Jehovah Ej Kaorõk Kiblie Eo Am
“Nejiõ, kwon meletlet, im kamõnõnõik buruõ.”—JABÕN KENNAN KO 27:11.
1. Ta jitõb eo ej kobrak lal in rainin?
JUÕN jitõbõn anemkwoj im kiblia ej kobrak lal rainin. Ri jilek Paul ej kamelele kin unin an walok jitõb rot in ilo letter eo an ñan Ri Christian ro ilo Ephesus: “Ilo ir kom kin etetal ilo ien eo lok lor ial in lõl in, lor iroij in kajur ko in mejatoto, jitõb eo ej jerbal ilo ro dri kiblia.” (Dri Epesõs 2:1, 2) Aet, jemaroñ ba bwe Satan Devil eo, “iroij in kajur ko in mejatoto” eo, ear kajededlok jitõb in kiblia eo ilo aolepen lal in. Ear kõmman eindein ilo ebeben eo kein kajuõn, im ej wõnmanlok wõt im kõmman eindein ilo juõn joñan elaplok jen ien eo kar jolaltak e jen lañ ñan lal ilo ien eo Bata eo Kein Kajuõn an Lal ear walok.—Reveles̃õn 12:9.
2, 3. Ta un ko unin ad aikwij bokake Jehovah?
2 Bõtab, einwõt Ri Christian ro, jejelã bwe Jehovah Anij ej tellokin bõk kiblie eo ad kinke ej Ri Kõmanman eo, Ri Kejbãrok Mour eo ad, Iroij Bõtata eo eyokwe, im Ri Lomor eo ad. (Sam 148:5, 6; Jerbal 4:24; Dri Kolosse 1:13; Reveles̃õn 4:11) Ri Israel ro ilo ran ko an Moses rar jelã bwe Jehovah ear Ri Lomor im Ri Kanemkwoj eo air. Kin men in, Moses ear jiroñ ir: “Inem komin lale, im kõmõn einwõt Jeova ami Anij ej jiroñ kom: komin jab jeõrlok jen e ñõn anbijmaroñ ak anmiñ.” (Duteronomi 5:32) Aet, ej tellokin bwe armij ro ren bokake Jehovah. Ak, emõkaj air kar oktaklok im kiblia ñan Iroij Bõtata eo air.
3 Ewi joñan aorõkin ad bokake Eo Ej Kõmanman men otemjej ilañ im ion lal? Juõn ien Anij ear jiroñ Samuel bwe en ba ñan King Saul: “Bokake emõn jen katok.” (1 Samuel 15:22, 23) Etke emol men in?
Ewi Wãwen Bokake “Emõnlok Jen Katok”
4. Ilo wãwen et eo jemaroñ lelok juõn men ñan Jehovah?
4 Einwõt Ri Kõmanman eo, men ko mweied otemjej ilo kanniek rej an Jehovah. Kin men in, ewõr ke jabdewõt men jemaroñ lelok ñan e? Aet, jemaroñ lelok juõn men elap an aorõk ñan e. Ta eo? Jemaroñ lo uak eo ilo nan in kakkõl in: “Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.” (Jabõn Kennan Ko 27:11) Jemaroñ bokake Anij. Meñe wãwen ko ibbed im family ko ad reoktak jen don, ilo ad bokake Anij kij kajjojo jemaroñ uake nan in kinaak eo an Satan Devil eo bwe armij ro rejjab maroñ debij air tiljek ñan Anij ñe rej jelmae melejoñ ko. Ej juõn jerammõn elap ñan kõmmane men in!
5. Ewi wãwen kiblia eo an armij ej jelet Ri Kõmanman eo? Kwalok juõn wanjoñok.
5 Anij ej itoklimo kin bebe ko jej kõmmani. Elañe jejjab bokake, bebe in ad ej jelet e. Ewi wãwen? Ej kaburomõj e ñe jabdewõt armij ej kõmman juõn bebe enana. (Sam Ko 78:40, 41) Ta elañe juõn ri tõñal ejjab bokake im lor nan in kakabilek ko kin ta eo en mõñã im jab mõñã ñan kejbãrok mour eo an ak ej mõñã wõt mõñã ko renana ñan enbwinin? Naj ewi wãwen eñjake eo an doctor eo an? Alikar bwe enaj eindein lemnak eo an Jehovah ñe armij ro rejjab bokake e, kinke ejelã kin ta jorrãn ko renaj walok kin ad kajekdone nan in kakabilek ko ñan mour.
6. Ta eo enaj jibañ kij bwe jen bokake Anij?
6 Ta eo enaj jibañ kij kajjojo bwe jen bokake? Ej juõn men ekkar bwe kij kajjojo jen kajitõk ibben Anij bwe en letok juõn “buru e jelalokjen” ak buru ekiblie, einwõt an kar King Solomon kõmmane. Ear kajitõk kin kain buru rot in bwe en “maroñ kili emõn im nana” im en emõn an ekajete Ri Israel ro mõttan. (1 Kiñ Ro 3:9) Jej aikwiji juõn ‘buru ekiblie’ elañe jenaj kile oktak eo ikõtan ta eo emõn im ta eo enana ilo juõn lal eobrak kin jitõb in kiblia. Emwij an Anij letok Nan eo an, Bible eo, book ko jet rej bedbed ion Bible, kwelok ko an Christian, im elder ro rej yokwe ilo congregation eo bwe jen maroñ kaddek juõn ‘buru ekiblie.’ Jej kortokjen ke aolep men in letok kein kar litoki ilo yokwe?
7. Etke Jehovah ej kaorõk bokake elaplok jen katok kin men im mour ko?
7 Ikijen men in, kememej wõt bwe ilo ien ko etto, Jehovah ear kalikar ñan armij ro an bwe bokake ear laplok an aorõk jen men in katok ko kin men in mour. (Jabõn Kennan Ko 21:3, 27; Hosea 6:6; Matu 12:7) Etke ekar eindein, ke Jehovah ear kaiñi armij ro an bwe ren katok men in mour ko? Eokwe, kar ta unin an armij eo katok kin men in mour eo? Ej kõmmane ke men in kinke ekõnan kabuñburuen Anij? Ak ej baj kõmmane ñan an lor wõt juõn manit? Elañe juõn ri kabuñ elukkun kõnan kabuñburuen Anij, enaj kate wõt im bokake aolep kien ko an. Anij ejjab aikwiji katok kin men in mour ko, ak men eo elap an wõr tokjen me jemaroñ lelok ñan e ej ad bokake.
Juõn Joñok ñan Kakkõl Kij
8. Etke Anij ear karmijeteik Saul einwõt king?
8 Bwebwenato eo ilo Bible kin King Saul ej kalikar kin aorõkin bokake. Saul ear jino an jerbal einwõt juõn iroij ilo ettã buru im inemõn, ear ‘drik ilo mejen’ make. Bõtab, tokelik, utiej buru im lemnak ko rejjab jimwe ear jino jelet bebe ko an. (1 Samuel 10:21, 22; 15:17) Juõn ien, Saul ear aikwij jelmaik Ri Philistia ro ilo tarinae. Samuel ear jiroñ king eo bwe en kõttar e bwe en katok kin men in mour ko ñan Jehovah im bõk nan in kakabilek ko jen e. Bõtab, Samuel ear jab itok ilo awa eo ear kõtmene kake, im armij ro rar jino jebliklik jen ibben. Ke ear lo bwe rar jino jebliklik jen ibben, Saul “e ar lelok katok kijeek eo.” Jehovah ear jab buñburuen kake. Ke Samuel ear tõbartok, king eo ear jekben kin bwid eo an, im ba bwe kin an Samuel rumijtok, ear ‘kajelolõ’ ak lemnak emõn bwe en lelok men in katok ko ñan bõk joij eo an Jehovah. Ñan King Saul, lelok men in katok eo ear laplok an aorõk jen an bokake nan in kakabilek eo bwe en kõttar wõt Samuel ñan an lelok men in katok eo. Samuel ear jiroñ e: “Kwar kõmõn men in bwebwe; kwar jab bokake kien Jeova am Anij, eo E ar jiroñ yuk.” An jab bokake Jehovah ear tellok ñan an luji jerbal in iroij eo an.—1 Samuel 10:8; 13:5-13.
9. Ewi wãwen Saul ear likit juõn joñok elukkun nana kin bokake Anij?
9 King eo ear katak ke jen men in ear walok? Jaab! Tokelik, Jehovah ear kaiñi Saul bwe en kajeebeplok ailiñ in Amalek, eo ear jumae Israel meñe kar ejelok ruõn. Saul en kar jab kõtlok bwe men in mour ko ren ellã im mour. Ear bokake wõt ñan joñan eo “e ar mõn ro dri Amelek jen Havila ilo ial lok ñõn Shur.” Ke Samuel ear wõnmaik e, king eo ear mõnõnõ kin an bõk anjo ioir im ba: “Emõnõnõ kwe jen Jeova: ña I ar bokake kien Jeova.” Ak, jen an lor nan in jiroñ ko ralikar rar bõki, Saul im armij ro an rar jab mõn King Agag im “ko remõn ian jip ko, im ox ko re mãtõk, im lam ko, im men ko otemjej remõn.” King Saul ear kowãnik emake kin bwid eo an ilo an ba: “Armij ro rar kejbãrok ko remõn ian jip ko, im ox ko, bwe ren katok kake ñõn Jeova.”—1 Samuel 15:1-15.
10. Ta eo Saul ear likjap in katak kake?
10 Kin men in, Samuel ear jiroñ Saul: “Jeova ej buñburuen kin men in katok kijeek, im men in katok ko, einwõt ilo bokake ainiken Jeova ke? Lo, bokake emõn jen katok, im eoroñ emõn jen kioeo an jip koman ko.” (1 Samuel 15:22) Kinke Jehovah ear karõk bwe ren kokkure men in mour ko, rar jab emõn ñan air katok kaki.
Jen Kiblie ilo Men ko Otemjej
11, 12. (a) Ewi wãwen an Jehovah lemnak ñe jej kate kij ñan kabuñburuen ilo ad kabuñ ñan e? (b) Ewi wãwen juõn armij emaroñ mon e make ilo an lemnak bwe ej kõmanman ankil an Anij meñe ilo mol ej kiblia?
11 Elap an Jehovah mõnõnõ ñe ej lo an ri karejar ro an retiljek jutak bin meñe rej jelmae matõrtõr, rej kwalok nan kin Ailiñ eo meñe armij ro rejjab itoklimo, im rej bed ilo kwelok ko an Christian meñe ebin air kabwe aikwij ko ñan mour! Ad bokake ilo men kein raorõk ñan mour eo ad ilo jitõb ej kalañliñ buruen! Jehovah ej kaorõk aolep wãwen ko jej kõmmani ñan kabuñ ñan e ilo yokwe. Armij ro remaroñ kajettokjen jerbal ko ad, ak Anij ej lo men ko jej liloki jen buruõd im kememeji.—Matu 6:4.
12 Bõtab, ñan ad kabuñburuen Anij, jej aikwij bokake e ilo wãwen otemjej ilo ad mour. Jen jab mone kij make im lemnak bwe jemaroñ ellok jen kien ko an Anij toan wõt ad kabuñ ñan e ilo wãwen ko jet ilo mour eo ad. Ñan wanjoñok, juõn armij emaroñ mone emake ilo an lemnak bwe elañe ej baj kabuñ wõt ñan Anij, emaroñ kõmman mour in lũñ ak kõmman juõn bwid elap. Elap an bwid lemnak rot in!—Dri Galetia 6:7, 8.
13. Ilo ittino, ewi wãwen ad bokake Jehovah emaroñ bed ilo melejoñ?
13 Kin men in, jemaroñ kajitõkin kij make, ‘Ij bokake ke Jehovah ilo makitkit ko ij kõmmani ran otemjej, meñe ilo men ko jejjab kõmmani iman mejen armij?’ Jesus ear ba: “Eo ej tiljek ilo men eo eriktata, ej tiljek bareinwõt ilo men eo elap; im eo e jab wãnik ilo men eo eriktata, bareinwõt e jab wãnik ilo men eo elap.” (Luk 16:10) Jej ‘etal ke ilo tiljek iloan mweo imõd kin buru e wãppen,’ ijo armij ro jet rejjab maroñ lo kij ie? (Sam Ko 101:2) Aet, meñe jej bed ilo mweo imõd, emaroñ melejoñe tiljek eo ad. Ilo elõñ ailiñ ko me ewõr computer ko ilo elõñ moko imõn armij ro ijo, ebidodo in aluij pija in kelwan ko. Jejjo yiõ ko remotlok, ebin lo pija rot kein elañe kwar jab etal ñan jikin ko ekkã air kwalok men in kamõnõnõ ko retton ie. Jenaj bokake ke jen buruõd nan ko an Jesus: “Jabrewõt eo ej kalimjek kõra im mijkaiye emwij an lũñ iben ilo buruen”? Aet, jenaj jek ilo buruõd ke bwe jen jab aluij pija rot kein retton ñan jidik? (Matu 5:28; Job 31:1, 9, 10; Sam Ko 119:37; Jabõn Kennan Ko 6:24, 25; Dri Epesõs 5:3-5) Ta kin movie ko relej ilo TV? Jej errã ke ibben Anij, eo ‘ej kijirãte eo ej yokwe lej.’ (Sam Ko 11:5) Ak ta kin idak den in kadõk le jen joñan ilo ittino? Bible eo ej kananaik manit in kadõk, ak ej bareinwõt kakkõl Ri Christian ro bwe ren jab “ijol wain.”—Taitõs 2:3; Luk 21:34, 35; 1 Timote 3:3.
14. Ta jet ian wãwen ko jej kwalok ad bokake Anij ikijen wãwen ad kajerbal money?
14 Bar juõn wãwen jej aikwij ekkõl wõt ej ikijen wãwen kajerbal money. Ñan wanjoñok, jenaj ke bõk kunad ilo karõk ko ñan korlok money ilo mõkaj meñe remaroñ kwot jen armij? Ewõr ke juõn kõnan ibbed ñan riap bwe jen jab kõllã owõj? Ak, kate kij ke ñan bokake kien eo ñan “lelok ñõn ro otemjej men ko rekar ñõn ir, owõj ñõn eo en bõk owõj”?—Dri Rom 13:7.
Bokake eo Ej Itok Jen Yokwe
15. Etke kwoj bokake kien ko an Jehovah?
15 Bokake kien ko an Anij ej bõktok jerammõn ko. Ñan wanjoñok, ilo ad kejbãrok kij jen jikka, mour ilo erreo, im ilo ad kwalok kautiej kin kwojarjar in bõtõktõk, jej kejbãrok kij jen jet nañinmij ko. Bareinwõt, ñe jej mour ekkar ñan mol ko ilo Bible eo ilo wãwen ko jet, jemaroñ bõk tokjen kin wõnãn mour, ibwiljin armij, ak ilo mweo ibben family eo. (Aiseia 48:17) Jabdewõt tokjen ko remõn jej bõki jemaroñ watõki einwõt jerammõn ko rej kamol bwe kien ko an Anij rekeie. Bõtab, un eo elaptata unin ad bokake Jehovah ej kinke jej yokwe e. Jejjab karejar ñan Anij kin un ko rekibbon. (Job 1:9-11; 2:4, 5) Anij ear kõtlok kij bwe jen beek wõn eo jekõnan bokake. Jej bokake Jehovah kinke jekõnan kabuñburuen im kinke jekõnan kõmman men eo ejimwe.—Dri Rom 6:16, 17; 1 Jon 5:3.
16, 17. (a) Ewi wãwen Jesus ear kwalok an bokake Anij kin yokwe jen buruen? (b) Ewi wãwen jemaroñ kajeoñe Jesus?
16 Jesus ear likit joñok eo ewãppen kin bokake Jehovah kin an yokwe E jen buruen. (Jon 8:28, 29) Ke ear bed ion lal, Jesus ear “katak im bokake kin men ko E ar iñtan kaki.” (Dri Hibru 5:8, 9) Ewi wãwen? Jesus ear “mõke kõtãik E, im E ar bokake ñõn mij, aet, mij eo ion drebail.” (Dri Pilippai 2:7, 8) Meñe Jesus ear bokake ke ear bed ilañ, ear bar melejoñe kiblie eo an ke ear bed ion lal. Jemaroñ liki bwe Jesus ebojak ilo wãwen otemjej ñan jerbal einwõt Priest Eo Eutiej kin ro jatin ilo jitõb im ri tõmak ro jet bareinwõt.—Dri Hibru 4:15; 1 Jon 2:1, 2.
17 Ta kin kij? Jemaroñ kajeoñe Jesus ilo ad likit bwe bokake ankil an Anij en men eo moktata ilo mour. (1 Piter 2:21) Jemaroñ lo mõnõnõ im juburu ñe yokwe Anij ej kamakit kij ñan ad kõmmane men ko Jehovah ej kakien kij ñan ad kõmmani, meñe jet ien armij rej jibede ak kabo kij ñan kõmman juõn men eoktak. (Dri Rom 7:18-20) Men in ekoba ad mõnõnõ in bokake nan in jiroñ ko jen ro rej tel kij ilo kabuñ eo emol, meñe rejjab wãppen. (Dri Hibru 13:17) Ad bokake kien ko jen Anij ilo mour eo ad make ej juõn men elap an aorõk iman mejen Jehovah.
18, 19. Bokake Anij jen buruõd ej tellok ñan ta?
18 Rainin, ad bokake Jehovah emaroñ kitibuj ad kijenmij iumin matõrtõr bwe jen debij tiljek eo ad. (Jerbal 5:29) Bareinwõt, ad bokake kien eo an Jehovah ñan kwalok nan im katakin armij ej aikwij bwe jen kijenmij ñan jemlokin jukjuk im bed in. (Matu 24:13, 14; 28:19, 20) Jej aikwij kijenmij elañe jekõnan wõnmanlok im kobalok ibben ro jeid im jatid, meñe jej jelmae elõñ ijjibed ko an lal. Anij eo ej yokwe kij elukkun jelã bwe jej kate kij ñan bokake e ilo wãwen rot kein. Bõtab, ñan bokake e kin aolepen buruõd, jej aikwij tarinaik mõm in kanniek ko ad rejerawiwi im illok jen nana, kalaplok ad kamolol kin ta eo emõn.—Dri Rom 12:9.
19 Ñe jej karejar ñan Jehovah kin yokwe im kin juõn buru ewõr kamolol ie, ej ‘letok jinekjij ñõn kij kin ad bukot E.’ (Dri Hibru 11:6) Men in katok ko rekkar rej men in aikwij im remõn im ewõr tokjeir, ak bokake kin aolepen buruõd im kin ad yokwe Jehovah men in ej kabuñburuen ilo joñan eo elaptata.—Jabõn Kennan Ko 3:1, 2.
Ewi Wãwen Kwonaj Uak?
• Etke jemaroñ ba bwe ewõr juõn men ibbed jemaroñ lelok ñan Jehovah?
• Ta bwid ko Saul ear kõmmani?
• Ewi wãwen am maroñ kwalok bwe kwoj tõmak bwe bokake emõnlok jen katok?
• Ta eo ej kamakit yuk ñan bokake Jehovah?
[Pija eo ilo peij 15]
Etke King Saul ear kaillu Jehovah?
[Pija eo ilo peij 16]
Ewi wãwen juõn doctor eyokwe ej lemnak kin juõn ri nañinmij eo ear kajekdon nan in kakabilek ko an?
[Pija ko ilo peij 17]
Kwoj bokake ke kien ko an Anij ilo mweo imõm ijo ejelok armij ej lo yuk ie?