Kwoj Bõk Ke Lemnak Eo An Jehovah Kin Ro Jet?
“Bwe en ejelok kiojõljõl ilo enbwin, . . . Ra ko otemjej ren jimor kejbãrok dron.”—1 KOR. 12:25.
1. Kar ta eñjake eo am ke kwar jino deloñ ilo paradise eo ilo jitõb?
KE JAAR kajenolok kij make jen lal in enana im jino kobalok ibben armij ro an Jehovah, jaar mõnõnõ in lo yokwe eo emãnãn im itoklimo me ej bed ibwiljiir. Men in elukkun oktak jen armij ro rejaje manit, renana, im rekin akwel me rej bed iumin pein Satan! Jaar deloñ ilo paradise eo ilo jitõb, eo me eobrak kin ainemõn im burukuk.—Ais. 48:17, 18; 60:18; 65:25.
2. (a) Ta eo emaroñ jelet lemnak eo ad kin ro jet? (b) Ta eo jemaroñ aikwij in kõmmane?
2 Bõtab, ke ej motlok jet ien, kin ad jab wãppen jemaroñ jino bõk juõn lemnak ebwid kin ro jeid im jatid. Jab wãppen eo ad emaroñ kamakit kij ñan kalaplap kin bwid ko an ro jeid im jatid jen ad kalimjek kadkad ko remõn kadkadiir kin men ko lor jitõb. Ñan ba ilo juõn wãwen ebidodo, jej meloklok in bõk lemnak eo an Jehovah kin ir. Elañe men in ej walok ñan kij, eien ñan ad etale lemnak eo ad kin ro jet im kõmman bwe en juõn wõt ibben lemnak eo ealikar an Jehovah.—Ex. 33:13.
Wãwen eo Jehovah Ej Lo Ro Jeid im Jatid
3. Bible eo ej keidi congregation in Christian ñan ta?
3 Einwõt kar jei ilo 1 Dri Korint 12:2-26, ri jilek Paul ear keidi congregation eo an Christian ri kabit ro einwõt juõn enbwin im “elõñ ra’n.” Einwõt an oktak mõttan ko jen don ilo enbwin eo, kadkad ko im maroñ ko an ro uan congregation eo reoktak jen don. Ak, Jehovah ej mõnõnõ kake aolep ro uan congregation eo. Ej yokwe im kaorõk kajjojo iair. Eindein, Paul ej kakabilek kij bwe ro uan congregation eo “ren jimor kejbãrok dron.” Men in emaroñ bin kinke kadkadin ro jet remaroñ oktak jen ko ad.
4. Etke jemaroñ aikwij kajimwe lemnak eo ad kin ro jeid im jatid?
4 Bõlen ekkã ad kõnan kalimjek mõjno ko an ro jeid im jatid. Ilo ad kõmman eindein, ej einwõt ñe jej kajerbal juõn camera me ejjab maroñ lo likieo in juõn jikin. Bõtab, lemnak eo an Jehovah ej einwõt juõn camera me emaroñ lo, jab armij eo wõt ak bareinwõt jikin ko ibelakin. Bõlen ekkã ad kalimjek wõt men eo ejjab emõn ibbed, ak Jehovah ej lale aolepen armij eo, ekoba aolep kadkad ko remõn kadkadin. Ñe jej kate kij bwe jen kajeoñe Jehovah, enaj laplok ad maroñ kowõnmanlok jitõb in yokwe im burukuk ilo congregation eo.—Ep. 4:1-3; 5:1, 2.
5. Etke ejõkkar ad ekajete ro jet?
5 Jesus ear jelã bwe armij ro rejjab wãppen ekkã air ekajete ro jet. Ear kakabileklek: “Komin jab ekajet bwe en jab ekajet kom.” (Mat. 7:1) Ekkar ñan nan ko ilo kajin eo jinoin, Jesus ear jab baj ba bwe ren “Jab ekajet,” einwõt rej ukõti ilo Bible in Majõl. Jen an eindein, ear ba: “Komin bõjrak ami ekajet” kinke ear jelã bwe elõñ ian ro rar roñjake e rar iminene in kõrraate ro jet. Emaroñ ke bwe manit in ej bed ibbed bareinwõt? Elañe aet, jej aikwij kate kij bwe jen oktak, bwe Anij en jab ekajete kij. Ilo mol, ejelok ad maroñ ñan ekajet juõn armij me Jehovah ear jitõñ e ñan an kõmmane jet eddo ko ilo congregation eo ak ñan ad ba bwe en kar jab mõttan congregation eo. Juõn brother emaroñ wõr men ko ej likjap kaki, ak elañe Jehovah ej wõnmanlok im bõk e ak buñburuen kake, enaj ekkar ke ad karmijete e? (Jon 6:44) Jej lukkun ke tõmak bwe Jehovah ej tel dolul eo an im elañe ej aikwij wõr kajimwe ko, enaj kõmman men in ilo ien eo ejejjet?—Read Dri Rom 14:1-4.
6. Ewi wãwen an Jehovah watõk ri karejar ro an?
6 Men eo ekabwilõñlõñ kin Jehovah ej bwe emaroñ lo joñan eo Ri Christian ro kajjojo remaroñ tõbare ñe rej bõk mour wãppen ilo lal eo ekãl. Ejelã bareinwõt ewi joñan an kar wõnmanlok ilo an jerbale men ko ear katak kaki ilo Bible eo. Kin men in, ejelok unin an lale mõjno ko an kajjojo. Jej read ilo Sam 103:12 “Einwõt rear etolok jen kabilũñ, ein drein E ar likit bwir ko am etolok jen kim.” Elap ad maroñ kamolol kin men in!—Sam 130:3.
7. Ta eo jej katak jen lemnak eo an Jehovah kin David?
7 Jej lo kein kamol ko ilo Jeje ko ilo Bible kin maroñ eo ekabwilõñlõñ an Jehovah ñan an lo kadkad ko remõn kadkadin juõn armij. Anij ear kwalok kin David einwõt “korijera Devid, eo e ar bokake kien ko Aõ, im e ar lõr Iõ kin aolepen buruen, im kõmõn men eo wõt e jime iman meja.” (1 Kiñ. 14:8) Emol, je jelã bwe David ear kõmman jet men ko rebwid. Ak, Jehovah ear lale wõt kadkad ko remõn kadkadin David kinke ear jelã bwe ear emõn buruen David.—1 Kron. 29:17.
Lale Ro Jeõm im Jatõm Einwõt An Jehovah Lale Ir
8, 9. (a) Ilo wãwen et jemaroñ kajeoñe Jehovah? (b) Ewi wãwen jemaroñ wanjoñok kake men in, im kin ta tokjen eo ñan kij?
8 Jehovah e jelã lemnak ko ilo buruen juõn armij, ak jejjab maroñ. Men in ej juõn un emõn unin ad jab ekajete armij. Jejaje kin aolep un ko unin an armij kõmman men ko. Jej aikwij kate kij ñan kajeoñe Jehovah ilo ad jab kalimjek likjap ak mõjno ko an armij, me renaj jako tokelik. Ej juõn mejenkajjik emõn ñan ad anõk Jehovah ilo ad jab lale bwid im mõjno ko an ro jeid im jatid. Elañe jej kõmman men in enaj kakõmõnmõnlok kõtan ko rainemõn ibben ro jeid im jatid maan im kõrã.—Ep. 4:23, 24.
9 Ñan wanjoñok, lemnak kin juõn em ejorrãn—tããñ ko rej toto im reiten wõtlok, window ko rerup, im tõrak ko ilo bõrwoj eo rejorrãn kin air tutu. Enañin aolep armij ro remaroñ lo mweo im lemnak bwe ren kar rupe; elukkun nana ñan air lale. Ak bar juõn armij emaroñ bõk juõn lemnak elukkun oktak. Emaroñ jab mad kin abañ kein ak ej lo bwe mweo ekajur wõt im emaroñ kõkãle. Ej wiaik mweo im kõmmani jorrãn ko ie im men in ej kõmman an aibujuij lok mweo. Tokelik, ro rej ito-itak bajjek rej kwalok kin joñan an aibujuij mweo. Jemaroñ ke einwõt armij in me ear kate ñan kõkãle mweo? Jen ad kalimjek likjap im mõjno ko an ro jeid im jatid, jemaroñ ke kile kadkad ko remõn kadkadiir im maroñ eo ñan air rittolok ilo jitõb? Elañe ej eindein ad kõmman, inem einwõt Jehovah jenaj yokwe ro jeid im jatid kin air kate ñan anõk kadkad ko kadkadin Jehovah.—Read Dri Hibru 6:10.
10. Ewi wãwen nan in kakabilek eo ilo Dri Pilippai 2:3, 4 emaroñ jibañ kij?
10 Ri jilek Paul ear letok jet nan in kakabilek ko me remaroñ jibañ kij kakõmõnmõnlok kõtan ko ad ibben aolep ro ilo congregation eo. Ear rejañ Ri Christian ro: “Komin jab kõmõn jabrewõt ilo wãlok ak aibujuij jekron, a kin etã buruemi jabrewõt en lemnok ro jet remõn jen e; Im jabrewõt iami en jab lale men ko an wõt, a bareinwõt men ko an ro jet.” (Pil. 2:3, 4) Ettã buru enaj jibañ kij bõk juõn lemnak ejimwe kin ro jet. Elañe jej kwalok ad itoklimo kin ro jet im bukõt kadkad ko remõn kadkadiir, men in enaj bareinwõt jibañ kij ñan bõk lemnak eo an Jehovah kin ir.
11. Ta oktak ko rar jelet jet congregation ko?
11 Ilo ran kein, oktak ko me rej walok ibelakin lal rar kõmman bwe elõñ armij ro ren emmakit ñan jikin ko jet. Jet jikin kwelok ko kiõ ewõr armij ro jen elõñ ailiñ ko. Jet ian armij rein me rar emmakit ñan jikin ko ad rar kwalok air itoklimo kin mol ko ilo Bible, im rar koba ibbed ilo ad kabuñ ñan Jehovah. Armij rein rej “jen ailiñ otemjej, im ian bwij otemjej, im driloabjen otemjej, im konono otemjej.” (Rev. 7:9) Tokjen men in, elõñ ian congregation ko ad kiõ rej ejaak in armij ro jen ibelakin lal.
12. Ta lemnak eo kin don jej aikwij kate kij ñan kejbãroke, im etke men in emaroñ bin jet ien?
12 Ilo congregation eo ad, jej aikwij kate kij ñan bõk juõn lemnak ekkar kin don. Men in ej kakememej kij ñan lemnak kin nan in kakabilek eo an ri jilek Peter ñan kwalok “yokwe jimjãn jimjãten e jaje mon” im ñan “kanuij yokwe dron kin buruemi.” (1 Pit. 1:22) Emaroñ bin ñan kaddek yokwe eo emol ilo juõn congregation ej ejaakin armij ro jen elõñ ailiñ ko. Manit ko an ri tõmak ro mõttad remaroñ oktak jen men ko jej iminene kaki, im men in emaroñ bareinwõt kitibuj jelãlokjen eo air, ewi joñan air mweie, im uno in kil ko kiliir. Kwoj lo ke bwe ebin am melele kin wãwen air lemnak ak emmakit? Emaroñ eindein air lemnak kin kwe. Mekarta, kij aolep jaar bõk nan in jiroñ in: “Komin yokwe jimjãn jimjãten.”—1 Pit. 2:17.
13. Ta oktak eo ilo lemnak eo ad jemaroñ aikwij kõmmane?
13 Emaroñ juõn menin aikwij ñan ukõt lemnak eo ad make bwe en maroñ laplok buruõd ñan kobaik ad yokwe aolep ro jeid im jatid. (Read 2 Dri Korint 6:12, 13.) Jet ien jej ba ke nan ko einwõt “Ijjab kwalok kalijeklok, ak . . . ” inem kwalok jet kadkad ko renana me ekkã ad lemnak bwe ro ibwiljin jet kumi in armij ro rej kwaloki? Eñjake rot in emaroñ kalikar bwe ewõr wõt aikwij eo ñan ad jolok kalijeklok me ej bed ilo tumũlal in buruõd. Jemaroñ kajitõkin kij make, ‘Ij kate iõ ke ñan jelã kajjen armij ro jen bar juõn ailiñ?’ Etale rot in emaroñ jibañ kij kakõmõnmõnlok ad kaorõk dolul in jimjãn jimjatid ibelakin lal.
14, 15. (a) Kwalok jet wanjoñok ko kin ro rar kõmman oktak ko ilo lemnak ko air kin ro jet. (b) Ewi wãwen ad maroñ anõk ir?
14 Bible eo ej kwalok jet wanjoñok ko remõn kin ro rar ukõt lemnak eo air, im juõn iair kar ri jilek Peter. Einwõt juõn Ri Jew, Peter ear jab deloñ ilo mweo imõn juõn Ri Gentile. Lemnak kin eñjake eo an ke kar jiroñ e ñan an deloñ ilo mweo imõn Cornelius, juõn Ri Gentile ejañin mwijmwij! Peter ear kajimwe lemnak eo an, ilo an melele bwe ear ankil an Anij bwe armij ro jen ailiñ ko otemjej ren erom mõttan congregation in Christian. (Jerb. 10:9-35) Saul, eo ear erom ri jilek Paul tokelik, ear bareinwõt aikwij jolok an kwalok kalijeklok. Ear kwalok bwe joñan an kar dike Ri Christian ro ear “kanuij matõrtõr eklisia an Anij, im I ar kokkure e.” Ak, ke Iroij Jesus ear kajimwe Paul, ear kõmman oktak ko relap im ear bareinwõt bõk nan in tel ko jen ro ear matõrtõr ir mokta.—Gal. 1:13-20.
15 Ejelok bere bwe jemaroñ kõmman oktak ko ilo lemnak eo ad ikijen jibañ eo jen jitõb eo an Jehovah. Elañe jej lo bwe ewõr kalijeklok ilo buruõd, jen kate kij ñan joloke im ñan “kejbãrok an Jitõb kõmõnmõn buru wõt juõn ilo liab in ainemõn.” (Ep. 4:3-6) Bible eo ej rejañ kij ñan “kõnõk yokwe, eo ken lukwõj ej kowãppemi.”—Kol. 3:14.
Anõk Jehovah ilo Jerbal in Kwalok Nan eo Ad
16. Ta eo ej ankil an Anij kin armij ro?
16 “Bwe ejelok kaljiklok armij iben Anij,” ri jilek Paul ear je. (Rom. 2:11) Ej karõk eo an Jehovah bwe armij ro jen ailiñ ko otemjej ren maroñ kabuñ ñan e. (Read 1 Timote 2:3, 4.) Bwe men in en jejjet kitien, ear karõk bwe ren keañ kin “gospel ej in drio” ñan “ailiñ im bwij im konono im driloabjen otemjelok.” (Rev. 14:6) Jesus ear ba: “Lõl e jikin kallip” eo. (Mat. 13:38) Ewi aorõkin men in ñan kwe im family eo am?
17. Ewi wãwen jemaroñ jibañ aolep armij?
17 Ejjab aolep remaroñ etal ñan jikin ko retolok ilo lal in ñan kwalok kin ennan in Ailiñ eo ñan ro jet. Bõtab, bõlen jemaroñ bõklok ennan in ñan armij ro jen ailiñ ko jet me rej jokwe ilo territory eo ad. Jebojak ke ñan kwalok nan ñan aolep armij, im jab ñan ro wõt im jaar kwalok nan ñan ir iumin elõñ yiõ ko? Kwon beek ñan jibadõk ro jet me rejañin eoroñ ennan eo.—Rom. 15:20, 21.
18. Ta itoklimo eo Jesus ear kwalok kin armij ro?
18 Jesus ear kile aikwij eo ñan jibañ aolep armij. Ear jab kwalok nan ilo juõn wõt jikin. Bwebwenato eo ilo Bible ej jiroñ kij bwe ear “etetal ilo jikin kwelok ko otemjej relap im redrik.” Inem “ke Ej lo jar ko, Ej tiriamokake ir” im ear kwalok aikwij eo ñan jibañ ir.—Mat. 9:35-37.
19, 20. Ta jet ian wãwen ko jemaroñ kwalok itoklimo eo me Jehovah im Jesus rej kwaloke kin armij ro otemjej?
19 Ta jet ian wãwen ko kwomaroñ kwalok ejja lemnak in wõt? Jet rar kate ir ñan kwalok nan ilo jikin ko ilo territory eo air me ejeja air kwalok nan ie. Men in emaroñ koba jikin business ko, park ko, jikin bus ak taxi ko, ak iman apartment ko me ebin ad deloñ ie. Ro jet rar kate ir ñan katak bar juõn kajin bwe ren maroñ kwalok nan ibben jet kumi in armij ro me rej kiõ jokwe ilo jikin eo air ak ñan kumi in armij ro me ejeja air kwalok nan ñan ir ilo ien ko remotlok. Ad katak ñan yokyokwe armij rein ilo kajin eo air emaroñ kwalok bwe kwoj lukkun itoklimo kin ir. Elañe kwojjab maroñ katak bar juõn kajin, kwomaroñ ke rejañ ro jet me rej kõmmane? Emol, jejjab kõnan bõk juõn lemnak enana kin etke ro jet rej kate ir ñan kwalok nan ñan armij ro jen bar juõn ailiñ. Mour ko an aolep armij raorõk ilo mejen Anij, im jekõnan bõk ejja lemnak eo wõt.—Kol. 3:10, 11.
20 Ñe jej bõk lemnak eo an Anij kin armij ej melelen bwe jej aikwij kwalok nan ñan ir aolep, jekdon ta wãwen ko ibbeir. Jet remaroñ homeless (ejelok jikin air jokwe), retton, ak enana ak etton wãwen mour eo air. Elañe jet armij rejjab joij ñan kij, men in en jab kõmman bwe jen bõk juõn lemnak enana kin aolep armij ro jen ailiñ eo air. Jet armij ro rar jab joij ñan Paul, ak ear jab kõtlok bwe men in en kabõjrak e jen an kwalok nan ñan armij ro jen ailiñ eo. (Jerb. 14:5-7, 19-22) Ear kejatdikdik bwe jet armij ro renaj emmakit ilo juõn wãwen emõn.
21. Ñe kwoj bõk lemnak eo an Jehovah kin ro jet, ewi wãwen men in enaj jibañ yuk?
21 Elukkun alikar kiõ bwe jej aikwij bõk lemnak eo an Jehovah ñe jej jerbal ibben ro jeid im jatid ilo bukwon eo ad, ibben dolul in jimjãn jimjatid ibelakin lal, im armij ro jej iion ir ilo jerbal in kwalok nan. Ñe elaplok ad kwalok lemnak eo an Jehovah, enaj laplok ad maroñ kowõnmanlok ainemõn im burukuk. Im enaj emõnlok ad maroñ jibañ armij ro ñan air yokwe Jehovah, Anij eo “e jab kaljiklok” ak ej kwalok itoklimo eo eyokwe kin aolep, “bwe ir otemjej jerbal an pã ko pein.”—Job 34:19.
Kwomaroñ Ke Uak?
• Ta lemnak eo jej aikwij bõprae kin ro jeid im jatid?
• Ewi wãwen ad maroñ anõk Jehovah ilo wãwen ad lemnak kin ro jeid im jatid?
• Ta eo kwar katak kin lemnak eo ad kin dolul in jimjãn jimjatid ibelakin lal?
• Ewi wãwen jemaroñ anõk lemnak eo an Jehovah kin armij ñe jej kwalok nan?
[Pija eo ilo peij 26]
Ewi wãwen kwomaroñ jelã kajjen armij ro jen ailiñ ko jet?
[Pija ko ilo peij 28]
Ilo wãwen et ko kwomaroñ jibadõk elõñlok armij ro kin news eo emõn?