Komin Wõnmanlok im Kõmman Emõn

“Komin . . . kõmmõn emmõn.”​—LK. 6:​35.

1, 2. Etke ekkã an bin ñan kõmman emõn ñan ro jet?

EMAROÑ bin ñan kõmman emõn ñan ro jet. Ñan ro jej kwalok ad yokwe ir, remaroñ jab kwalok air yokwe ñan kij. Meñe jej jibañ armij ro joñan wõt ad maroñ ilo ad kate ñan jaketo-jaketak “gospel e aibujuij an Anij e mõnõnõ” im Nejin ñan ir, remaroñ jab itoklimo im kamolol. (1 Tim. 1:​11) Ro jet rej kamol bwe rej “dri kijirãte drebail an Kraist.” (Pil. 3:​18) Einwõt Ri Christian ro, ewi wãwen jej aikwij jerbal ibbeir?

² Jesus Christ ear jiroñ ri kalor ro an: “Komin yokwe ro rej kijdrate kom, im kõmmõn emmõn.” (Lk. 6:​35) Jen lukkun etale kiõ nan in kakkõl in. Bareinwõt jenaj bõk tokjen jen point ko jet Jesus ear kwalok kin kõmman emõn ñan ro jet.

“Komin Yokwe Ro Dri Kijirãte Kom”

3. (a) Ilo nan ko am make, kwalok point ko relap kin nan eo an Jesus ilo Matu 5:​43-​45. (b) Ta lemnak eo ri tel in kabuñ an Ri Jew ro ilo ebeben eo kein kajuõn rar kaddeklok ikijen Ri Jew ro im ro rejjab Ri Jew?

³ Ilo katak eo an ebuñbuñ ion Tol eo, Jesus ear jiroñ ri roñjake ro an ñan yokwe ri kijirãt ro air im jar kin ro rej matõrtõr ir. (Read Matu 5:​43-​45.) Ro rar bed ilo ien eo kar Ri Jew ro, im rar jelã kin nan in kakien eo an Anij: “Kwon jab irenwõne, im kwon jab bãle ro nejin armij ro am; a kwon yokwe dri turum einwõt kwe.” (Liv. 19:​18) Ri tel in Ri Jew ro ilo ebeben eo kein kajuõn rar lemnak bwe “nejin armij ro am” im “dri turum” rej jitõñlok wõt ñan Ri Jew ro. Kien eo Anij ear letok ikijen Moses ear kakien Ri Israel ro bwe ren jenolok jen ri ailiñ ko jet, bõtab rar kaddeklok lemnak eo bwe aolep ro rejjab Ri Jew rej ri kijirãt ro air im armij ro ren dike ir.

4. Ewi wãwen ri kalor ro an Jesus rar aikwij in jerbal ibben ro rej kijirãte ir?

⁴ Oktan men in, Jesus ear keañ: “Komin yokwe ro dri kijirãte kom, im jar kin ro rej matõrtõr kom.” (Mat. 5:​44) Ri kalor ro an rar aikwij in kwalok yokwe ñan aolep ro rar kajememeik ir. Ekkar ñan ri jeje Gospel eo Luke, Jesus ear ba: “Ij jiroñ kom ro rej roñjake iõ: Komin yokwe ro rej kijdrate kom, im kõmmõn emmõn ñõn ro rej matõrtõre kom, kejerammõn ro rej koole kom, im jar kin ro rej kõmmõn nana ñõn kom.” (Lk. 6:​27, 28) Einwõt armij ro kajjojo ilo ebeben eo kein kajuõn im rar jerbale men ko Jesus ear katakin kaki, jej bareinwõt “kõmmõn emmõn ñõn ro rej matõrtõre” kij ikijen ad uaki kajememe ko air kin jerbal ko remõn. Jej “kejerammõn ro rej koole” kij ilo ad konono ñan ir ilo joij. Im jej “jar kin ro rej matõrtõr” kij kin air lej ak kin air “kõmmõn nana” ñan kij. Jar rot kein rej kwalok ad yokwe ro rej kijirãte kij kinke jej kajitõk ibben Jehovah bwe ro rej matõrtõr kij ren maroñ oktak im emmakit ilo wãwen eo me Jehovah enaj buñburuen kake.

5, 6. Etke jej aikwij yokwe ro rej kijirãte kij?

⁵ Etke jej aikwij in kwalok yokwe ñan ro rej kijirãte kij? “Bwe komin ro nejin Jememiuij ilõñ,” Jesus ear ba. (Mat. 5:​45) Elañe jej bokake nan in kakabilek in, jej erom “ro nejin” Anij kinke jej anõke Jehovah, eo ej “kõtak al ion ro renana im ion ro remõn, im kowut ion ro rewãnik im ion ro re jab wãnik.” Einwõt bwebwenato eo an Luke ear kwaloke, Anij “ej joij ñõn ro rejaje kammolol im ro ri nana.”​​—Lk. 6:​35.

⁶ Ñan kwalok ñan ri kalor ro an aorõkin air wõnmanlok im “yokwe ro rej kijdrate” ir, Jesus ear ba: “Elañe komij yokwe ro rej yokwe kom ta jinekjij ñõn kom? dri tel owõj re jab kõmõn einwõt ke? Im elañe komij yokyokwe ro jeõmi im jatõmi wõt, ewi elap ami kõmõn jen ro jet? dri ailiñ ko re jab kõmõn einwõt ke?” (Mat. 5:​46, 47) Elañe jej yokwe wõt ro rej yokwe kij, jejamin bõk “jinekjij,” ak jerammõn, jen Anij. Ri tel owõj ro, im rar kitõtõik ir, rar bareinwõt kwalok air yokwe ñan ro rej yokwe ir.​​—Luk 5:​30; 7:​34.

7. Etke ejjab juõn men elap elañe jej yokyokwe wõt ro ‘jeid im jatid’?

⁷ Yokyokwe an Ri Jew ro kar kitibuj nan eo “ainemõn.” (Ekaj. 19:20; Jon 20:​19) Men in ear kwalok bwe kejatdikdik eo an kar bwe en emõn ejmour, bed, im an mweie armij eo rej yokyokwe e. Ejamin juõn men ‘elap’ elañe jej yokyokwe wõt ro jej watõk ir ‘jeid im jatid.’ Einwõt Jesus ear kwalok, “dri ailiñ ko” rej kõmman eindein.

8. Ke Jesus ear ba: “Kom naj wãppen” ta eo Jesus ear kõnan bwe ri roñjake ro an ren kõmmane?

⁸ Kin an kar ri kalor ro an Christ jolet jerawiwi, rejamin kar maroñ jimwe im wãppen. (Rom. 5:​12) Bõtab, Jesus ear kajemlok mõttan in ilo katak eo an ikijen an ba: “Kom naj wãppen einwõt Jememiuij i lõñ E wãppen.” (Mat. 5:​48) Ilo wãwen in ear rejañ ri roñjake ro an ñan anõke ‘Jemeir ilõñ,’ Jehovah, ñan kowãppen air yokwe​​—ilo air kõmman bwe en jejjet ikijen air kwalok yokwe ñan ro rej kijirãte ir. Kij bareinwõt, jen eindein.

Etke Jen Jolok Bwid?

9. Ta melelen nan kein: “Jolok amuij muri ibõm”?

⁹ Jej wõnmanlok im kõmman emõn ñe jej ilo tiriamokake jolok bwid an eo ear jerawiwi nae kij. Ilo mol, ilo joñok in jar eo an Jesus ewõr nan kein: “Jolok amuij muri ibõm, einwõt kim ar jolok an armij muri ibem.” (Mat. 6:​12) Emol, bwe men in ejjab konono kin muri kin money. Gospel an Luke ear kwalok bwe “muri” ko Jesus ear lemnak kaki rej jerawiwi ko, kinke ej ba: “Jeorlok amuij jerawiwi; bwe kimuij bareinwõt jeorlok an armij otemjej muri ibem.”​​—Luk 11:4.

10. Ikijen jolok bwid, ewi wãwen jemaroñ anõke Anij?

¹⁰ Jej aikwij in anõke Anij, eo ej mõnõnõ in jolok bwid ko an ri jerawiwi ro rej ukwelok. Ri jilek Paul ear je: “Komin joij im emmõn buruõmi ñõn dron; komin jolok an dron bwid einwõt Anij ear jolok ami bwid ilo Christ.” (Ep. 4:​32) Ri jeje sam David ear al: “Jeova e kanuij tiriamo im joij wõt; erumij An illu im E mweie kin tiriamo kake. . . . E ar jab kõmõn ñõn kim einwõt jerawiwi ko am, ak nawõnam ekar ñõn bwir ko am. . . . Einwõt rear etolok jen kabilũñ, ein drein E ar likit bwir ko am etolok jen kim. Einwõt jemeir ej tiriamokake ro nejin, ein drein Jeova ej tiriamokake ro remjõk E. Bwe E jelã wãwen kõmõnmõn kim; E kememej bwe kim bõñõlñõl.”​​—Sam 103:​8-​14.

11. Anij ej jolok bwid an wõn?

¹¹ Ien eo wõt Anij emaroñ jolok an armij ro bwid ej elañe emwij air jolok bwid an ro rar jerawiwi nae ir. (Mark 11:​25) Ñan kwalok point in, Jesus ear kakobaba: “Bwe elañe komij jeorlok bwir ko an armij, bareinwõt Jememiuij ilõñ E naj jeorlok bwir ko ami. A elañe kom jab jeorlok bwir ko an armij, bareinwõt Jememiuij e jamin jeorlok bwir ko ami.” (Mat. 6:​14, 15) Aet, Anij ej jolok bwid an ro wõt im rej mõnõnõ in jolok bwid an ro jet. Im juõn wãwen ñan wõnmanlok im kõmman emõn ej ñan bokake nan in kakabilek eo an Paul: “Einwõt Anij ear jolok ami bwid ilo Christ.”​​—Ep. 4:​32.

“Komin Bõjrak jen Ami Ekajet”

12. Ta nan in kakabilek eo Jesus ear letok kin ad ekajet ro jet?

¹² Katak eo ion Tol eo ear kwalok bar juõn wãwen bwe jen kõmman emõn ke Jesus ear jiroñ ro rej roñjake: “Komin bõjrak jen ami ekajet bwe en jab ekajet kom.” (Matu 7:​1, NW.) Elikin an kar ba men in, ear kajerbal juõn wanjoñok elap ñan kwalok point in. (Read Matu 7:​2-5.) Jen etale ta melelen an kar Jesus ba: “Komin bõjrak jen ami ekajet.”

13. Ewi wãwen ro rar roñjake Jesus remaroñ “kõtlok”?

¹³ Einwõt Matthew, Luke ej eliji nan ko an Jesus ke ej ba: “Komin jab ekajet, im jamin ekajete kom: komin jab liakelok, im jamin liakelok kom: komin kõtlok im naj kõtlok kom.” (Luk 6:​37) Ri Pharisee ro ilo ebeben eo kein kajuõn ear eddo air ekajete armij ro jet, ekkar ñan manit ko rejjab bedbed ion Bible. Jabdewõt ri roñjake ro an Jesus me rar kõmmane men in rar aikwij in ‘bõjrak jen air ekajet.’ Jen an eindein, ren kar “kõtlok,” melelen rej aikwij in jolok bwid ko an ro jet. Ri jilek Paul ear letok ejja nan in kakabilek eo ikijen jolok bwid, einwõt ej walok itulõñ.

14. Ilo air jolok bwid, ri kalor ro an Jesus renaj kar kamakit armij ro ñan air kõmman ta?

¹⁴ Ilo air jolok bwid, ri kalor ro an Jesus renaj kar kamakit armij ro ñan jolok bwid. “Bwe ilo ekajet eo komij ekajet kake, naj ekajet kom,” Jesus ej ba, “im ilo joñok eo komij joñok kake, naj bar joñok ñõn kom.” (Mat. 7:2) Ikijen wãwen ad jerbal ibben ro jet, jenaj madmõd men eo jej jeor.​​—Gal. 6:7.

15. Ewi wãwen an kar Jesus kwalok bwe ejjab jimwe ñan kõrraate ro jet?

¹⁵ Kememej bwe ñan kwalok ewi joñan an nana ñan kõrraat, Jesus ear kajitõk: “Im etke kwoj kalimjek belok erik iloan mejen jeõm im jãtõm a jab lemnok kin wijki iloan mejõm? A ekijkan am ba ñõn jeõm im jãtõm, In jolok belok erik jen mejõm; im lo, wijki ej ber iloan mejõm?” (Mat. 7:​3, 4) Juõn armij eo ej kõrraate bar juõn ej lale wõt bwid ko redik iloan “mejen” jein im jatin. Eo ej kõrraat ej einwõt ñe ej ba bwe ejjab emõn lolokjen an jein im jatin. Meñe edik wõt an bwid​—einwõt juõn belok​—eo ej kõrraat ej kajitõk bwe en “jolok belok” eo. Ilo etao, ej bõk eddo eo bwe en jibañ jein im jatin ñan kakõmõnmõnlok an lolokjen.

16. Etke jemaroñ ba bwe juõn “wijki” ear bed iloan mejen Ri Pharisee ro?

¹⁶ Ri tel in kabuñ an Ri Jew ro elaptata air kar kõrraate ro jet. Ñan wanjoñok: Ke juõn emaan eo ebilo me Christ ear kemour e ear kwalok bwe Jesus ear itok jen Anij, ilo air illu Ri Pharisee ro rar uake: “Kw’ar lotak ilo jerawiwi wõt, im kwoj katakin kim ke?” (Jon 9:​30-​34) Ikijen maroñ eo ñan ekajet ilo jimwe ekkar ñan lemnak im kien eo an Jehovah, juõn “wijki” ear bed iloan mejen Ri Pharisee ro im rar bilo. Kin men in Jesus ear lamõj: “Kwe dri jela mon, kwon jolok wijki eo jen mejõm mokta; inem kwo naj lolokjen im jolok belok erik jen mejen jeõm im jãtõm.” (Mat. 7:5; Luk 6:​42) Elañe jej beek bwe jen kõmman emõn im jerbal ilo emõn ibben ro jet, jenaj jab kõrraate ir im bukõte belok eo ilo kõkkar iloan mejen jeid im jatid. Jen an eindein, jenaj kwalok bwe jejjab wãppen im kin men in jej aikwij in bõprae ad ekajet im kõrraate ri tõmak ro mõttad.

Wãwen Jej Aikwij in Jerbal Ibben Ro Jet

17. Ekkar ñan Matu 7:​12, ewi wãwen jej aikwij in jerbal ibben ro jet?

¹⁷ Ilo Katak eo ion Tol eo, Jesus ear kwalok bwe Anij ej jerbal ibben ri karejaran einwõt juõn jemen ikijen an uaki jar ko air. (Read Matu 7:​7-​12.) Ej menin aorõk bwe Jesus ear likit kien in kin mwil: “Men otemjej jabrewõt komij kõnan bwe armij ren kõmõnmõn ñõn kom, en ein drein ami kõmõnmõn ñõn ir.” (Mat. 7:​12) Ñe jej jerbal ibben armij ro ilo wãwen in wõt jej kamol bwe jej ri kalor ro remol an Jesus Christ.

18. Ewi wãwen “kien” eo ear kwalok bwe jen jerbal ibben ro jet einwõt jekõnan bwe ren jerbal ibbed?

¹⁸ Elikin an kar ba bwe jej aikwij in jerbal ibben ro jet einwõt wãwen ad kõnan bwe ren jerbal ibbed, Jesus ear kakobaba: “Bwe men in kien im dri kanan ro.” Ñe jej jerbal ibben ro jet ilo wãwen eo Jesus ear kwaloke, jej jerbal ekkar ñan karõk eo an “kien” in​​—jeje ko ilo Bible jen book in Jenesis ñan Duteronomi. Ijellokin an kwalok karõk eo an Jehovah ñan keotak juõn ine me enaj jolok aolep nana ko, book kein rej kwalok Kien eo Anij ear lelok ñan ailiñ in Israel ikijen Moses ilo 1513 B.C.E. (Jen. 3:​15) Ijellokin men ko jet, Kien eo ear kalikar bwe Ri Israel ro rar aikwij in kwalok ekajet jimwe, ren kar jab kalijeklok, im ren kar kõmman emõn ñan ro ri jeramel im ñan ruwamaejet ro ilo ene eo.​​—Liv. 19:​9, 10, 15, 34.

19. Ewi wãwen “ri kanan ro” rej kwalok bwe jej aikwij kõmman emõn?

¹⁹ Ilo an jitõñlok ñan “dri kanan ro,” Jesus ear lemnak kin book in kanan ko an Jeje ko in kajin Hebrew. Rej kwalok kake kanan ko kin Messiah im emwij an kar Christ kajejjet kitieir. Jeje kein rej bareinwõt kwalok bwe Anij ej kajerammõn armij ro an ñe rej kõmman men eo ejimwe iman mejen im jerbal ibben ro jet ilo wãwen eo ejimwe. Ñan wanjoñok, kanan eo an Isaiah ear lelok ñan Ri Israel ro nan in kakabilek in: “Ein drein Jeova ej ba, ‘Komin lale ekajet jime, im kõmõn wãnik. . . . E mõnõnõ armij eo ej kõmõn men in, im nejin armij eo ej drebije, . . . im ej drebij pein jen an kõmõn jabrewõt nana.’ ” (Ais. 56:​1, 2) Aet, Anij ej watõk bwe armij ro an ren wõnmanlok im kõmman emõn.

Ien Otemjej Jen Kõmman Emõn ñan Ro Jet

20, 21. Ewi wãwen jar ko rar emmakit ñan Katak eo an Jesus ion Tol eo, im etke kwoj aikwij in kalmenlokjen kake men in?

²⁰ Jaar etale jet wõt ian elõñ point ko raorõk Jesus ear kwalok ilo Katak eo an ejej uan ion Tol eo. Meñe eindein, enaj bidodo ad maroñ melele kin wãwen katak eo an ear kamakit armij ro rar roñjake. Bible eo ej ba: “Im ke Jisõs ej kajemlok nan kein, jar ko rej bwilõñ kin An katak; Bwe E ar katakin ir einwõt iroij, im jab einwõt skraib ro air.”​​—Mat. 7:​28, 29.

²¹ Ejelok bere bwe Jesus Christ ear kamol bwe e eo kar kanan kake einwõt “Ri Bebe Emeletlet.” (Isa. 9:6) Katak eo ion Tol eo ej juõn joñok elap kin jelãlokjen eo an Jesus kin wãwen lemnak eo an Jemen ilañ. Ijellokin point ko jaar etale, elap an katak eo kwalok kin mõnõnõ eo emol, wãwen ad jeor jen mour etton, wãwen eo ñan kõmman wãnik, ta eo jej aikwij in kõmmane ñan lo jokane im lañliñ ilju im jeklaj, im elõñ men ko jet. Etke kwojjab bar tiljek in read im jar kake Matu chapter 5 ñan 7? Kalmenlokjen kake nan in kakabilek eo ekanuij emõn an Jesus kar jeje kake. Jerbale ilo mour eo am men ko Christ ear ba ilo Katak eo an ion Tol eo. Inem enaj emõnlok am maroñ in kabuñburuen Jehovah, jerbal ilo jimwe ibben ro jet, im wõnmanlok wõt im kõmman emõn.

Ewi Wãwen Kwonaj Uak?

• Ewi wãwen jej aikwij in jerbal ibben ri kijirãt ro ad?

• Etke jej aikwij in jolok bwid?

• Ta eo Jesus ear ba kin ekajete armij ro?

• Ekkar ñan Matu 7:​12, ewi wãwen jej aikwij in jerbal ibben ro jet?

[Naan ko ilo peij 10]

Kwojelã ke etke Jesus ear ba: “Komin bõjrak jen ami ekajet”?

[Pija eo ilo peij 8]

Etke jej aikwij in jar kin ro rej matõrtõre kij?

[Pija eo ilo peij 10]

Ien otemjej kwoj ke jerbal ibben ro jet einwõt wãwen am kõnan bwe ren jerbal ibbam?