañ ñan Saul, king eo ear jolok made eo an bwe en wãkare. Ilo ien kein jimor, David ear maroñ okõk jen made eo. Ke Saul ear kajeoñ ilo ien eo kein kajilu ñan mõn e, king eo an Israel ilo ran ko renaj itok ear kile bwe ear aikwij ko kin mour eo an. Eliktata, kinke Saul ear wõnmanlok wõt ilo an kate ñan jibwe im mõn e, David ear bebe ñan an bukõt jikin kone ilikin territory eo an Israel.​​—1 Samuel 18:11; 19:​9, 10.

6. Etke Saul ear ba bwe ren mõn aolep ro rej jokwe ilo Nob?

⁶ Ilo ial eo an lok ñan Israel, David ear bõjrak ilo jikin kwelok eo ilo Nob, ijo imõn kabbed eo an Jehovah ear bed ie. Alikar bwe, ilo ien ko eo an David ear wõr jet likao ro rar etal ibbenlok, im David ear kabuk kijeir im kijen. Saul ear roñ bwe priest eo elap ear lelok ñan David im lõmaro mõttan jet mõñã im jãje eo David ear bõke jen Goliath eo emij. Kin an illu, Saul ear kõmman bwe ren mõn aolep ro rej jokwe ilo jikin kwelok eo, koba 85 priest ro.​​—1 Samuel 21:​1, 2; 22:​12, 13, 18, 19; Matu 12:​3, 4.

Bar Juõn Ien Ko Jen Mij

7. Etke Gath ear jab juõn jikin tilekek emõn ñan David?

⁷ Jen Nob, David ear ko 25 mile ko tolok ñan territory eo an Ri Philistine ro im bukõt jikin kone ibben King Achish ilo Gath, bukwon eo an Goliath. Bõlen David ear lemnak bwe Gath enaj kar jikin eo eliktata Saul enaj kar bukõte e ie. Bõtab, ejjabto, ri karejar ro an king eo an Gath rar kile David. Ke David ear roñ bwe rar jelã bwe e eo, “e ar kanuij mijõk Ekish kiñ in Gat.”​​—1 Samuel 21:​10-​12.

8. (a) Ta eo Sam 56 ej jiroñ kij kin wãwen eo ear walok ñan David ke ear bed ilo Gath? (b) Ewi wãwen David ear ko jen an naj kar mij?

⁸ Inem Ri Philistine ro rar jibwe David. Emaroñ kar ilo ien in David ear je sam eo emũlal ilo an kar akwelap ñan Jehovah: “Kwoj likit dren in kemjalal ko aõ ilo boto eo Am.” (Sam 56:8 im nan ko iman in sam eo) Ilo wãwen in ear kwalok liki eo an bwe Jehovah ejamin meloklok an buromõj ak enaj ilo yokwe lale im kejbãrok e. David ear bareinwõt lemnake juõn kõl ñan an mone king eo an Philistia. Ear kõmman einwõt ñe ebwebwe. Ke King Achish ej lo wãwen eo, ear kauweik ri karejar ro an kin air ãñintok lein “euriekak” ñan e. Alikar bwe, Jehovah ear kajerammõn kõl eo an David. David ear illok jen jikin kwelok eo, bar juõn ien ko jen an mij.​​—1 Samuel 21:​13-​15.

9, 10. Kin ta un eo David ear jeje Sam 34, im wõn ro emaroñ kar lemnak kin ir ke ear jeje sam eo?

⁹ Bible eo ejjab ba elañe ro rar rejetake David rar ko ibbenlok ñan Gath ak rar kanuij lale e jen ri kijirãt ro ilo jikin ko rebak ilo Israel. Jekdon ta wãwen eo, emaroñ kar juõn ien koba ibben don ekamõnõnõ ke David ear report ñan ir kin wãwen Jehovah ear bar lomoren e. Ien in ear likit bedbed eo kin Sam 34, einwõt ej kwalok kake ilo nan ko iman in sam eo. Ilo eon ko jiljilimjuõn ilo jinoin sam in, David ej nebar Anij kin an lomoren e im ej kirtok ro rej rejetake ñan koba ibben ilo an kautiej Jehovah einwõt Ri Lomor eo Elap an armij ro An.​​—Sam 34:​3, 4, 7.

¹⁰ David im lõmaro mõttan rar lo jikin kone ilo roñ in Adullam ilo tol ko ilo Israel, enañin joñoul mile ko i rear in Gath. Ijo, Ri Israel ro me rar jab juburueir kin wãwen ko rar walok iumin kien eo an King Saul rar jino itok im kobatok ibbeir. (1 Samuel 22:​1, 2) Ke David ear jeje nan ko ilo Sam 34:​8-​22, emaroñ kar wõr an lemnak kin ir. Nan in kakememej ko ilo eon kein rej bareinwõt aorõk ñan kij rainin, im jenaj lukkun bõk tokjen jen ad bwebwenato ilo tibdikin sam in eaibujuij.

Kõnan eo Am Eaorõktata ej Einlok Wõt ke eo An David?

11, 12. Ta un ko rebed ibbed ñan kaibujuij Jehovah ien otemjej?

¹¹ “I naj wijtak Jeova ien otemjej; An nebar e naj ber i loñiõ ien otemjelok.” (Sam 34:⁠1) Kin an mour einwõt juõn ri ko, David emaroñ kar lap an inebata kin aikwij ko an ilo kanniek, ak einwõt an nan kein kwalok, aikwij kein an rar jab kabañ ak bõk jikin kõnan eo an ñan nebar Jehovah. Ej juõn joñok emõn ñan kij ñe jej jelmae melejoñ ko rebin! Meñe jej bed ilo school, jikin jerbal, ibben Ri Christian ro mõttad, ak ilo jerbal in kwalok nan, kõnan eo ad eaorõktata ej aikwij eñin bwe jen nebar Jehovah. Baj lemnak mõk kin un ko relõñ jej aikwij in kõmman eindein! Ñan wanjoñok, ejelok jemlokin men ko jemaroñ loi im mõnõnõ kaki ilo men in kõmanman ko raibujuij an Jehovah. Im lale ta eo ear kõtõbrake ikijen dolul eo an ion lal! Meñe rejjab wãppen, Jehovah ear kajerbal armij ro retiljek ilo juõn wãwen ekajur ilo ran kein. Ewi wãwen menin kõmanman ko im tõbrak ko an Anij ñe keidi ibben ko an armij ro me lal in ej kabuñ ak kautiej ir? Kwojjab ke errã ibben David, eo ear bareinwõt jeje: “Ejelok ian anij rõn einwõt Kwe O Iroij, im ejelok jerbal einwõt jerbal ko Am”?​​—Sam 86:⁠8.

¹² Einwõt David, jekõnan kaibujuij Jehovah ien otemjej kinke jerbal ko an rej make wõt emõn. Bareinwõt, jej mõnõnõ in jelã bwe Ailiñ eo an Anij ej kiõ ilo pein Ri Jolet eo ñan indio an David, Jesus Christ. (Reveles̃õn 11:​15) Melelen menin bwe jemlokin jukjuk in bed in ej ebak. Ilju im jeklaj eo ej indio an elõñlok jen jiljino billion armij ro ej bed ilo kauwatata. Ejañin wõr einwõt mokta kin kain aikwij rot in ñan jiroñ ro jet kin Ailiñ eo an Anij im ta eo mõttan jidik enaj kõmman ñan armij im ñan jibañ ir kaibujuij Jehovah ibbed. Emol men eo eaorõktata ilo mour eo ad ej aikwij ñan kajerbal jabdewõt ien ebellok ñan rejañ ro jet ñan air bõk ‘news emõn’ ilo mõkaj.​​—Matu 24:⁠14.

13. (a) Kin wõn eo David ear kemjãje kake, im armij rot ro rar mõnõnõ in roñjake? (b) Ewi wãwen an ro ettã burueir ruaklok ñan Christian congregation eo rainin?

¹³ “Aõ e naj kimjãje ilo Jeova; ro etã burueir re naj roñjake im re naj lõñliñ.” (Sam 34:⁠2) Ijin David ear jab kemjãje kin jabdewõt tõbrak ko an make. Ñan wanjoñok, ear jab kemjãje kin wãwen an kar mone king eo an Gath. Ear kile bwe Jehovah ear kejbãroke ke ear bed ilo Gath im bwe ear maroñ deor kin jibañ eo an Jehovah. (Jabõn Kennan Ko 21:⁠1) Alikar, David ear kemjãje, jab ilo e make, ak ilo Jehovah. Kinke ear kõmmane menin, ro ettã burueir rar ruaklok ñan Jehovah. Jesus ear bareinwõt nebar ãt eo etan Jehovah, im menin ear karuaklok armij ro etta burueir ñan E. Rainin, ro ettã burueir jen ailiñ otemjej rej ruaklok ñan congregation ko ibelakin lal an Christian ri kabit ro, eo me Jesus ej Bõr eo. (Dri Kolosse 1:​18) Ear emmakit buruen rein ettã burueir ke rej roñ an ri karejar ro an kaibujuij etan Anij im ke rej roñ kin ennan eo an Bible eo, eo me jitõb kwojarjar eo an Anij ej kamaroñ ir ñan melele kake.​​—Jon 6:​44; Jerbal 16:⁠14.

Kwelok ko Rej Kakajur Tõmak eo Ad

14. (a) David ear juburu ke ñan kaibujuij Jehovah ilo ittino wõt? (b) Ta joñok eo Jesus ear likiti kin kwelok ko kin kabuñ?

¹⁴ “O komin koutiej Jeova, im jen jimor leliñlok etan.” (Sam 34:⁠3) David ear jab juburu ñan kaibujuij Jehovah ilo ittino wõt. Ear ilo yokwe rejañ ro mõttan ñan koba ibben ilo air leliñlok etan Anij. Eindein, Jesus Christ, David eo Elaplok, ear mõnõnõ ilo an kaibujuij Jehovah ilobwilij​​—ilo imõn kwelok eo, ilo ien kwojkwoj ko ilo temple eo an Anij ilo Jerusalem, im ilo ien ko ej bed ibben ri kalor ro an. (Luk 2:​49; 4:​16-​19; 10:21; Jon 18:​20) Ej juõn jerammõn ekamõnõnõ ñan anõk joñok eo an Jesus ilo ad jimor kaibujuij Jehovah ilo ien ko otemjej rebellok ibben ri tõmak ro mõttad, elaptata kiõ ke jej “lo an ran eo ebaktok”!​​—Dri Hibru 10:​24, 25.

15. (a) Bwebwenato eo an David ear jelet lõmaro mõttan ilo wãwen et? (b) Ewi wãwen ad bõk tokjen jen ad bed ilo kwelok ko?

¹⁵ “I ar kabukot Jeova, im E ar uak iõ, im E ar lomor iõ jen aõ mijõk otemjej.” (Sam 34:⁠4) Menin ear walok ear aorõk ñan David. Kin menin, ear etal wõt im ba: “Dri jeramel in e ar kir, im Jeova e ar roñjake, im lomoren jen jorran ko an otemjej.” (Sam 34:⁠6) Ñe jej koba ibben ri tõmak ro mõttad, ewõr ien ko remõn im rebellok ñan ad kwalok bwebwenato ko rekõketak kin wãwen Jehovah ear jibañ kij ñan kijenmij iumin wãwen ko rebin. Menin ej kakajur tõmak eo an ri tõmak ro mõttad, einwõt nan ko an David rar kakajur tõmak eo an ri jibañ ro an. Ilo wanjoñok eo an David, ro mõttan rar “reilok ñõne [Jehovah] im mõnõnõ; Ejamin ellok jen ir.” (Psalm 34:⁠5) Meñe rar ko jen King Saul, rar jab bõk eñjake in jook. Rar liki bwe Anij ear rejetak David, im turin mejeir ear lukkun mõnõnõ. Ilo juõn wãwen einlok wõt, ro rekãl me rej itoklimo im bareinwõt ro me etto air kar Ri Christian ro remol rej reilok ñan Jehovah kin jibañ. Kinke emwij air lo ak bõk jibañ eo an, wãwen an mõnõnõ turin mejeir ej kwalok kõnan eo air ñan bed wõt ilo air tiljek.

Jen Kamolol kin Jibañ ko Rej Itok Jen Enjel Ro

16. Ewi wãwen Jehovah ear kajerbal enjel ro an ñan air jibañ ak lomoren kij?

¹⁶ “Enjel an Jeova ej ber iturin ro re mijõk E, im lomorir.” (Sam 34:⁠7) David ear jab watõk lomor eo an jen Jehovah einwõt juõn men me emaroñ walok wõt ñane. Mol, David ear ri kabit eo an Jehovah, king eo an Israel tokelik, ak ear jelã bwe Jehovah ej kajerbal enjel ro an ñan air lale im kejbarok aolep ri kabuñ ro an retiljek, meñe reutiej ak rettã. Ilo ran kein ad, ri kabuñ ro remol rar bareinwõt bõk kejbarok eo me Jehovah ej letok. Ilo Nazi Germany​​—bareinwõt ilo Angola, Malawi, Mozambique, im elõñ bar ailiñ ko jet​​—ri utiej ro rar lolorjake ennan ko air ñan jolok Ri Kennan ro an Jehovah. Kõtõbar ko air rar jab tõbrak. Jen an eindein, armij ro an Jehovah ilo ailiñ kein rar lõñlok wõt ilo air jimor kaibujiuj etan Anij. Etke? Kinke Jehovah ej kajerbal enjel ro an rokwojarjar ñan air kejbarok im tel armij ro an.​​—Dri Hibru 1:​14.

17. Ilo wãwen et ko enjel ro an Anij rej jibañ kij?

¹⁷ Bareinwõt, enjel ro an Jehovah remaroñ karõk im ukõt wãwen ko bwe ren kõmakit ak jolok jabdewõt eo ej kõmman bwe ro jet ren lõkatip jen ibwilijin armij ro an Jehovah. (Matu 13:41; 18:​6, 10) Im meñe jemaroñ jab kile kin menin ilo ien eo, enjel ro rej jolok abañ ko me remaoñ kabañ jerbal eo ad ñan Anij, im rej kejbarok kij jen men ko me remaroñ kajorrãn kõtan eo ad ibben Jehovah. Men eo eaorõktata, rej tel kij ilo jerbal in kwalok kin “gospel ej in drio” ñan aolep armij, ekoba jikin ko me jerbal in kwalok nan ej wõnmanlok wõt iumin wãwen ko rekauwatata. (Reveles̃õn 14:⁠6) Kein kamol kin jibañ eo an enjel ro ekkã air walok ilo book in Bible ko jeje in Ri Kennan ro an Jehovah.a Bwebwenato rot kein relõñ im jejjab maroñ kajekdoni einwõt bwebwenato bajjek.

18. (a) Ta eo jej aikwij kõmmane ñan ad bõk tokjen jen jibañ eo an enjel ro? (b) Ta eo naj etale ilo katak in tok juõn?

¹⁸ Ñan ad wõnmanlok wõt im bõk tokjen jen tel im kejbãrok eo an enjel ro, jej aikwij wõnmanlok wot ilo ad kaibujuij etan Jehovah meñe jej iion jumae ko. Kememej bwe, enjel eo an Anij ej bed “iturin ro rej mijak [Jehovah].” Ta melelen menin? Ta in mijak Anij, im ewi wãwen ad maroñ kaddek mijak in? Etke juõn Anij eo eyokwe ekõnan bwe jen mijak e? Kajitõk kein naj bwebwenato kaki ilo katak in tok juõn.

[Kamelele eo itulal]

Ewi Wãwen Kwonaj Uak?

• Ta abañ ko David ear kijenmij kaki ke ear juõn likao?

• Einwõt David, kin ta eo elaptata ad itoklimo kake?

• Ewi wãwen ad watõk kwelok ko an Ri Christian?

• Ewi wãwen Jehovah ej kajerbal enjel ro an ñan air jibañ kij?