Kajitõk ko Jen Ro Rej Riit
Jabõn Kennan Ko 22:6 ej ke kalimur bwe elañe ejime air kibel ajiri ro rej Kristian reban ilok jen ial eo an Jeova?
Jej riit ilo eon in: “Kwon kibel juõn ajiri ilo ial eo en etal ie, im ñe e ridto e jamin illok jen e.” Einwõt juõn jul kar kubõle bwe en jime ilo an edreklok ñõn juõn wijki, ajiri ro me ejime air kibel ir renaj mõnõnõ in wõnmanlok im korijer ñõn Jeova ñe rej ridtolok. Einwõt an aolep ro jemen im jinen jela, kain kibel rot in ej bõk elap ien im ej kitibuj air kate ir. Ñõn kõmõn bwe ajiri ro nejiir ren erom Kristian dri kalor ro, ro jemen im jinen rej aikwij lukkun katakin, kakabilek, rejañ im kowe ir, bareinwõt kõmõn juõn joñok emõn ñõn ir. Rej aikwij ekkeini air kõmõne men in ilo yokwe iomin elõñ yiõ ko.
Bõtab, melelen men in ke bwe elañe juõn ajiri ej ilok jen an korijer ñõn Jeova, elikjõp an kar jemen im jinen katakin e? Ilo jet wãwen ko, ro jemen im jinen remaroñ kar likjõp ilo air kate ir ñõn kakajiriri ajiri ro nejiir ilo kaje im kowe an Jeova. (Dri Epesõs 6:4) Ilo ijo turãjet, jabõn kennan ejjab kalimur bwe kibel eo emõn enaj kõmõn bwe ajiri ro ren tiljek ñõn Anij. Ro jemen im jinen rejjab maroñ eik ajiri ro ilo jabrewõt wãwen eo rekõnan. Einwõt ro reridto, ajiri ro eor air maroñ in kãlet im ir wõt remaroñ kãlet wãwen mour eo rekõnan. (Duteronomi 30:15, 16, 19) Meñe elap an ro jemen im jinen kate ir, jet ajiri ro remaroñ jab tiljek, einwõt kar Solomon, eo ear je eon in jej etale. Bareinwõt ear or ro nejin Jeova rar jab tiljek.
Kin men in, eon in ejjab ba bwe aolep ien juõn ajiri “e jamin illok jen e” ak ej ba bwe eñin men eo ekkã an naj walok. Men in ej juõn menin kõkãtok ñõn ro jemen im jinen! Ro jemen im jinen ren bõk ñõn burueir ilo air jela bwe air kate ir ñõn kibel ro nejiir ilo wãwen eo an Jeova renaj jebar leen ko remõn. Kinke jerbal eo air eaurõk im elap kilair ion ajiri ro, kar rejañ ro jemen im jinen ñõn lukkun lale erro eo air.—Duteronomi 6:6, 7.
Meñe ajiri ro rej bwijrõk jen air korijer ñõn Jeova, ro jemen im jinen me rej lukkun lale wãwen air katakin ro nejiir remaroñ kejatrikrik bwe ajiri ro nejiir renaj bar jeblaktok. Mol eo ilo Baibel ekajur, im wãwen an ro jemen im jinen katakin ebin melokloke.—Sam 19:7.