Tiljek Ñan Christ im Ri Karejar Eo An Etiljek
“An iroij . . . e naj kairoij e ion men ko otemjelok an.”—MATU 24:45-47.
1, 2. (a) Wõn eo Jeje ko ilo Bible rej kalikar bwe ej ad Ri Tel? (b) Ta eo ej kwalok bwe Christ ej boub wõt ilo an tel congregation eo an Christian?
“IM REN jab naetami ‘Ri Tel’ kinke eor juõn wõt ami ri tel, [Christ]!” (Matthew 23:10) Ikijen nan kein Jesus ear kalikar ñan ri kalor ro an bwe ejelok armij ion lal en air ri tel. Ri Tel eo air enaj juõn eo jen lañ—Jesus Christ make. Anij eo ear kabbe Jesus bwe en bõk jerbal in. Jehovah “e ar kejerkakbiji E jen ro remij . . . E ar lelok E bõran ion men otemjej ñõn eklisia, eo enbwinin.”—Dri Epesõs 1:20-23.
2 Kinke Christ eo ej “[bõr] ion men otemjej” ilo congregation eo an Christian, ej kajerbal maroñ eo an ion men ko otemjej rej walok iloan congregation eo. Ejelok jabdewõt men ej walok iloan congregation eo me ejjab loe. Elap an itoklimo in lo elañe kajjojo kumi in Ri Christian, ak congregation ko, rej mour ekkar ñan kien ko reutiej an Christian im elañe ewõr juõn air kõtan ebak ibben Anij. Menin ej lukkun alikar ilo Reveles̃õn eo kar lelok ñan ri jilek John ilo jemlokin lok ebeben eo kein kajuõn C.E. Ñan congregation ko jiljilimjuõn, lalem alen an kar Jesus ba bwe ear jelã kin kõmman ko air, kadkad ko remõn im mõjno ko air, im ear lelok nan in kakabileklek im nan in rejañ ko ekkar ñan aikwij ko air. (Reveles̃õn 2:2, 9, 13, 19; 3:1, 8, 15) Kin menin jemaroñ lukkun tõmak im liki bwe Christ ear jelã kin wãwen mour in jitõb eo an congregation ko jet ilo Asia Minor, Palestine, Syria, Babylonia, Greece, Italy, im ijoko jet. (Jerbal 1:8) Ak ta kin rainin?
Juõn Ri Karejar Etiljek
3. Etke ejejjet ñan ad keidi Christ ñan juõn bõr im congregation eo an ñan juõn enbwin?
3 Elikin jerkakbiji eo an im mokta lok wõt jidik jen an wanliñlok ñan ibben Jemen ilañ, Jesus ear jiroñ ri kalor ro an: “Emwij letok ñõn Iõ kajur otemjej i lõñ im i lõl.” Ear bareinwõt ba: “Lo, Ij ber ibemi ien otemjej ñõn jemlokõn lõl.” (Matu 28:18-20) Enaj wõnmanlok wõt im bed ibbeir im boub ilo an einwõt Ri Tel eo air. Ilo letter ko an ñan Ri Christian ro ilo Ephesus im Colossae, ri jilek Paul ear kõkkar kin congregation eo an Christian ñan juõn “enbwin,” im Christ ej Bõran. (Dri Epesõs 1:22, 23; Dri Kolosse 1:18) Juõn book in kamelele kin Bible eo etan The Cambridge Bible for Schools and Colleges ej ba bwe nan in kõkkar in “ejjab ba wõt kin aorõkin burukuk ibben Bõr eo, ak bareinwõt bwe maroñ eo an Bõr eo ej jerbal ion mõttan ko ilo enbwin eo. Rej kein jerbal ko An.” Wõn eo Christ ear kajerbale einwõt kein jerbal eo an jen ien eo kar lelok kajur eo an Ailiñ eo ñane ilo 1914?—Daniel 7:13, 14.
4. Ekkar ñan kanan eo an Malachi, ta eo Jehovah im Christ Jesus rar lo ke rar itok ñan air etale temple eo ilo jitõb?
4 Kanan eo an Malachi ear kanan bwe Jehovah, “Iroij eo,” ibben lok “ri keañ eo emwij kallimur kake,” nejin Christ Jesus, eo ej kab jino jijet ilo throne eo an, enaj itok ilo ekajet ñan etale “temple” eo An, ak imõn kabuñ eo an ilo jitõb ilo nan in kõkkar. “Ien in” ñan jino ‘ekajet imõn Anij’ ear alikar ilo 1918.a (Malachi 3:1; 1 Piter 4:17) Ro im rej ba bwe rej jutak kin Anij im kabuñ eo an emol ion lal kar let air etale ir. Kabuñ ko an Christendom, ro im iumin elõñ buki yiõ ko rar katakin kin katak ko rejjab nebar im kautiej Anij im ear lap air bõk kunair ilo ien mõnmõn armij eo ilo Bata eo an Lal Kein Kajuõn, kar kajekdon ir. Juõn bwen Ri Christian ri karejar ro emwij kabit ir im retiljek kar melejoñ ir, karreoik ir einwõt kin kijeek, im kar buñburu kake ir, rej erom ñan Jehovah “priest ro bwe ren maroñ bõklok menin jortak ko rewebben ñõn Iroij.”—Malachi 3:3.
5. Ilo an errã ibben kanan eo an Jesus kin ‘bed’ eo an, wõn kar ‘dri korijer eo etiljek’?
5 Ilo an errã ibben kanan eo an Malachi, kakõlle eo elõñ mõttanin me Jesus ear lelok ñan ri kalor ro an ñan jibañ ir kile kin ien eo ej “itok im lokõn lõl” ear koba kakõlle eo kin kumi in “dri korijeran.” Jesus ear ba: “Inem wõn eo dri korijer e tiljek im meletlet, eo an iroij e ar likit e bwe en dri kõmñe ion ro dron, bwe en najirik ir ilo ien emõn? Emõnõnõ dri korijeran eo, an iroij e naj itok im lo an kõmõnmõn ein drein. Emol Ij ba ñõn kom, e naj kairoij e ion men ko otemjelok an.” (Matu 24:3, 45-47) Ke ear “itok” ñan an etale “dri korijeran” ilo 1918, Christ ear lo juõn bwen ri karejar ro emwij kabit ir im retiljek me jen 1879 rar kajerbal magazine in im book ko jet rej bedbed ion Bible eo ñan letok mõñã ko ilo jitõb “ilo ien emõn.” Ear bõk rein einwõt kein jerbal eo an ak “dri korijeran,” im ilo 1919 ear lelok ñan ir jerbal in lolorjake im ñan tel aolep men ko mweien ion lal.
Lolorjake Men ko Mweien Christ ion Lal
6, 7. (a) Bar ta jet ian nan ak ãt ko Jesus ear kajerbali ke ear konono kin “dri korijeran” etiljek? (b) Ta eo ear kalikar ikijen an Jesus kajerbal nan eo “dri kõmñe”?
6 Jet alliñ ko mokta jen an Jesus lelok kanan eo an kin kakõllan bed eo an, ekoba an walok juõn “dri korijer” eo ej jutak ikijen ion lal, ear konono kin “dri korijer” in ilo juõn wãwen eoktaklok jidik me ej kalikar kin ta eddo ko an ri karejar in. Jesus ear ba: “Inem wõn dri kõmñe eo etiljek im meletlet, eo iroij eo an e naj kairoij e ion ro dri korijeran, bwe en lelok kijeir ñõn ir ien ejejit? Emol Ij ba ñõn kom, e naj kairoij e ion men otemjej men ko an.”—Luk 12:42, 44.
7 Ijin rej naetan ri karejar eo einwõt juõn ri kõmõñã, juõn nan kar ukõte jen juõn nan ilo Greek melelen “eo ej lolorjake men otemjej iloan juõn em ak ilo juõn weto.” Kumi in ri kõmõñã rein rejjab baj ro re jelãlokjen wõt ilo air kameleleik point ko rekaitoktoklimo jen Bible eo. Ak ijellokin jerbal eo air ñan letok mõñã ko reuõne ilo jitõb ilo “ien ejejit,” “dri kõmñe eo etiljek” naj kairoij e ion aolep ri jerbal ro an Christ im jitõñe ñan an lolorjake congregation eo an Christ im aolep makitkit ko an ion lal, “men otemjej men ko an.” Ta eo men kein rej kitibuji?
8, 9. Ta “men ko otemjelok an” kar jitõñ ri karejar eo bwe en lali?
8 Eddo ko an ri karejar eo ej kitibuj an lale jikin ko ro ri kaloran Christ rej kajerbali ñan air bõk manlok jerbal in Christian ko air, einwõt headquarter im ra ko an Ri Kennan ro an Jehovah ilo lalin, im bareinwõt jikin kabuñ ko air. Ak elaptata, ri karejar eo ej bareinwõt lolorjake program in katak Bible ko me rej kaddek mour in jitõb eo ilo kwelok ko kajjojo week im ilo ien assembly im convention ko. Ilo ien kwelok kein, rej kwalok melele ko kin jejjet in kitien kanan ko ilo Bible, im nan in tel ko rejejjet kin wãwen jerbali nan in kaiñi ko jen Bible ilo mour ko ad kajjojo ran.
9 Eddo ko an ri kõmõñã eo ej kitibuj bareinwõt lolorjake jerbal eo elap an aorõk, jerbal in kwalok kin “gospel in an ailiñ in lõñ” im “kõmõn dri ailiñ ko otemjej bwe ren dri [kalor].” Menin ej kitibuj katakin armij ñan air kõmman men otemjej me Christ, eo ej Bõran congregation eo, ear jiroñ bwe ren kõmmane ilo ien jemlokin. (Matu 24:14; 28:19, 20; Reveles̃õn 12:17) Jerbal in kwalok nan im katakin in emwij an bõktok juõn “jar elap” in ro retiljek mõttan bwen ri kabit ro. Rein “menin aurõk ko” jen ailiñ ko otemjej, ejelok bere rej mõttan men ko raorõk “men ko otemjelok an” Christ me ri karejar eo etiljek ej lolorjake.—Reveles̃õn 7:9; Haggai 2:7.
Kumi eo ej Jutak Ikijen Class in Ri Karejar Eo
10. Kumi ta eo kar jitõñ ir bwe ren kõmman bebe ko ilo ien ko an Jesus im ri jilek ro, im ewi wãwen ear jelet congregation ko?
10 Eddo ko relap an ri karejar eo etiljek alikar ear kitibuj an kar aikwij kõmman elõñ bebe ko. Ilo congregation eo jinoin an Ri Christian ro, ri jilek ro im elder ro ilo Jerusalem rar jutak ikijen class in ri karejar eo, ilo air kõmman bebe ko ñan aolepen congregation eo an Christian. (Jerbal 15:1, 2) Bebe ko an kumi eo ear tel ilo ien ko an Jesus im ri jilek ro kar jilkinlok ñan congregation ko ikijen letter ko im ikijen ro rej itoitak. Ri Christian ro jinoin rar mõnõnõ in bõk nan in tel ko ralikar, im air mõnõnõ in burukuk ibben kumi in tel eo ear bõktok ainemõn im burukuk ibwiljiir.—Jerbal 15:22-31; 16:4, 5; Dri Pilippai 2:2.
11. Wõn eo Christ ej kajerbale rainin ñan tel congregation eo an, im ewi wãwen ad aikwij lemnak kin kumi in Christian ri kabit rein?
11 Einwõt kar ilo ien ko an Ri Christian ro jinoin, juõn kumi in overseer ri kabit ro rej ejaake Governing Body in ri kalor ro an Christ ion lal rainin. Ikijen kajur in “pein anbijmaroñõn”, Christ, eo ej Bõran congregation eo, ej tel lõmarein retiljek ilo air lolorjake jerbal eo an Ailiñ eo. (Reveles̃õn 1:16, 20) Ilo bwebwenato in mour eo an, Albert Schroeder, juõn eo etto an uan Governing Body eo im ej kab mwij an kamwij lok ial in mour eo an ion lal, ear je: “Ro uan Governing Body eo rej iion don im kwelok Wednesday otemjej, kabellok kwelok eo kin jar im kajitõk kin tel eo an jitõb eo an Jehovah. Im rej lukkun kate ir bwe men otemjej rej etali im aolep bebe ko rej kõmmani ren errã ibben Nan eo an Anij, Bible eo.”b Jemaroñ liki Ri Christian ri kabit rein retiljek. Ikijen Governing Body eo, jej aikwij eoroñ nan in jiroñ eo an Paul: “Komin bokake im kõtãik kom ñõn ro rej tel kom, bwe rej lale ami.”—Dri Hibru 13:17.
Kwalok Kautiej eo Ekkar kin Ri Karejar eo Etiljek
12, 13. Ta un ko ekkar ñan Jeje ko ilo Bible unin ad kwalok kautiej ñan class in ri karejar eo?
12 Un eo elap ñan ad kwalok kautiej eo ekkar kin class in ri karejar eo etiljek, ej eñin bwe ilo ad kõmmane menin, ilo mol jej kwalok ad kautiej Iroij eo air, Jesus Christ. Paul ear jeje kin ri kabit rein: “E dri anemkwojan eo emwij kir e, e korijeran Kraist. Emwij wiaik kom kin juõn wõnan.” (1 Dri Korint 7:22, 23; Dri Epesõs 6:6) Kin menin, ñe jej tiljek wõt im kõttãik kij ñan tel eo an ri karejar eo etiljek im Governing Body eo an, jej kõttãik kij ñan Christ, Iroij eo an ri karejar in. Ilo ad kwalok kautiej eo ekkar ñan kein jerbal in Christ ej kajerbale ñan an lale men ko an ijin ion lal ej juõn wãwen jej “kwalok bwe Jisõs Kraist e Iroij, ñõn aibujuij an Anij Jemen.”—Dri Pilippai 2:11.
13 Bar juõn un ekkar ñan Jeje ko ilo Bible unin jej aikwij kwalok ad kautiej ri karejar eo etiljek, ej kinke Ri Christian ri kabit ro ion lal ej konono kake ir ilo nan in kõkkar einwõt juõn “temple” me Jehovah ej jokwe ie “ikijen jitõb.” Kin air eindein, rein re “kwojarjar.” (1 Dri Korint 3:16, 17; Dri Epesõs 2:19-22) Inem eñin kumi eo rej konono kake ir einwõt temple eo ekwojarjar me Jesus ear lelok men ko an ion lal ñan ir, melelen men in bwe jet wãwen ko rekkar im eddo ko ilo congregation eo an Christian rej ñan kumi in ri karejar rein wõt. Eñin unin, aolep ro ilo congregation eo rej watõke menin einwõt jerbal eo ekwojarjar ñan air lor im eddeb ñan tel eo ej itok jen ri karejar in etiljek im Governing Body eo an. Aet, ‘sheep ro jet’ rej watõk bwe ej juõn jerammõn ñan air jibañ class in ri karejar in ilo air lale im kejbãrok men ko an Iroij eo.—Jon 10:16.
Rejetak Ir ilo Tiljek
14. Einwõt an kar Isaiah kanan kake, ewi wãwen sheep ro jet rej etal ilikin class in ri karejar eo im jerbal einwõt ri “jerbal” ro ejelok wõnãir?
14 An sheep ro jet kõttãik ir ñan ro uan Israel eo ilo jitõb kar kanan kake ilo Aiseia: “Ein drein Jeova ej ba, Jerbal an Ijipt, im mweiuk ko mweien Itiopia, im ro dri Sebia, armij re utiej, re naj itok ñõn kwe, im re naj am: re naj lor yuk; ilo tomere ko re naj itok; im re naj buñbero ñõn kwe, im re naj akwelap ñõn yuk, im ba, Emol Anij ej ilo kwe; im ejelok bar juõn, ejelok Anij.” (Aiseia 45:14) Ilo kõkkar, sheep ro jet rainin rej etal ilikin class in ri kabit ri karejar in im Governing Body eo, im lor tel eo air. Einwõt ri “jerbal” ro ejelok wõnãir, sheep ro jet rej mõnõnõ in lelok maroñ ko air im men ko mweieir ñan jurake jerbal in kwalok nan eo ibelakin lal me Christ ear kabbeik ri Christian ri kabit ro an ion lal bwe ren kõmmane.—Jerbal 1:8; Reveles̃õn 12:17.
15. Ewi wãwen kanan eo ilo Aiseia 61:5, 6 ej kanan kin kõtan eo ej bed ikõtan sheep ro jet im Israel eo ilo jitõb?
15 Sheep ro jet rej lañliñ im kamolol ilo air jerbal ñan Jehovah iumin tel eo an class in ri karejar eo im Governing Body eo an. Rej kile ri kabit ro einwõt ro uan “Israel an Anij.” (Dri Galetia 6:16) Einwõt “ro drua maijet” im “dri ene ko jet” ilo nan in kõkkar, rej kobalok ibben Israel ilo jitõb, rej ilo mõnõnõ jerbal einwõt “dri tõblõl” im “dri lale bwil in grep ko” iumin tel eo an ri kabit, “pris ro an Jeova” im ‘dri korijer ro an Anij.’ (Aiseia 61:5, 6) Ilo kijejeto rej bõk kunair ilo jerbal in kwalok kin news eo emõn kin Ailiñ eo im kõmman bwe armij ren ri kalor ilo ailiñ otemjej. Kin juõn buru eyu rej jibañ class in ri karejar eo ilo air shepherd im lale ro rekãl im rej einwõt sheep.
16. Ta eo ej kamakit sheep ro jet ñan air tiljek wõt im rejetake ri karejar eo etiljek im meletlet?
16 Sheep ro jet rej kile bwe rar bõk elap tokjen ko jen kate ko relap an ri karejar eo etiljek ilo an najidik ir ekan ko ilo jitõb ilo ien ejejjet. Rej ilo ettã buru kile bwe elañe ear jab kin ri karejar eo etiljek im meletlet, rejamin kar jelã kin mol ko raorõk ilo Bible, einwõt mol eo kin iroij bõtata eo an Jehovah, kin kokwojarjar etan, Ailiñ eo, lañ ko rekãl im lal ekãl, kin aan, wãwen ro remij, im mol eo kin wõn Jehovah, Nejin, im jitõb kwojarjar. Kin juõn kamolol im tiljek eyu, sheep ro jet kin yokwe rej rejetak ri kabit ‘ro jatin’ Christ ion lal ilo ien in ien jemlokin.—Matu 25:40.
17. Ta eo Governing Body eo ear kile bwe ej juõn men rej aikwij kõmmane, im ta eo jenaj etale ilo katak in tok juõn?
17 Kinke rein ej ietlok uair, rein emwij kabit ir rejjab maroñ bed ilo aolep congregation ko ñan air lukkun lale wãwen rej lolorjake men ko mweien Christ. Kin men in, Governing Body eo ej jitõñ lõmaro jen bwiljin sheep ro jet ñan air bõk eddo ko ñan lolorjake office ko an ra eo, district ko, circuit ko, im congregation ko an Ri Kennan ro an Jehovah. Wãwen lemnak im eñjake eo ad kin shepherd rein me rej jerbal iumin tel eo an Christ, ej jelet ke tiljek eo ad ñan Christ im ri karejar in an etiljek? Jenaj etale menin ilo katak in tok juõn.
[Kamelele ko itulal]
a Ñan etale tibdikin katak in, lale Imõniaroñroñ, June 1, 2004, page 21-26.
b Kar jeje ilo March 1, 1988, katak eo ilo magazine in, page 10-17.
Ilo Elij
• Wõn eo ej ad Ri Tel, im ta eo ej kalikar bwe ejelã kin wãwen ko rej walok ilo congregation ko?
• Ilo ien etale “temple” eo, wõn ro rar lo ir bwe rej jerbal einwõt juõn ri karejar etiljek, im ta mweiuk ko kar lelok ñan ir bwe ren lali?
• Ekkar ñan Jeje ko ilo Bible, ta un ko ñan ad ilo tiljek rejetak ri karejar eo etiljek?