Jibadõk “Kwojarjar ilo Mijõk Anij”

IKIJEN kwojarjar eo eutiej an Jehovah Anij, Bible eo ej ba: “E kwojarjar, E kwojarjar, E kwojarjar, Jeova in inelip eo.” (Ais. 6:3; Rev. 4:8) Nan in Hebrew im Greek eo kin “kwojarjar” ej kalikar lemnak eo kin erreo in kabuñ, ak bed ettolok jen men ko retton. Kwojarjar eo an Anij ej jitõñlok ñan mwil eo an ewãppen.

Ejjab ke bwe Anij eo ekwojarjar, Jehovah, enaj kõtmene bwe ro rej kabuñ ñan e ren kwojarjar, melelen bwe ren erreo ilo enbwin bareinwõt ilo mwil im jitõb? Ilo alikar, Bible eo ej kwalok bwe Jehovah ekõnan bwe armij ro an ren kwojarjar. Jej read ilo 1 Piter 1:16: “Komin kwojarjar; bwe Ña I kwojarjar.” Armij ro rejjab wãppen remaroñ ke lukkun anõk kwojarjar eo an Jehovah? Aet remaroñ, meñe rejjab maroñ anõke ilo juõn wãwen ewãppen. Jehovah emaroñ watõk kij jekwojarjar elañe jej kabuñ ñan e ilo juõn wãwen erreo ilo jitõb im wõr juõn kõtan ebak ibben.

Inem, ewi wãwen ad maroñ kõmman bwe en erreo wõt mwilid ilo lal in me elap an etton? Ta manit ko jej aikwij bõprae ad kõmmani? Ta oktak ko ikijen konono im mwil jemaroñ aikwij in kõmmani? Jen lale ta eo jemaroñ katak jen ta eo Anij ear kakien Ri Jew ro bwe ren kõmmane ke rar jeblak jen Babylon ñan kabijukneir ilo 537 B.C.E.

Im Enaj Wõr “Ial in Kwojarjar”

Jehovah ear kanan bwe armij ro an me rar bed iumin kamakoko an Ri Babylon ro renaj bar jeblak ñan kabijukneir. Ewõr kein kamol kanan eo kin bar jeblak eo, ear kallimur: “Im juõn ial elap e naj ie, im juõn ial, im naj naetan Ial in kwojarjar.” (Ais. 35:8) Nan kein rej kwalok bwe Jehovah ear jab baj kabellok wõt ial eo ñan an Ri Jew ro jeblak ñan kabijukneir ak ear jiroñ ir bwe enaj kejbãrok ir ilo ial eo lok.

Kin ri karejar ro an ion lal rainin, Jehovah ear kabellok “Ial in Kwojarjar” eo ej tellok ir jen Babylon Elap, dolul in kabuñ ko rewan ibelakin lal. Ilo 1919 ear kanemkwoj Christian ri kabit ro jen air kamakoko ilo jitõb ñan kabuñ wan, im jidik kin jidik rar karreoik kabuñ eo air jen aolep katak ko rebwid. Congregation eo an ri kabuñ ro an Jehovah rainin ej juõn jikin erreo im eainemõn, ijo jemaroñ kabuñ ñan Jehovah im ejaak juõn kõtan eainemõn ibben im ibben ro jeid im jatid.

Ro uan “bwij erik” in Christian ri kabit ro im “jar elap” in ‘sheep ro jet’ me rej lõñlok wõt, emwij air kãlet ñan etetal ilo juõn wãwen ekwojarjar im rej kirtok ro jet ñan air kobatok ibbeir. (Luk 12:32; Rev. 7:9; Jon 10:16) “Ial in Kwojarjar” ej bellok ñan aolep ro me rej mõnõnõ in “lelok [enbwineir] men in jurtak emour, ekwojarjar, men in kabuñburuen Anij.”​—Rom. 12:1.

“Ro Retton Re Jamin Etal Ie”

Ilo 537 B.C.E., Ri Jew ro me rar bar jeblak rar aikwij bokake juõn menin aikwij eaorõk. Ikijen ro me ej tellokiir ñan etetal ion “Ial in Kwojarjar,” Aiseia 35:8 ej ba: “Ro retton re jamin etal ie; a e naj ñõn ro emwij lomoren ir: ro dri itoitõk, aet, ro dri bwebwe re jamin jebwãbwe iloan.” Kinke unin an Ri Jew ro jeblak ñan Jerusalem kar ñan air bar kajutak kabuñ eo erreo, enaj kar ejelok jikin ñan ro me rej lemnak kin ir make, ejelok air kautiej kin men ko rekwojarjar, ak rej kõmmani men ko retton. Ro rar jeblak rar aikwij mour ekkar ñan kien ko reutiej kin mour erreo an Jehovah. Ro rekõnan kabuñburuen Jehovah rainin rej aikwij bareinwõt mour ekkar ñan kien kein. Rej aikwij jibadõk “kwojarjar ilo mijõk Anij.” (2 Kor. 7:1) Inem, ta manit ko retton jen jab kõmmani?

“Kiõ jerbal in kõniek ko re alikar,” Paul ear jeje, “im men kein: lũñ, etton, ejej.” (Gal. 5:19) Lũñ ej ekkejellok ibben aolep wãwen belele wan ko me rej kitibuji air kajerbal mõttan ko ilo enbwiniir ñan air kõmmani men ko renana ilikin mour in mare eo. Ãjej ej kitibuj mõm enana, im kijoñ. Alikar, lũñ im ãjej jimor rej nae kwojarjar eo an Jehovah. Kin men in, ro me rej wõnmanlok ilo air kõmmani manit kein retton rejjab maroñ mõttan Christian in congregation eo ak naj bukwelok ir jene. Ejja wãwen dein ibben ro me rej kõmmani men ko relukkun etton, melelen, “etton otemjej ilo dõr.”​—Ep. 4:19.

“Etton” ej juõn nan ej kitibuj elõñ wãwen jerawiwi ko. Nan in Greek eo ej jitõñlok ñan jab erreo ak etton ilo jabdewõt men​—ilo mwil, konono, im ad kobalok ibben ro rejjab ri tõmak ak ro rar illok jen mol eo. Ekoba bareinwõt manit ko retton jidik me remaroñ jab liakelok ñan ekajet.a Bõtab rein me rej kõmmani men kein retton rej jibadõk ke juõn ial ekwojarjar?

Bõlen juõn Ri Christian ej jino lale pija in kelwan ko ilo ittino. Jidik kin jidik, ke kõnan ko retton rej jino air walok, bebe eo an ñan an erreo wõt iman Jehovah ej diklok. Mwilin emaroñ jañin tõbar joñan eo me ej oktak im kõmmane men eo elap an etton, bõtab, ejjab wõnmanlok ilo an lali wõt ‘jabrewõt men ko rokwojarjar, jabrewõt men ko emõn air buñbuñ, elañe eor emõn, im elañe eor nebar.’ (Pil. 4:8) Pija in kelwan etton im ej kokkure kõtan eo an juõn ibben Anij. En jab walok jabdewõt men etton ibwiljid.​—Ep. 5:3.

Lale bar juõn wanjoñok. Jen ba bwe juõn Ri Christian ej kõmmane manit eo ikijen an ikkure kin enbwinin make ilo jõkkar ak lepã​—ej ikkure kin enbwinin make ñan kworuj kõnan eo an ñan belele​—emaroñ koba an aluiji pija in kelwan ak jaab. Meñe nan eo “masturbation” (ikkure kin enbwinin make) ejjab walok ilo Bible eo, ejelok bere bwe men in ej juõn manit etton ilo lemnak im eñjake. Im elañe juõn ej wõnmanlok wõt ilo manit in ejjab ke bwe emaroñ kokkure kõtan eo an ibben Jehovah im jab erreo iman mejen Anij? Jen bokake jen buruõd nan in kauwe eo an ri jilek Paul ñan “karreoik kij jen etton otemjej in kõniek kab ar” im “juloki kõnan ko an lõl in im rej jerbal ilo kom, einwõt men kein: kijoñ, nana mwilin, lũñ, mõm an kanniek, im ankwonak.”​—2 Kor. 7:1; Kol. 3:5.

Lal in an Satan ej kõtlok manit ko retton, im elaptata ej rejañ armij ro bwe ren kõmmane. Emaroñ bin ñan kejbãrok kij jen ad reel ilo kain manit rot kein. Ak Ri Christian ro remol ren jab “etetal jen kiõ einwõt dri pegan rej etetal, ilo air lemnok wan.” (Ep. 4:17) Elañe jej kejbãrok wõt kij jen manit ko retton ilo ittino ak iman mejen armij, inem Jehovah enaj kõtlok kij bwe jen etetal ilo “Ial in Kwojarjar” eo.

“Ejelok Laion E Naj Ie”

Ñan lañliñ kin buñburu eo an Anij eo ekwojarjar, Jehovah, emaroñ juõn menin aikwij bwe jen kõmman oktak ko relap ilo mwilid im nan eo ad. Aiseia 35:9 ej ba: “Ejelok laion e naj ie, im ejelok kiru e lej e naj wõnliñlok ion,” melelen, “Ial eo Ekwojarjar.” Ilo kõkkar, armij ro relej ilo kõmman im konono jemaroñ keidi ir ibben menin mour ko rawia. Rejamin bed ilo lal eo ekãl im wãnik an Anij. (Ais. 11:6; 65:25) Elap an aorõk bwe ro me rekõnan bõk buñburu eo an Anij rej aikwij jolok kadkad ko relej im jibadõk mour eo ekwojarjar.

Jeje ko ilo Bible ej jiroñ kij: “En joko jen kom meo otemjej, im libõpne, im illu, im airwaro, im konono nae, kab kakitõtõ otemjej.” (Ep. 4:31) Ilo Dri Kolosse 3:8 ej ba: “A kiõ komin bareinwõt julok men kein otemjej; illu, buru karu, illu aitok, konono nae, im nan ko retton jen loemi.” Nan ko “konono nae” me eon ko ruo itulõñ rej kajerbali ej melelen air kajerbal nan ko rej kajorrãn, kajook ak kajirere, ak konono nae Anij.

Rainin, nan ko retton im remeo ak rej kalõkatip armij, ekkã air walok, bareinwõt ilo moko imõn family ko. Lõmaro im limaro ri belele rej buroñe don kin nan ko reddo im ñan ajiri ro nejiir. Kain nan rot kein relej ren kar jab walok ilo moko imõn Ri Christian ro.​—1 Kor. 5:11.

Jibadõk “Kwojarjar ilo Mijõk Anij”​—Ej Juõn Jerammõn!

Ej juõn jerammõn elap ñan karejar ñan Jehovah Anij! (Josh. 24:19) Paradise eo ilo jitõb me Jehovah ear kadeloñ kij na iloan ej juõn men eaorõk. Emol bwe debij mwil eo ekwojarjar mwilid iman mejen Jehovah ej wãwen eo emõntata ñan mour.

Mõttan jidik Paradise eo ion lal me Anij ear kallimur kake enaj lukkun walok. (Ais. 35:1, 2, 5-7) Ro me relukkun kõnan loe im mour wõt ilo juõn wãwen ekwojarjar renaj jerammõn ñe rej bõk jikiir ilo Paradise eo. (Ais. 65:17, 21) Inem, jen kate wõt im kabuñ ñan Anij ilo juõn wãwen erreo im bed ebake wõt e.

[Kamelele eo itulal]

[Pija eo ilo peij 26]

Ta eo Ri Jew ro rar aikwij kõmmane ñan air maroñ etetal ilo “Ial in Kwojarjar”?

[Pija eo ilo peij 27]

Pija in kelwan ko rej kokkure kõtan eo am ebak ibben Jehovah

[Pija eo ilo peij 28]

“En joko jen kom . . . konono nae, kab kakitõtõ otemjej”