KAJJITÕK KO BAIBÕL̦ EJ UWAAKI

Ta eo jemaroñ katak kõn Anij?

Anij ej juon jetõb me jejjab maroñ loe. Ear kõm̦anm̦an ijoko otemjej ilañ, lal̦, im men otemjej. Ejjel̦o̦k jinoin Anij, mel̦el̦ein bwe ejjel̦o̦k en̦ ear kõm̦anm̦ane. (Sam 90:2, UBS) Anij ekõn̦aan bwe armej ro ren kõn̦aan katak im jel̦ã men ko rem̦ool kõn e.​—Riit Jerbal 17:24-27.

Ewõr etan Anij im jemaroñ jel̦ã etan. Bareinwõt, jemaroñ jel̦ã kõn e ikijjeen men ko ear kõm̦anm̦ani. (Rom 1:20) Ak bwe jen lukkuun jel̦ã kõn Anij, jej aikuj katak Baibõl̦. Naan eo an ej kwal̦o̦k kõn wãween an Anij kwal̦o̦k yokwe.​—Riit Sam 103:7-10.

Ta l̦õmn̦ak eo an Anij kõn men ko renana rej wal̦o̦k ñan armej ro?

Ri Kõm̦anm̦an eo ad, Jeova, ej illu im bũrom̦õj ñe ej lo an men ko renana wal̦o̦k ñan armej ro. (Duteronomi 25:16) Ear kõm̦anm̦an kõj ilo wãween wõt e. Eñin unin jej bar illu im bũrom̦õj ñe jej lo an men ko renana wal̦o̦k ñan ro jet. Anij ear jab kõm̦m̦an bwe men kein renana ren wal̦o̦k. Ilo m̦ool, Anij ear lel̦o̦k maroñ ñan an armej ro make kããlõt ta eo rekõn̦aan kõm̦m̦ane. Ekabũrom̦õjm̦õj bwe ejjab jim̦we wãween an elõñ armej ro kõjerbal maroñ in aer im rej kõm̦m̦ani men ko renana ñan ro jet. “Eddo bũruon” Jeova ke ej lo men kein.​—Riit Jenesis 6:5, 6; Duteronomi 32:4, 5, UBS.

El̦ap an aorõk ippãn Jeova jerbal im kõm̦m̦an ko rem̦m̦an im rejim̦we. Eban kõtl̦o̦k wõt bwe jerbal im kõm̦m̦an ko renana an armej ren wõnm̦aanl̦o̦k wõt. (Sam 37:28, 29) Baibõl̦ ej kallim̦ur bwe m̦õttan jidik Anij enaaj jol̦o̦k armej ro renana.​—Riit 2 Piter 3:7-9, 13.