Kabukõt Im Etale “Men Ko Remũlõl An Anij”
“Jitõb ej kabukot men otemjej, aet, men ko re mũlõl an Anij.”—1 DRI KORINT 2:10.
1. Ta jet ian katak ko remol jen Bible eo rej kalañliñ ri katak Bible ro rekãl?
ENAÑIN aoleped ilo congregation in Christian jej kememej ien eo jar lañliñ ke jaar katak kin mol eo. Jaar katak im melele etke ãt eo etan Jehovah e aurõk, etke ej kõtlok an wõr eñtan, etke jet wõt armij renaj etal ñan lañ, im ta ilju eo an ro retiljek. Bõlen emwij ad kar katak Bible eo moktalok, ak rar noje men kein jen kij, ejja wãwen in wõt ej walok ibben enañin aolep armij ro. Jemaroñ keidi kij make einwõt juõn armij me ear kajeoñ aluije wõd ko ilo lojet. Elañe ejelok kein jibañ ibben, ejamin lo aolep men ko raibujuij ilo lojet. Bõtab, ilo an kajerbal mej in turoñ ak uwe ion juõn loon me ewõr glass kabin, enaj lap an kijoror ñan lale elõñ kain wõd ko raibujuij im bwijin kain unokair, ek ko, elõñ men in mour in lojet ko jet einwõt jibinbin, aolõk im men ko eierlok wõt rekabwilõñlõñ. Eindein, ke juõn armij ear katakin kij ñan melele kobban Bible eo, jaar jino im lo “men ko re mũlõl an Anij.”—1 Dri Korint 2:8-10.
2. Etke lañliñ eo ej itok jen ad katak Nan in Anij emaroñ bed wõt ñan indio?
2 Jen juburu wõt ke kin ad jelã jidik kin jet katak ko remol jen Bible eo? Nan eo “men ko remũlal an Anij” ej kitibuj ad melele kin meletlet eo an Anij me ej lelok ñan ri Christian ro ikijen jitõb kwojarjar ak ej noje jen ro jet. (1 Dri Korint 2:7) Katak ko kin meletlet an Anij rebellok ñan kij im eban jemlok ad maroñ lañliñ kaki! Jejamin jelã men otemjej kin wãwen ko remeletlet an Anij. Lañliñ eo jaar bõke ilo ien eo jaar jino katak Bible eo emaroñ bed wõt ibbed ñan indio elañe ejjab bõjrak ad etale “men ko re mũlõl an Anij.”
3. Etke jej aikwij lukkun melele kin men ko jej tõmak kaki?
3 Etke jej aikwij bõk melele kin “men ko re mũlõl”? Ad bõk melele jab kin men ko wõt jej tõmak kake ak bareinwõt kin un ko unin ad tõmaki—bedbedin men ko jej tõmak kake—rej kakajur tõmak im liki eo ad. Jeje ko rej jiroñ kij ñan “jerbal men in jitõb” ñan “melejoñ [kij] ta ankil an Anij emõn im kabuñburuen im wãppen.” (Dri Rom 12:1, 2) Ad melele kin un ko unin an Jehovah kajitõk ibbed bwe jen mour ilo juõn wãwen ekkar ej kakajur bebe eo ad ñan bokake. Kin men in, jelãlokjen eo kin “men ko re mũlõl” emaroñ letok kajur ñan kate kij im jab bo kin kõmman ko rejõkkar im emaroñ kakajur kij ñan “kijejeto ilo jerbal ko remõn.”—Taitõs 2:14.
4. Katak Bible eo ej kitibuj ta?
4 Ñan melele men ko remũlal jenaj aikwij katak ibbed make. Bõtab, katak ejjab joñan wõt juõn einwõt ñe kwoj read bajjek juõn men. Ej kitibuj aikwij eo ñan lukkun liñõre juõn katak im kile ewi wãwen ej ekkejellok ibben men ko kwoj jelã kadede. (2 Timote 1:13) Ej kitibuj ad kile un ko unin rej ba juõn men. Ien katak Bible eo ej aikwij koba ien kalmenlokjen kin ewi wãwen jemaroñ kajerbale men ko jej katak kaki ñan kõmman bebe ko remeletlet im ñe jej jibañ ro jet. Bareinwõt, kinke “Jeje ko otemjej emwij letok kin kakõrmol an Anij,” katak eo ad en kobaik “nan otemjej rej waloktok jen loñin Anij.” (2 Timote 3:16, 17; Matu 4:4) Katak Bible emaroñ kitibuj elap jerbal! Ak bareinwõt elap lañliñ ie, im ad melele “men ko re mũlõl an Anij” ejjab lukkun bin.
Jehovah Ej Jibañ Ro Rettã bwe Ren Melele Kake
5. Wõn ro remaroñ melele kin “men ko re mũlõl an Anij”?
5 Meñe ear jab lap am kabel ilo katak ko ilo school im kwojjab iminene in katak, kwon jab lemnak bwe “men ko re mũlõl an Anij” rebin im kwojjab maroñ melele kake. Ke Jesus ear bed ion lal, Jehovah ear kalikar karõk eo an, jab ñan ro ri meletlet im ri jelãlokjen, ak ear kalikare ñan ro rar jab school im ro re ettã burueir ñan bõk katak ko jen ro ri karejaran Anij. Rar einwõt niñniñ rõn ñe jej keidi ibben ro rar katak ilo school ko. (Matu 11:25; Jerbal 4:13) Kin “men ko jabrewõt Anij e ar kapojõk ñõn ro rej yokwe E,” ri jilek Paul ear jeje ñan ri tõmak ro mõttan: “Anij e ar kwaloki ñõn kij kin Jitõb: bwe Jitõb ej kabukot men otemjej, aet, men ko re mũlõl an Anij.”—1 Dri Korint 2:9, 10.
6. Ta melelen 1 Dri Korint 2:10?
6 Ewi wãwen jitõb eo an Anij ej kabukõt “men otemjej, aet, men ko re mũlõl an Anij”? Ijellokin an kwalok ñan Ri Christian ro kajjojo reveles̃õn ko air make, Jehovah ej kajerbal dolul eo an me jitõb eo ej bed ion. Dolul in ej lelok melele ko kin Bible eo ñan ro don Anij im rej jerbal ilo burukuk. (Jerbal 20:28; Dri Epesõs 4:3-6) Ibelakin lal, congregation ko rej lañliñ ñan lor einlok wõt program in ibben don kin katak Bible eo. Ilo jejjo wõt yiõ ko, rej katak ibben don aolep katak ko ilo Bible eo. Jitõb kwojarjar eo ej jerbal ilo congregation ko ñan jibañ armij ro ie kwalok mwil ko mwilin Christian bwe ren melele “men ko re mũlõl an Anij.”—Jerbal 5:32.
Ta Men Ko Rej Kitibuj “Men ko Re Mũlõl an Anij”
7. Etke elõñ armij rej jab melele kin “men ko re mũlõl an Anij”?
7 Jen jab lemnak bwe “men ko re mũlõl” rebin ñan melele kake. Jelãlokjen eo kin “men ko re mũlõl an Anij” renojak jen enañin aolep armij, ejjab kinke meletlet eo an Anij elap an bin ñan melele ak bõke, ak kinke Satan ej mone armij bwe ren karmijete jibañ eo Jehovah ej lelok ikijen dolul eo an.—2 Dri Korint 4:3, 4.
8. Ta men ko remũlal Paul ear kwaloki ilo chapter eo kein kajilu ilo letter eo an ñan ri Epesõs ro?
8 Chapter eo kein kajilu ilo letter eo an Paul ñan ri Epesõs ro ej kwalok bwe “men ko re mũlõl an Anij” rej kitibuj elõñ katak ko me enañin aolep armij ro an Jehovah remelele kake, einwõt wõn eo ej Ine in kallimur eo, wõn armij ro ewõr ibbeir kejatdikdik eo ñan mour indio ilañ, im Ailiñ in Messiah eo. Paul ear je: “Ilo ien ko remotlok Anij ear jab kwalok men eo ettino ñõn armij, ak kiõ emwij an kwaloke kin Jitõb eo an ñõn ri jilõk ro rekkwojarjar im ri kanan ro. Eñin men eo ettino; kin wõt gospel ri ailiñ ko rej bõk air kõj ilo jerammõn ko an Anij ibben ri Jew ro; rej jimdron ilo juõn wõt enbwin, im bõk air kõj ilo kallimur eo Anij ear kõmmõne ilo Christ Jesus.” Paul ear ba bwe ear bõk jen Anij jerbal eo ñan “kalikkar ñõn armij otemjej wãwen an naj tõbrak bebe eo ettino an Anij. Anij, eo ej ri kõmõnmõn men otemjej.”—Ephesus 3:5-9.
9. Etke ej juõn jerammõn ñan melele “men ko re mũlõl an Anij”?
9 Paul ear bar kamelele kin ankil an Anij bwe “eklesia eo an en kalikkar ñõn kajur ko im maroñ ko ilo lõñ ko kin jelãlokjen eo an Anij.” (Dri Epesõs 3:10) Enjel ro remaroñ katak ikijen air lale wãwen eo Jehovah ej jerbal ibben congregation in Christian ilo meletlet. Ej juõn jerammõn ibbed ñan bõk melele kin men ko enjel ro rej bar itoklimo kake! (1 Piter 1:10-12) Tokelik, Paul ear ba bwe jenaj aikwij kate kij ñan “kanuij jela iben ro remõn otemjej, ta eo drilpen, im aitokõn, im mũlõlin, im utiejen,” kin tõmak eo an Christian. (Dri Epesõs 3:11, 18) Kiõ jen etale jet wanjoñok ko kin men ko remũlal me remaroñ kalaplok ad melele im lolokjen.
Wanjoñok ko kin Men ko Remũlal
10, 11. Ekkar ñan Jeje ko ilo Bible, ñããt eo Jesus ear erom mõttan eo elap an ‘inen’ “kõrã” eo an Anij ilãñ?
10 Jejelã bwe Jesus ej mõttan eo elap an “ine” eo kin “korã” an Anij ilõñ me ej walok ilo Jenesis 3:15. Ñan kalaplok ad melele, jemaroñ kajitõk: ‘Ñaat eo Jesus ear erom Ine in kallimur eo? Ekar walok ke mokta jen an itok jen lõñ, ilo ien an lotak einwõt juõn armij ilo kanniek, ilo ien ear baptais, ak ilo ien ear jerkakbiji?’
11 Anij ear kallimur bwe mõttan dolul eo an ilõñ, me kanan eo ej naetan “kõrã,”eo an Anij enaj keotak juõn ine me enaj kokkure bõran serpent eo. Ak thousand yiõ ko remotlok, im kõrã eo an Anij ear jab kwalok jabdewõt ine eo emaroñ in kokkure Satan im jerbal ko an. Kin men in, kanan eo an Aiseia ear naetan “war” im “e buromõj iloan.” (Aiseia 54:1, 5, 6) Lokin jet ien, Jesus ear lotak ilo Bethlehem. Ak elikin an baptais, ke jitõb eo ear kabit e bwe en erom nejin Anij ilo jitõb, Jehovah ear kejelã: “Nejiõ.” (Matu 3:17; Jon 3:3) Eliktata mõttan eo elap an ‘inen’ kõrã eo ej kab kwalok e make. Tokelik, jitõb kwojarjar ear kabiti ri kalor ro an Jesus. “Kõrã,” eo an Jehovah me jen etto ear bed einwõt juõn kõrã me ear “jab keutak,” kiõ emaroñ “driblok ilo al.”—Aiseia 54:1; Dri Galetia 3:29.
12, 13. Ta eon ko rej kwalok bwe aolep Christian ri kabit ro ion lal rej ejaak “dri korijer e tiljek im meletlet”?
12 Wanjoñok eo kein karuo kin men ko remũlal me ear kwalok ibbeir ej kin karõk eo an Anij ñan kãlet 144,000 jen armij ro ion lal. (Reveles̃õn 14:1, 4) Jej mõnõnõ ñan katak bwe ri kabit ro aolep me rej jokwe ion lal ilo jabdewõt ien rej ejaak “dri korijer e tiljek im meletlet.” Jesus ear ba bwe rein renaj “najirik” ro don Anij. (Matu 24:45) Eon ta ko ilo Bible rej kamol bwe katak in ejimwe im mol? Jesus ear ke konono kin jabdewõt ri Christian me ej kõketak jein im jatin ilo men ko lor jitõb?
13 Anij ear jiroñ ailiñ in Israel: “Kom dri kennan ro Aõ . . . im dri korijera I ar kãlete.” (Aiseia 43:10) Ak ilo ran in Nisan 11 ilo yiõ eo 33 C.E., Jesus ear jiroñ ri tel ro jen ailiñ in Israel bwe Anij ear beek ñan karmijete ir im rar jab maroñ wõnmanlok einwõt ri karejar ro An. Ear ba: “Naj bõk ailiñ in Anij jen kom, im lelok ñõn dri ailiñ rej kõmõn leen kaki.” Jesus ear ba ñan jarlepju in armij ro: “Lo mweo imwemi likit e ñõn kom im jeebeplok.” (Matu 21:43; 23:38) Einwõt kar ri karejar ro an Jehovah, ailiñ in Israel rar jab tiljek im meletlet. (Aiseia 29:13, 14) Tokelik ilo ejja ran in wõt, ke Jesus ear bõkmantak kajitõk eo: “Wõn eo dri korijer e tiljek im meletlet” einlok wõt ñe ear kajitõk ilo wãwen in, ‘Ta ailiñ meletlet eo enaj bõk jikin Israel im erom ri karejaran Anij etiljek?’ Ri jilek Peter ear kwalok uak eo ke ear jiroñ congregation in Ri Christian ri kabit ro: “Kom . . . ‘dri ailiñ rokwojarjar, armij ro an Anij wõt.’ ” (1 Piter 1:4; 2:9) Ailiñ eo ekwojarjar, “Israel an Anij” ear erom ri karejaran Jehovah ekãl. (Dri Galetia 6:16) Einwõt ke aolepen ro uan Israel eo etto kar juõn wõt “ri karejar eo,” ilo ejja wãwen dein wõt ibben Christian ri kabit ro ion lal ilo jabdewõt ien rej ejaak “dri korijer e tiljek im meletlet.” Ej juõn jerammõn ibbed ñan bõk “mõñã” ko ilo jitõb ikijen ri karejaran Anij!
Katak Ibbed Make Emaroñ Wõr Lañliñ Ie
14. Etke katak Bible eo ej kitibuj elaplok jen ad baj readi im ewi wãwen ewõr lañliñ ie?
14 Ñe jej bõk melele ko rekãl kin juõn katak ilo Jeje ko jen Nan in Anij, jej mõnõnõ ke ilo wãwen eo ej kakajur tõmak eo ad? Eñin unin katak Bible eo, elaplok jen ad baj readi, emaroñ kalañliñ kij. Kin men in, ilo ien kwoj read katak ko an Christian, kajitõk ibbam make: ‘Ewi wãwen kamelele kein rej oktak jen melele ko aõ mokta kin katak eo? Ta eon ko jet ak kamelele ko imaroñ kobaiki ñan rejetak melele ko ie?’ Elañe kwonaj aikwij im bar likit ien ñan bukõt melele ko, jei kajitõk eo am, im karõk bwe kwon bukõt uak eo ñe kwoj katak ibbem make tokelik.
15. Kain etale katak rot ko remaroñ kalañliñ yuk, im ewi wãwen emaroñ lap tokjen?
15 Kain etale katak rot ko renaj kalañliñ yuk ilo am kabuk melele ko rekãl? Kain ien rot kein ñan etale katak ko kin bujen ko reoktak jen don me Anij ear ejaaki ewõr tokjen ñan armij ro. Kwomaroñ kakajur tõmak eo am ilo ien ñan kabuk melele kin kanan ko me rej jitõñlok ñan Jesus Christ ak juõn ien ñan etale ilo book ko ilo Bible jen eon-ñõn-eon. Bar juõn men in kakajur tõmak eo ad ej ñe jej elij bwebwenato ko kin men ko rar walok ibben Ri Kennan Ro An Jehovah. Im juõn etale ilo katak ko me rej konono kin men ko remũlal me rar walok jen katak ko ilo Imõniaroñroñ enaj jibañ yuk ñan melele ko relaplok kin jet eon ko ilo Bible eo. Joij im lale wãwen eo rar kajerbale eon ko ñan kamelele katak eo. Men in enaj jibañ yuk ñan kaminene am “maroñ in jela” im kaddek lolokjen. (Dri Hibru 5:14) Ilo ien kwoj katak, kwon jei note ko ilo Bible eo am make ak ion juõn paper. Ilo wãwen in katak eo am enaj lap tokjen ñan kwe im ñan ro kwomaroñ lelok jibañ ñan ir.
Jibañ Ro Redik ñan Lo Lañliñ ilo Katak Bible
16. Ewi wãwen kwomaroñ jibañ ro redik ñan lo lañliñ ilo ien rej katak Bible eo?
16 Ro jemen im jinen elap air jibañ ro nejiir ñan kaddek kõnan eo ñan katak kin men ko lor jitõb. Jab kajettokjen maroñ eo an jodikdik ro ñan melele men ko remũlal. Elañe kwoj bebe bwe jodikdik ro ren bok melele ko kin juõn etale katak ñan kwaloke ilo ien katak ibben family eo, kwomaroñ kajitõk ibbeir ta men ko rar katak kake. Ien katak ibben family emaroñ koba ien kamelmel ñan jibañ ro redik jojomare tõmak eo air im kilen kamol men ko rej tõmak kake im remol. Bareinwõt, kwomaroñ kajerbal brochure eo “See the Good Land”a (Lo Eneo Emõn) ñan katak kin jikin ko ilo Bible im ñan kalikar ta eo kwonaj katak ilo week in program in read Bible eo.
17. Etke jej aikwij jokkin wõt juõn ñe jej bõk ien ñan etale katak ko ilo Bible ibbed make?
17 Katak ko kin etale Bible eo ibbed make rekaitoktoklimo im remaroñ kakajurlok tõmak eo ad. Ak, kwon kejbãrok bwe en jab kamad yuk jen ien ko kwar kajenoloki ñan katak lok iman katak ko me renaj walok ilo ien kwelok ko. Kwelok ko rej bar juõn wãwen Jehovah ej katakin kij ikijen “ri karejar eo etiljek im meletlet.” Bõtab, am bar likit ien ñan bukõt melele emaroñ kakõmõnmõnlok uak ko am ilo kwelok ko—ñan wanjoñok, ilo kwelok kin Congregation Book Study eo ak ilo kwelok kin School in Kwalok Nan eo an Christian ilo ien eo rej kwalok point ko relap jen read Bible eo.
18. Etke jibadbad ko ad ñan katak “men ko re mũlõl an Anij” elap tokjeir?
18 Katak ibbed make men ko remũlal ilo Nan in Anij enaj jibañ yuk ruaklok ñan Jehovah. Ilo an kwalok ewi joñan aorõkin men in, Bible eo ej ba: “Meletlet e juõn men in kouk, einwõt mõnni ej men in kouk; a tokjen jelalokjen, eñin, meletlet ej lomoren eo ej ber.” (Ekklisiastis 7:12) Kin men in, kate eo am ñan kamũlallok am melele kin men ko lor jitõb elap tokjen. Bible eo ej kallimur ro rej wõnmanlok im kabukõt bwe renaj: “lo jelalokjen kin Anij.”—Jabõn Kennan Ko 2:4, 5.
[Kõmel̦el̦e eo itulal̦]
a Jeje in Ri Kennan ro an Jehovah.
Kwomaroñ Ke Kamelele?
• Ta in “men ko re mũlõl an Anij”?
• Etke jen jab bõjrak ilo ad katak kin men ko remũlal?
• Etke lañliñ eo ñan melele kin “men ko re mũlõl an Anij” ebellok ñan aolep Ri Christian ro?
• Ewi wãwen kwomaroñ kalaplok am bõk tokjen jen “men ko re mũlõl an Anij”?
[Pija eo ilo peij 28]
Ñaat eo Jesus ear erom Inen kallimur eo?
[Pija eo ilo peij 31]
Ro jemen im jinen remaroñ karõk ñan ajiri ro nejiir katak ko ñan bukõt melele ñan air kebojak lok iman mokta jen air katak ibben don einwõt juõn family