Bed eo an Christ​—Ta melelen Ñan Kwe?

“Ta eo kakõlõn Am naj itok im lokõn lõl?”​—MATU 24:​3.

1. Ta kajitõk eo ekaitoklimo ri kalor ro an Jesus rar kajitõk ibben kake?

ENAÑIN ruo thousand yiõ ko remotlok, emen ian ri kalor ro an Jesus rar bõkmantak juõn kajitõk ke rar bwebwenato ibben Jesus ion Tol Olivet. Rar kajitõk: “Ñãt men kein re naj walok? im ta eo kakõlõn Am naj itok im lokõn lõl?” (Matu 24:3) Ilo kajitõk in, ri kalor ro an Jesus rar kajerbal ruo ennan ko rekaitoklimo, “am naj itok” im “lokõn lõl.” Ta melelen ennan kein im rej kennan kin ta?

2. Ta melelen nan eo syn·teʹlei·a, me rej ukõte “lokõn” ilo Bible in kajin Majõl?

² Jen etale ennan eo kein karuo mokta. Ilo kajin Greek ewõr ruo nan ko (syn·teʹlei·a im te’los) me rej ukõti einwõt “lokõn lõl” ilo Bible in kajin Majõl. Bõtab, ilo kajin eo jinoin nan kein ewõr oktak in meleleir. Nan in syn·teʹlei·a, nan eo rej kajerbale ilo Matu 24:​3, melelen “ien jemlokin” im nan eo juõn te’los, melelen “jemlokin.” Jemaroñ kajerbal juõn wanjoñok ñan kamelele kin juõn katak me ej walok ilo Kingdom Hall. Ilo jemlokin katak eo ej mõttan in katak eo eliktata, im ri konono eo ej likit ien ñan kakememej ri kwelok ro kin ta men ko ear kwaloki ilo katak eo im ej kwalok ewi wãwen jemaroñ kajerbali ilo mour. Jemlokin katak eo ej walok ñe ri konono eo ej to jen stage eo. Ilo juõn wãwen einlok wõt, ekkar ñan wãwen Bible eo ej kamelele, syn·teʹlei·a ej jitõñlok ñan ien eo me ej tellok ñan im ekoba ien jemlokin.

3. Ta jet ian men ko rej walok iumin iroij eo an Jesus?

³ Ta melelen “itok” eo me ri jilek ro rar kajitõk kake? Nan in ej itok jen nan in Greek eo pa·rou·siʹa, eo ej lukkun melelen ‘bed iturin,’ ‘bed ibben,’ ak ‘bed ijo.’a Pa·rou·siʹa ak bed eo an Christ ear ijjino ke kar kairoij e einwõt king ilañ ilo 1914 im ej wõnmanlõk wõt ñan ien eo ej itok ñan kokkure ro renana ilo ‘eñtan elap.’ (Mat. 24:21) Elõñ men ko reoktak jen don, ekoba “ran ko eliktata” ilo jukjuk in bed in enana, ien aini ri kabit ro, im air jerkakbiji ñan lañ, renaj walok ilo ien bed eo an Jesus. (2 Tim. 3:1; 1 Kor. 15:23; 1 Tes. 4:​15-​17; 2 Tes. 2:1) Jemaroñ ba bwe nan eo “lokõn lõl” ej melelen ien eo eliktata im jemlokin jukjuk im bed in (syn·teʹlei·a) im rej jitõñlok ak walok iumin ien Iroij eo an Jesus einwõt King (pa·rou·siʹa).

Juõn Ien Eaetok

4. Ewi wãwen ien bed eo an Jesus ej errã ibben men ko rar walok ilo ran ko an Noah?

⁴ Kinke nan in pa·rou·siʹa ej jitõñlok ñan juõn ien eo eaetok, men in ej errã ibben ta eo Jesus ear ba kin ien bed eo an. (Read Matu 24:​37-​39.) Lale bwe Jesus ear jab keidi ien bed eo an ibben ien eo ekadu me ibwijleplep eo ear walok ilo ran ko an Noah. Ijellokin men in, ear keidi ien bed eo an ñan juõn ien eaetoklok mokta jen ibwijleplep eo. Iumin ien in ear koba jerbal eo an Noah ñan jek wa eo im jerbal eo an kin kwalok nan, mae ien ibwijleplep eo ear ijjino. Men kein rar walok iumin elõñ yiõ ko. Ilo ejja wãwen wõt, aetokin ien an Christ bed ej kitibuj elõñ men ko rej aikwij walok im ekoba eñtan eo elap eo ej aikwij walok ilo ien jemlokin.​​—2 Tess. 1:​6-9.

5. Ewi wãwen nan ko ilo Reveles̃õn chapter 6 rej kwalok bwe ien bed eo an Jesus ej walok iumin juõn ien eaetok?

⁵ Bareinwõt kanan ko ilo Bible eo rej kalikar ien eo an Christ im rej jitõñlok ñan juõn ien eaetok im jab ñan ien eo wõt enaj itok ñan kokkure ro ri nana. Book in Reveles̃õn ej kwalok Jesus einwõt eo ej uwe ion juõn horse emouj im ej bõke juõn belin. (Read Reveles̃õn 6:​1-8.) Elikin an bõke maroñ eo ñan iroij einwõt King ilo 1914, Bible eo ej kwalok Jesus einwõt eo “Ej bõk anjo im wõnmanlok bwe En bõk anjo.” Tokelik bwebwenato eo ej kamelele bwe ro jet me rej uwe ion horse ko eoktak unokair rej bar waloktok. Ri ettõr rein rej kõkkar kin, tarinae, ñitta, im nañinmij ko relap, ir kein men ko rar walok iumin juõn ien eaetok me Bible eo ej kanan kin “ran ko eliktata.” Jej lo men kein im wãwen ko rej jejjet kitieir ilo ran kein.

6. Ta eo Reveles̃õn chapter 12 ej kamelele ñan kij kin ien bed eo an Christ?

⁶ Reveles̃õn chapter 12 ej kwalok kamelele ko jet kin jutak eo kin Ailiñ eo an Anij ilañ. Ej kwalok kin juõn tarinae ilañ me armij rejjab maroñ loe. Michael​​—Jesus Christ ilañ​​—im enjel ro an rej tarinaik Devil im demon ro. Ilo jemlokin, rar jolaltak Satan Devil eo im ro mõttan ñan lal. Ilo ien in, bwebwenato eo ej kwalok, bwe Devil eo elap an illu, “bwe e jela jirik wõt ien iben.” (Read Reveles̃õn 12:​7-​12.) Inem, ealikar bwe jutak eo kin Ailiñ eo an Christ ilañ ej jino juõn ien ejej uan me ej melelen “wo” ñan lal eo im ro rej bed ie.

7. Ta eo Sam chapter ruo ej kamelele kake, im ta ien eo ebellok ej kwaloke kake?

⁷ Sam chapter ruo ej bar kanan kin an Anij kairoij Jesus einwõt King ion Tol Zion ilañ. (Read Sam 2:​5-9; 110: ​1, 2.) Bõtab, sam in ej bar kwalok kin juõn ien ebellok ñan ri tel ro an lal, ekoba armij ro an, ñan kõttãik ir ñan iroij eo an Christ. Ej kaiñ ir bwe ren “meletlet” im kõttãik ir ñan “katak” im kajimwe mour eo air. Aet, iumin ien in “emõnõnõ ro otemjej rej liki E [Anij]” ikijen air karejar ñan Jehovah im eo Ear kowãppen e bwe en King. Inem, juõn ien ear bellok ñan kõmman oktak ko iumin ien bed eo an Jesus ilo ien eo ej Iroij.​​—Sam 2:​10-​12.

Kile Kakkõle Eo

8, 9. Wõn ro renaj kile kakõllan bed eo an Christ im melele kake?

⁸ Ke ri Pharisee ro rar kajitõk kin ñããt Ailiñ eo enaj itok, Jesus ear uak ir im ba bwe eban itok im “kanuij kili” ekkar ñan wãwen eo rej watõke. (Luke 17:​20, 21) Ro rejjab tõmak reban melele kake. Rar jab kile Jesus einwõt King eo ej itok ilo ran ko rej bedotok. Inem wõn ro renaj maroñ kile kakõlle eo kin ien bed eo an Christ im melele joñan aorõkin?

⁹ Jesus ear kwalok bwe ri kalor ro an renaj lo kakõlle eo ilo juõn wãwen ealikar einwõt ñe “jarom ke ej walok jen iomin mõtõn lõñ, ej romak ñõn bar juõn mõtõn lõñ.” (Read Luk 17:​24-​29.) Ekaitoktoklimo bwe ilo Matu 24:​23-​27 ej ekkejellok ñan ejja kamelele eo wõt kin kakõllan bed eo an Christ.

Ebeben eo me Enaj Kile Kakõlle Eo

10, 11. (a) Kar ta melele eo mokta kin nan eo “ebeben” ej walok ilo Matu 24:34? (b) Wõn ro ri kalor ro an Jesus rar melele bwe renaj mõttan “ebeben in”?

¹⁰ Mokta, magazine in ear kamelele bwe ilo ebeben eo kein kajuõn, “ebeben in” me ej konono kake ilo Matu 24:34 kar melelen “ri Jew ro rejjab tõmak me rar mour ilo ejja ebeben eo wõt.”b Kamelele in einwõt ear jejjet kinke eon ko jet rar kwalok bwe Jesus ear kajerbale nan eo “ebeben” ilo juõn wãwen ejjab emõn, im enañin aolep ien, Jesus ear kajerbale juõn nan, einwõt “nana,” ñan kamelele kin ebeben eo. (Matu 12:39; 17:17; Mark 8:​38) Kin men in, magazine in ear kwalok kin ewi wãwen kanan in enaj jejjet kitien ilo ran kein ad, Jesus ear kennan kin “ebeben” eo enana an ro rejjab tõmak renaj bar lo wãwen ko me enaj kalikar ien jemlokin (syn·teʹlei·a) bareinwõt renaj bar lo jemlokin (te’los).

¹¹ Emol bwe ke Jesus ear kajerbale nan eo “ebeben” ilo juõn wãwen enana, ear konono ñan ak kin ro renana ilo ran ko an. Ak kar ejja wãwen dein ke an konono ilo Matu 24:34? Kememej wõt bwe emen ian ri kalor ro an Jesus rar “mõketok ñõn iben.” (Matu 24:3) Kinke Jesus ear jab kajerbal ejja kain nan ko wõt ke ear konono ibbeir kin “ebeben in,” ejelok bere bwe ri kalor ro an rar melele bwe renaj kar mõttan “ebeben” eo me reban “joko ñõn ter eo naj jejit men kein otemjej.”

12. Ewi wãwen eon ko ibelakin nan eo “ebeben” ej kalikar wõn ro Jesus ear konono kake?

¹² Melele in ad kin nan eo “ebeben” ej bedbed ion ta? Ikijen ad lukkun etale eon ko ibelakin. Einwõt ej ba ilo Matu 24:​32, 33, Jesus ear ba: “Komin katak parebõl jen wijiki fig: ñe ej ub ran, im ej eoñ bwilik, kom jela ebak ien mãnãn. Bareinwõt kom, ñe komij lo men kein rej waloktok, komin jela Ej ebak, aet iturin kejem ko.” (Keidi Mark 13:​28-​30; Luk 21:​30-​32.) Tokelik, ilo Matu 24:​34, jej read: “Emol Ij ba ñõn kom, ebeben in e jamin joko ñõn ter eo naj jejit men kein otemjej.”

13, 14. Etke jemaroñ ba bwe “ebeben” eo me Jesus ear kennan kake kar jitõñlok ñan ri kalor ro an?

¹³ Jesus ear ba bwe ri kalor an, me mõttan jidik jitõb kwojarjar eo enaj kabit ir, renaj kar kile ta melelen “men kein otemjej” ñe renaj walok. Kin men in Jesus ear konono kin ri kalor ro an ke ear ba nan kein: “Ebeben in e jamin joko ñõn ter eo naj jejit men kein otemjej.”

¹⁴ Ilo air naj oktak jen ro rejjab tõmak, ri kalor ro an Jesus reban lo kakõlle eo wõt ak bareinwõt renaj melele kake aorõkin. Ren kar “katak” jen kakõlle ko im “jela” ta mol in meleleir. Renaj kar melele im kamolol bwe “Ej ebak, aet iturin kejem ko.” Emol bwe Ri Jew ro rar jab tõmak im ri kabit ro retiljek jimor rar lo jidikin an jejjet kitien nan ko an Jesus ilo ebeben eo kein kajuõn. Bõtab, ri kabit ro an wõt ilo ien eo rar maroñ katak jen men kein rar walok​​—im melele men ko rar loi.

15. (a) Wõn ro rej ejaakin “ebeben” eo ilo ran kein me Jesus ear kanan kake? (b) Etke jejjab maroñ antonelok ewi aetokin “ebeben in”? (Lale box eo ilo page 25.)

¹⁵ Rainin armij ro rejjab melele men ko lor jitõb rej ba bwe rejañin “kanuij kili” kakõlle eo bwe Jesus ej bed. Rej lemnak bwe men ko otemjej rej walok kiõ rej einwõt mokta. (2 Pit. 3:4) Ilo ijo turãjet, ri kabit ro retiljek jatin Christ, ak kumi in ri kabit ro me ri jilek John ej kõkkar kake ilo ran kein, emwij air kile kakõlle in im rej melele kake. Einwõt juõn kumi, ri kabit rein rej ejaakin “ebeben” eo ilo ran kein im reban “joko mokta jen men kein otemjej naj itok.”c Men in ej kwalok bwe jet ian ro jatin Christ renaj mour wõt ion lal ñe enaj jino eñtan eo elap.

“Komin Ekil”

16. Ta eo ri kalor ro an Christ renaj aikwij im kõmmane?

¹⁶ Bõtab, elõñlok men ko jej aikwij kõmmani, ijellokin ad kile wõt kakõlle eo. Jesus ear ba: “Nan eo Ij ba ñõn kom, Ij ba ñõn otemjelok, Komin ekil.” (Mark 13:​37) Elap an aorõk men in ñan kij aolep rainin meñe jej ro uan ri kabit ro ak mõttan jar eo elap. Elaplok jen ruatimjuõn ñoul yiõ ko remotlok jen ien eo Jesus ear bõk melim ñan iroij einwõt King ilañ ilo 1914. Meñe jej aikwij kate kij, jenaj aikwij bojak im ekkõl wõt. Ad melele bwe Christ ej iroij ilañ kiõ ej jibañ kij ñan bojak. Bareinwõt ej jibañ kij ñan ekkõl bwe mõttan wõt jidik enaj itok im kokkure ro ri kijirãte “naj itok ilo auõ eo ñe kom jab lemnok kake.”​​—Luk 12:40.

17. Ewi wãwen melele eo kin bed eo an Christ en jelet kij, im ta eo jej aikwij beek ilo buruõd ñan ad kõmmane?

¹⁷ Melele eo ad kin bed eo an Christ ej jibañ kij kalaplok jitõb in ekaiuriur. Jejelã bwe Jesus ej bed ibbed im ej iroij einwõt King ilañ jen 1914. Mõttan jidik enaj kokkure ro ri nana im bõktok elõñ oktak ko ibelakin lal. Kin men in jej aikwij beek ilo buruõd ñan boub wõt ilo jerbal eo Jesus ear kanan kake ke ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn [teʹlos].”​​—Matu 24:14.

[Kamelele ko itulal]

Ewi Wãwen Kwonaj Uak?

• Ewi wãwen jejelã bwe bed eo an Jesus ej walok iumin juõn ien eaetok?

• Wõn ro rej jelã kakõlle eo kin bed eo an Jesus im ta melelen men in?

• Wõn ro rej kitibuj ebeben eo ilo ran kein me Matu 24:34 ej kwalok kake?

• Etke jejjab maroñ antonelok ewi aetokin “ebeben in”?

[Bo̦o̦k eo ilo peij 25]

Jemaroñ ke Antonelok Aetokin “Ebeben In”?

Nan eo “ebeben” ekkã an jitõñlok ñan armij ro reoktak dettair jen don me aetokin mour ko air rej koba ilo juõn ien ak ilo ien eo juõn men ej walok. Ñan wanjoñok, Exodus 1:6 ej jiroñ kij: “Im e ar mij Josep, im ro jein im jãtin otemjej, im aolepen ebeben eo.” Joseph im ro jein im jatin dettair reoktak jen don, ak ear wõr juõn men joñan wõt juõn ibbeir ilo ien eo air. Ekoba ilo “ebeben eo” kar jet jein im jatin Joseph me rar lotak mokta jen e. Jet iair rar mour manlok elikin an Joseph mij. (Jen. 50:​24) Ro jet ilo “ebeben eo,” einwõt Benjamin, rar lotak elikin Joseph im bõlen rar mour manlok elikin ear mij.

Inem ñe nan eo “ebeben” rej kajerbale ñan kamelele kin mour an armij ilo juõn ien, jejjab maroñ antonelok ewi aetokin ien ak jejelã wõt bwe enaj jemlok im ejjab juõn ien ekanuij aetok. Kin men in, ke ear kajerbal nan eo “ebeben in,” einwõt ej walok ilo Matu 24:34, Jesus ear jab kwalok ñan ri kalor ro an juõn wãwen ak kõl ñan antonelok ñããt eo “ran ko eliktata” renaj jemlok. Ijellokin men in, Jesus ear kalikar bwe rejamin jelã “ran eo im auõ eo.”​—2 Tim. 3:1; Matu 24:36.

[Pija eo ilo peij 22, 23]

Elikin an bõk melim ñan iroij einwõt King ilo 1914, ej pijaik Jesus einwõt eo ej “bõk anjo”

[Pija eo ilo peij 24]

“Ebeben in e jamin joko ñõn ter eo naj jejit men kein otemjej”