“Komin Kwojarjar Ilo Wãwen Otemjej Ami Ber In Kõmõn”

“A einwõt Eo e ar kir kom E kwojarjar, komin bareinwõt kwojarjar ilo wãwen otemjej ami ber im kõmõn, bwe emwij jeje: ‘Komin kwojarjar, bwe Ña I kwojarjar’”​—1 PETER 1:15, 16.

1. Etke Peter ear kaketak Christian ro bwe ren kwojarjar?

ETKE ri jilek Peter ear letok nan in kakabilek in ilõñ? Kinke ear lo aikwij eo ñõn kajojo Christian ñõn kejbarok lemnak im kõmmõn ko an bwe en errã ibben lãjrak in kwojarjar eo an Jehovah. Kin men in, ear kwalok lok iman nan kein ilõñ ilo an ba: “Kin men in komin kapojõk buruemi . . . Einwõt ro nejin jilkaie, komin jab mõke kõmõnmõn kom ekar ñõn mõm ko ami mokta ilo ien ami jajelokjen.”​—1 Peter 1:13, 14.

2. Etke kõnan ko ad mokta jen ad kar katak mol eo rar jab kwojarjar?

² Kõnan ko ad mokta rar jab kwojarjar. Etke? Kinke elõñ ro iad jaar lor juõn ialin kõmmõn ko an lõl in mokta jen ad kar bõk mol eo an Christian. Peter ear jela men in ke ear je ilo alikar: “Bwe emõn ran ko remotelok ren bwe kin ami kõmõn kõnan an ro dri pegan, im etetal ibeir ilo lũñ, mõm ko renana, irak wain , eep ko, karek ko, im kabuñ ñõn ekjõp ko.” Bwebõta, Peter ear jab kwalok kin kõmmõn ko rejjab kwojarjar im rebuñbuñ ilo lõl in ad ran kein, ke rar jab jela kaki ilo ien eo.​—1 Peter 4:3, 4.

3, 4. (a) Ewi wãwen ad maroñ jumae kõnan ko rebwid? (b) Christian ro ej aikwij jab wor air eñjake ke? Kamelele.

³ Kwar lo ke bwe kõnan kein rej men ko rej men in karelel ñõn kanniek, ñõn lemnak ko, im eñjake ko? Ñe jej kõtlok bwe men kein ren kajur, inem lemnak im kõmmõn ko ad renaj kanuij bidodo air oktak im jab kwojarjar. Men in ej kalikar aikwij eo ñõn kõtlok bwe kajur in kammanwa eo en bebeik kõmmõn ko ad. Paul ear kalikare ilo wãwen in: “Inem ij akwelap ñõn kom, ro jeiõ im jãtiõ, kin tiriamokake ko an Anij, bwe komin lelok enbwinemi men in jurtak emour, ekwojarjar, men in kabuñburuen Anij, eñin ami jerbal men in Jitõb.”​—Rome 12:1, 2.

⁴ Ñõn lelok juõn men in jurtak ekwojarjar ñõn Anij, jej aikwij kõtlok bwe kajur in kammanwa eo, jab eñjake ko, ren kajur. Jete ro emwij kũnõrelok ir ñõn loan mour in lũñ kin air kar kõtlok eñjake ko air ñõn bebeik mwilier! Ejjab melelen men in bwe eñjake ko ad ren bõjrak; elañe eindein, ewi wãwen ad naj kwalok ad lõñliñ ilo jerbal eo an Jehovah? Bõtab, elañe jekõnan kwalok leen jitõb im jab jerbal ko an kanniek, inem jej aikwij ukõt lemnak ko ad ñõn wãwen lemnak eo an Christ.​—Galetia 5:22, 23; Pilippai 2:5.

Mour Kwojarjar, Wõnãn Ekwojarjar

5. Etke Peter ear lemnak kin aikwij eo ñõn kwojarjar?

⁵ Etke elap an kar Peter lemnak kin aikwij eo kin kwojarjar eo an Christian? Kinke ear kanuij in emõn an jela kin wõnãn kwojarjar eo kar kõllãiki ñõn kanemkwoj armij in kiblie ro. Ear je: “Bwe kom jela ar jab binmour ñõn kom kin men in ijurwewe ko, kin silver im gold, jen ami mour bata emwij likite ñõn kom jen ro jimami. A kin bõtõktõk e aurõk, einwõt an lam ejelok notan im ekwojarjar, aet eo an Kraist.” (1 Peter 1:18, 19) Aet, Unjen kwojarjar eo, Jehovah Anij, ear jilkintok Nejin eo ej make wõt ear keotake, “Eo Ekwojarjar,” ñõn lõl ñõn kõllã binmour eo enaj kar kõtlok an armij ro wor juõn air kõtan emõn ibben Anij.​—John 3:16; 6:69; Exodus 28:36; Matthew 20:28.

6. (a) Etke ejjab bidodo ñõn ad etal ilo mwilin kwojarjar? (b) Ta eo emaroñ jibañ kij kejbarok wõt mwilir bwe en kwojarjar?

⁶ Bõtab, jej aikwij kile bwe ejjab bidodo ad mour ilo juõn wãwen ekwojarjar ñe jej bed ibwiljin lõl in enana an Satan. Ej likit jen ko ñõn Christian ro remol, ro rej kajeoñ mour im ellã ilo jukjuk in bed in an. (Epesõs 6:12; 1 Timothy 6:9, 10) Ijibed ko ilo jikin jerbal ko, jumae eo an family, kajirere ilo school, im abañ eo jen ro mõttad rej kõmmõn bwe mour ilo jitõb ekajur en juõn men in aikwij ñõn an juõn debij wõt kwojarjar. Men in ej kalikar aorõk in ijo kwunad ilo ad katak ibbed make im ekkeini ad bed ilo kwelok ko an Christian. Paul ear kakabilek Timothy: “Kwon kanuij drebij wãwen nan ko remol kw’ar roñjaki jen ña, ilo tõmak im yokwe eo ej ilo Kraist Jisõs.” (2 Timothy 1:13) Jej roñjaki nan in ejmour kein ilo Kiiñdom Hall eo ad im ilo ien eo jej makelok iad im katak Bible. Remaroñ jibañ kij ñõn ad kwojarjar ilo mwilid ilo ran otemjej ilo elõñ kajjo wãwen ko.

Mwil Kwojarjar ilo Family eo

7. Ewi wãwen an kwojarjar aikwij jelet mour in family eo ad?

⁷ Ke Peter ear elij nan ko ilo Leviticus 11:44, ear kajerbal nan in Greek eo haʹgi·os, eo ej melelen “jibellok jen jerawiwi im kin men in wujleplok ñõn Anij, kwojarjar.” (An Expository Dictionary of New Testament Words, by W.E. Vine) Ewi wãwen an aikwij in ñõn kwojarjar jelet kij ilo mour in family in Christian eo ad? Ej aikwij melelen bwe mour in family eo ad ej aikwij bedbede ion yokwe, bwe “Anij yokwe.” (1 John 4:8) Yokwe in karmijete kõnan ko ad make ej oil eo ej oili kõtan eo ikõtan ri belele ro im ikõtan jemen im jinem im ajiri ro.​—1 Korint 13:4-8; Epesõs 5:28, 29, 33; 6:4; Kolosse 3:18, 21.

8, 9. (a) Ta wãwen eo jet ien ej walok ilo juõn imõn Christian? (b) Ta nan in kakabilek eo emõn Bible ej letok kin men in?

⁸ Jemaroñ lemnak bwe kalikar kain yokwe rot in enaj make bed im waloktok ilo juõn family in Christian. Ak, jej aikwij kamol bwe yokwe ejjab ien otemjej kajur ñõn joñan eo rej aikwiji ilo jet moko imõn Christian. Emaroñ alikar ad einwõt kwalok ad yokwe ilo Kiiñdom Hall eo, ak ekanuij bidodo an diklok kwojarjar eo ad ilo mweo. Inem emaroñ mõkaj ad meloklok bwe lio belele ej juõn Christian sister wõt ak bwe leo belele ej ejja brother eo wõt (im bõlen juõn ministerial servant ak juõn elder) eo rej kile im kautiej e ilo Kiiñdom Hall eo. Ñe jej lõkatip emaroñ walok iakwelel ko rekakijekeek. Juõn mour eo ruo mweãñõn emaroñ tõbalbaltok ñõn loan mour ko ad. Ej etal im jako juõn kõtan eo einwõt juõn maan im kõrã ri belele im einwõt Christ ak enaj baj juõn emaan im juõn kõrã ilo air aitwerõke don. Rej meloklok bwe ej aikwij wor juõn mejatoto emõn imweo. Bõlen rej jino iten konono einwõt armij in lõl in. Ekanuij bidodo an juõn nan in kakũtõto maroñ walok jen loñi!​—Jabõn Kennan 12:18; keiri Jerbal 15:37-39.

⁹ Bõtab, Paul ej kakabilek: “Ejelok nan etton en waloktok jen loñimi, a jabrewõt eo emõn im nan in kalek ekar ñõn aikwij, bwe en lelok joij ñõn eo ej roñjake.” Im men in ej jitõñlok ñõn aolep ri roñjake ro ilo mweo, ekoba ajiri ro.​—Epesõs 4:29; James 3:8-10.

10. Ewi wãwen an nan in kakabilek eo kin kwojarjar jerbal ñõn ajiri ro?

¹⁰ Kiõ ialin tel in kin kwojarjar eindein an jerbal ñõn ajiri ro ilo juõn family in Christian. Ebidodo air roltok jen school ñõn mweo im jino kajeoñwe konono in jumae im jab kautiej ko an ri lõl in ro mõttair! Ajiri ro, komin jab bõk lemnak ko ladik ro rejelmene ro rar kakũtõtõik ri kanan eo an Jehovah rar kwalok kaki im ro enana kobban loñier, im kwalok nan in blasphem ko eierlok wõt ko ibben jodikdik ro ilo ran kein. (2 Kiiñ 2:23, 24) Nan ko am rejjab aikwij etton kin nan ko iluial an armij ro elap air jowan ak rejjab lemnak kin ro jet ñõn air kajerbal nan ko remõn. Einwõt Christian ro, nan ko ad rej aikwij kwojarjar, emõn, nan in kalek, joij, im emwij “kejãtok e kin salt.” Ej aikwij kajenolok kij bwe jej einwõt oktak jen armij ro jet.​—Kolosse 3:8-10; 4:6.

Kwojarjar im Ro Uan Family Eo Ad Rejjab Tõmak

11. Etke kwojarjar ejjab melelen ad make kwowãnik kij?

¹¹ Ke jej kajeoñ in jerbale kwojarjar, jej aikwij jab kwalok ad utiej im kowãnik kij make, elaptata ñe jej jerbal ibben ro uan family eo me rejjab tõmak. Mwilin Christian eo ejoij mwilid ej aikwij jibañ ir ñõn air lo bwe jeinjuõn ilo juõn wãwen eo ewor tokjen, bwe jejela wãwen kwalok yokwe im joij, meñe einwõt kar ri Samaria eo emõn ilo wanjoñok eo an Jesus.​—Luke 10:30-37.

12. Ewi wãwen an Christian ri belele ro maroñ kõmmõn bwe mol eo en laplok an karelel ñõn ri belele ro mõttair?

¹² Peter ear kalikar aorõkin juõn lemnak eo ejimwe ñõn ro uan family eo ad rejjab tõmak ke ear jeje ñõn Christian kõrã ri belele ro: “Ein drein, limaro, komin kõtãik kom ñõn lõmaro belemi, bwe elañe jabrewõt e jab bokake nan eo, en rel buruen ñe ejelok nan, kin an beleir ber im kõmmõn. Ñe rej lo ami etetal ekwojarjar ilo mijõk.” Juõn Christian kõrã ri belele (ak leo belele) emaroñ kõmmõn bwe mol eo en laplok an karelel ñõn eo rejtan ejjab tõmak elañe ej emõn mwilin, ej lemnak kin eo juõn, im ej kautiej. Melelen men in bwe ej aikwij wor ukoktak ilo schedule in theocratic eo bwe ri belele eo ejjab tõmak en jab inebata ak kowane.a​—1 Peter 3:1, 2.

13. Ewi wãwen an elder ro im ministerial servant ro jet ien maroñ jibañ ri belele maan ro rejjab tõmak ñõn air kamolol kin mol eo?

¹³ Elder ro im ministerial servant ro jet ien remaroñ jibañ ruo ri belele ilo air bõk air jela kin leo ri belele ejjab tõmak ilo air ibben don jet ien. Ilo wãwen in emaroñ lo bwe Ri Kennan ro rej armij ro remõn ibben itoklimo ko elap belakier, ekoba men ko jet ijellokin Bible eo. Ilo juõn case, juõn elder ear kwalok an itoklimo ilo juõn ikkure in ãñwod an juõn leo ri belele. Ear bwe ñõn an ellã ion abañ eo ilo jinoin im ear jino an einwõt juõn jeran. Leo ri belele ear etal im erom juõn jimjen jimjatin eo ear baptais. Ilo bar juõn case, juõn maan ri belele ejjab tõmak ear wor an itoklimo ilo bao ko rej naetair canary. Elder ro rar jab ebwer. Juõn iair ear katak kin men in bwe ñe ebar ion leo ilo ien eo tok juõn, emaroñ kabellok juõn konono kin men in leo ear itoklimo kake! Kin men in, kwojarjar ejjab melelen am lejen joñan am kijñeñe kin mwil ak wor juõn wõt kain lemnak.​—1 Korint 9:20-23.

Ewi Wãwen Ad Maroñ Kwojarjar Ilo Congregation eo?

14. (a) Ta juõn ian kõl ko an Satan ñõn kamõjnoiklok congregation eo? (b) Ewi wãwen ad maroñ jumae jen eo an Satan?

¹⁴ Satan Devil eo ej juõn ri ruruwe, bwe ilo Greek ãt in Devil, di·aʹbo·los, ej melelen “ri naruõn” ak “ri ruruwe.” Ruruwe ej juõn ian kabel ko an, im ej kajeoñ kajerbale ilo congregation eo. Kilen eo emõn ibben ej ñidemij. Jej kõtlok ke kij make bwe jen ian ro ej kajerbale ilo manit in ejjab kwojarjar? Ewi wãwen an maroñ eindein? Ilo ad jinoe, ilo eliji, ak ilo roñjake. Jabõn Kennan eo emeletlet ej kwalok: “Juõn armij dri ankeke ej kijibliklik akwail, im juõn dri unojrikrik ej kijbil ro rej jimjeran.” (Jabõn Kennan 16:28) Ta eo mejelan ñidemij im ruruwe? Jej aikwij lukkun lale bwe nan ko ad ien otemjej rej nan in kalek im rej bedbed ion yokwe. Elañe jej bukõt men ko remõn im jab likjap ko an ro jeer im jater, kennan eo ad enaj ien otemjej emõn im ekkar ñõn jitõb. Kememej bwe lo notan juõn ebidodo. Im armij eo ej ñidemij ñõn yuk kin ro jet emaroñ bareinwõt ñidemij ñõn ro jet kake yuk!​—1 Timothy 5:13; Titus 2:3.

15. Ta kadkad ko einwõt ko an Christ renaj jibañ debij wõt kwojarjar eo an ro otemjej ilo congregation eo?

¹⁵ Ñõn kejbarok kwojarjar eo an congregation eo, kij otemjej ej aikwij bed ibbed ejja lemnak eo wõt an Christ, im jejela bwe kadkad eo elap kadkadin ej yokwe. Kin men in, Paul ear kakabileke ri Kolosse ro bwe ren kwalok tiriamokake einwõt Christ: “Inem, einwõt Anij e ar kãlet kom rokwojarjar im jitenburu, komin kõnõk buruen tiriamo, joij, etã buru, inimõn, jejanunoij, . . . , jeorilok nana jen dron . . . Ak ion men kein otemjej, komin kõnõk yokwe, eo ken lukwõj ej kowãppemi.” Inem ear kobaiktok: “Im ainemõn jen Kraist en iroij ilo buruemi.” Emol kin jitibõn jeorlok bwid in, jemaroñ debij wõt burukuk eo im kwojarjar eo an congregation eo.​—Kolosse 3:12-15.

Kwojarjar eo Ad Ej Walok ke ñõn ro rej Jokwe Ibelakid?

16. Etke kabuñ eo ad ekwojarjar en kabuñ eo ekamõnõnõ?

¹⁶ Ak ta kin armij ro rej jokwe ibelakir, ro ri turud? Ewi wãwen air lemnak kake kij? Jej kwalok ke lõñliñ kin mol eo, ak jej kõmmõn ke bwe en einwõt juõn men eo eddo? Elañe jej kwojarjar einwõt an Jehovah kwojarjar, inem ej aikwij alikar ilo konono eo ad im mwilir. Ej aikwij alikar bwe kabuñ eo ad ekwojarjar ej kabuñ eo emõnõnõ. Etke ej eindein? Kinke Jehovah ad Anij ej juõn Anij emõnõnõ, eo ej kõnan bwe ri kabuñ ro an ren lõñliñ. Kin men in, ri jeje Psalm ear maroñ in ba kin armij ro an Jehovah ilo ien ko etto: “Emõnõnõ ro dri ailiñ eo, ñe air Anij Jeova!” Jej kalikar ke mõnõnõ in? Ajiri ro nejid rej bareinwõt kalikar ke air mõnõnõ kin air bed ibwiljin armij ro an Jehovah ilo Kiiñdom Hall eo im ilo assembly ko?​—Psalm 89:15, 16; 144:15b.

17. Ta eo jemaroñ kõmmõne ilo juõn wãwen eo emõn ñõn kwalok kwojarjar eo ejokkin wõt juõn?

¹⁷ Jemaroñ bareinwõt kwalok ad jokkin wõt juõn ilo kabuñ eo ad ekwojarjar ikijen jitibõn karejar im joij ñõn ro ri turud. Jet ien ej menin aikwij ñõn ro ri turud bwe jen karejar ibben don, bõlen ñõn karreo melan ko ak, einwõt ilo jet ailiñ ko, ñõn jibañ kõmõnmõnlok ial ko im highway ko. Ikijen men in, kwojarjar eo ad emaroñ alikar ilo wãwen ad kejbarok jikin kallip ko ad, nabõj in mweo, ak men ko jet mweier. Elañe jej kõtlok bwe jokobej ko ren ejibliklik ak jab karõki ilo melan eo, ak meñe kin kããn wan ettõr ko remor bwe aolep ren maroñ loi, jemaroñ ke ba bwe jej jerbal ñõn ro ri turud ilo kautiej?​—Revelation 11:18.

Kwojarjar ilo Jikin Jerbal im ilo School

18. (a) Ta eo ej juõn wãwen eo ebin ibben Christian ro rainin? (b) Ewi wãwen ad maroñ einjuõn jen lõl in?

¹⁸ Ri jilek Paul ear jeje ñõn Christian ro ilo jikin kwelok eo ear jab kwojarjar ilo Korint: “I ar jejewoj ilo letter eo aõ bwe komin jab kõmao iben ro ri lũñ, a I ar jab lemnok kin ri lũñ an lõl in, ak iben ri ankwonak im ri koaroñ, ak iben ri kabuñ ñõn ekjõp. Bwe elañe eindein, kom naj kar aikwij lukkun ilok jen lõl.” (1 Korint 5:9, 10) Men in ej juõn wãwen ebin ñõn Christian ro, ro rej tel air kajojo ran ibben armij ro rejjab kejbarok mour in erreo. Men in ej juõn melejoñ elap kin tiljek, elaptata ilo jikin ko ijo mour in ankemejur, nana, im jab mol rej kajekdoni im jab ellok ñõni. Ilo wãwen in ilo jikin jerbal im jikin school eo jejjab maroñ kõttãiklok kien ko ad bwe jen einwõt ñe “emõn” ñõn ro ibelakir. Jen an eindein, joij eo ad ak mwil eo einjuõn mwilin Christian eo ad ej aikwij kõmmõn bwe jen jenolok im alikar ñõn armij ro ewor air melele, ñõn ro rej kile aikwij eo air ilo jitõb im ro rej bukõt men eo emõnlok.​—Matthew 5:3; 1 Peter 3:16, 17.

19. (a) Ta melejoñ ko ajiri ro nejim rej iioni ilo school? (b) Ta eo jemen im jinen ajiri ro remaroñ kõmmõne ñõn jurake ajiri ro nejier im mwiliir ekwojarjar?

¹⁹ Ilo wãwenin lok wõt, ekanuij lõñ melejoñ ko rej jelmae ajiri ro nejid ilo school. Kom ro jemeir im jineir komij lolok ke school eo ajiri ro nejim rej bed ie? Kwojela ke kain mejatoto rot eo ekajur ijo? Ewor ke juõn am kõtan emõn ibben ri kaki ro? Etke elap tokjen kajitõk kein? Kinke ilo elõñ jikin ko ilo lõl in, school ko rej oktak im einwõt bukwon wijki in kowadoñ, unokan kadõk ko, im mour in lũñ. Ewi wãwen an ajiri ro nejim maroñ debij wõt tiljek eo air im mwilin kwojarjar eo air elañe jemeir im jineir rejjab lukkun jutak ilikier im rejtak ir? Nan in kakabilek in an Paul ñõn jemen im jinen ajiri ro ejejjet: “Ro jemeir, komin jab kaillu ro nejimi, bwe ren jab õbwer.” (Kolosse 3:21) Juõn wãwen eo ñõn kabwer ajiri ro ej ñõn likjap in melele kin abañ ko im melejoñ ko air kajojo ran. Kebojak kin kabo ko ilo school ej ijjino ilo mejatoto eo ilo jitõb ilo mweo imõn juõn Christian.​—Deuteronomy 6:6-9; Jabõn Kennan 22:6.

20. Etke kwojarjar elap tokjen ñõn kij otemjej?

²⁰ Ilo kejemloke, etke kwojarjar elap tokjen ñõn kij aolep? Kinke ej jerbal einwõt juõn men in kejbarok kij nae ial ko ituloa in lõl in an Satan im lemnak eo an. Ej juõn jerammõn kiõ im naj ilo ien kane rej itok. Ej jibañ kij jortoklik ñõn kij kin mour eo enaj lukkun mol in mour ilo lõl eo ekãl ewãnik. Ej jibañ kij bwe jen jokkin wõt juõn, ebidodo kebak kij, Christian ro rej konono ñõn don​—jab ro elejen joñan air kijñeñe. Ilo baj ba wõt, ej kõmmõne kij bwe jen einwõt Christian.​—1 Timothy 6:19.

[Kamelele eo itulal]

Kwoj Kememej Ke?

◻ Etke Peter ear lo aikwij eo ñõn kakabilek Christian ro kin kwojarjar?

◻ Etke ejjab bidodo ñõn mour ilo juõn wãwen ekwojarjar?

◻ Ta eo kij otemjej jemaroñ kõmmõne ñõn kõmõnmõnlok kwojarjar ilo family eo?

◻ Bwe congregation eo en bed wõt im kwojarjar, ta mwilin ejjab kwojarjar jej aikwij bõprae?

◻ Ewi wãwen ad maroñ bed wõt im kwojarjar ilo jikin jerbal eo im ilo jikin school eo?

[Pija ilo peij 26, 27]

Einwõt Ri Kennan ro an Jehovah, jej aikwij lõñliñ ilo ad karejar ñõn Anij im ilo jerbal ko jet