Bukõt Juõn Karõk In Mour Ewõr Tokjen
“Men otemjej eor air menono ren nebar Jeova.”—SAM 150:6.
1. Kwalok kin jibadbad ko an juõn likao kin juõn unin mour eo ewõr tokjen.
“IAR katak bwe in juõn doctor kinke iar kõnan kajerbal mour eo aõ ñan jibañ armij. Iar bareinwõt lemnak bwe ñe inaj utiej im elõñ money ko inaj bõki einwõt juõn doctor enaj kõmman aõ mõnõnõ,” Seung Jin ej kememej, eo ear rittolok ilo Korea.a “Ke iar kile joñan an dik men ko doctor ro remaroñ kõmmani ñan jibañ armij ro ilo wãwen eo rej lukkun aikwij, iar oktak im buromõj. Inem iar katak bwe in juõn ri jiñña, ak men ko iar kõmmani rar bõktok jidik wõt tokjen ñan ro jet. Kin men in iar eñjake bwe ij kibbon kin aõ kõmman men ko me rar kalañliñ ña make. Iar oktak im juõn ri kaki, im ejjab to iar kile bwe iar maroñ lelok wõt melele ko ñan ir ak jab tel ir ilo juõn wãwen enaj tellok ñan mõnõnõ eo emol.” Einwõt elõñ ro jet, Seung Jin ear bukõt juõn karõk ak unin mour eo ewõr tokjen.
2. (a) Ta melelen bwe en wõr juõn karõk in mour ibbed? (b) Ewi wãwen ad jelã bwe Ri Kõmanman eo ear wõr ibben juõn karõk ke ear likit kij ijin ion lal?
2 Elañe ewõr juõn karõk emol ilo ad mour ej melelen bwe ewõr unin ad mour, ewõr juõn mejenkajjik ealikar, im ewõr juõn men jej kate kij kake. Emaroñ ke wõr juõn karõk rot in ibben armij? Aet! Mol eo in bwe kar kõmanman im letok ñan kij meletlet, juõn bõklikit, im maroñ eo ñan kõmmanwa ej kalikar bwe Ri Kõmanman eo ear wõr juõn an karõk emõn ke ear likit kij ijin ion lal. Kin men in, wãwen eo wõt jemaroñ lo im kajejjet karõk eo ad emol ej ikijen ad mour ekkar ñan karõk eo an Ri Kõmanman eo.
3. Karõk eo an Anij kin armij ej kitibuj ta?
3 Bible eo ej kalikar bwe karõk eo an Anij ej kitibuj elõñ men ko. Ñan wanjoñok, wãwen eo ekabwilõñlõñ kar kõmanman kij emol an kwalok yokwe eo an Anij ejelok kibbon ie. (Sam 40:5; 139:14) Kin men in, ñe jej mour ekkar ñan karõk eo an Anij ej melelen bwe jej yokwe ro jet ilo juõn wãwen ejelok kibbon ie einwõt Anij. (1 Jon 4:7-11) Ej bareinwõt melelen bwe jej bokake nan in jiroñ ko an Anij, me rej jibañ kij ñan mour ekkar ñan karõk eo an ej kwalok yokwe.—Ekklisiastis 12:13; 1 Jon 5:3.
4. (a) Ta eo ej men in aikwij bwe en wõr ibbed karõk eo emol ilo ad mour? (b) Ta karõk eo elaptata jabdewõt armij emaroñ jibadõke?
4 Anij ear bareinwõt karõk bwe armij ren mour ibben don im ibben men in kõmanman ko jet ilo yokwe im ainemõn. (Jenesis 1:26; 2:15) Ak, ta eo jej aikwij kõmmane bwe jen eñjake ad mõnõnõ, jokane, im ainemõn? Einwõt an juõn ajiri aikwij jelã bwe jemen im jinen rej bed ilo juõn jikin ebake e ñan an eñjake an mõnõnõ im jokane, jej aikwij juõn kõtan emõn im ebak ibben Jemed ilañ ñan lo unin im karõk eo emol ilo mour. (Dri Hibru 12:9) Anij ej kõmman bwe juõn kõtan rot in ibben en maroñ walok ilo an kõtlok bwe jen maroñ ruaklok ñan e im ilo an roñjake jar ko ad. (Jemes 4:8; 1 Jon 5:14, 15) Elañe jej “etetal iben Anij” ilo tõmak im erom ro jeran, jenaj maroñ kalañliñ im nebar Jemed ilañ. (Jenesis 6:9; Jabõn Kennan Ko 23:15, 16; Jemes 2:23) Eñin karõk eo elaptata jabdewõt armij emaroñ jibadõke. Ri jeje sam ear je: “Men otemjej eor air menono ren nebar Jeova.”—Sam 150:6.
Ta Karõk eo Am ilo Mour?
5. Etke ejjab juõn men in meletlet ñan likit men ko lor kanniek moktata ilo ad mour?
5 Juõn ian mõttan karõk eo an Anij ej bwe jen kejbãrok kij make im family ko ad. Men in ekoba ad lale aikwij ko ilo kanniek im men ko lor jitõb jimor. Bõtab, jej aikwij kwalok jokkin wõt juõn ilo men in bwe jen jab kõtlok bwe inebata im men ko an jukjuk im bed in ren laplok im aorõklok jen men ko lor jitõb. (Matu 4:4; 6:33) Ekaburomõjmõj bwe, elõñ armij rej kajerbal aolepen air mour ñan korlok mweiuk ko. Ak, ilo ad kajeoñ in jibadõk mweiuk ko ñan kabwe aolep aikwij ko ad, men in ejjab juõn men in meletlet. Juõn ekkatak rar kõmmane ilo ran kein kin armij ro remweie ilo Asia ej kalikar bwe elõñ iair rej “inebata im jab eñjake air jokane, meñe ewõr air utiej im elõñ men ko rar maroñ kõtõbraki kin air mweie.”—Ekklisiastis 5:11.
6. Ta nan in kakabilek eo Jesus ear letok ikijen jibadõk mweiuk ko?
6 Jesus ear konono kin “mon an mweiuk ko.” (Mark 4:19) Ilo wãwen et mweiuk ko rej men in mon? Ej kinke armij ro rej lemnak bwe mweiuk ko renaj kamõnõnõik ir, ak ilo mol rejjab. “Elañe kwoj arõk money, ejamin bo am kõnan,” king eo emeletlet Solomon ear kile. (Ekklisiastis 5:10) Ak juõn armij emaroñ ke jibadõk mejenkajjik ko lor kanniek im ilo ejja ien eo wõt karejar ñan Anij kin aolepen buruen? Jaab. Jesus ear kamelele: “Ejelok armij e maroñ bokake ruo iroij; bwe e naj kijirãte juõn im yokwe eo juõn; ak e naj drebij juõn im kejekron eo juõn. Kom ban dri korijeran Anij im mweiuk.” Jesus ear rejañ ri kalor ro an bwe ren korlok, jab mweiuk ko ion lal, ak ‘mweiuk ko i lõñ,’ melelen, ñan kõmman juõn ãt emõn ibben Anij, eo “e jela men ko komij aikwij mokta jen ami kajitõk iben.”—Matu 6:8, 19-25.
7. Ewi wãwen jemaroñ bõk “mour eo emol”?
7 Ke ear jeje ñan ri jerbal eo mõttan, Timothy, ri jilek Paul ear lelok jet nan in kakabilek ko rekajur ikijen men in. Ear jiroñ Timothy: “Kwon kowe ro dri mweie . . . bwe ren jab kejatrikrik ir kin mweiuk ko mweiuk torlok, a kin Anij, eo Ej wujleptok ñõn kij men ko otemjej bwe jen mõnõnõ kake . . . , im ren mol kab pojõk in lelok men in tiriamo: Im ren mõke kamweikwiuk ir kin foundes̃õn emõn mae ien ej itok, bwe ren bõk mour eo emol.”—1 Timote 6:17-19.
Ta in “Mour eo Emol”?
8. (a) Etke elõñ armij rej kate ir ñan jibadõk mweiuk ko im air utiej? (b) Ta eo rein rej likjap in kile?
8 Ñan elõñ armij, nan ko “mour eo emol” ej kõmman air lemnak kin juõn wãwen mour emweie im eobrak kin men in kamõnõnõ ko. Juõn magazine ilo Asia ear ba: “Ro rej aluij movie ak TV rej katak ñan kaddeklok juõn kõnan ñan bõk men ko rej loi, ñan ettõnak kin men ko remaroñ bõki.” Elõñ armij rej kõmman bwe jibadõk mweiuk im utiej en mejenkajjik eo air ilo mour. Elõñ rej mõnõnõ in jolok ien emõn ded eo air, ejmour, mour in family, im men ko raorõk ilo jitõb ñan air bukõt men kein. Eiet armij rej bõjrak im lemnak bwe ewõr kilan Satan ilo pija kein, im ej kamakit ir ñan air emmakit nae karõk eo an Anij ñan kij. (1 Dri Korint 2:12; Dri Epesõs 2:2) Eñin unin elukkun lõñ armij ro rejjab mõnõnõ kiõ!—Jabõn Kennan Ko 18:11; 23:4, 5.
9. Ta eo armij ro rejjab maroñ kõtõbrake, im etke?
9 Ta kin ro rej jerbal ilo ejelok kibbon kin emõn eo an armij ro jet, ilo air kate ñan jolok kwuli, nañinmij, im ekajet jab jimwe? Jibadbad ko air remõn im rej karmijeteik kõnan ko air make, ekkã air bõktok tokjen ko ñan elõñ armij. Ak, meñe rej kate ir joñan wõt air maroñ, rejamin ukõt jukjuk im bed in ñan juõn lal ejimwe im wãnik. Etke ejjab maroñ? Kinke “aolepen lõl ej berwõt ilo dri nana eo”—Satan—im ejjab kõnan bwe en oktak.—1 Jon 5:19.
10. Ñããt eo armij ro retiljek renaj lo “mour eo emol”?
10 Elap an kaburomõjmõj elañe juõn armij ejelok bar juõn kejatdikdik ibben ijellokin mour ilo lal in kiõ! “Elañe ilo mour in wõt jej kejatrikrik kij ilo Kraist, kij armij in tiriamo ian armij otemjej,” Paul ear je. Lemnak eo bwe “Jen mõña im irak, bwe ilju je mij” ej bed ibben ro im rej tõmak bwe ejelok bar juõn kejatdikdik kin mour ijellokin mour in. (1 Dri Korint 15:19, 32) Ak ewõr juõn ilju emõn, “kin lõñ ko rekal im lõl ekal, eo kwojarjar ej jokwe iloan.” (2 Piter 3:13) Ilo ien in, Ri Christian ro renaj maroñ lañliñ kin “mour eo emol,” melelen, “mour in drio” ilo wãppen, elañe jab ilañ inem enaj iumin iroij eo eyokwe an kien eo an Ailiñ in Anij!—1 Timote 6:12.
11. Etke jerbal eo ñan kowõnmanlok men ko an Ailiñ in Anij elap an keie?
11 Ailiñ in Anij wõt enaj lo tõbrak ñan kamadmõde abañ ko an armij. Kin men in, jerbal eo ñan kowõnmanlok men ko an Ailiñ in Anij ej jibadbad eo elaptata an keie me jabdewõt armij emaroñ jibadõke. (Jon 4:34) Ñe jej bõk kunad ilo jerbal in, jemaroñ lañliñ kin juõn kõtan eaorõk ibben Jemed ilañ. Bareinwõt, jemaroñ lañliñ in jerbal ibben million ro jeid im jatid ilo congregation in Christian, me rej jibadõk ejja karõk eo wõt ilo mour.
Kõmman Men in Katok ko Rejimwe
12. Keidi mour ilo jukjuk im bed in ibben “mour eo emol.”
12 Lal in kiõ “e jokolok im mõm ko an,” Bible eo ej ba. Ejelok juõn mõttan in lal eo an Satan, ekoba an buñbuñ im mweie, enaj ellã jen jorrãn, “a eo ej kõmõnmõn ankil an Anij ej berwõt in drio.” (1 Jon 2:15-17) Ilo oktan men ko remaroñ mõkaj air jako einwõt mweiuk in lal in, aibujuij eo ejedkaju, im men in kamõnõnõ ko an jukjuk im bed in me jidik wõt an wõr tokjeir, “mour eo emol”—mour indio iumin Ailiñ in Anij—enaj bedwõt ñan indio im ej tellokin ñan ad kõmman katok kake ak karmijete kõnan ko ad make, elañe jej kõmman katok ko rejimwe.
13. Ewi wãwen leo im lio ri belele rar kõmman katok ko rejimwe?
13 Lemnak kin Henry im Suzanne. Rej lukkun tõmak ilo kallimur eo an Anij bwe aolep ro rej likit bwe Ailiñ eo en moktata ilo air mour renaj bõk jibañ eo an Anij. (Matu 6:33) Kin men in, rar kãlet ñan jokwe ilo juõn em ejjab kanuij lap wõnãn bwe erro jimor rar jab aikwij in jerbal, im ilo wãwen in rar maroñ jolok elaplok ien ilo jibadbad ko lor jitõb ibben ledik ro ruo nejiir. (Dri Hibru 13:15, 16) Juõn jerair ear jab melele kin jokãlet eo air. Lio ear ba ñan Suzanne: “Jera, elañe kwokõnan jokwe ilo juõn em emõnlok, kwoj aikwij katok kin juõn men.” Ak, Henry im Suzanne rar jelã bwe elañe rej likit Jehovah moktata ilo air mour “eor an kalimur kin mour in, kab mour eo e naj itok.” (1 Timote 4:8; Taitõs 2:12) Ledik ro nejiir rar rittolok im erom ri kwalok full-time ro im rekijejeto. Einwõt juõn family, rej eñjake bwe ejelok jabdewõt men ko raorõk kar debiji jen ir; jen an eindein, ear lap air bõk tokjen ilo air kõmman bwe jibadõk “mour eo emol” en karõk in mour eo air.—Dri Pilippai 3:8; 1 Timote 6:6-8.
Jab ‘Kanuij Jerbale Lal In’
14. Ñe je meloklok karõk eo ad emol emaroñ tellok ñan kain rot jorrãn ko?
14 Bõtab, elukkun kauwatata elañe je meloklok karõk eo ad emol im jab debij wõt kejatdikdik eo ad kin “mour eo emol.” Jenaj bed ilo kauwatata eo bwe jen ‘ilok, im lemnok ko, im mweiuk ko, im mõnõnõ ko an mour in rej koutameik kij.’ (Luk 8:14) Kõnan ko ejelok kein bõprae im ‘inebata ko an mour’ remaroñ tellok ñan ad bõk kunad le jen joñan ilo jukjuk im bed in. (Luk 21:34) Ekaburomõjmõj bwe, jet rar lorak ilo aujid eo kin arõk mweiuk im “r’ar jebwãbwe jen tõmak im mõke wie ir kin elõñ men in kaburomõj,” im rar bareinwõt luji kõtan eo air eaorõk ibben Jehovah. Ej juõn tokjen elap an nana kin air jab “drebij mour in drio”!—1 Timote 6:9, 10, 12; Jabõn Kennan Ko 28:20.
15. Ewi wãwen juõn family ear bõk tokjen jen air jab ‘kanuij jerbale lal in’?
15 Paul ear kakabilek “ro rej jerbale lõl in [bwe en] einwõt re jab kanuij jerbale.” (1 Dri Korint 7:31) Keith im Bonnie rar bõk ñan burueir nan kein. “Iar erom juõn ian Ri Kennan ro an Jehovah ke ej kab mwij aõ school in kõmman ñi,” Keith ear ba. “Iar aikwij kãlet. Iar maroñ bõk elõñ ro rej kõmman ñiir, im korlok aõ jããn, ak men in enaj kar kabañ jerbal eo am ñan Anij. Iar kãlet ñan kõmman joñan ien aõ jerbal bwe en laplok aõ ien ñan lale ejmour eo ilo jitõb im eñjake an family eo am, eo ear koba lalem nejimro ledik. Meñe ear jeja an wõr bwen money ibbem, kimar katak ñan kadiklok men ko kimij wia, im ien otemjej ear bwe men ko kimar aikwiji. Ilo mour in family eo am kimar ebake don, ewõr jitõb in okmãnãn, im ear obrak kin lañliñ. Eliktata, kim aolep ar deloñ ilo jerbal in kwalok nan full-time. Kiõ limaro nejim emwij air mare, im jilu iair elõñ nejiir make. Family ko air remõnõnõ bareinwõt, kinke rej wõnmanlok im likit bwe karõk eo an Jehovah en moktata ilo air mour.”
Likit Karõk eo an Anij Mokta ilo Am Mour
16, 17. Joñok et ko kin armij ro rekabel Bible ej kwalok kaki, im ta wãwen ko jej kememej rein kake?
16 Bible eo ej kwalok wanjoñok ko kin ro rar mour ekkar ñan karõk eo an Anij im ro rar jab. Men ko jemaroñ katak jen wanjoñok kein rej jerbal ñan armij ro otemjej ajiri im ritto ro jimor, manit ko otemjej, im wãwen ko otemjej. (Dri Rom 15:4; 1 Dri Korint 10:6, 11) Nimrod ear kalek elõñ jikin kwelok ko relap, ak ear kõmmani ilo an jumae Jehovah. (Jenesis 10:8, 9) Ak, elõñ ro jet rar joñok ko remõn. Ñan wanjoñok, Moses ear jab kejbãrok kadkad eo an einwõt juõn ri utiej ilo Egypt bwe en karõk eo an ilo mour. Jen men in, ear watõk eddo ko an jen Anij einwõt “e aurõk jen mweiuk otemjej ilo Ijipt.” (Dri Hibru 11:26) Doctor eo Luke ekkã an jibañ Paul im ro jet kin nañinmij ko air. Ak Luke elaptata an kar jibañ armij ro einwõt juõn ri evanjel im ri jeje Bible eo. Ikijen Paul, je jelã kajjen, jab einwõt juõn eo etijemlok kin Kien eo, ak einwõt juõn missionary, juõn “dri jilik ñõn dri ailiñ ko.”—Dri Rom 11:13.
17 Elap ad kememej David, jab einwõt juõn ri tel in jar in tarinae eo im jab einwõt juõn ri kajañjañ im ri kine al ko, ak einwõt “juõn eman ekar ñõn buruen [Anij].” (1 Samuel 13:14) Jej jelã kin Daniel, ejjab kin jerbal eo an einwõt juõn ri utiej ilo kien eo ilo Babylon, ak kin jerbal eo an einwõt juõn ri kanan etiljek an Jehovah; Esther, ejjab einwõt leroij eo ilo Persia, ak einwõt juõn joñok emõn kin beran im tõmak; Peter, Andrew, James, im John, jab einwõt ri eñwõd ro, ak einwõt ri jilek ro an Jesus. Im joñok eo emõntata, jej kememej kin Jesus, jab einwõt juõn “karpenter,” ak einwõt “Dri Kraist.” (Mark 6:3; Matu 16:16) Aolep rein rar melele bwe jabdewõt kabel ko, mweiuk ko, ak utiejiir rar lañliñ kaki, mour eo air ej aikwij keolaplap, jab ilo jikin jerbal ko air, ak ilo jerbal eo air ñan Anij. Rar jelã bwe karõk eo elaptata an aorõk im ewõr tokjen ej bwe ren juõn maan ak kõrã eo ej mijak Anij.
18. Juõn Ri Christian emõn ded ear bebe ñan kajerbal mour eo an ilo wãwen et, im ta eo ear kile kake?
18 Seung Jin, eo kar konono kake ilo tujinoin katak in, ear melele kin men in bareinwõt. “Jen aõ kajerbal aolep kajur ko aõ ilo jerbal in doctor, jiñña, ak ri kaki, iar bebe ñan kajerbal mour eo aõ ekkar ñan wujleplok eo aõ ñan Anij,” ear kamelele. “Kiõ ij jerbal ilo juõn jikin elap air aikwij jibañ ie kin ro rej katakin kin Bible eo, im jibañ armij ñan air deloñ ilo ial eo ej tellok ñan mour indio. Iar lemnak bwe jerbal in kwalok nan full-time ejamin juõn jerbal ebin. Ak kiõ elaplok an limo wãwen mour eo aõ, ke ij kate iõ ñan kakõmõnmõnlok kadkad ko kadkadiõ im maroñ eo aõ ñan katakin armij ro jen ailiñ ko jet. Ij kile bwe ilo ad kõmman bwe karõk eo an Jehovah en karõk eo ad, ej wãwen mour eo wõt ewõr tokjen.”
19. Ewi wãwen ad maroñ lo karõk eo emol ilo mour?
19 Einwõt Ri Christian ro, kar letok ñan kij jelãlokjen im kejatdikdik eo ñan bõk lomor. (Jon 17:3) Inem, jen jab kõmman bwe “en jab jitokjen ami bõk joij an Anij.” (2 Dri Korint 6:1) Jen men in, jej aikwij kajerbal ran ko im yiõ ko ad raorõk ilo mour ñan nebar Jehovah. Jen kajededlok jelãlokjen eo me ej bõktok mõnõnõ eo emol kiõ im ej tellok ñan mour indio. Ilo ad kõmman men in, jenaj lo mol in nan kein an Jesus: “Mõnõnõ in lelok elap jen bõk.” (Jerbal 20:35) Im jenaj kar lo karõk eo emol ilo mour.
[Kõmel̦el̦e eo itulal̦]
a Kar ukõt jet ãt ko etan armij ro.
Kwomaroñ Ke Kamelele?
• Emaroñ wõr ibbed karõk et eo elaptata ilo ad mour?
• Etke ejjab juõn men in meletlet ñan am mour wõt ñan korlok mweiuk ko?
• Ta in “mour eo emol” me Anij ej kallimur kake?
• Ewi wãwen ad maroñ kajerbal mour eo ad ñan kajejjet karõk eo an Anij?
[Pija ko ilo peij 18]
Ri Christian ro rej aikwij kõmman katok ko rejimwe