Kwon Debij “Am Yokwe Mokta”
“Kwon drebij men eo ibõm.”—REV. 3:11.
1, 2. Ewi wãwen am kar eñjake ke kwar liki bwe men eo kwar katak kake kin Jehovah ear mol eo?
KWOJ ke kememej ien eo kwar mokta katak kin kejatdikdik eo ekanuij emõn me Jehovah ej lelok ñan armij ro rekiblie? Elañe kwar uan juõn kabuñ mokta, ewi wãwen am kar eñjake ke bar juõn ear kameleleik yuk ekkar ñan Jeje ko ilo Bible eo kin karõk eo an Anij ak ke ear kamelele kin katak ko ilo juõn wãwen kwar maroñ melele kaki? Bõlen kwar kile bwe kabuñ eo am ear jab katakin yuk mol eo kin Anij. Ak kiõ ekanuij lap am mõnõnõ kin am jelã mol eo! Elañe Ri Christian ro jemõm im jinõm rar kakajiririk yuk, kwoj ke kememej ewi wãwen am kar eñjake ke kwar liki bwe men eo kwar katak kin Jehovah kar mol eo im kwar bebe in mour ekkar ñan men in?—Rom. 12:2.
2 Elõñ ian ro jeõm im jatõm ilo jitõb renaj ba bwe ear kanuij lap air mõnõnõ, rar ebaklok ñan Jehovah, im rar kamolol bwe ear ibertok ir. (Jon 6:44) Mõnõnõ eo air ear kamakit ir ñan bõk kunair ilo makitkit ko an Ri Christian. Kin air obrak kin lañliñ rar kõnan jaketo-jaketak men eo rar eñjake ibben aolep. Kar ejja wãwen dein ke am iione?
3. Ta wãwen eo ear bed ilo congregation an Ri Ephesus ro ke Jesus ear jilkinlok juõn ennan ñan ir?
3 Ke ear konono ñan Ri Christian ro ilo ebeben eo kein kajuõn ilo Ephesus, Jesus ear kennan kin “am yokwe mokta.” Ear lõñ kadkad ko remõn kadkadin Ri Ephesus ro, bõtab ear diklok air kwalok yokwe jen kar mokta. Inem, Jesus ear jiroñ ir: “I jela kõmõn ko am, im am jerbal im kijenmij, im bwe kwo jab maroñ in kaberber yuk kin ro renana, im kw’ar melejoñ ro rej mõke naetair dri jilik, ak e jab irro, im kw’ar lo ir dri riõp; Im kwoj kijenmij im kw’ar kaberber yuk ilo eta, im kw’ar jab mõk. A men in iba ej notam, bwe kw’ar illok jen am yokwe mokta.”—Rev. 2:2-4.
4. Etke eaorõk rainin ennan eo an Jesus ñan Ri Ephesus ro?
4 Nan in kakabilek eo Jesus ear kwaloke ilo book in Reveles̃õn ñan Ri Ephesus ro im congregation ko jet ear jejjet ekkar ñan wãwen eo ear walok iumin jidik wõt ien ibwiljin Christian ri kabit ro jen 1914 im liktak. (Rev. 1:10) Bõtab, kiõ bareinwõt, emaroñ bwe jet Ri Christian ro remaroñ luji “[air] yokwe mokta” kin Jehovah im mol eo. Ilo ad lemnak kin men in, jen etale kin ewi wãwen kwomaroñ kejbãrok, kakajurlok, im kalaplok yokwe im kijejeto eo kwar eñjake mokta kin Anij im mol eo ikijen am kememej im kalmenlokjen kake men ko kar walok ibbam.
Ta eo Ear Kareel Yuk bwe Emol Men eo Kwar Katak Kake?
5, 6. (a) Kajjojo Ri Christian ej aikwij kõmman bwe en liki ta? (b) Ta eo ear kõmman am liki bwe Ri Kennan ro an Jehovah rej katakin mol eo? (c) Ta eo emaroñ jibañ juõn armij ñan kõkãl ak kakajur yokwe eo an kar mokta?
5 Aolep ro rej wujleplok mour eo air ñan Jehovah rej aikwij in “melejoñ” ta eo “ankil an Anij emõn im kabuñburuen im wãppen.” (Rom. 12:1, 2) Juõn ian men ko rej koba ilo ad kõmmane men in, ej ad katak mol eo ilo Bible. Men ko rej kõmman an juõn armij liki bwe Ri Kennan ro an Jehovah rej katakin mol eo emaroñ oktak jen men ko rej kõmman an bar juõn liki. Jet rej kememej bwe oktak in lemnak eo air ear walok ke rar read ãt eo ekwojarjar ilo Bible ak ke rar melele kin ta mol eo kin wãwen ro remij. (Sam 83:18; Ekk. 9:5, 10) Men eo ear jelet ro jet kar yokwe eo ibwiljin armij ro an Jehovah. (Jon 13:34, 35) Im ro jet rar lemnak kin ta melelen jab mõttan lal. Rar bõk jemlok eo bwe Ri Christian ro remol rejjab maroñ bõk kunair ilo aitwerõk ko an kien ak tarinae ko an jabdewõt ailiñ ko.—Ais. 2:4; Jon 6:15; 17:14-16.
6 Ñan elõñ, kamelele kein im bar ko jet kar men ko rar kaddek yokwe eo air mokta kin Anij. Bõk ien ñan kememej kin men eo ear kõmman am liki mol eo. Eoktak kadkad ko im wãwen ko ilo mour an kajjojo armij, inem unin am yokwe Jehovah im tõmak ilo kallimur ko an enaj oktak jen ro jet. Emaroñ bwe ejja un kein wõt remol ñan yuk rainin einwõt kar mokta ke kwar jino katak kaki. Mol eo ear jab oktak. Kin men in, am eliji lemnak im eñjake kein remaroñ ilo juõn wãwen, kõkãl im kakajur yokwe eo am kar mokta kin mol eo.—Read Sam 119:151, 152; 143:5.
Kakajur “Am Yokwe Mokta”
7. Etke jej aikwij in kalaplok yokwe eo ad kar mokta kin mol eo, im ewi wãwen jemaroñ kõmmane men in?
7 Bõlen elap oktak ko rar walok ilo mour eo am jen ien eo kwar wujleplok mour eo am ñan Jehovah. Yokwe eo am mokta kin mol eo ear aorõk, ak ke ear motlok elõñ ien ko, kwar aikwiji juõn yokwe emũlallok ñan jelmae melejoñ ko rekãl me ej melejoñe tõmak eo am. Bõtab, Jehovah ear jibañ yuk. (1 Kor. 10:13) Kin men in, men ko kwar iioni iumin elõñ yiõ ko raorõk bareinwõt ñan yuk. Rar jibañ yuk ñan kalaplok yokwe eo am kar mokta, im rej bar wãwen ko kwomaroñ melejoñe ta eo ankilan Anij emõn im kabuñburuen im wãppen.—Josh. 23:14; Sam 34:8.
8. Ewi wãwen Jehovah ear kwalok kin e make ñan Moses, im ewi wãwen ear laplok an Ri Israel ro jelã kajjen Anij?
8 Ñan wanjoñok, jen etale wãwen ko an Ri Israel ro ke Jehovah ear konono kin karõk eo an ñan kanemkwoj ir jen air kamakoko ilo Egypt. Anij ear kwalok kin e make ñan Moses ke ej ba: “Inaj kamol men eo inaj kamol.” (Ex. 3:7, 8, 13, 14 NW) Melelen men in, Jehovah ear ba bwe enaj kõmman bwe en erom jabdewõt men enaj aikwiji ñan kanemkwoj armij ro an. Ilo men ko rar walok tokelik im elañe ear menin aikwij, Ri Israel ro rar lo an Jehovah kwalok elõñ kadkad ko kadkadin—einwõt eo Ekajur Bõtata, einwõt juõn Ri Ekajet, juõn Ri Tel, juõn Ri Lomor, juõn Ri Tarinae, im juõn Eo ej Kabwe aikwij ko.—Ex. 12:12; 13:21; 14:24-31; 16:4; Nih. 9:9-15.
9, 10. Kain wãwen et eo emaroñ jibañ juõn ñan an jelã kajjen Anij, im etke ej juõn men emõn ñan kememej men kein rekar walok?
9 Wãwen bed eo am eoktak jen Ri Israel ro etto. Meñe eindein, ewõr men ko kar walok ibbam me rar kõmman am liki bwe Anij ej itoklimo kake yuk im men in ear kakajur tõmak eo am. Bõlen, Jehovah ear jerbal ilo juõn wãwen einwõt Eo ej Kabwe aikwij ko, juõn Ri Kainemõn, ak juõn Ri Katakin. (Read Aiseia 30:20, 21.) Ak bõlen kwar kile an kar uake ilo alikar jar eo am. Emaroñ bwe kwar jelmae juõn melejoñ, im juõn Ri Christian mõttam ear lewõj jibañ. Ak emaroñ bwe ikijen am katak ibbam make kwar kile eon ko rekkar me rej jerbal ñan wãwen eo kwoj iione.
10 Elañe kwar kwalok men kein kwar iioni ñan ro jet, emaroñ bwe ro jet rejamin naj kanuij bwilõñ. Ilo mol, men ko kar walok ibbam rar jab menin bwilõñ. Bõtab elap an aorõk men kein ibbam. Aet, Jehovah ear erom men eo kwar aikwiji. Lemnak kin yiõ ko kwoj bed ilo mol eo. Kwomaroñ ke kememej elõñlok jen juõn ien ke kwar eñjake bwe Jehovah ear kejbãrok mour eo am? Elañe aet, ñe kwoj kememej ien kein im wãwen kar eñjake eo am, men in emaroñ kamakit ilo buruõm ejja yokwe eo wõt kwar eñjake mokta kin Jehovah. Kaorõk ien kein. Kalmenlokjen kake men kein. Rej menin kamol bwe Jehovah ej itoklimo kin kwe, im ejelok jabdewõt emaroñ kabõjrak am tõmak kin men in.
Kwon Etale Kwe Make
11, 12. Elañe yokwe eo an juõn Ri Christian kin mol eo ear diklok, emaroñ kin ta un eo, im ta nan in kakabilek eo Jesus ear letok?
11 Elañe ejjab joñan wõt juõn yokwe eo am kin Anij im mol eo einwõt kar mokta, men in ejjab kin an kar oktak. Jehovah ejamin oktak. (Mal. 3:6; Jem. 1:17) Ear itoklimo kin yuk mokta, im ebar itoklimo kin yuk rainin. Inem, elañe ewõr juõn men ear oktak ilo kõtan eo am ibben Jehovah, emaroñ ta men in? Emaroñ ke bwe kwoj eñjake bwe elaplok an juõn men jibed yuk, im elaplok am inebata kin mour? Bõlen ilo ien ko remotlok elaplok am kar niknik in jar, ear tiljek am katak ibbam make, im emakijkij am kar bõk ien ñan kalmenlokjen. Ear laplok ke am kijejeto ilo jerbal in kwalok nan im ekkeini am bed ilo kwelok ko an congregation mokta jen kiõ?—2 Kor. 13:5.
12 Kwomaroñ jab kile jabdewõt kadkad kein ibbam make, ak elañe kwoj kile, ta eo ear kõmman bwe kwon oktak ilo wãwen kein? Ear maroñ ke bwe inebata ko ilo mour, einwõt kabwe aikwij ko kin family, kejbãrok ejmour eo am, ak men ko eierlok wõt, rar kõmman am luji eñjake in ekaiuriur eo am ikijen ran eo an Jehovah bwe ej ebaktok? Jesus ear jiroñ ri jilek ro an: “A komin kejbãrok kom ñe ab obrõk buruemi kin dõr, im karek, im inebata ko an lõl in, im emõkõj an ran eo itok iomi einwõt jen: Bwe ein drein e naj itok ion ro otemjej rej jokwe ion mejen aolepen lõl. A komin ekil im jar ien otemjej, bwe komin maroñ in ko jen men otemjej men ko re naj walok.”—Luk 21:34-36.
13. James ear keidi Nan eo an Anij ñan ta?
13 James, ri jeje Bible eo ekakõrmol, ear rejañ ri tõmak ro mõttan ñan etale ir make ilo mol ekkar ñan Nan eo an Anij. James ear jeje: “A komin dri kõmõnmõn nan eo, im jab dri roñjake wõt ro rej mõke mon ir. Bwe elañe jabrewõt armij ej dri roñjake nan, im jab dri kõmõne, ej einwõt armij eo ej lo mejen ilo kapjur: Bwe ej mõke lale e, im ej ilok im emõkõj an meloklok ie ein. A eo ej ber im liñõre kien in anemkwoj eo e wãppen, im jab dri roñjake eo ej meloklok, a e dri kõmõn ej jerbale, armij eo e naj mõnõnõ ilo an kõmõn.”—Jem. 1:22-25.
14, 15. (a) Ewi wãwen Bible eo emaroñ jibañ yuk ñan kakõmõnmõnlok kõtan eo am ibben Jehovah? (b) Ta kajitõk ko kwomaroñ kalmenlokjen kaki?
14 Juõn armij emaroñ kajerbal juõn kapjur ñan lale ñe ekarbõb. Ñan wanjoñok, elañe juõn emaan ej lo bwe necktie eo an ejjab jimwe, emaroñ kajimweiki. Elañe juõn kõrã ej lo bwe ebwok kool in bõran, emaroñ kõmmane. Ilo ejja wãwen in lok wõt, Jeje ko ilo Bible eo rej jibañ kij ñan etale kain armij rot kij. Ñe jej keidi kij make ibben men ko Bible ej ba kin kain armij rot jej aikwij erom, inem jej kajerbal men in einwõt juõn kapjur. Ak ta tokjen eo elañe jaar kalimjek juõn kapjur im jab kõmman jabdewõt men ñan kajimwe juõn likjap jaar loe? Jej meletlet elañe jej emmakit ekkar ñan men eo jej loe ilo ‘kien eo e wãppen’ an Anij, im erom “dri kõmõn” men in. Kin men in, jabdewõt eo ear kile bwe yokwe eo air mokta kin Jehovah im mol eo ear diklok enaj emõn ñan kalmenlokjen kake kajitõk kein: ‘Ta ijjibed ko ij jelmae kake ilo mour, im ewi wãwen ij emmakit ñan men kein? Ewi wãwen iar emmakit ilo ien ko remotlok? Ewõr ke juõn men ear oktak?’ Elañe jej lo likjap ko ñe jej etale kij make, jab kajekdoni. Elañe jej aikwij kõmman kajimwe ko, jab aibedbed in kõmmani ilo mõkaj.—Hib. 12:12, 13.
15 Bareinwõt kalmenlokjen rot in emaroñ jibañ yuk ñan likit mejenkajjik ko rekõmmanwa bwe kwon wõnmanlok wõt ilo jitõb. Ri jilek Paul ear lelok nan in kakabilek in ekakõrmol ñan Timothy ri jerbal eo mõttan bwe en kakõmõnmõnlok jerbal in kwalok nan eo an. Paul ear rejañ likao in: “Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej.” Enaj wõr tokjen elañe jej bareinwõt kalmenlokjen, ekkar ñan Nan eo an Anij, kin kain wõnmanlok eo jemaroñ kõmmane.—1 Tim. 4:15.
16. Ta kauwatata eo kwoj aikwij in lemnak kake ñe kwoj etale yuk make ekkar ñan Jeje ko ilo Bible eo?
16 Elañe emol am etale kwe make, ekkã am naj lo men ko kwoj mõjno kaki. Emaroñ kabwer yuk, ak jab kõtlok bwe men in en walok ñan yuk. Kinke mejenkajjik eo kin ad make etale kij ej ñan lale tu ia eo jemaroñ kakõmõnmõnloke. Emol, Satan ekõnan bwe likjap ko an juõn Ri Christian en kõmman an eñjake bwe ejelok tokjen an mour. Ilo mol, emwij an ba bwe Anij ej dike aolep jibadbad ko ñan ad karejar ñan e. (Job 15:15, 16; 22:3) Men in ej juõn riap Jesus ear jumaiki; Anij ej watõk kij kajjojo bwe jej aorõk. (Read Matu 10:29-31.) Ñe kwoj kile likjap ko am, men in en kar kõmman bwe ilo ettã buru kwon beek ñan kakõmõnmõnlok yuk make, ikijen jibañ eo an Jehovah. (2 Kor. 12:7-10) Elañe nañinmij ak bwijwõlã rej kõmman bwe en wõr joñan men ko kwomaroñ kõmmani, inem likit mejenkajjik ko rekkar, ak kwon jab ebwer ak kõtlok bwe yokwe eo am en diklok.
Elap Unin bwe Jen Kamolol
17, 18. Kain tokjen et ko kwoj bõki jen am kakajurlok yokwe eo am kar mokta?
17 Kwonaj bõk elap tokjen jen am wõnmanlok im kakajur yokwe eo am jen kar mokta. Kwomaroñ kamũlallok jelãlokjen eo am kin Anij im kamolol eo am kin tel eo an ilo yokwe. (Read Jabõn Kennan Ko 2:1-9; 3:5, 6.) “Ro rej bokake [nan in ekajet ko an Jehovah] elap wõnair,” ri jeje Sam ej ba. “Nan in katak an Jeova e bin im ej kameletlet ro re jaje.” Bareinwõt, “emõnõnõ ro re wãppen ilo ial eo; ro rej etal ilo kien Jeova.”—Sam 19:7, 11; 119:1.
18 Ejelok bere kwonaj errã bwe elap men ko remõn kwomaroñ kamolol kaki. Kwo melele kin un ko ilikin men ko rej walok ilo lal in. Kwoj bõk tokjen jen kejbãrok eo ilo jitõb im menin lelok ko me Anij ej lelok ñan armij ro an rainin. Ejelok bere bwe elap am bareinwõt kamolol, bwe Jehovah ear ibertok yuk ñan congregation eo an ibelakin lal im ear lewõj jerammõn eo kin am juõn ian Ri Kennan ro an. Kwon kamolol kin men ko remõn ilo mour eo am! Elañe kwoj kõmman juõn lajrak kin men kein, enaj lukkun aetok. Ñe ekkeini am kõmman men in enaj jibañ yuk ñan jerbale nan in kakkõl in: “Kwon drebij men eo ibõm.”—Rev. 3:11.
19. Ijellokin am kalmenlokjen kake kõtan eo am ibben Anij, ta men eo eaorõk ñan kejbãrok ejmour eo am ilo jitõb?
19 Ilo am kalmenlokjen kin wãwen tõmak eo am ear eddeklok iumin elõñ yiõ ko, men in ej juõn men kwomaroñ kõmmane ñan jibañ yuk debiji men ko ewõr ibbam. Ekkã an magazine in kwalok kin men ko jet raorõk me remaroñ jibañ kij kejbãrok juõn kõtan emõn ibben Anij. Ibwiljin men kein ej jar, bed im bõk kunad ilo kwelok ko an Ri Christian, im kijejeto in bõk kunad ilo jerbal in kwalok nan. Men kein remaroñ jibañ yuk ñan wõnmanlok im kõkãl, kalaplok im kakajur yokwe eo am kar mokta.—Ep. 5:10; 1 Pit. 3:15; Jud 20, 21.
Ewi Wãwen Kwonaj Uak?
• Ewi wãwen un ko unin am yokwe Jehovah ej menin rejañ ñan yuk kiõ?
• Ñe kwoj kalmenlokjen kin men ko kwar iioni iumin elõñ yiõ ko, ta eo men in emaroñ kamol ñan yuk?
• Etke kwoj aikwij in etale yokwe eo am kin Anij?
[Pija eo ilo peij 23]
Ta eo kin mol eo ear kareel yuk im kõmman am liki men in?
[Pija eo ilo peij 25]
Kwoj ke lo men ko kin kwe make me kwoj aikwij kajimweiki?