Jibadõk Karõk Eo An Anij Rainin
“[Christ] ar mij kin otemjej bwe ro rej mour ren jab bar mour ñõn ir mõke.” —2 DRI KORINT 5:15.
1. Kwalok bwebwenato eo an juõn missionary kin jerbal eo an.
“KAR wa eo waameãñ eo moktata ian ro rejjab ri tarinae ear deloñlok ilo juõn bukwon etolok ilo Africa elikin an kar jemlok tarinae eo,” juõn missionary etan Aaron ear kememejlok.a “Ear ejelok ial in am konono ibben congregation eo ijo, im kim ar aikwij lale bwe en bwe aikwij ko an ro jeim im jatim. Ijellokin mõñã ko, nuknuk, im book in Bible ko, kim ar bõktok juõn copy in video eo Jehovah’s Witnesses—The Organization Behind the Name (Ri Kennan ro an Jehovah—Dolul eo Ilikin Ãt In).b Kin an lukkun lõñ armij ro rej itoklimo rar itok ñan aluije video in ear walok ilo ‘theater (imõn aluij pija)’ eo ilo bukwon eo—juõn em aj ekilep ijo me juõn VCR im TV rej bed ie—kim ar aikwij bar kwaloke ruo alen. Elõñ rar kõnan katak Bible eo jen wõt ien ko kajjojo kar kwalok video eo. Alikar, kate ko am rar lukkun wõr tokjeir.”
2. (a) Etke Ri Christian ro rej bebe ñan kajerbal mour eo air ilo jerbal eo an Anij? (b) Ta kajitõk ko jenaj etali kiõ?
2 Etke Aaron im lõmaro mõttan rar bõk juõn jerbal ebin? Kin air kamolol kin katok in binmour eo an Jesus Christ, rar wujleplok mour eo air ñan Anij im rekõnan kajerbale ekkar ñan karõk eo an Anij. Einwõt rein, aolep Ri Christian ro emwij air wujleplok rar errã ñan “jab bar mour ñõn ir mõke” ak ñan kõmman joñan wõt air maroñ “kin gospel” eo. (2 Dri Korint 5:15; 1 Dri Korint 9:23) Rejelã bwe ñe jukjuk in bed in ejemlok, aolep money im buñbuñ ko ilo lal in enaj ejelok tokjeir. Ilo air mour im emõn ejmour eo air, rekõnan kajerbal men kein ekkar ñan karõk eo an Anij. (Ekklisiastis 12:1) Ewi wãwen ad maroñ kõmmane menin? Ia eo jemaroñ lo beran im kajur eo jej aikwiji ñan kõmmane menin? Im ta jerammõn ko kin jerbal rej bellok ñan kij?
Wõnmanlok im Bõk Buñten Nee ko Rekeie
3. Ñan kõmanman ankilan Anij ta buñten nee ko ej kitibuji?
3 Ñan Ri Christian ro remol, kõmanman ankilan Anij ej juõn jerbal ejelok jemlokin. Ekkã an jino kin jet buñten nee ko raorõk einwõt kadeloñ etam ilo School in Kwalok Nan eo, readi Bible eo ran otemjej, bõk kunam ilo jerbal in kwalok nan, im kõmman wõnmanlok ko ñan am baptais. Ñe jej kõmman wõnmanlok ko, jej lemnak kin nan ko an ri jilek Paul: “Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej.” (1 Timote 4:15) Wõnmanlok in ejjab ñan kaibujuij kij make ak ej kalikar kõnan eo ad ñan kõmanman ankilan Anij ilo jab kibbon. Ilo ad lor ial in ej kwalok bwe jej kõtlok bwe Anij en tel jibadbad ko ad ilo aolep makitkit ko kin mour, im elaplok an emõn an kõmmane menin jen ad maroñ kõmmane.—Sam 32:8.
4. Ewi wãwen ad maroñ likit inebata ko ejelok tokjeir?
4 Bõtab, ñe jejjab kõmman bebe ko ilo mõkaj ak elap ad inebata kin kij make, menin emaroñ kabañ kij jen ad kõmman wõnmanlok ilo jerbal eo ad ñan Anij. (Ekklisiastis 11:4) Kin menin, mokta jen ad maroñ lo mõnõnõ eo emol ilo ad jerbal ñan Anij im ro jet, jenaj aikwij mokta anjo ion inebata ko ad make. Ñan wanjoñok, Erik ear lemnak in jerbal ilo juõn congregation ej konono bar juõn kajin. Ak ear inebata: ‘Inaj ke jelã karõk aõ ibben congregation eo? Inaj ke kõnan ro jeiõ im jatiõ ijo? Renaj ke kõnan ña?’ Ear ba: “Eliktata iar kile bwe iar aikwij inebata elaplok kin ro jeiõ im jatiõ im jab kin ña make. Iar bebe ñan jab inebata kin men kein im lemnak wõt kin men ko imaroñ kõmmani ñan jibañ ro jet. Iar jar kin jibañ im wõnmanlok wõt ilo bebe ko aõ. Kiõ, elukkun lap aõ mõnõnõ kin jerbal eo ijo.” (Dri Rom 4:20) Aet, toan wõt an laplok ad jerbal ñan Anij im ro jet ilo jab kibbon, jenaj lo mõnõnõ im juburu.
5. Ñe jej jibadõk karõk eo an Anij, etke jej aikwij karõk makitkit ko ad ilo juõn wãwen emõn? Kamelele.
5 Ñan lo tõbrak ilo ad jibadõk karõk eo an Anij ekitibuj ad aikwij karõk makitkit ko ad ilo juõn wãwen emõn. Ilo meletlet jejamin kõmman elõñ muri ko me remaroñ kalorak kij ñan jukjuk im bed in im kadiklok maroñ eo ad ñan kõmmane jerbal eo an Anij. Bible eo ej kakememej kij: “Dri muri ej korijeran dri kamuri.” (Jabõn Kennan Ko 22:7) Liki Jehovah im likit men ko lor jitõb mokta ej jibañ kij ñan lemnak wõt kin men kein. Ñan wanjoñok, Guoming im kõrã ro ruo jein im jatin rej jokwe ibben jineir ilo juõn bukwon elap wõnãn em im ebin ellolo jerbal ko remõn ie. Ilo air kejbãrok wãwen air kajerbal jããn im jibañ don kõllãik men ko jet, rar maroñ kabwe aikwij ko air meñe jet wõt iair rar jerbal. “Jet ien, ejjab aolep ej wõr air kõllã ak jããn,” Guoming ej ba. “Bõtab, kimij maroñ wõnmanlok wõt ilo jerbal in pioneer im bareinwõt lale im kejbãrok jinim. Elap am kamolol bwe Jinim ejjab kõnan bwe kimin kajekdon jibadbad ko lor jitõb ñan am kabwe aikwij ko an ilo mour.”—2 Dri Korint 12:14; Dri Hibru 13:5.
6. Ta joñok eo ej kwalok kin wãwen eo jemaroñ kõmman bwe mour eo ad en errã ibben karõk eo an Anij?
6 Elañe elap am boub in jibadõk jerbal ko an lal—meñe jibadbad ko kin jããn ak men ko jet—likit karõk eo an Anij mokta emaroñ aikwij ad kõmman elap oktak ko. Oktak kein ekkã air jab walok ak kõmman ilo mõkaj, im elañe kwoj kõmman bwid ilo ien eo jinoin kwar kajeoñ ejjab melelen bwe kwoj likjap. Lemnak kin Koichi, eo me ear wõr juõn an abañ ikijen an lap an jolok ien ñan ikkure. Koichi ear katak Bible ke ear juõn jodikdik, ak iumin elõñ yiõ ko, video game ko ear men eo elaptata ilo mour eo an. Juõn ran Koichi ear ba ñan e make: ‘Kwoj et? Jilñoul jima am yiõ kiõ, im kwojjab kõmman jabdewõt men ewõr tokjen kin mour ne am!’ Koichi ear bar jino an katak kin Bible eo im bõk jibañ jen congregation eo. Meñe oktak ko rar walok jidik kin jidik, ear jab ebwer. Kin jar ko relõñ im jibañ ko reyokwe jen ro jet, ejjab to ear anjo ak rõlok jen manit eo an. (Luk 11:9) Koichi ej kiõ mõnõnõ in jerbal einwõt juõn ministerial servant.
Katak ñan Ad Jokkin Wõt Juõn
7. Etke jej aikwij jokkin wõt juõn ilo ad kõmmane jerbal eo an Anij?
7 Jibadõk karõk eo an Anij ej kitibuj kate ko ad kin aolepen buruõd. Jej jab aikwij makoko ak jowan ilo ad kõmmane menin. (Dri Hibru 6:11, 12) Bõtab, Jehovah ejjab kõnan bwe jen kamõk kij make—ilo enbwin, lemnak, ak ilo eñjake. Ilo ad ettã buru im kile bwe jejjab maroñ kõtõbrak jerbal eo an Anij kin kajur eo ad make menin ej kaibujuij e im bareinwõt kwalok bwe jej jokkin wõt juõn. (1 Piter 4:11) Jehovah ej kallimur ñan letok kajur eo jej aikwiji ñan kõmanman ankilan, bõtab jej jab aikwij iun kij make ellã jen joñan ad maroñ, ilo ad kajeoñ in kõmmani men ko ejjab kõtmene jen kij. (2 Dri Korint 4:7) Ñan wõnmanlok im jerbal ñan Anij ilo ad jab kamõk kij make, jej aikwij karõk jibadbad ko ad.
8. Ta eo ear walok ke juõn jiroñ Ri Christian ear kajeoñ in lelok joñan wõt an maroñ ñan lal in im ñan Jehovah jimor, im ta oktak eo ear kõmmane?
8 Ñan wanjoñok, iumin ruo yiõ Ji Hye, eo ej jokwe ilo Turear in Asia, ear jerbal ilo juõn jikin jerbal elap ijjibed ie ke ej pioneer. “Iar kajeoñ in lelok joñan wõt aõ maroñ ñan Jehovah im ñan jerbal eo aõ jimor,” jiroñ in ej kamelele, “ak iar kiki lalem wõt awa ko ilo juõn boñ. Ejjab to, ear ejelok aõ kajur ak maroñ in lemnak kin mol eo, im ear dik aõ mõnõnõ kin men ko lor jitõb.” Ñan an maroñ jerbal ñan Jehovah kin ‘aolepen buruen, aan, lemnak, im an kajur,’ Ji Hye ear bukõt bar juõn jikin jerbal me enaj diklok an jolok ien ko an. (Mark 12:30) “Meñe family eo aõ ear jibed iõ bwe in bukõt juõn jerbal elaplok wõnãn ñan kalaplok money ko, iar kajeoñ ñan likit karõk eo an Anij mokta,” jiroñ in ej ba. “Ij maroñ wõt bõk jããn ko ñan kabwe aikwij ko, einwõt nuknuk ko rekarbõb. Im elap an emõn aõ mour bwe ebwe awa in aõ kiki! Ij lo mõnõnõ ilo jerbal in kwalok nan eo aõ, im elaplok aõ kajur ilo jitõb kiõ. Ej eindein kinke ediklok aõ jelmae men in kareelel ko im men in kamad ko an lal in.”—Ekklisiastis 4:6; Matu 6:24, 28-30.
9. Ewi wãwen kate ko ad ilo jerbal in kwalok nan enaj jelet armij ro?
9 Ejjab aolep remaroñ jerbal ñan Anij einwõt juõn full-time ri kwalok kin news eo emõn. Elañe kwoj jelmae am ritto, nana ejmour, ak utame ko jet, kememej bwe Jehovah ej lukkun kamolol kin tiljek eo am im jabdewõt jerbal ko kwoj kõmmani kin aolepen buruõm. (Luk 21:2, 3) Kin menin, ejelok juõn iad, ej aikwij kajettokjen mol eo bwe kate ko ad, meñe ewõr joñair, emaroñ wõr kilair ñan ro jet. Ñan wanjoñok, ta elañe jaar etal ñan jet em im ejelok en ear itoklimo kin ennan eo ad. Ke jaar etal jen moko, armij ro remaroñ kennan kin ad jolok elõñ awa ko ak ran ko ñan ad bukõtlok ir, meñe ejelok ear kabellok kejam eo ñan kij! Jej jab kõtmene bwe aolep ro rej roñjake news eo emõn renaj mõnõnõ in bõke, ak ewõr jet renaj. (Matu 13:19-23) Jet remaroñ uak tokelik elañe wãwen ko ilo lal in ak ilo mour eo air ej oktak. Ilo jabdewõt wãwen, ñe jej kõmman joñan wõt ad maroñ ilo jerbal in kwalok, jej kõmmane jerbal eo an Anij. Jej “dri jerbal iben Anij.”—1 Dri Korint 3:9.
10. Ta jerammõn ko rebellok ñan aolep ro ilo congregation eo?
10 Bareinwõt, kij aolep jemaroñ jibañ ro uan family ko ad im ri tõmak ro jeid im jatid. (Dri Galetia 6:10) Kilan eo ad emõn ion ro jet emaroñ lap im to air bed. (Ekklisiastis 11:1, 6) Ñe elder ro im ministerial servant ro rej niknik in kõmmane eddo ko air, rej jibañ ro ilo congregation eo ñan air ejmour im bin wõt ilo jitõb, im makitkit ko an Christian renaj lõñlok. Jej liki bwe elañe “eor [tokjed] ien otemjej ilo jerbal an Iroij,” jerbal eo ad “e jab jekron.”—1 Dri Korint 15:58.
Jibadõk Karõk eo an Anij Einwõt Ej Jerbal eo Ad
11. Ijellokin ad jerbal ibben congregation eo ilo bukwon eo, ta jerammõn ko jet remaroñ bellok ñan kij?
11 Einwõt Ri Christian ro, jej yokwe mour, im jekõnan kaibujuij Anij ilo men otemjej jej kõmmane. (1 Dri Korint 10:31) Ñe jej tiljek ilo ad kwalok news eo emõn kin Ailiñ eo im katakin ro jet ñan air bokake aolep nan ko Jesus ear jiroñ kij kaki, jenaj lo jerammõn ko relõñ kin jerbal ko rebellok ñan kij. (Matu 24:14; 28:19, 20) Ijellokin ad jerbal ibben congregation eo ad, emaroñ wõr jerammõn ko ibbed rebellok ñan jerbal ijo me elaplok aikwij ie, bõlen ilo bar juõn territory, kajin, ak juõn ailiñ. Elder im ministerial servant ro ewõr air maroñ me rejañin mare, remaroñ kir ir ñan air bed ilo School in Bible ñan Katakin Lõmaro kin Jerbal ko Rejej Uair, im elikin air diojlok renaj etal im jerbal ilo congregation ko me rej aikwij jibañ kin Ri Christian ro reritto ilo jitõb, bõlen ilo ailiñ eo air make ak ijoko jet. Ri belele ro me rej bed ilo jerbal in kwalok nan full-time emaroñ tellokiir ñan bõk kaminene kin missionary jen school eo etan Gilead im ñan jerbal ilo juõn ailiñ ej konono bar juõn kajin. Im ewõr juõn aikwij elap kin ro remõnõnõ in bõk eddo eo ñan kõmman jerbal ko rekajjo jen don ilo Bethel im ilo ekkal im kejbãrok jikin kwelok ko im office ko ilo ra eo.
12, 13. (a) Ewi wãwen am maroñ bebe kin jerbal rot eo kwonaj jibadõke? (b) Kamelele kin ewi wãwen bõk kaminene ilo juõn jerbal emaroñ wõr tokjen ñan jerbal ko jet.
12 Jerbal et eo kwonaj jibadõke? Einwõt juõn ri karejar an Jehovah emwij an wujleplok, ien otemjej kwon reilok ñan e im ñan dolul eo an ñan bõk tel. An “Jitõb emõn” enaj jibañ yuk ñan kõmman juõn bebe ejimwe. (Nihimaia 9:20) Ekkã an juõn jerbal tellok ñan bar juõn, im iminene im kabel ko jej bõki ilo juõn kain jerbal emaroñ wõr tokjeir ilo bar juõn jerbal tokelik.
13 Ñan wanjoñok, Dennis im lio belen, Jenny, ekkã air bõk kunair ilo jerbal in ekkal Kingdom Hall ko. Elikin an kar Hurricane Katrina kajorrãn turõkin United States, erro ar bõk eddo eo ñan jibañ ro rar aikwij jibañ. Dennis ej ba: “Kajerbal kabel ko kim ar bõki jen am kalek Kingdom Hall ko ñan jibañ ro jeim im jatim ear bõktok elap lañliñ ñan kim. Kamolol eo me ro kim ar jibañ ir rar kwaloke emol elap an jelet buruem. Elõñ ian kumi in ri jibañ ro jet rar lo jidik wõt tõbrak ilo air bar kaleki moko. Emwij an kar Ri Kennan ro an Jehovah kõkãl ak bar kalek elõñlok jen 5,300 moko im elõñ Kingdom Hall ko. Armij ro rar lo wãwen ad jerbal rej kiõ kwalok air itoklimo kin ennan eo ad.”
14. Ta eo kwomaroñ kõmmane elañe kwokõnan jibadõk jerbal in kwalok nan full-time?
14 Kwomaroñ ke jibadõk karõk eo an Anij ikijen am kãlet jerbal in kwalok nan full-time einwõt jerbal eo am? Elañe aet, emol kwonaj bõk elõñ jerammõn ko. Elañe wãwen ko ibbam kiõ rejjab kõtlok bwe en eindein, bõlen kwomaroñ kõmman juõn oktak. Kwon jar einwõt kar Nehemiah ke ear kõnan bõk juõn jerbal eaorõk: “O [Jehovah], ij akwelap ñõn Yuk, . . . Kwon kejerammõn ña korijerõm.” (Nihimaia 1:11) Inem, liki Eo ej “roñjake jar,” im jerbal ekkar ñan jar eo am. (Sam 65:2) Ñan an Jehovah maroñ kajerammõn jibadbad ko am ñan kalaplok am jerbal ñane, mokta kwoj aikwij kõmman jibadbad kein. Ñe emwij am bebe ñan bõk jerbal in kwalok nan full-time, lor wõt im kabin bebe eo am. Elikin jet ien, iminene eo am enaj laplok, im enaj laplok am lañliñ.
Mour Emol an Wõr Tokjen
15. (a) Ewi wãwen ad bõk tokjen jen ad bwebwenato ibben im read kin ri karejar ro etto air karejar ñan Anij? (b) Kwalok juõn bwebwenato me kwar lo bwe elap an kõketak yuk.
15 Ta tokjen ko kwomaroñ kõtmene jen am jibadõk karõk eo an Anij? Bwebwenato ibben ro etto air karejar ñan Jehovah, elaptata ro me rar bõk jerbal in kwalok nan full-time iumin elõñ yiõ ko. Elap an kajuburu im ewõr unin mour eo air! (Jabõn Kennan Ko 10:22) Renaj jiroñ yuk bwe Jehovah ejañin kar likjap in jibañ ir ñan bõk men eo elap air aikwiji im elõñ men ko jet meñe ilo wãwen ko rebin. (Dri Pilippai 4:11-13) Iumin elõñ yiõ ko kiõ ear walok elõñ buki bwebwenato ko kin ro retiljek ilo magazine in Imõniaroñroñ. Kajjojo bwebwenato kein rej kwalok juõn jitõbõn kijejeto im lañliñ me ej kakememej kij kin bwebwenato eo ej bed ilo Bible ilo book in Jerbal. Ilo am readi bwebwenato kein renaj kamakit yuk ñan am ba, ‘Ikõnan wãwen mour rot in!’
16. Ta eo ej kõmman bwe mour eo an juõn Ri Christian en wõr tokjen im kamõnõnõ?
16 Aaron, me kar konono kake ilo jinoin katak in, ej kememej: “Ilo Africa, ekkã aõ iion jodikdik ro me rej itoitak jen ailiñ eo air ñan bukõt unin air mour. Elõñ rar jab maroñ lo juõn. Bõtab kim ar, im kimij bed ijin ñan jibadõk karõk eo an Anij ikijen am kowõnmanlok news eo emõn kin Ailiñ eo, im kim ar lañliñ kin juõn mour ekaitoktoklimo im ewõr tokjen. Kim ar kile bwe elaplok mõnõnõ ilo lelok jen ilo bõk.”—Jerbal 20:35.
17. Etke jej aikwij jibadõk karõk eo an Anij kiõ?
17 Ta kin kwe? Ta jibadbad eo kwoj jibadõke? Elañe ejelok juõn am mejenkajjik ilo jitõb, jibadbad ko jet renaj mõkaj air bõk ien im kajur ko am. Etke kwoj jerwane mour eo am eaorõk ñan men ko me lal eo an Satan ej kowõnmanloki? Mõttan jidik ñe “iñtan eo elap” ej walok, mweiuk ko im jerbal ko an lal enaj ejelok tokjeir. Men eo enaj wõr tokjen ej kõtan eo ad ibben Jehovah. Enaj lap ad kamolol bwe jaar jerbal ñan Anij im ro jet im ear lap ad jibadõk karõk eo an Anij ilo mour eo ad!—Matu 24:21; Reveles̃õn 7:14, 15.
[Kõmel̦el̦e ko itulal̦]
a Kar ukõt jet ãt ko etan armij.
b Jeje in Ri Kennan ro an Jehovah.
Kwomaroñ Ke Kamelele?
• Ewi wãwen an Jehovah lemnak kin jerbal eo ad ñane?
• Ewi wãwen an meletlet im jokkin wõt juõn jibañ kij ñan jerbal ñan Anij im ro jet?
• Ta jerammõn ko rebellok ñan ad jerbal ie?
• Ewi wãwen ad maroñ bõk juõn mour emol im ewõr tokjen kiõ?
[Pija ko ilo peij 24]
Jej aikwij kwalok jokkin wõt juõn ñan ad maroñ wõnmanlok wõt im jerbal ñan Jehovah kin aolepen aad
[Pija ko ilo peij 25]
Elõñ wãwen jerbal ekwojarjar