Kõttãik Kij Ñan Maroñ Eo An Jehovah

“Bwe eñin yokwe Anij, bwe jen kejbãrok kien ko An: im kien ko An re jab erro.”​—1 JON 5:3.

1, 2. (a) Etke elõñ armij ro rainin rejjab kõnan kõttãik ir ñan ro jet? (b) Emol ke bwe ro rej kajeoñ kajenolok ir rej lukkun anemkwoj? Kamelele.

“ELÕÑ armij ro rainin rejjab kõnan kõttãik ir ñan armij ro jet, ñan air lor men ko rej jiroñ ir kake.” Armij rein me rejjab kõnan kõttãik ir ñan maroñ eo an armij eo juõn rej lemnak “Iban kõtlok bwe jabdewõt armij en jiroñ iõ ta eo in kõmmane.” Bõtab, emol ke bwe armij rein rej anemkwoj im oktak? Jaab ñan jidik! Elõñ iair rej lor mwil ko mwilin armij ro ibelakiir me rej ilo “wãwen dri lõl in.” (Rom. 12:2) Jen air anemkwoj, rein rej “dri kamakoko an kõt,” einwõt Christian Ri jilek Peter ear ba. (2 Pit. 2:​19) Rej etetal im “lor ial in lõl in, lor iroij in kajur ko in mejatoto,” Satan Devil eo.​​—Ep. 2:2.

² Juõn ri jeje book ear ba ilo utiej buru: “Ijjab kõtlok bwe ro jema im jinõ ak juõn priest ak juõn ri tel in kabuñ ak Bible eo ñan beek ta eo emol im emõn ibba.” Emol, jet armij remaroñ kajerbal maroñ eo air ilo jõkkar im ejjab tellokiir ñan ad kautiej ir. Bõtab eñin ke wãwen eo ñan kamadmõd abañ eo im kwalok bwe jejjab aikwiji tel eo an ro jet? Bwebwenato ko relap rej walok ilo newspaper rej letok uak eo ekaburomõjmõj. Ej juõn men ekaburomõjmõj bwe ilo ien eo armij ro rej lukkun aikwij nan in tel ak jibañ, enañin aolep rej makoko in bõke.

Lemnak eo Ad kin Maroñ

3. Ewi wãwen Ri Christian ro ilo ebeben eo kein kajuõn rar jab bokake kien armij ien otemjej?

³ Einwõt Ri Christian ro, bebe eo ad ej oktak jen ro ri lal in. Ejjab melelen bwe jej bokake jabdewõt men armij rej jiroñ kij kake. Jen an eindein, jet ien jejjab aikwij bokake nan in jiroñ ko air meñe ewõr air maroñ. Men in ear bareinwõt walok ñan Ri Christian ro ilo ebeben eo kein kajuõn. Ñan wanjoñok, ilo ien eo ke rar jiroñ ri kalor ro bwe ren jab kwalok nan, rar jab bokake priest eo eutiej im ri eutiej ro me rar mõttan kumi in Sanhedrin. Rar jab jolok mwil ko mwiliir remõn ñan bokake kien armij.​​—Read Jerbal 5:​27-​29.

4. Ta joñok ko ilo Jeje ko ilo kajin Hebrew rej kwalok bwe elõñ ian armij ro an Anij rar kãlet in kõmman bebe eo ejjab buñbuñ?

⁴ Mokta jen ien ko an Jesus, elõñ ro ri karejaran Anij rar emmakit ilo ejja wãwen in wõt. Ñan wanjoñok, Moses ear “abwin bwe ren likit etan nejin kõra eo nejin Pero: Im lemnok bwe an iñtan iben ro dron Anij emõn,” meñe ear bõk “illu an kiñ eo.” (Hib. 11:​24, 25, 27) Joseph ear jumae kõnan eo an lio belen Potiphar ñan an lũñ ibben, meñe ear jelã bwe ewõr an lio maroñ ñan bõktok jorrãn ion. (Jen. 39:​7-9) Daniel “ear jek ilo buruen bwe en jab kejerawiwik e make kin wine im mõñã ko ilo worwor eo an king eo,” meñe ri eutiej eo ilo Babylon ear jab mõnõnõ kake. (Dan. 1:​8-​14) Joñok kein rej kwalok bwe, ilo ran ko etto, ro don Anij rar jutak bin kin men ko remõn, jekdon ta men ko rar walok ibbeir tokelik. Rar jab baj bokake wõt armij kinke rar kõnan kabuñburueir, im jejjab kõnan kõmman eindein bareinwõt.

5. Ewi wãwen lemnak eo ad ej oktak jen lemnak eo an ro ri lal in?

⁵ Bebe eo ad ñan jutak bin ejjab kinke jej baj makoko wõt ñan roñjake; im jejjab einwõt ro rekõnan baj jumae wõt kinke rejjab errã ibben kien. Jen men in, jebojak im mõnõnõ ñan kõttãik kij ñan maroñ eo an Jehovah mokta jen armij. Ñe kien an armij rej idaptõk ibben kien Anij, jokãlet eo ñan kõmman juõn men ejimwe ejjab bin. Einwõt ri jilek ro ilo ebeben eo kein kajuõn, jej bokake Anij elap jen armij.

6. Etke emõn ñan bokake kien ko an Jehovah aolep ien?

⁶ Ta eo emwij an jibañ kij ñan mõnõnõ in kõttãik kij ñan maroñ eo an Anij? Jej errã kin nan ko ilo Jabõn Kennan 3:​5, 6: “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am.” Jej liki bwe jabdewõt men Anij ej kajitõk ibbed ñan ad kõmmane enaj lap tokjeir ñan kij. (Read Duteronomi 10:​12, 13.) Ilo mol, Jehovah ear kwalok e make ñan Ri Israel ro einwõt “Eo eor tokjen An katakin yuk, Eo ej tel yuk ilo ial eo emõn kwon etal ie.” Ear kakobaba: “O elañe kwar eoroñ kien ko Aõ! Inem am ainemõn e naj kar einwõt juõn river, im am wãnik einwõt no ko in lometo.” (Ais. 48:​17, 18) Elap ad liki nan kein. Jej tõmak bwe ej ñan tokjen eo ad ñan bokake kien ko an Anij aolep ien.

7. Ta eo jej aikwij in kõmmane elañe jejjab lukkun melele juõn kien me Nan in Anij ej kwalok kake?

⁷ Jej mõnõnõ in kõttãik kij ñan maroñ eo an Jehovah im bokake meñe jej jab lukkun melele unin Nan eo an ej jiroñ kij kake. Men in ejjab melelen bwe jej tõmak meñe ejelok bedbedin; kinke men in ej kwalok ad tõmak im liki. Ej kwalok ad tõmak jen buruõd ilo Jehovah kinke ejelã ta men ko remõn ibbed. Bokake eo ad ej juõn kein kamol kin yokwe eo ad ñane, kinke ri jilek John ear je: “Bwe eñin yokwe Anij, bwe jen kejbãrok kien ko An.” (1 Jon 5:3) Ak ewõr bar juõn men kin bokake eo ad me jejjab kõnan meloklok.

Kamineneik Maroñ in Lolokjen eo Ad

8. Ewi wãwen “minene” eo ad ñan jelã emõn im nana emaroñ ekkejel ibben ad kõttãik kij ñan maroñ eo an Jehovah?

⁸ Bible eo ej jiroñ kij bwe “minene rej maroñ in jela kajen emõn im nana.” (Hib. 5:​14) Kin men in, jejjab baj kõnan bokake kien Anij einwõt juõn robot; ak, jekõnan “jela kajen emõn im nana” ekkar ñan kien ko an Jehovah. Jekõnan kile meletlet eo an Jehovah, im errã ibben ri jeje psalm: “Kiõm ej ber iloan buruõ.”​​—Sam 40:8.

9. Ewi wãwen jemaroñ kõmman bwe bõklikit eo ad en jerbal ekkar ñan kien ko an Jehovah, im etke elap an aorõk ñan ad kõmmane men in?

⁹ Ñan kile tokjen ko kin kien Anij einwõt ri jeje psalm, jenaj aikwij kalmenlokjen kin men ko jej readi ilo Bible eo. Ñan wanjoñok, ñe jej katak kin juõn menin aikwij jen Jehovah, jemaroñ kajitõkin kij make: ‘Etke kien in ak nan in kaiñi in emeletlet? Etke elap tokjen ibba bwe in bokake? Ta tokjen ko renana emwij an walok ibben ro rar kajekdon nan in kakabilek eo an Anij kin men in?’ Ñe bõklikit ko ad re jerbal ekkar ñan lemnak eo an Jehovah, jenaj bojak im kõmman bebe ko ekkar ñan ankilan. Jemaroñ bõk “jelalokjen [kin] ta eo ankil an Iroij” im lore ikijen ad bokake. (Ep. 5:​17) Jet ien men in ejjab bidodo ñan kõmmane.

Satan ej Bukõt Kilen Kokkure Maroñ eo an Anij

10. Ta juõn ian wãwen ko Satan ear kajeoñ in kokkure maroñ eo an Anij?

¹⁰ Satan etto an kajeoñ in kokkure maroñ eo an Anij. Jitõbõn kajenolok e jen Anij ej alikar ilo elõñ wãwen ko. Ñan wanjoñok, lemnak kin wãwen an armij jab kautiej karõk eo an Anij kin mour in mare. Armij ro jet rej jokwe ibben don meñe rejañin mare, im ro jet rej bukõt kilen air jebel jen eo belele. Armij rein remaroñ errã ibben juõn actress ak kõrã in tieta eo ebuñbuñ ke ear ba: “Bed ibben juõn wõt armij eban walok ibben emaan im kõrã ro jimor.” Ear kakobaba im ba: “Ejelok juõn ijelã kajjen me ear tiljek ñan lio ak leo mõttan ak jabdewõt ro rekõnan tiljek wõt ñan don.” Ke ear lemnak kin kõtan eo an ibben ro jeran me rar lo jorrãn, juõn actor ebuñbuñ ear ba ilo eindein: “Ijjab lukkun tõmak bwe ej biktokin armij ñan bed ibben juõn wot armij toan wõt ad mour.” Emõn ñan kajitõkin kij make, ‘Imõnõnõ ke im kõttãik iõ ñan maroñ eo an Jehovah kin karõk kin mour in mare, ak wãwen an lal in jelet aõ lemnak?’

11, 12. (a) Etke ebin ibben jodikdik ro ñan air kõttãik ir ñan maroñ eo an Jehovah? (b) Kwalok juõn bwebwenato me ej kalikar bwe ejjab juõn menin meletlet ñan rupe kien ko an Jehovah im nan in kaiñi ko an.

¹¹ Kwoj juõn ian jodikdik ro ke ilo dolul eo an Jehovah? Elañe aet, inem Satan elukkun kõnan kareel buruõm im bõk lemnak eo bwe maroñ eo an Jehovah ej jidik wõt tokjen ñan yuk. “Mõm ko an likao” ekoba ijjibed jen ro mõttam remaroñ kareel yuk ñan bõk lemnak eo bwe kien ko an Anij elap air eddo. (2 Tim. 2:​22) Kwon jab kõtlok men in bwe en walok ibbam. Kwon kate yuk ñan jelã bwe kien ko an Anij remeletlet. Ñan wanjoñok, Bible eo ej jiroñ yuk ñan “ko jen lũñ.” (1 Kor. 6:​18) Bar ijin, kwon kajitõk ibbam make: ‘Etke kien in emeletlet? Ilo aõ bokake men in ewi wãwen inaj bõk tokjen?’ Bõlen kwoj jelã kajjen ro rar jab bokake nan in kakabilek eo an Anij im tokelik bõk wõnãn elap kin bwid eo air. Rej lukkun mõnõnõ ke kiõ? Mour eo air kiõ ej emõnlok ke jen ien eo rar mõnõnõ ibben dolul eo an Jehovah? Emol ke bwe rar lo mõnõnõ ko me ri karejar ro an Anij rar likjap jeni?​​—Read Aiseia 65:14.

¹² Lemnak kin ennan ko jet an juõn Christian etan Sharon ke ear ba ilo ien ko jeman: “Kin aõ jab bokake kien Jehovah, iar bõk nañinmij eo ekauwatata etan AIDS. Ekkã aõ reiliklok ñan ien iar lukkun mõnõnõ in karejar ñan Jehovah iumin elõñ yiõ ko.” Lio ear kile bwe ear juõn menin bwebwe ñan an rupe kien ko an Jehovah me ear aikwij in kautieji. Jehovah ear letok kien ko ñan kejbãrok kij. Sharon ear mij 7 week ko elikin an ba ennan kein itu-lõñ. Bwebwenato eo an ej kwalok bwe, ejelok jabdewõt men emõn Satan emaroñ lelok ñan ro rekin jeraik jukjuk im bed in enana. Einwõt “jemen riõp,” ej kallimur kin elõñ men ko, ak aolepeir rejjab mol, einwõt kallimur eo ear ba ñan Eve. (Jon 8:​44) Emol, emõn ñan kõttãik kij maroñ eo an Jehovah aolep ien.

Kejbãrok Jen juõn Jitõb in Anemkwoj

13. Ta juõn ian wãwen ko jej aikwij kejbãrok kij jen ad kwalok juõn jitõbõn anemkwoj?

¹³ Elañe jenaj kõttãik kij ñan maroñ eo an Jehovah, jej aikwij kejbãrok kij jen ad bõk juõn jitõbõn anemkwoj. Jitõbõn utiej buru emaroñ kamakit kij ñan lemnak bwe jejjab aikwij lor nan in tel ko an jabdewõt armij. Ñan wanjoñok, bõlen jenaj jumae ro rej tel ro don Anij im nan in kakabilek ko air. Emwij an Anij karõk bwe jen bõk ekan ko lor jitõb jen ri karejar eo etiljek im meletlet. (Mat. 24:​45-​47) Ilo etta buru jenaj aikwij kile bwe eñin wãwen eo Jehovah ej kejbãrok armij ro an rainin. Jen lor joñok eo an ri jilek ro retiljek. Ilo ien eo ke jet ri kalor ro rar lõkatip, Jesus ear kajitõk ibben ri jilek ro: “Kom bareinwõt kõnan ilok ke?” Peter ear uak: “Iroij, kim naj ilok ñõn wõn? Ibõm nan ko nan in mour in drio.”​​—Jon 6:​66-​68.

14, 15. Etke jej aikwij kõttãik kij ñan nan in kakabilek ko ilo Bible eo?

¹⁴ Ad mõnõnõ in kõttãik kij ñan maroñ eo an Jehovah ej kitibuj ad jerbale nan in kakabilek eo jen Nan eo an. Ñan wanjoñok, ri karejar etiljek im meletlet ej rejañ kij ñan “emmij im ekkõl.” (1 Thes. 5:6) Nan in kakabilek in elap an jejjet ilo ran kein eliktata me elõñ rej “anij lo burueir, im re naj dri arõk mweiuk.” (2 Tim. 3:​1, 2) Mwil rot kein remaroñ ke jelet kij? Aet. Mejenkajjik ko an lal in remaroñ kamade kij jen ad jibadõk men ko lor jitõb, ak arõk mweiuk. (Luk 12:​16-​21) Kin men in, emenin meletlet ñan bõk nan in kakabilek jen Bible eo im jer jen mour eo ekibbon me ro ilo lõl in an Satan rej kwaloke!​​—1 Jon 2:​16.

¹⁵ Elder ro rej lelok ekan ko lor jitõb me rej bõk jen ri karejar retiljek im meletlet ñan congregation ko ilo bukwon eo air. Bible eo ej rejañ kij: “Komin bokake im kõtãik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakajuror kom.” (Hib. 13:​17) Melelen men in ke bwe elder ro ilo congregation eo reban likjap? Jaab! Anij ej lo likjap ko air elaplok jen jabdewõt armij. Meñe eindein, ej kõtmene bwe jen kõttãik kij ñan ir. Ad jerbal ilo burukuk ibben elder ro, meñe rejjab wãppen, ej kwalok bwe jej mõnõnõ in kõttãik kij ñan maroñ eo an Jehovah.

Aorõkin Kwalok Ettã Buru

16. Ewi wãwen jemaroñ kwalok ad kautiej Jesus einwõt Bõran congregation eo an Christian?

¹⁶ Aolep ien jej aikwij kememej bwe Jesus ej Bõr eo emol bõran congregation eo. (Kol. 1:​18) Eñin unin jej aikwij kõttãik kij im bokake tel eo an elder ro, im “kanuij kautiej ir.” (1 Thes. 5:​12, 13) Emol, bwe elder ro ilo congregation remaroñ kwalok air ettã buru ikijen air katakin congregation eo kin Nan eo an Anij, im jab kin air make lemnak. Rej “jab elã jen men ko emwij jeje” bwe en jab kowõnmanlok air lemnak kake.​​—1 Kor. 4:6.

17. Etke juõn kõnan ñan iroij ion ro jet ekauwatata?

¹⁷ Aolep ro ilo congregation eo renaj aikwij ekkõl kin air jab bukõt nebar ñan ir make. (Jabõn. 25:​27) Ej alikar, bwe eñin kar juõn men in aujid ñan juõn ri kalor eo me ri jilek John ear jelmae. Ear je: “Diotrepis, eo ej kõnan bwe en iroij ioir, e jab bõk kim. Kin men in, elañe ij iwij, I naj kememej jerbal ko ej kõmõnmõni, ke ej konono nae kim nan ko renana.” (3 Jon 9, 10) Jemaroñ bõk tokjen jen bwebwenato in rainin. Ewõr ibbed juõn un emõn ñan jolok jabdewõt kain lemnak ak eñjake ñan iroij ion ro jet. Bible eo ej jiroñ kij: “Ablip ej ilok iman kokkure, im utiej buru iman buñ.” Ro rej mõnõnõ in bõk maroñ eo an Anij rej aikwij kate wõt ir ñan bõprae aujid eo kin jua, kinke elañe rejjab enaj tellok ñan air jook kake.​​—Ken. 11:2; 16:18.

18. Ta eo enaj jibañ kij ñan kõttãik kij ñan maroñ eo an Jehovah?

¹⁸ Aet, kwon kate wõt ñan jumae jitõbõn anemkwoj an lal in im kõttãik yuk ñan maroñ eo an Jehovah. Kwon kortokjen ien ñan kalmenlokjen kake ilo kamolol kin jerammõn eo am ñan karejar ñan Jehovah. Am bed ibben ro don Anij ej kein kamol bwe emwij an bõk kwe ikijen jitõb kwojarjar eo an. (Jon 6:​44) Kwon jab kajettokjen kõtan eo am ibben Anij. Kwon kate wõt kwe ñan kwalok ilo aolep makitkit ilo mour eo am bwe kwoj karmijete jitõbõn anemkwoj im bwe kwoj mõnõnõ in kõttãik yuk ñan maroñ eo an Jehovah.

Kwoj Kememej Ke?

• Ta eo ej kitibuj ad kõttãik kij ñan maroñ eo an Jehovah?

• Ewi wãwen kamineneik lolokjen ko ad ej ekkejel ibben ad kõttãik kij ñan maroñ eo an Jehovah?

• Ilo wãwen et ko Satan ej kajeoñ in kokkure maroñ eo an Anij?

• Etke eaorõk bwe jen kõttãik kij ñan maroñ eo an Jehovah?

[Pija eo ilo peij 18]

“Kimij aikwij in bokake Anij, im jab armij”

[Pija eo ilo peij 20]

Ej juõn menin meletlet ñan lor kien ko an Anij aolep ien