Jehovah Ej Yokwe Ekajet Jimwe
“Ña, Jeova, Ij yokwe ekajet jime.”—AISEIA 61:8.
1, 2. (a) Ta melelen nan ko “ekajet jimwe” im “ekajet jab jimwe”? (b) Ta eo Bible ej ba kin Jehovah im kadkad in ekajet jimwe eo an?
EKAJET jimwe rej kamelele kake einwõt ‘kadkad eo ej kwalok ejelok kalijeklok, ejimwe im mol an jerbal, im ej lor mwil eo ewãnik im emõn.’ Ekajet jab jimwe ej kitibuj air kwalok kalijeklok, renana, im rej kaeñtan ro jet meñe ejjab tellokiir.
2 Enañin 3,500 yiõ ko remotlok, Moses ear jeje ikijen Iroij Bõtata eo ijoko otemjej ilañ im ilal, Jehovah: “An jerbal e wãppen; bwe ial ko An otemjej re wãnik: juõn Anij in tiljek im ejelok nana iben.” (Duteronomi 32:4) Elõñlok jen jiljilimjuõn buki yiõ ko tokelik, Anij ear kakõrmole Isaiah ñan je nan kein: “Ña, Jeova, Ij yokwe ekajet jime.” (Aiseia 61:8) Inem ilo ebeben eo kein kajuõn, Paul ear ba: “Eor jab wãnik iben Anij ke? En jab eñin.” (Dri Rom 9:14) Im ilo ejja ebeben eo wõt, Peter ear keañ: “Anij e jab lemnok kin okõtõn armij: A ilo ailiñ otemjej eo ej mijõk E, im jerbale kwojarjar, ej kabuñburuen.” (Jerbal 10:34, 35) Aet, “Jeova ej yokwe [ekajet jimwe].”—Sam 37:28; Malachi 3:6.
Ekajet Jab Jimwe Ej Jededlok Wõt
3. Ewi wãwen ekajet jab jimwe ear ijjino ion lal?
3 Ekajet jimwe ejjab juõn kadkad elap ilo ran kein. Jemaroñ jorrãn kin kõmman in ekajet jab jimwe ko ilo jabdewõt makitkit ko an jukjuk im bed in—ilo jikin jerbal eo, ilo school, ilo ad jerbal ibben ri utiej ro, im ilo wãwen ko jet—ilo dolul in family eo bareinwõt. Ilo mol, ekajet jab jimwe kein rejjab kãl. Rar walok ke ro jemed im jined moktata rar jumae im erom ri nana ro, kin an kar juõn jitõb ri jumae me ear erom Satan Devil eo kareel ir. Adam, Eve, im Satan rar lukkun bwid ke rar kajerbal maroñ in kãlet eo air me Jehovah ear lelok ñan ir ilo juõn wãwen ejjab jimwe. Bwid ko air rar bõktok elap eñtan im mij ñan armij otemjej.—Jenesis 3:1-6; Dri Rom 5:12; Dri Hibru 2:14.
4. Ewi toan an kar ekajet jab jimwe mõttan bwebwenato eo an armij?
4 Iumin enañin 6,000 yiõ ko jen jumae eo ilo Eden, ekajet jab jimwe ear erom mõttan wãwen jukjuk im bed in armij. Jemaroñ kõtmene bwe men in enaj walok kinke Satan ej anij in lal in. (2 Dri Korint 4:4) Ej juõn ri riap im jemen riap, juõn ri ruruwe im ri jumae Jehovah. (Jon 8:44) Ien otemjej ej kõmman an walok ekajet jab jimwe ko renana otem nana. Ñan wanjoñok, kin kilan eo enana an Satan mokta jen Ibwijleplep eo ilo ran ko an Noah, Anij ear lo bwe “elap nana ko an armij ion lõl, im bwe lemnok otemjej i buruen renana wõt aolepen ien.” (Jenesis 6:5) Wãwen in ear wõnmanlok wõt ñan ien eo Jesus ear bed ion lal. Ear ba: “Nana ilo ran ej bwe ñõn ran eo,” melelen bwe enaj wõr abañ ko an rebin, einwõt ekajet jab jimwe ko. (Matu 6:34) Ilo jimwe Bible eo ej ba: “Aolepen men in kõmõn e mat im ñõr, im mat im iñtan ñõn ien in.”—Dri Rom 8:22.
5. Etke elaplok an wõr ekajet jab jimwe ko ilo ran kein ad jen mokta?
5 Inem, ekajet jab jimwe ko me rej walok jen men ko renana rar wõnmanlok wõt ilo aolepen bwebwenato eo an armij. Wãwen eo kiõ ej nana lok jen mokta. Etke? Kinke iumin elõñ yiõ ko jukjuk im bed in kiõ enana ear bed ilo “ran ko eliktata” an, im ej iion “ien ko renana” ke ej ebake jemlokin. Bible eo ear kanan bwe ilo ien in, armij ro renaj “anij lo burueir, im re naj dri arõk mweiuk, im dri jualõñlõñ, im dri jua, im dri kajirere, . . . ro re jab kamolol, im dri nana, im ro re jab yokwe ro nukiir, im ro re lej, im ro rej kennan nan in riõp, ro re jab kamanwa, r’awia, ro rej drike emõn, ro dri ketõk, ro re mõlkaro, ro dri kimjãje.” (2 Timote 3:1-5) Kadkad ko renana einwõt kadkad kein remaroñ tellok ñan elõñ kain ekajet ko rejjab jimwe.
6, 7. Ta bwid ko elap air nana rej kaeñtan armij ro ilo ran kein?
6 Iumin jibuki yiõ ko rej kab motlok emwij ad lo ekajet jab jimwe ko ilo juõn joñan jejañin kar loi mokta. Juõn un ej bwe, elaplok an kar wõr tarinae ko iumin yiõ kein. Ñan wanjoñok, jet ri etale ro kin bwebwenato in armij rar antonelok bwe ilo Bata eo an Lal Kein Ka-II wõt, enañin 50 million ñan 60 million armij ro rar mij, enañin aolepeir rar jab ri tarinae ro—rar maan ro, kõrã ro, im ajiri ro ejelok rueir. Jen ien eo ear jemlok tarinae eo, elõñ million armij ro jet rar mij kin tarinae im ire ko jet, im bar ilo tarinae kein enañin aolep ro rar mij rar jab ri tarinae ro. Satan ej kowõnmanlok ekajet jab jimwe kein kinke elap an illu, kin an jelã bwe mõttan jidik Jehovah enaj kokkure e. Kanan eo ilo Bible ej kwaloke ilo wãwen in: “Bwe devil e ar wõnlõlwoj ñõn kom, im elap an illu, bwe e jela jirik wõt ien iben.”—Reveles̃õn 12:12.
7 Joñan money ko rej kajerbali kiõ ibelakin lal kin tarinae ej enañin juõn trillion dollar ko kajjojo yiõ. Elõñ buki million armij ro ejjab bwe aikwij ko ibbeir kin mour, inem lemnak mõk kin men ko remõn renaj kar walok elañe rar kajerbal aolep money kein kin jibadbad ko rainemõn. Enañin juõn billion armij ro ejjab bwe mõñã ko kijeir, ke ebuñ pãlok mõñã ko ibben ro jet. Ekkar ñan juõn report jen United Nations, ear kalikar bwe kajjojo yiõ enañin lalem million ajiri ro rej mij kin air kwuli. Elap an jab jimwe! Inem, lemnak kin elõñ ro ejelok rueir me rej mij kin an kõrã ro rebõroro mõn lojiir. Rej antonelok bwe oran eo ilo kajjojo yiõ ej ikõtan 40 million ñan 60 million ibelakin lal. Juõn bwid elap an nana!
8. Ilo wãwen et eo wõt emaroñ wõr ekajet jimwe ñan armij?
8 Ri tel im iroij ro ion lal rejañin lo mejelan abañ ko relõñ me rej kaeñtan armij ro rainin, im meñe rej kate ir ñan kamadmõde abañ ko rejamin lo tõbrak bareinwõt. Nan in Anij emwij an kanan bwe ilo ran ko ad “armij renana im ro dri jela mon re naj laplok ilo air nana, re naj mone im naj mone ir.” (2 Timote 3:13) Joñan an lap an ekajet jab jimwe jededlok ilo wãwen mour ko ad jen ran ñan ran, armij rejjab maroñ joloke. Anij in ekajet jimwe eo wõt emaroñ joloke. E wõt emaroñ jolok Satan, demon ro, im armij ro renana.—Jeremiah 10:23, 24.
Unin Ad Inebata
9, 10. Etke Asaph ear buromõj im kõnan ebwer?
9 Ilo ien ko remotlok, jet ri jeje Bible ro bareinwõt rar lemnak kin etke Anij ejañin kar bõk kunan ilo makitkit ko an armij im bõktok ekajet jimwe im wãnik eo emol. Ñan wanjoñok, lemnak kin juõn emaan me Bible eo ej konono kake. Jeje ko iman in Sam 73 ej kwalok kin ãt in Asaph, im emaroñ konono kin juõn ri al ebuñbuñ jen bwij eo an Levi ilo ien iroij eo an King David ak ñan ri kajañjañ ro ilo family eo an Asaph. Asaph im ro nukin rar kine elõñ al ko me rar kajerbali ke rar kabuñ ilobwilij. Ak, juõn ien ilo an mour, ri jeje sam in ear buromõj im kõnan ebwer. Ear lo an ri nana ro lukkun mweie, im ear lo bwe ekkã air juburu kin mour eo air, im rejjab iion jabdewõt tokjen ko renana.
10 Jej konono: “Bwe I kar junmar ro re jua, ke I ar lo an ro dri nana jerammõn. Bwe ejelok iñtan ilo air mij; ak kajur eo air ebin. Re jab jorran einwõt armij ro jet, im jab kokkure ir einwõt ro jet.” (Sam 73:2-8) Ak tokelik ri jeje Bible in ear kile bwe kain lemnak rot in ear bwid. (Sam 73:15, 16) Ri jeje sam in ear kajeoñ in kajimwe lemnak eo an, ak ear jab lukkun melele kin etke ro renana rar jab bõk kaje kin nana ko rar kõmmani ke armij ro rewãnik ekkã air kar eñtan.
11. Ta eo ri jeje sam in Asaph ear melele kake tokelik?
11 Tokelik, emaan in etiljek ear melele kin ta eo enaj walok ñan ro renana—bwe ilo jemlokin Jehovah enaj kajimwe men otemjej. (Sam 73:17-19) David ear je: “Kwon kõtar Jeova im kejbãrok ial eo An, im E naj koutiej yuk in jolit ene eo. Ñe bukwelok ro dri nana kwo naj loe.”—Sam 37:9, 11, 34.
12. (a) Ta karõk eo an Jehovah ikijen nana im ekajet jab jimwe? (b) Ewi lemnak eo am kin mejelan abañ in kin ekajet jab jimwe?
12 Jemaroñ liki bwe, ej karõk eo an Jehovah in bwe en jolok nana im ekajet jab jimwe ko jen lal in ilo ien eo ear karõke. Ej juõn men me Ri Christian ro retiljek bareinwõt rej aikwij kakememej ir kake. Jehovah enaj jolok ro rej jumae ankil an, im enaj kajerammõn ro rej mour ekkar ñan e. “Mejen ej lale, kilin mejen ej melejoñ ro nejin armij. Jeova ej melejoñ eo ej wãnik; im An ej kijirãte dri jerawiwi im eo ej yokwe lej. Ej kowut ion dri jerawiwi jen ko, kijeek im brimston, aire kijeek . . . Bwe ewãnik Jeova; ej yokwe wãnik; ro rejime re naj lo mejen.”—Sam 11:4-7.
Juõn Lal Ekãl im Ewõr Ekajet Jimwe Ie
13, 14. Etke wãnik im ekajet jimwe renaj jededlok ilo lal eo ekãl?
13 Elikin an Jehovah kokkure jukjuk im bed in enana me ej bed iumin pein Satan, Enaj bõktok juõn lal ekãl im aibujuij. Lal in enaj bed iumin Ailiñ eo an Anij ilañ, eo Jesus ear katakin ri kalor ro an ñan air jar kake. Wãnik im ekajet jimwe renaj bõk jikin nana im ekajet jab jimwe, kinke ilo ien in naj jejjet an uake jar in ilo wãwen eo eyu: “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.”—Matu 6:10.
14 Bible eo ej jiroñ kij kin kain iroij rot eo jemaroñ kõtmene kake, kain eo me aolep ro emol burueir rej kijoror kake. Ilo ien eo Sam 145:16 enaj jejjet kitien: “Kwoj [Jehovah Anij] erlokwe peiõm im kamat air kõnan ñõn men otemjej remour.” Bareinwõt, Aiseia 32:1 ej ba: “Lo, juõn kiñ [Christ Jesus ilañ] e naj iroij ilo wãnik, im iroij ro [ro rej jutak kin Christ ion lal] re naj iroij ilo ekajet jime.” Ikijen King eo Jesus Christ, Aiseia 9:7 ej kanan: “E naj ejelok jemlokõn orlok in men in iroij eo An im inemõn, ion tron eo an Devid, im ion men in kiñ eo an bwe En kabin e, im bwe En jibõñ e kin ekajet jime im wãnik jen ien in im ñõn in drio. Kijejeto an Jeova in inelip eo e naj kõmõn men in.” Kwomaroñ ke lo am mour iumin iroij in ewãnik?
15. Ta eo Jehovah enaj kõmmane ñan armij ro ilo lal eo ekãl?
15 Ilo lal eo ekãl an Anij, ejelok unin ad aikwij kwalok kin nan ko jej loi ilo Ekklisiastis 4:1: “Inem I ar jeblak im lo men in kejorran otemjej emwij kõmõni iomin al: im, lo, dren in kemjalal an ro emwij kejorran ir, im ejelok dri kainemõn; im iben ro dri kejorran ir eor kajur; a ejelok dri kainemõn ir.” Emol, kin lemnak ko ad rejjab wãppen, ebin ad lemnak kin ewi joñan an naj aibujuij lal eo ekãl im wãnik. Enaj ejelok nana, jen men in, ran otemjej enaj obrak kin men ko remõn. Aet, Jehovah enaj kajimwe bwid ko otemjej, im enaj kõmmane ilo juõn wãwen ellã jen ad maroñ kõtmene kake. Elukkun ekkar an Jehovah Anij kakõrmol ri jilek Peter ñan an je: “Ak jej kõttar kallimur an Anij: kin lõñ ko rekãl im juõn lõl ekãl, ijo wanik enaj bed ie”!—2 Peter 3:13.
16. Ewi wãwen “lõñ ko rekãl” rar jutak, im ilo wãwen et eo rej keboje “lõl [eo] ekãl” rainin?
16 Emol, “lõñ ko rekãl,” ak kien eo an Anij ilañ iumin pein Christ, emwij an kar jutak. Ilo ran kein eliktata emwij air ijjino aintok ro renaj mõttan “lõl [eo] ekãl,” melelen jukjuk im bed in armij ro rewãnik me renaj jokwe ion lal. Emwij air tõbar enañin jiljilimjuõn million armij, ilo enañin 235 ailiñ ko im 100,000 congregation ko. Armij rein elõñ million orair rej katak kin wãwen ko rewãnik im jimwe an Jehovah, im tokjen men in, ibelakin lal rej lañliñ kin juõn burukuk me ej bedbed ion yokwe in Christian. Burukuk eo air ej laptata an alikar im to an bed ilo bwebwenato eo an lal in, juõn burukuk me ellã jen jabdewõt men me armij ro an Satan rar iione. Yokwe im burukuk rot in rej kwalok kin ta eo enaj walok ilo lal eo ekãl an Anij, eo enaj bed iumin juõn kien ewãnik im jimwe.—Aiseia 2:2-4; Jon 13:34, 35; Dri Kolosse 3:14.
Tarinae eo an Satan Ejamin Lo Tõbrak
17. Etke tarinae eo eliktata an Satan nae armij ro an Jehovah ejamin wõr tõbrakin?
17 Mõttan jidik Satan im ro don renaj tarinaik ri kabuñ ro an Jehovah ñan kajeoñ in kokkure ir. (Ezekiel 38:14-23) Men in enaj mõttan men eo Jesus ear naetan ‘eñtan eo elap, eo e jañin einwõt jen jinoin lõl ñõn ien in, aet, e jamin einwõt tokelik.’ (Matu 24:21) Tarinae eo an Satan enaj wõr ke tõbrak? Jaab. Nan in Anij ej kallimur: “Bwe Jeova ej yokwe ekajet [jimwe], im E jab illok jen ro remõn An: naj kejbãrok ir ñõn in drio, a naj bukwelok inen ro renana. Ro remõn re naj jolit ene eo, im jokwe iloan ñõn in drio.”—Sam 37:28, 29.
18. (a) Ewi wãwen an naj Anij emmakit ñe Satan ej tarinaik armij ro An? (b) Etke ear emõn ñan am etale katak kein rej bedbed ion Bible kin anjo eo an ekajet jimwe?
18 Tarinae eo an Satan im jar in tarinae eo an nae ri karejar ro an Jehovah enaj jumae eo eliktata. Jehovah ear kanan ikijen Zechariah: “Jabdrewõt eo ej dreñet kom ej dreñet men eo eaurõktata ibba.” (Zechariah 2:8) Ej einwõt ñe juõn armij ej tuññũli ijuun mejen Jehovah kin addin pein. Enaj emmakit ilo mõkaj im kokkure aolep ri kijirãt ro. Ri karejar ro an Jehovah rej ro elaptata ion lal me rej kwalok yokwe, burukuk, ainemõn, im bokake kien. Inem tarinae eo nae ir elukkun naj jõkkar im jab jimwe. Eo elap an ‘yokwe ekajet jimwe’ ejamin kõtloke. An emmakit ilo etair enaj walok ilo an jako indio aolep ri kijirãt ro an armij ro an, ilo anjo eo kin ekajet jimwe, im ilo lomor eo an ro rej kabuñ ñan Anij eo wõt emol. Elõñ men ko elap air kabwilõñlõñ im kamõnõnõ rej bed imad!—Jabõn Kennan Ko 2:21, 22.
Ewi Wãwen Kwonaj Uak?
• Etke elap an jededlok ekajet jab jimwe?
• Ewi wãwen Jehovah enaj kamadmõde abañ eo kin ekajet jab jimwe ion lal?
• Ta eo ear jelet buruõm ilo katak in kin anjo eo kin ekajet jimwe?
[Pija eo ilo peij 7]
Nana ear kanuij lap mokta jen Ibwijleplep eo, im ej eindein ilo ‘ran kein eliktata’
[Pija eo ilo peij 8]
Ilo lal eo ekãl an Anij, wãnik im ekajet jimwe renaj bõk jikin nana