Ñe Emõn Dettam Kwon Kãlet Ñan Karejar Ñan Jehovah
“A kwon berwõt ilo men ko kw’ar katak im rel buruõm kaki.”—2 TIM. 3:14.
1. Ewi lemnak eo an Jehovah kin jerbal eo an Ri Kennan ro an emõn dettair?
JOÑAN an aorõk jerbal eo ekwojarjar an armij ro emõn ded ibben Jehovah, ear kwalok juõn nanin kanan kin ir. Ri jeje sam ear al im ba: “Ro drom rej mõnõnõ im lewoj ir mõke ilo ran in Am kajur: ilo wõlio ko in kwojarjar, jen lojien ejiboñ: ibõm molawi an ien emõn drer.” (Sam 110:3) Aet, Jehovah ej kaorõk jodikdik ro me rej mõnõnõ in karejar ñan e.
2. Jodikdik ro ilo ran kein rej jelmae kain kilan rot ko jen lal kin ilju im jeklaj eo air?
2 Kom jodikdik ro ilo congregation eo an Christian, emwij ke ami wujleplok ami mour ñan Jehovah? Elõñ jodikdik ro rej lo bwe ebin ñan air karejar ñan Anij. Ri tel ro ilo jikin business, ri kaki in school ko, im jet ien ro uan family im ro jerair rej rejañ jodikdik ro ñan jibadõk mejenkajjik ko ilo kanniek. Ñe jodikdik ro rej jibadõk mejenkajjik ko ilo jitõb, ekkã an armij ro an lal kajirere kake ir. Ak ilo mol, karejar ñan Anij ej jibadbad eo emõntata kwomaroñ jibadõke ilo mour eo am. (Sam 27:4) Kin men in, kwon lemnak kin kajitõk kein jilu: Etke kwoj aikwij karejar ñan Anij? Ewi wãwen kwomaroñ lo tõbrak ñe kwoj mour einwõt juõn eo emwij wujleplok an mour ñan Anij jekdon ta eo armij ro jet renaj ba ak kõmmane? Ta ien ko remõn kin jerbal eo ekwojarjar remaroñ bellok ñan yuk?
Karejar ñan Jehovah Ej Men Eo Jej Aikwij Kõmmane
3. Ewi wãwen menin kõmanman ko an Jehovah ren jelet kij?
3 Etke kwoj aikwij karejar ñan Anij eo emol im emour? Reveles̃õn 4:11 ej kwalok un eo elaptata: “Ekar ñõn Kwe, O Iroij im am Anij, bwe kwon bõk aibujuij im nebar im kajur; bwe kw’ar kõmõnmõn men ko otemjej, im kin ankil am r’ar ber im emwij kõmõnmõni.” Jehovah ej Ri Kõmanman eo ekabwilõñlõñ kin men ko otemjej rej bed. Lal in elap an aibujuij! Wijki ko, wut ko, menin mour ko, lojet, tol ko, im waterfall ko—Jehovah ear kõmanmani aolep. Sam 104:24 ej ba: ‘Lõl e obrõk kin mweiuk ko mweien [Anij].’ Elap ad kamolol bwe Jehovah ilo yokwe ear letok enbwinid im lolãtãt eo ad bwe jen lañliñ kin lal in im men otemjej rej bed ion! Ad kamolol kin menin kõmanman ko raibujuij ren kamakit kij bwe jen karejar ñan e!
4, 5. Ta men ko rekabwilõñlõñ rar karuaklok Joshua ñan Jehovah?
4 Bar juõn unin ad karejar ñan Jehovah jemaroñ loe ilo nan ko an ri tel eo an Israel, Joshua. Ilo tujemlokin mour eo an, Joshua ear jiroñ armij ro an Anij: “Kom jela ilo buruemi otemjej, im ilo ami otemjej, bwe e ar jab likjõp juõn men ian men ko remõn Jeova ami Anij e ar ba kin kom; men otemjej re jejit ñõn kom, ejelok juõn iair e ir.” Etke Joshua ear maroñ ba men in?—Josh. 23:14.
5 Ke ear juõn ajiri eo me ear rittolok ilo Egypt, Joshua ear katak im jelã kin kallimur eo an Jehovah ñan lelok juõn ene ñan Ri Israel ro. (Jen. 12:7; 50:24, 25; Ex. 3:8) Inem Joshua ear lale ke Jehovah ear jino kajejjet kitien kallimur eo an ilo an bõktok menin kaeñtan ko joñoul ion enen Egypt im iun Pharaoh bwe en kõtlok ro nejin Israel. Joshua ear juõn ian ro me rar diojlok ilujen Lomalo Ekilmir, inem ear aluij ke lomalo eo ear kamaloñ Pharaoh im jar in tarinae eo an. Ilo ial eo eaetok ilujen “ene emõra ijo ejelok dren” ilo Ene Jemaden in Sinai, Joshua ear lo wãwen eo Jehovah ear kabwe aolep aikwij ko an Ri Israel ro. Ejelok juõn Ri Israel ear mij kin maro ak kwuli. (Dut. 8:3-5, 14-16; Josh. 24:5-7) Ke emottok ien eo ñan an Ri Israel ro bõk anjo ion ri ailiñ ko ilo Canaan im bõk Enen Kallimur eo, Joshua ear lo wãwen eo Anij eo air ear jibañ ir ilo jerbal in.—Josh. 10:14, 42.
6. Ta eo enaj jibañ yuk ñan kaddek kõnan eo ñan karejar ñan Anij?
6 Joshua ear jelã bwe Jehovah ear kajejjet kitien kallimur ko An. Inem, Joshua ear ba: “A kin ña im ro nuku, kim naj jerbal ñõn Jeova.” (Josh. 24:15) Ta kin kwe? Ñe kwoj lemnak kin kallimur ko me Anij eo emol ear kajejjet kitieir im ko me enaj kajejjeti, rej kamakit yuk ke ñan karejar ñan e einwõt Joshua?
7. Etke baptais iumin den ej juõn buñten nee eaorõk?
7 Ilo am kalmenlokjen kin menin kõmanman ko an Jehovah im kallimur ko an raibujuij me jemaroñ liki, ren kar kamakit yuk ñan jab wujleplok mour eo am ñan Jehovah wõt ak bareinwõt bwe kwon kalikare ilo am baptais ilo den. Baptais ej juõn buñten nee eaorõk me aolep ro rekõnan karejar ñan Anij rej aikwij kõmmane. Jesus, eo ej Joñok eo ad, ear kalikar men in. Mokta wõt jidik jen an kar jinoe jerbal in Messiah eo an, ear lelok e make ñan John Ri Baptais bwe en baptais e. Etke Jesus ear baptais? Ear ba, “Bwe I ar itok jen lõñ, jab bwe In kõmõnmõn ankil Aõ, a ankil an Eo e ar jilkintok Iõ.” (Jon 6:38) Ñan kwalok bwe ear bojak in lelok e make ñan kõmanman ankilan Jemen, Jesus ear baptais.—Mat. 3:13-17.
8. Etke Timothy ear kõnan kabuñ ñan Anij, im ta eo kwomaroñ aikwij in kõmmane?
8 Lemnak bareinwõt kin joñok eo an Timothy, juõn Ri Christian jodikdik me Jehovah ear lelok ñan e elõñ eddo im jerammõn ko ejejuair. Etke Timothy ear beek in kabuñ ñan Anij eo emol? Bible eo ej jiroñ kij im ba bwe ear “katak im rel [buruen] kaki.” (2 Tim. 3:14) Elañe kwar katak kin Nan in Anij im erel buruõm kin katak ko remol jen Bible, kwoj einlok wõt Timothy. Kiõ kwoj aikwij kõmmane juõn bebe. Etke kwojjab konono ibben jemõm im jinõm kin ta bebe eo am? Ir im bareinwõt elder ro an congregation eo, remaroñ jimor jibañ yuk ñan melele kin ta aikwij ko ekkar ñan Bible eo kwoj aikwij tõbari ñan am maroñ tellokin baptais.—Read Jerbal 8:12.
9. Ewi wãwen emaroñ jelet armij ro jet ñe kwoj baptais?
9 Elañe kwoj baptais, ej wãwen eo emõntata ñan am jino karejar ñan Anij. Ilo am bõk buñten nee in, kwonaj bõk kunam ilo juõn iaikwij eaetok im ãjinkij eo ej mour indio im lañliñ eo kiõ kin am kõmanman ankilan Anij. (Hib. 12:2, 3) Bareinwõt kwonaj kalañliñ ro uan family eo am me rej bed kadede ilo iaikwij in im ri tõmak ro mõttam ilo congregation eo an Christian. Elaptata, kwonaj kamõnõnõik buruen Jehovah. (Read Jabõn Kennan Ko 23:15.) Emol, ro jet remaroñ jab melele kin unin am kõnan kabuñ ñan Jehovah, im remaroñ lemnak bwe ebwid bebe eo am. Remaroñ jumae yuk bareinwõt. Bõtab, kwomaroñ bõk anjo ion aitwerõk kein.
Ñe Ro Jet Rej Jumae Yuk
10, 11. (a) Ta kajitõk ko armij ro remaroñ kajitõk ibbam kin bebe eo am ñan am karejar ñan Anij? (b) Ta eo kwomaroñ katak jen wãwen eo Jesus ear uake kajitõk ko kin kabuñ eo emol?
10 Ri school ro mõttam, ro ri turõm, im ro nukõm remaroñ bwok kin bebe eo am ñan karejar ñan Jehovah. Remaroñ kajitõk ibbam kin etke kwar kõmmane bebe in im ta eo kwoj tõmak kake. Ewi wãwen am naj uak? Emol, kwoj aikwij etale lemnak im eñjake ko am bwe kwon kamelele kin un ko unin am kõmmane bebe eo. Im ñan uake kajitõk ko kin men ko kwoj tõmak kaki, ejelok bar juõn joñok emõntata ijellokin Jesus, me kwoj aikwij lore.
11 Ke ri tel ro an kabuñ an Ri Jew ro rar jino kajitõk ibben Jesus kin jerkakbiji eo, ear kwalok juõn eon me rar jab lemnak kake. (Ex. 3:6; Mat. 22:23, 31-33) Ke juõn scribe ear kajitõk ibben kin ta kien eo elaptata, Jesus ear kwalok eon ko rekkar ilo Bible ñan e. Ri jeje eo ear wõr an kamolol kin uak eo an Jesus. (Liv. 19:18; Dut. 6:5; Mark 12:28-34) Wãwen an kar Jesus kajerbal Jeje ko ilo Bible eo im wãwen an konono ibbeir ear kõmman bwe armij ro ren “jibil jen dron kin E,” im ri jumae ro an rar jab maroñ mõn e. (Jon 7:32-46) Ñe kwoj uake kajitõk ko kin tõmak eo am, kwon kajerbal Bible eo im uak ilo “inimõn im mijõk.” (1 Pit. 3:15) Elañe kwojaje uak eo, jab mijak in ba bwe kwonaj mõnõnõ in bukõt uak eo. Tokelik, kwon bukõt uak eo, ilo am kajerbal kein katak ko einwõt Watch Tower Publications Index ak Watchtower Library ilo CD-ROM elañe ewõr ilo kajin eo kwoj melele kake. Ñe kwoj lukkun kebojak, kwonaj jelã “kijkan emõn [am] uak armij otemjej.”—Kol. 4:6.
12. Etke kwon jab kõnan kõtlok bwe matõrtõr en kabwer yuk?
12 Kwomaroñ jelmae men ko jet ijellokin kajitõk ko kin bebe eo am ñan karejar ñan Anij im tõmak eo am. Ilo mol, ri kijirãt eo an Anij, Satan Devil eo, ej iroij ion lal. (Read 1 Jon 5:19.) Jejjab maroñ kabuñburuen aolep armij, im jet armij remaroñ jumae kij. Jet armij remaroñ “konono nae” yuk im jab bõjrak air kõmmane. (1 Pit. 4:4) Ak kememej, bwe kwojjab make iam. Jesus Christ ear bõk matõrtõr bareinwõt. Ri jilek Peter ear bareinwõt iione, im ear je: “Komeo, ro jitenburu, komin jab lemnok kin men in kijeek e naj itok bwe en melejoñ kom, einwõt elañe men eo ekãl ej walok ñõn kom: A komin lõñliñ kin ami bõk mõtõn iñtan ko an Kraist.”—1 Pit. 4:12, 13.
13. Etke Ri Christian ro remaroñ lañliñ ñe armij ro rej matõrtõre ir?
13 Jemaroñ lañliñ ñe jej kijenmij iumin matõrtõr im jumae einwõt Ri Christian. Etke? Kinke ñe jej kabuñburuen lal in ej kalikar bwe jej mour ekkar ñan kien ko an Satan—im jab an Anij. Jesus ear kakkõl: “Wo ñõn kom ke armij otemjej re naj nebar kom! bwe ein drein an ro jimair kõmõn ñõn ro dri kanan riõp.” (Luk 6:26) Matõrtõr ej kalikar bwe Satan im lal eo an rej illu ibbam kinke kwoj karejar ñan Jehovah. (Read Matu 5:11, 12.) Im kin air ‘kajirere kake yuk kin etan Kraist,’ ej juõn men kwomaroñ lañliñ kake.—1 Pit. 4:14.
14. Ta tokjen ko remõn remaroñ walok ñe juõn armij ej debij an tiljek ñan Jehovah meñe ej jelmae matõrtõr?
14 Ñe kwoj tiljek wõt ñan Jehovah meñe armij ro rej jumae yuk, ewõr elõñlok jen emen tokjen ko. Kwoj kwalok nan kin Anij im Nejin. Kijenmij eo am ej rejañ Ri Christian ro jeõm im jatõm. Ñe rej kalimjek joñok eo am emõn, men in emaroñ kamakit jet armij ro me rejjab jelã kin Jehovah ñan air bukõt E. (Read Dri Pilippai 1:12-14.) Im ñe kwoj melele kin ewi wãwen Jehovah ej kakajur yuk ñan kijenmij iumin melejoñ ko, yokwe eo am kin e enaj laplok wõt.
“Juõn Aur Elap” Ej Bellok ñan Yuk
15. Ta “aur elap” eo ear bellok ñan ri jilek Paul?
15 Ikijen jerbal eo an ilo Ephesus, ri jilek Paul ear je: “Bwe emwij kebellok juõn aur elap ñõn iõ im itok limoõ.” (1 Kor. 16:8, 9) Ear juõn aor ear tellok ñan juõn jerbal elap kin kwalok news eo emõn im kõmman ri kalor ro ilo jikin kwelok eo. Ilo an deloñ ilo aor eo, Paul ear jibañ elõñ armij ñan air katak kin Jehovah im kabuñ ñan E.
16. Ewi wãwen bwen ri kabit ro rar deloñ ilo “juõn aur elap” ilo 1919?
16 Ilo 1919 Jesus Christ ear likit “juõn aur elap” iman bwen ri kabit ro. (Rev. 3:8) Ilo kijejeto rar deloñ ilo aor eo im jino kwalok nan kin news eo emõn im katakin armij kin Bible ilo juõn joñan elaplok jen mokta. Kar ewi tõbrakin jerbal eo air? News eo emõn ear tõbar jabõn ko jabõn lal, im tarrin jiljilimjuõn million armij ro rar bõk kejatdikdik eo ñan bõk mour indio ilo lal eo ekãl an Anij.
17. Ewi wãwen kwomaroñ deloñ ilo “juõn aur elap” eo ej tellok ñan jerbal ko relap?
17 “Juõn aur elap” eo ej tellok ñan jerbal ko relap, ej bellok wõt ñan aolep ri karejar ro an Jehovah. Ro rej deloñ iloan rej lo lañliñ im juburu ñe rej kalaplok jerbal eo air ñan kwalok nan kin news eo emõn. Kom jodikdik me rej karejar ñan Jehovah, ewi joñan ami kaorõk jerammõn in elap ñan jibañ armij ro jet bwe ren “tõmak ilo gospel” eo? (Mark 1:14, 15) Kwonañin ke lemnak in bõk jerbal in regular pioneer ak auxiliary pioneer? Kalek Kingdom Hall ko, jerbal ilo Bethel, im jerbal in missionary rej jerammõn ko jet remõn rej bellok ñan elõñ iami. Kinke mõttan jidik lal eo enana an Satan enaj jako, ej juõn menin kakaiuriur ñan bõk kunam ilo jerbal kein kin Ailiñ eo. Kwonaj ke deloñtok ilo ‘aur in elap’ kiõ ke ejja wõr wõt ien?
“Erjoñ im Lo bwe Jeova E Joij”
18, 19. (a) Ta eo ear jibañ David bwe en debij juõn kõnan ekajur ñan an karejar ñan Jehovah? (b) Ta eo ear kwalok bwe David ear jab ajlok kin an karejar ñan Anij?
18 Ri jeje sam ear kir ro jet bwe ren “erjoñ im lo bwe Jeova e joij.” (Sam 34:8) Ke King David ilo Israel eo etto ear juõn ladik ej lale sheep, Jehovah ear lomoren e jen menin mour ko rawia. Anij ear jurake e ke ear tarinaik Goliath im lomoren e jen jorrãn ko jet. (1 Sam. 17:32-51; Sam 18, im kamelele ko itujinoin chapter eo) Kinke Anij ej tiriamo, David ear je: “O Jeova aõ Anij, elõñ men in bwilõñ, jerbal ko Kw’ar kõmõne, kab lemnok ko Am ñõn kim: re ban kilajrõk ir ñõn Kwe; elañe I naj kõnan kwalok im konono kaki, relõñ jen maroñ in bwini.”—Sam 40:5.
19 David ear lukkun yokwe Jehovah im kõnan bwe en nebar E kin aolepen buruen im lolãtãt eo an. (Read Sam 40:8-10.) Meñe emotlok elõñ yiõ ko, David ear jab ajlok kin an kar kajerbal aolepen mour eo an ñan kabuñ ñan Anij. Mour ñan kabuñ ñan Anij kar men eo eaorõktata ibben—menin kamõnõnõ eo elaptata. Ke ear ritto, David ear ba: “Bwe Kwe aõ kejatrikrik, O Iroij Anij, im aõ men in liki jen ke I ar ajiri. Eokwe, ñe I naj ridto im uõn kolan bõra O Anij, kwon jab illok jen ña.” (Sam 71:5, 18) Liki eo an David ilo Jehovah im jimjera eo an ibben ear kajurlok, meñe kajur eo an ilo enbwinin ear mõjnolok.
20. Etke karejar ñan Anij ej wãwen eo emõntata ñan mour?
20 Wãwen mour ko an Joshua, David, im Timothy rej kamol bwe karejar ñan Jehovah ej wãwen eo emõntata ñan mour. Tokjen ko ejjab to air bed me rej itok jen ad jibadõk men ko an lal rejjab maroñ joñan wõt tokjen ko etto air bed jej bõki ñe jej ‘korijer ñõn E kin aolepen buruõd im aolepen ad.’ (Josh. 22:5) Elañe kwojañin wujleplok mour eo am ñan Jehovah ilo jar, kwon kajitõk ibbam, ‘Ta eo ej bõprae iõ jen aõ erom juõn ian Ri Kennan ro an Jehovah?’ Elañe emwij am baptais einwõt juõn ri kabuñ an Jehovah, kwokõnan ke kalaplok lañliñ ilo mour eo am? Inem kwon kalaplok am jerbal ñan Anij, im wõnmanlok wõt ilo men ko lor jitõb einwõt juõn Ri Christian. Katak eo tok juõn enaj kwalok ñan yuk kin ewi wãwen kwomaroñ rittolok ilo jitõb ilo am lore joñok eo an ri jilek Paul.
Ewi Wãwen Kwonaj Uak?
• Kwalok ruo un ko unin am karejar ñan Anij.
• Ta eo ear jibañ Timothy ñan an bebe bwe en karejar ñan Anij?
• Etke kwoj aikwij jutak bin ilo tõmak meñe armij ro rej matõrtõre yuk?
• Ta ien ko remõn rej bellok ñan yuk ñan am jerbal ñan Anij?
[Pija eo ilo peij 18]
Karejar ñan Jehovah ej wãwen mour eo emõntata
[Pija eo ilo peij 19]
Kwomaroñ ke uake kajitõk ko kin tõmak eo am?