Bokake Ej Juõn Ke Katak An Ajiri Elap Tokjen?
“JEMEN im Jinen Ajiri Ro, Rej Kõnan Ajiri Ro Kadkadiir Rej Kajju jen Don, Jab baj Ajiri Ro wõt Rej Bokake.” Juõn newspaper kwalok ennan in. Report in im edik ear bedbed ion tokjen ko jen juõn katak eo rar kõmmane ilo New Zealand, eo ear kalikar bwe “22 wõt per cent in ro rar uak rar lemnak bwe ajiri ro rej aikwij katakin ir bokake ilo mweo.” Ekkatak eo ear bareinwõt lo bwe jemen im jinen ajiri ro rainin rej tõmak bwe elaplok tokjen katakin ajiri ro wãwen ko einwõt mwil ko remõn, jutaklok iair, im bõk eddo.
Ilo ebeben in an kajjojo armij einjuõn jen don ilo lemnak im an juõn lemnak kin kõnan eo an make, ejjab menin ilbõk bwe elõñ wõt armij rej bere lemnak in kin bokake im kin katakin kake ñan ajiri ro. Ak bokake eo an ajiri jen ke rej dik wõt jen baj lemnak wõt kake einwõt juõn kilen eo emor ke? Ak bokake ej mõttan ke katak ko elap tokjeir ajiri ro remaroñ katak im bõk tokjen jene? Men eo elaplok tokjen, ewi wãwen an Jehovah Anij, Unjen karõk in family, lemnak kin bokake ñan jemen im jinen ajiri ro, im ta jet ian tokjen ko rej walok jen bokake rot in?—Jerbal 17:28; Dri Epesõs 3:14, 15.
“Men in E Jime”
Ñan congregation eo an Christian ilo ebeben eo kein kajuõn ilo Ephesus, ri jilek Paul ear je: “Ajiri rõn, komin bokake jememi im jinemi ilo Iroij: bwe men in e jime.” (Dri Epesõs 6:1) Kin menin, un eo moktata ñan bokake rot in ej bwe ej errã ibben kien eo ekwojarjar kin ta eo ejimwe. Einwõt an kar Paul likiti, “men in e jime.”
Ilo errã ibben menin, jej lo bwe Nan in Anij ej kamelele bwe ñe jemen im jinen katakin ajiri eo ibben mejenkajjik eo kin kajimwe im eiki juõn kadkadin ajiri ilo yokwe einwõt juõn kainõknõk eaibujuij, “juõn rojen bõrõm emõn, im toninir i kenwam,” im einwõt juõn men “ej kabuñburuen Iroij.” (Jabõn Kennan Ko 1:8, 9; Dri Kolosse 3:20) Ilo men eo oktak in, kiblia ñan ro jemen im jinen ajiri ej bõkmantak jab buñburu eo ekwojarjar.—Dri Rom 1:30, 32.
“Bwe En Emõn Ibõm”
Paul ear jitõñlok ñan bar juõn tokjen bokake ke ear je: “ ‘Kwon koutiej jemõm im jinõm (eo kien moktata eor kallimur iben), Bwe en emõn ibõm, im bwe en eto am mour ion lõl.’ ” (Dri Epesõs 6:2, 3; Exodus 20:12) Ilo wãwen et ko bokake jemen im jinen ajiri ro emaroñ walok tokjen ñan emõn eo an juõn?
Ñan jinoe, ejjab mol ke bwe jemen im jinen ajiri ro ewõr tokjen eo emõn ibbeir kin air ritto im wõr air iminene? Meñe jelãlokjen eo air emaroñ jab tõbar jelã eo ran kein kin computer ak un ko jet rej katakin ilo school, elap air jelã kin mour im kamadmõd ibben abañ ko an mour. Jodikdik ro, ilo wãwen eo juõn, ejabwe ibbeir lemnak eo jokkin wõt juõn ej itok jen ritto ilo mour. Kin menin, rej itok wõt in mõkaj ilo kõmman bebe, ekkã air lelok ir make ñan ijjibed ko rewan an ro dettair wõt, elap wõt ijo ñan jorrãn eo air make. Ilo mol, Bible ej ba: “E lukjõk men in bwebwe ilo buruen juõn ajiri.” Ta eo ej mejelan? “A alal in kaje e naj ubakelok etolok jen e.”—Jabõn Kennan Ko 22:15.
Tokjen ko kin bokake ellãlok jen kõtan eo an jemen im jinen im ajiri eo. Ñan an jukjuk im bed eo an armij jerbal ilo metaltõl im wõr tõbrak ko rej walok ie, ej aikwij wõr karejar ibben don, eo oktan ej aikwiji juõn joñok in bokake. Ñan wanjoñok, ilo juõn belele, ej bojak in lelok, jen an akwelap im jab lemnak kin jimwe im eñjake ko an ro jet, ej walok tokjen menin ilo ainemõn, errã, im mõnõnõ. Ilo jikin jerbal eo, ri jerbal eo ettãlok ej juõn aikwij ñan jabdewõt business ak jibadbad ñan lo tõbrak. Ilo kõtan eo ñan kien ko im kakien ko an government, bokake ejjab kanemkwoj wõt juõn jen an bõk kaje ak ej bareinwõt bõktok juõn joñan jokane im kejbãrok.—Dri Rom 13:1-7; Dri Epesõs 5:21-25; 6:5-8.
Armij ro redik ro rejjab bokake ro rej bed ilo maroñ ekkã air oktak im jõkkar ñan jukjuk im bed eo. Ilo keidi, katak eo kin bokake eo rej katak ilo ien ajiri wõt emaroñ eraklok wõt ilo an wõr an jinekjej ilo aolepen ien mour eo an juõn armij. Inem ewõr tokjen ñan katak menin ilo ien eo juõn ej ajiri wõt!
Jinekjej eo Elap kin Bokake
Bokake ejjab bõktok wõt kõtan ko rekamõnõnõ an family eo im tokjen ko jet kin aetok in mour ak ej bareinwõt letok bedbed eo ej ejaake kõtan eo elaptata an aorõk ian aolep—kõtan eo ikõtan juõn armij im Ri Kõmanman eo an. Einwõt “Dri Kõmõnmõn” eo Elap eo ej “unin dren in mour,” Jehovah Anij ejimwe an tellokin bõk bokake eo ad eyu.—Ekklisiastis 12:1; Sam 36:9.
Nan in “bokake” ilo wãwen ko ekajjo wãwen jen don ie ej walok elõñlok jen 160 alen ilo Bible eo. Bareinwõt, ewõr buki ijoko rej jitõñlok ñan kien eo an Anij, nan in kibel ko, bebe in ekajet ko, im men ko rej bebek juõn men, men kein otemjej rej kir ñan ad lelok kij ñani. Ealikar ñan kij bwe Anij ej lale bokake einwõt juõn menin aikwij ñan lañliñ ñan kabuñburuen. Aet, bokake ej juõn menin aikwij ñan kalek juõn kõtan ibben Jehovah. (1 Samuel 15:22) Ekaburomõjmõj, bwe kar baj eindein wõt bwe kõnan eo an armij ejjab ñan bokake ak ñan jab bokake. “Bwe enana lemnok in buruen armij jen an inono,” Bible ej ba. (Jenesis 8:21) Kin menin, katak eo kin bokake rej aikwij katak kake ejjab ilo ien ajiri wõt ak ilo aolepen ien mour eo. Kõmman eindein ej bõktok juõn jinekjej elap.
Kememej bwe, einwõt an kar ri jilek Paul kwalok, nan in kibel eo ñan bokake jemen im jinen ajiri ej itok ibben juõn kallimur eo ruo mweñan, einwõt ba, bwe “en emõn ibõm, im bwe en eto am mour ion lõl.” Juõn kamol in kallimur in jej lo ilo Jabõn Kennan Ko 3:1, 2: “Nejiõ, kwon jab meloklok kien eo aõ; a buruõm en bokake nan in kibel ko aõ: bwe aitokõn ran ko, im yiõ ko in mour, im ainemõn, re naj kobaik ñõn yuk.” Jinekjej eo elap ñan ro rej bokake ej juõn kõtan ibben Jehovah kiõ im mour indio ilo juõn lal in ainemõn ekãl.—Reveles̃õn 21:3, 4.
[Pija]
Bokake ej bõktok kõtan ko rekamõnõnõ ilo family eo, ilo jikin jerbal, im ibben Jehovah